RAMTUN CA HUIÑOLDUNGUN 7
ÜLCATUN 51 Elufiyiñ taiñ mongen ta Jehová
¿Chem quimeleleiñmu pu nazareo tañi bemün?
“Petu nazareongele libcünongi Jehová mu” (NÚM. 6:8).
¿CHEM QUIMAIÑ?
Tañi femün pu nazareo quelluafeiñmu taiñ nehuencünuhual ca taiñ chumal rume taiñ poyeafiel ta Jehová.
1. ¿Chemu inayentubingün pu cüdahuelquebilu Jehová?
¿RUME piuqueyefimi ta Jehová? Eimi müten femquelaimi. Rumel mülequei che ñi piuqueyefiel ta Jehová (Sal. 104:33, 34). Fentrenque che elcünuqueingün falinque dungu ñi serfiafiel ta Jehová. Cuifi Israel mu femngechi femqueingün tati pu nazareo. ¿Inei engün am pu nazareo? ¿Chem quimeltueiñmu ñi femün? Peafiyiñ.
2. 1) ¿Iñi am pu nazareo? (Números 6:1, 2). 2) ¿Chemu quiñeque israelche nazareongepoingün?
2 Ti feipin nazareo tuhui hebreo quehun mu. Feipilei quiñe che dullingelu ca huichucünungelu ñi femal quiñe falin cüdau. Tati pu nazareo elcünuquefui falinque dungu tañi doi cüdahuelafiel ta Jehová. Moisés tañi ley feipifui quiñe huentru ca quiñe domo feipicünuafui ta Jehová tañi nazareongerpual ca tunteñma ñi femal (papeltunge Números 6:1, 2). a Quiñe Israel che nazareongerpulu, mülefui ñi femnoal quiñeque dungu ñi femquefel pu caquelu Israel che. Tüfa cüdaungefui, feimu ¿chemu nazareongerpuqueingün? Tañi rume piuqueyefiel mu ta Jehová ca rume mañumniefuingün com cümeque dungu tañi elueteu (Deut. 6:5; 16:17).
3. ¿Chemu nazareo reque beliiñ?
3 Famülque mu iñchiñ inaquelafiyiñ Moisés tañi ley, doi mai “Cristo ñi ley”, feimu nazareongerpulayafuiñ (Gál. 6:2; Rom. 10:4). Huelu tati pu nazareo reque, iñchiñ ca femngechi ayünieiñ cüdahuelafiel ta Jehová com taiñ piuque mu, com taiñ mongen, com taiñ raquiduam ca com taiñ nehuen meu (Mar. 12:30). Feimu feipiquefiyiñ ta Jehová taiñ serfiafiel com taiñ mongen mu. Taiñ huechurpual taiñ feipicünufiel, mülei taiñ femal Jehová tañi ayüqueel ca elcünual quiñeque dungu taiñ ayüniefel. Peaiñ chumngechi huechunenturpui tañi feipicünuel tati pu nazareo ca chem quimeltueiñmu ñi femün engün (Mat. 16:24). b
NEHUENTUHUAIÑ TAIÑ DOI CÜDAHUELABEL JEHOVÁ
4. Números 6:3, 4 tañi eipin, ¿chumabüi pu nazareo?
4 (Papeltunge Números 6:3, 4). Tati pu nazareo ngelafui tañi putuafiel tati pulcu ca tañi iyafiel tati ofad ca pasa no rume. Pulcutual ca ofadtual huesa dungu no fel. Caquelu pu Israel che femquefuingün. Biblia feipi Chau Dios huli tati pulcu, ca ayühuelmaquefi huentru tañi piuque (Sal. 104:14, 15). Femfulu rume, tati pu nazareo ayühunquechi eluuqueingün tañi putunoal. c
Pu nazareo reque, ¿eluucüleimi tami elal quiñeque dungu tami ayüniefel? (Inaduamnge parrafo 4-6).
