QUIMELÜN ÑI PAPILTUNGEAL 40
ÜLCATUN 30 Ñi Ngünechen, ñi cüme Chau ca tañi Hueni
Jehová “mongeltuquebi pu cutrantupiuquelelu”
“Mongeltuquebi pu cutrantupiuquelelu ca traricünoquebi tañi pu allben” (SAL. 147:3).
¿CHEM QUIMAIÑ?
Jehová müna duamtuquebi pu cutrantupiuquelelu. Tübachi papiltun pengelqui chumqui quidu taiñ cüme duamcüleal ca chumngechi quelluqueiñmu taiñ yabültucubel caque che.
1. Jehová, ¿chum duamcülequi iñchiñ mu?
JEHOVÁ com quimniei chem dungu mu ñi rupamequen tañi pu che. Jehová cüme quimnieiñmu, ayüucüleliyiñ ca hueñancüleliyiñ (Sal. 37:18). Tunte hueñancüleliyiñ rume huelu serfiniefiliyiñ Jehová, quisu rume ayüucülequei iñchiñ mu ca eluucülei taiñ quelluaeteu ca taiñ yafültucuaeteu.
2. Jehová, ¿chumquebi pu cutrantupiuquelelu? ¿Chumabüiñ taiñ quelluatu?
2 Salmo 147:3 pengeli Jehová impolcacünuquefi tañi allfeñ pu cutrantupiuquelelu. Feitachi texto cüme pengeli Jehová piuqueyen mu cuidaquefi pu hueñancülelu ñi piuque. Huelu taiñ cuidayaeteu mu ta Jehová, ¿chumafuiñ iñchiñ? Raquiduamnge tüfa: quiñe che allfülele, amuai doctor mu. Huelu mülefui tañi inayal com tañi feipieteu tati doctor, femngechi tañi tremotual tañi allfeñ. Iñchiñ cutrantupiuqueleliyiñ, ca mülei taiñ femal. Inayaiñ com taiñ feipieteu ta Jehová, femngechi taiñ cutrantupiuquelehuenoal. Tüfachi troquiñ mu, peaiñ quiñeque ngülam tañi elufiel Jehová tati pu cutrantupiuquelelu ca chumngechi inayafuingün.
MÜNA BALIN-NGIIÑ JEHOVÁ MU
3. ¿Chemu balinolu troquiuqui quiñeque che?
3 Famülque mu, ngehuelai ta piuqueyen, feimu fentren che piuqueyengenolu troquiuqueingün ca falintuuquelaingün. Quiñe lamngen Helen a pingelu feipi: “Tañi familia mu mülelafui piuqueyen. Tañi chau lladcüfemquefui, falilaimi piquefeneu”. Eimi rupafuimi chi chumngechi tañi rupan ta Helen, cuifi huesa troquingequefuimi chi, huesa pingequefuimi cam falilaimi pingequefuimi. Feimu, ¿iñche piuqueyepeafeneu mai quiñe che? piafuimi chi.
4. ¿Chem eipicünoqueiñmu Jehová, Salmo 34:18 mu?
4 Cuifi mu huesa troquingequefuimi rume, loncontucuaimi Jehová tami piuqueyenieteu ca tami falintuqueteu. Biblia feipi Jehová “fülmaniequefi com pu hueñancülelu ñi piuque” (papeltunge Salmo 34:18). Eimi falintuunolmi, loncontucuaimi tüfa: Jehová peñmaeimu cümeque dungu tami piuque mu, ca fültucupaimu quisu ñi rüpü mu (Juan 6:44). Quisu rume piuqueyeimu ca eluucülequei tami quelluaeteu.
5. Jesús ñi chumquebel pu illamcangequelu, ¿chem quimeleleiñmu?
5 Peaiñ ñi chumün ta Jesús. Mülepalu mapu mu ta Jesús, ngüneduami fentren che tañi falintuuquenon, feimu cutranpiuqueyefi engün (Mat. 9:9-12). Feichi mu, mülefui quiñe domo huesa cutran nielu, ayüfui ñi tremotual. Feimu idañmafi Jesús ñi huechun tacun. Fei Jesús yafültucueyu ca saquieyu tañi feyentun mu (Mar. 5:25-34). Jesús rume cüme inayentuquefui tañi Chau (Juan 14:9). Feimu eimi maneluucüleaimi Jehová tami falintuqueteu ca inaduamquei tami cüme piuquengen, tami feyentulen ca tami piuqueyefiel.