5. Madián, Marcela engu, ¿chumingu ca chemu?
5 Pu nazareo reque, iñchiñ ca femngechi elcünuquefiyiñ quiñeque dungu taiñ doi cüdahuelafiel ta Jehová. Peaiñ ñi femün quiñe curehuen, Madián ca Marcela pingelu. Quisu engu cüme felequefuingu. Ti peñi cüme cüdau niequefui, feimu mülequefuingu quiñe elangechi ruca mu. Huelu ayüniefuingu tañi doi cüdahuelafiel ta Jehová. Fei, ¿chumingu? “Eluhuiyu tayu fente gastanoal ta plata, mületuyu quiñe doi pichi ruca mu ca fendefiyu tayu auto” pingu. Quisu engu inei no rume obligalafeyu tañi femal, femingu tañi doi poyeafiel ta Jehová. Rume ayüucületuingu tañi femün mu.
6. Pu cristiano, ¿chemu ayühun mu elcünoiñ billque dungu bachantü? (Pebinge tati adentun).
6 Iñchiñ ayühunquechi elcünuquefiyiñ quiñeque dungu taiñ doi cüdahuelafiel ta Jehová (1 Cor. 9:3-6). Jehová obligaquelaeiñmu taiñ femal, ca feichi dungu taiñ elcünuel huesa dungu no fel. Quiñeque peñi, lamngen ayüfule rume ñi nieal engün quiñe ruca, quiñe cüme cüdau, fentren culliñ, huelu ngüneuqueingün tañi femal. Ca quiñeque pu che ayüfule rume tañi nieal tañi afcadi, dulliqueingün tañi femnoal. Ca quiñeque hue curehuen ngüneuqueingün tañi nienoal pichiqueche. Ca quiñeque elcünuqueingün tañi familia ca tañi pu hueni ñi amual cheu ñi doi duamniengen amuldunguquelu. Fentren iñchiñ femqueiñ taiñ doi cüdahuelafiel ta Jehová. Ngoimalayaiñ: Chau Jehová falintuquei com taiñ femquen, pichin-ngefule rume cam alün-ngefule rume (Heb. 6:10).
BÜTRA PIUQUECÜNONGEN MU TRÜRNGELAAIÑ CAQUE CHE MU
7. Quiñe nazareo, ¿chemu cüdaungeabüi bemal ñi eipicünon? (Números 6:5). (Pebinge tati adentun).
7 (Papeltunge Números 6:5). Tati pu nazareo catrüquelafui tañi lonco, femngechi pengelquefuingün ñi ngünenieteu ta Jehová. Quiñe Israel che eluule tañi alüñma nazareongeal, rume alüqueafui tañi lonco, feimu quimfalngeafui tañi nazareongen. Caquelu pu che respetaeliyu ca quelluntucueliyu, cüdaungelayafui tañi nazareongeal. Huelu quiñeque mu, quiñeque nazareo falintungequelai ca respetangequelai. Amós ñi antü mu, tati pu nazareo elungequefui pulcu tañi putual engün, femngechi ñi huechurpunoal tañi feipicünuel (Amós 2:12). Felei llemai, pu nazareo mülefui ñi nehuencünuhual ñi inayentunoafiel caquelu pu che ca ñi huechurpual ñi feipicünufiel ta Jehová.
Pu nazareo nehuencünuuqueingün ñi inayentunoafiel caquelu che. (Inaduamnge parrafo 7).
8. Benjamín tañi bemün mu, ¿chem ayübimi?
8 Quiñeque mu, taiñ yehuen chengen mu cüdautuafuiñ taiñ inayentunoafiel caquelu pu che, huelu Jehová nehuentucuafeiñmu llemai. Peafiyiñ ñi rupan quiñe pichi huentru poyequefilu ta Jehová. Benjamín pingei, mülei Noruega mapu mu. Quiñe rupa tañi colegio mu trahuluhuingün ñi acordayafiel pu Ucrania che hueichangelu engün. Pu pichiqueche feipingei ñi tucutuhual engün chem color tañi nieel Ucrania ñi bandera ca ñi ülcantual engün. Ñi coneltunoal tüfachi trahun mu, Benjamín quiñepülecünuufui. Quiñe tati profesora peeyu, fei mütrümeyu. “Cüpange, esperaniehuiyiñ” pieyu. Benjamín nehuencünuhui ca feipifi tañi profesora: “Iñche coneltuquelan politica dungu mu. Fentren Dunguquelu Ineingen Jehová presuntucungequei tañi amunon mu ta hueichan”. Fei tati profesora coneltulayaimi müten pieyu, huelu tañi pu compañ ramtucaeyu chemu tañi coneltunoal. Benjamín llicalefui, feimu epe ngümafui. Huelu nehuencünuhui, fei ca huiño feipifi tañi chem pifiel tañi profesora. Puutulu ruca mu, Benjamín feipifi tañi pu chau Jehová tañi nehuentucueteu.
9. ¿Chumngechi ayühulabüiñ Jehová tañi piuque?
9 Iñchiñ am dullifilu taiñ serfiafiel ta Chau Jehová, caquelu che reque femquelaiñ, doi mai yeniequeiñ cüme mongen. Quiñeque mu cüdautuafuiñ taiñ feipial taiñ testigongen colegio cam cüdau mu, feimu duamfali taiñ nehuen piuquecünuhual. Doi rupale ta antü doi huesaque che mülerpuai, feimu doi cüdautuafuiñ taiñ inayal Jehová tañi feipin ca taiñ amuldungual (2 Tim. 1:8; 3:13). Huelu nehuencünuuliyiñ taiñ inayentunoafiel caquelu pu che, femngechi ayühuelafiyiñ ta Jehová (Prov. 27:11; Mal. 3:18).
DOYÜMAIÑ JEHOVÁ
10. Pu nazareo mu, ¿chemu cüdaungeabüi inaal Números 6:6, 7 tañi eipin?
10 (Papeltunge Números 6:6, 7). Tati pu nazareo ngelafui ñi fülmayafiel quiñe la. Tüfa rume cüdaungepelafui pu nazareo mu lan mu quiñe tañi pu che. Feichi mu tati pu che huimtulefui ñi fülmanieafiel tati la (Juan 19:39, 40; Hech. 9:36-40). Feimu tati pu nazareo ayüfulu rume, pepi inalafui femngechi huimtun. Pu nazareo lan mu quiñe tañi pu che, ¿rume hueñancüquepelafuingün tañi pepi fülmanoafiel? Huelu huechurpuingün müten tañi feipicünufiel ta Jehová, femngechi pengelingün tañi feyentulen quisu meu. Jehová llemai nehuentucueyu engün.
11. Cüdaungebüle ume, ¿chem doyümaiñ? (Pebinge tati adentun).
11 Iñchiñ feipicünufiyiñ ta Jehová taiñ serfiafiel, feimu eluucülequeiñ taiñ femürpual chem dungu meu rume taiñ mongen meu. Eluquefiyiñ taiñ pu che chem tañi duamnieel ca ayüqueiñ taiñ tuteafiel engün, huelu doyümqueiñ taiñ ayühuelafiel ta Jehová (Mat. 10:35-37; 1 Tim. 5:8). Quiñeque mu taiñ familia ayülayafui chi quiñeque dungu taiñ femel, huelu ayühuelquefiyiñ ta Jehová.
¿Eluucüleimi tami ayühuelafiel ta Jehová cüdaungefule rume? (Inaduamnge parrafo 11). d
12. Upalu quiñe cüdaungechi dungu, ¿chumi Alexandru ca chumlai?
12 Peafiyiñ ñi rupan Alexandru ca tañi domo Dorina pingelu. Trür papeltufuingu ta Biblia quiñe tripantu. Huelu Dorina pihuelai tañi papeltual ta Biblia, ca ayüfui tañi füta tañi ca femal. Huelu quisu tüngquechi feipifi tañi elcünunoafiel tañi papeltun. Huelu Dorina ayülai tañi feipieteu tañi füta, feimu chumi rume tañi nüngayelafiel. Alexandru cüdautufui chemu tañi feipieteu tañi domo. Ñi huesa pieteu ca ñi huesa femeteu tañi domo, Alexandru quiñeque mu raquiduamfui ñi papeltuhuenoafiel ta Biblia. Huelu eluucülei ñi serfiafiel ta Jehová ca pengelelfi ñi domo ñi piuqueyefiel ca ñi respetaniefiel. Tañi cüme femün mu tüfachi peñi, rupan mu ta tripantu tañi domo ca huiño papeltutui Biblia ca fautizahurpui. Pefinge ti video Alexandru ca Dorina Vacar: “Ti piuqueyechequelu ñom chengei ca cüme piuquengei”, quintunge jw.org mu ti troquiñ “Ti rüf dungu cacünuquetufi che ñi mongen”.