6. Balinolu troquiuliiñ, ¿chumabüiñ?
6 Raquiduamcülelmi tami falinon, ¿chumafuimi? Papeltuaimi Biblia cheu tañi feipin tami falintuqueteu ta Jehová, ca raquiduamaimi tami papeltuel mu (Sal. 94:19). b Trürümuulayaimi caquelu mu, ca raquiduamlayaimi tami pepi femnoel mu. Jehová turpu feipilayaimu tami femal pepilfalnochi dungu (Sal. 103:13, 14). Cuifi mu, chem huesaque dungu rume femngefulmi, culpaulayaimi tami femngen mu. Loncontucuaimi: Jehová, ¿inei am juzgayafi? Tati femquelu huesaque dungu, huelu quelluafi pu huesalcangelu (1 Ped. 3:12). Taiñ lamngen Sandra rume huesalcangei petu pichicalu. Fei feipi: “Rume llellipuquefiñ ta Jehová. Feipiquefiñ chumngechi tañi pequeteu fei, ca femngechi iñche tañi pehual”.
7. Com tami upan mongen mu, ¿chumngechi quelluaimu tami cüdahuelabel Jehová?
7 Jehová ta adnieafeimu ta eimi tami quelluafiel ta caquelu. Jehová eluñmaeimu tami quelluconal quiñe falin cüdau mu: ti amuldungun (1 Cor. 3:9). Tami huesa rupan mu cuifi, doi cüme entendeafuimi caquelu pu che sufrilelu, fei doi cüme quelluafuimi engün. Taiñ lamngen Helen, taiñ nütramcapeel parrafo 3 mu, quellungei, fei fachantü doi cüme quelluchequei. Fei feipi: “Rumel falintuuquelafun, huelu Jehová tañi duam mu doi piuqueyengelu troquiuquetun, ca adniequeneu tañi quelluafiel ta caquelu”. Fachantü, Helen precursora regularngerpui. ¡Müna ayüucületui!
LONCONTUCUAIMI JEHOVÁ ULPACÜNOIMU TAMI YABCAN
8. ¿Chem eipicünoqueiñmu Jehová, Isaías 1:18 mu?
8 Quiñeque taiñ pu peñi, pu lamngen cuifi mu culpaingün petu ñi fautizaunon cam rupan fautizahun mu chi. Fei famülque mu, petu huesa duamcülequeingün. Huelu loncontucuaiñ Jehová taiñ rume piuqueyeteu ca tañi hulün ñi Fotüm perdonañmangeal taiñ culpan. Fei Jehová ayüquei taiñ raquiduamtucuafiel tüfachi dungu. Jehová feipieiñmu: “Cüpamün mai, ca cümelcautuaiñ” pi. c Femliyiñ, fei Jehová com perdonañmayaiñmu taiñ culpan (papeltunge Isaías 1:18). Taiñ piuqueyen Chau Jehová acordahuequelai taiñ cuifique culpan. Huelu rumel acordanieafi cümeque dungu taiñ femquen, ¿mañumcülenoafulu am ta iñchiñ? (Sal. 103:9, 12; Heb. 6:10).
9. ¿Chemu bill raquiduamhuelaaiñ taiñ cuibique upan?
9 Petu huesa duamcülelmi tami huesa femün mu cuifi, ¿chumafuimi? Raquiduamaimi tami femmequen ta fachantü ca tami chumal cüpalechi antü mu. Raquiduamaimi ti apostol Pablo mu. Quisu inacaquefui pu cristiano tañi huesa femafiel, huelu repentiutui. Quimniefui Jehová tañi perdonaeteu (1 Tim. 1:12-15). Feimu raquiduamcülelafui tañi huesa femün ta cuifi mu, ca raquiduamcülelafui com ñi femün tañi fariseongerpual (Filip. 3:4-8, 13-15). Pablo raquiduamcülefui müten tañi amuldungual ca chem ñi rupayal cüpalechi antü mu. Tami huesa femün ta cuifi, chumlayafuimi rume, deu rupai tati. Huelu femcünuulayaimi, famülque mu mai püramyeafuimi Jehová ca ayühuelafuimi. Ca raquiduamaimi tami llohual cümeque dungu cüpalechi antü mu.
10. Taiñ cuibi bemün mu huedalcabiliiñ caque che, ¿chumabüiñ?
10 Huesa femülmi cuifi mu, fei huesa duamelfilmi caquelu, ¿chumafuimi? Com piuque mu feipiafimi tami perdonayaeteu, ca pengelelafimi tami repentiucülen (2 Cor. 7:11). Llellipuafimi Jehová ñi quelluafiel com pu huesa duamcülelu tami femün mu. Jehová quelluafeimu eimi ca quelluafui caquelu pu che tami huesa duamelfiel ñi amuleal engün ca ñi tüngcületual.
11. Jonás tañi bemün, ¿chem quimeleleiñmu? (Pebinge tati adentun).
11 Tami huesa femün cuifi mu quimtucuaimi tami femhuenoal, cafei eluhuaimi tami femal chem dungu rume tami feipiafeteu Jehová. Peaiñ ñi chumün ta Jonás. Jehová feipieyu tañi amual ta Nínive, huelu quisu feyentulai, cañpüle amui. Fei Jehová norümtueyu. Fei ti profeta cüme quimürpui tañi feipingen (Jon. 1:1-4, 15-17; 2:7-10). Jehová fentecünulai tañi maneluhun Jonás mu. Ca rupa ca feipingei tañi amual ta Nínive mu, fei Jonás pürüm feyentui. Huesa duamfulu rume ta Jonás, huelu fentecünulai tañi feyentuafiel ta Jehová (Jon. 3:1-3).
Jehová adcünulu Jonás ñi tripayal ti fütra challhua meu, ca huiño feipifi ñi amual Nínive tañi huldungumeal. (Inaduamnge parrafo 11).
JEHOVÁ TAÑI NEHUEN MU YABÜLTUCUQUEIÑMU
12. Upaliiñ hueyaque dungu, ¿chumngechi tüngduameleiñmu Jehová? (Filipenses 4:6, 7).
12 Rupaliyiñ huesaque dungu mu, Jehová quelluqueiñmu quisu tañi nehuen mu. Peaiñ tañi rupan quiñe curehuen Ron engu Carol. Tañi püñeñ langümuhui. Fei engu feipingu: “Rupaquefuyu huesaque dungu mu, huelu tüfa trürümfal-lafui, doi hueñancün-ngei. Pepi umautuquelafuyu rume, fei llellipuquefuyu ta Jehová, fei quisu eluqueiñmu tañi tüngün ñi chem pin Filipenses 4:6, 7” (papeltunge). Eimi, hueñancün dungu mu rupalmi, allfülele reque tami piuque, nütramcafinge Jehová tami chum duamcülen. Llellipufinge müten ta Jehová. Alüñma, pichiñmangefule rume, huelu ngillatuafimi (Sal. 86:3; 88:1). Fentrenque rupa pedifinge tami eluaeteu ñi nehuen, fei eluucüleai tami quelluaeteu (Luc. 11:9-13).
13. Jehová tañi nehuen, ¿chumngechi quelluaiñmu taiñ abeluunoal taiñ cüme cüdahuelnebel quidu? (Efesios 3:16).
13 ¿Yafüngehuenolu troquiuqueimi? Jehová tañi nehuen mu quelluafeimu tañi serfinieafiel (papeltunge Efesios 3:16). Peaiñ tañi rupan taiñ lamngen Flora pingelu. Quisu ca tañi füta misionerongequefuingu, huelu tañi füta ñihualpeyu, fei hudahuingu. Taiñ lamngen feipi: “Tañi femeteu tañi füta rume cutrantupiuqueleneu. Fill antü fei mu müten raquiduamquefun, fei feipifiñ ta Jehová tañi eluaeteu ñi nehuen femngechi tañi aguantayal. Tañi piuque allfülequefui reque, huelu Jehová tremoltueneu. Jehová doi nehuentucueneu ca quellueneu tañi aguantayal. Ellaca mu femnoalu troquiufun” pi taiñ lamngen. Fachantü taiñ lamngen doi maneluhui Jehová mu. Chem dungu mu rume rupafule, maneluuquei Jehová tañi quelluaeteu. Taiñ lamngen rume quelluqueyu tañi feipin Salmo 119:32, tüfa pengeli chumngechi ñi quellueteu ta Jehová. Feipi: “Iñche eluucülequen tañi inayafiel tami huercün dungu, eimi am tami eluquefiel tañi doi quimürpuafiel”.
14. ¿Chumabüiñ taiñ llohual Chau Dio tañi nehuen?
14 Rupan pedifilmi Jehová tami elueteu ñi nehuen, ¿chumaimi? Fentecünulayaimi tami amual trahun mu ca tami amuldungual. Feita mu llohuaimi Jehová tañi nehuen. Papeltuafimi Biblia fill antü, femngechi tami raquiduam apoleai reque Jehová tañi cümeque dungu mu (Filip. 4:8, 9). Papeltumequelmi, raquiduamaimi: ¿chem huesaque dungu rupai feiti che? Ca, ¿chumngechi quellueyu Jehová? Sandra, taiñ nütramcapeel parrafo 6 mu, rupai fentren huesaque dungu mu. Fei feipi: “Tañi rupan ta José rume yafültucueneu. Fei rupalu rume huesaque dungu mu ca norngenochi dungu, famentuulai Jehová mu, rumel hueniyeniefi” (Gén. 39:21-23).
TAIÑ PU PEÑI CA LAMNGEN MU, JEHOVÁ YABÜLTUCUQUEIÑMU
15. ¿Iñi engün am yabültucuabeiñmu? Ca, ¿chumngechi? (Pebinge tati adentun).
15 Huesaque dungu mu rupaliyiñ, taiñ pu peñi ca pu lamngen müna yafültucuafeiñmu (Col. 4:11). Taiñ pu peñi ca pu lamngen mu Jehová pengelqueiñmu tunte taiñ piuqueyenieteu. Fei engün compañayafeiñmu, allcütuafeiñmu, femngechi yafültucuafeiñmu. Papeltulelafeiñmu quiñe troquiñ Biblia cam trür llellipuafuiñ (Rom. 15:4). d Quiñeque taiñ pu peñi, pu lamngen, quelluafeiñmu ñi chem raquiduamquen ta Jehová, femngechi tüngcüleafuiñ. Ca femngechi yelelafeiñmu iyael taiñ yafültucuaeteu.
Müna yafültucuqueiñmu ca quelluqueiñmu pu cümeque hueni manelfalngelu ca poyequefilu Jehová. (Inaduamnge parrafo 15).
16. ¿Chumabüiñ taiñ llohual caque che tañi quellun?
16 Duamnieliyiñ ta quellu, feipiafiyiñ ta caquelu taiñ quelluaeteu. Taiñ pu peñi ca pu lamngen piuqueyeiñmu ca ayüniei taiñ quelluaeteu (Prov. 17:17). Quiñeque mu, quimquelaingün taiñ chum duamcülen ca chem taiñ duamnieel (Prov. 14:10). Huesa duamcülelmi, feipiafimi cümeque hueni tami chum duamcülen. Feipiafimi chumngechi tami quellungeal. Cafei nütramcayafuimi quiñe cam epu loncolelu tami doi manelnieel. Quiñeque lamngen ayüquei tañi nütramcayafiel cangelu quimque lamngen.
17. ¿Chem dungu mu lloulaabüiñ yabüluhun? Ca, ¿chumabüiñ?
17 Püntünentuulayaimi. Eimi hueñancülelmi, ayüafuimi tami quisuleal. Cafei quiñeque mu tami pu peñi ca pu lamngen entendelayafeimu, cam tañi feipin mu engün huesa duamelafeimu (Sant. 3:2). Huelu femfule rume engün, püntünentuulayaimi fei engün mu. Jehová adcünuafeyu engün tami yafültucuaeteu. Quiñe loncolelu Gavin pingelu niei depresion cutran. Quisu feipi: “Quiñeque mu ayüquelan tañi nütramcayal. Ayüquen tañi quisuleal müten” pi. Tüfachi loncolelu cüdautufulu rume, huelu eluuquei tañi müleal pu peñi ca pu lamngen engün. Tüfa cüme duamelqueyu quiñeque mu. Quiñe lamngen Amy pingelu, feipi: “Chem tañi rupan cuifi meu, müte maneluuquelan caquelu che mu, cüdautulu rume iñche, huelu eluucülen tañi piuqueyeafiel pu lamngen ca ñi maneluhual fei engün mu. Femngechi femquei ta Jehová. Tañi femquen ayühulquefiñ ta Jehová. Iñche ca ayüucülequen”.
JEHOVÁ ÑI BEMAL CUPALECHI ANTÜ MU, YABÜLCUTUQUEIÑMU
18. ¿Chem upaai cüpalechi antü mu? Ca, ¿chumabüiñ?
18 Pichiñma mu, Jehová apümcayafi com taiñ hueñancülqueteu ca taiñ cutrancaqueteu (Apoc. 21:3, 4). Müleliyiñ ti hue mapu mu, com taiñ cutrancalquefeteu conhuelayai piuque mu (Is. 65:17). Chumngechi ngüneduampeiñ, allfülele reque taiñ piuque, Jehová tremolmaqueiñmu. Jehová eluqueiñmu fentren dungu taiñ yafültucuaeteu ca taiñ quelluaeteu, feimu cüme llohuafiyiñ. Acordanienge tüfa: eimi, Jehová rume duamtunieimu (1 Ped. 5:7).
ÜLCATUN 7 Jehová mu cüpai ñi nehuen
a Ca üi tuculelngei quiñeque che.
b Inaduamnge ti huichulechi dungu “Jehová falintueimu llemai”.
c Taiñ cümelcautual Jehová iñchiñ, mülei taiñ llellipuafiel taiñ perdonaeteu ca elcünual taiñ huesa femün, femngechi pengelaiñ taiñ repentiuhun. Fütra culpaliyiñ, ca quintuaiñ pu loncolelu taiñ quelluaeteu (Sant. 5:14, 15).
d Quintuafuimi ti lifru Biblia ñi ngülam adniequeiñmeu pingelu, fei peaimi ti troquiñ “Fill raquiduamcülelu” ca “Yafüluhun”, peafuimi fillque texto tami quelluafeteu.