13. ¿Chumngechi pengelaiñ taiñ piuqueyebel Jehová ca taiñ pu che?
13 Jehová am deumafilu pu familia, feimu ayüfui tañi ayüucüleal (Efes. 3:14, 15). Taiñ rüf ayüucüleal, femaiñ Jehová taiñ feipieteu. Felei llemai, iñchiñ yafüluuqueiñ taiñ serfiafiel ta Jehová, huelu ca femngechi eluuqueiñ taiñ cuidayafiel taiñ pu che ca taiñ piuqueyenquechi troquiafiel. Jehová com peniei ca rume falintuñmaqueiñmu (Rom. 12:10).
HUELUQUE YABÜLUHUAIÑ TAIÑ NAZAREO REQUE BELEAL
14. ¿Iñi am doi yabültucuabiiñ?
14 Com iñchiñ eluucüleaiñ taiñ elcünual quiñeque dungu taiñ poyefiel mu ta Jehová, huelu quiñeque mu cüdautuafuiñ. Fei, ¿chumngechi caque quiñeque iñchiñ yafültucuhuafuiñ? Taiñ feipin meu llemai (Job 16:5). Tami trahunche mu, ¿mülei quiñeque tami pu peñi cam lamngen adcünutufilu ñi mongen ñi doi cüdahuelafiel ta Jehová? Cam quimfimi chi quiñeque hueche, cüdaungelu rume inayentuquelafingün ñi huesa femquen tañi pu compañ. Quiñeque tati pu estudiaquelu Biblia cam quiñeque tami pu peñi cam lamngen caiñetuqueyu chi tañi pu familia. Feimu eluhuaiñ taiñ yafültucuafiel engün ca feipiafiyiñ taiñ fente falintuquefiel com ñi femqueel Jehová mu (Filem. 4, 5, 7).
15. Quiñeque cristiano, ¿chumingu ñi quelluabel pu doi cüdahuelquebilu Jehová?
15 Quiñeque mu quelluntucuafuiñ taiñ pu peñi, pu lamngen fill antü cüdahuelquefilu ta Jehová (Prov. 19:17; Heb. 13:16). Femngechi femi quiñe cuse lamngen mülelu Sri Lanka mapu mu. Doi plata elungelu tañi pension mu, quellufi epu üllcha precursora müte nienolu plata, femngechi ñi elcünunoal ñi precursorangeel. Fill cüyen pichiquen huichunentucünuquei plata ñi quelluafiel, femngechi tañi culliafiel ñi telefono. ¡Müna cümecünui ñi femquen tüfachi cuse lamngen!
16. ¿Chem quimeleleiñmu pu nazareo ñi bemün?
16 Rume quimeltueiñmu ñi chumün tati pu nazareo. Ca quimürpuiñ fentren dungu Jehová mu. Jehová quimniei taiñ serfiquefiel com piuque mu. Jehová ca quimniei taiñ serfinieafiel cüdaungefule rume. Cafei Jehová mangelqueiñmu taiñ pengelelafiel chumte taiñ piuqueyefiel (Prov. 23:15, 16; Mar. 10:28-30; 1 Juan 4:19). Ñi chumün tati pu nazareo pengeli Jehová quimniei com taiñ femquen taiñ serfiafiel ca rume falintuñmaqueiñmu. Feimu llemai, amulepe taiñ serfinieafiel ta Jehová com taiñ piuque mu ca com taiñ nehuen mu.
¿CHEM PIMI CAI?
-
Pu nazareo nehuentuhuingün tañi doi cüdahuelabel Jehová ca bütra piuquecünongingün, ¿chumngechi pengelingün tüba?
-
¿Chumaiñ taiñ hueluque yabültucuhual taiñ nazareo reque beleal?
-
Pu nazareo ñi eipicünon, ¿chem quimeleleiñmu Jehová mu?
ÜLCATUN 124 Nor piuquengeaiñ fill dungu mu
a Jehová quiñeque nazareo dullifi, huelu epe com quisu tañi pin mu nazareocünuhuingün (inaduamnge ti huichulechi dungu “ Quiñeque nazareo Jehová ñi elcünuel”).
b Quiñeque mu, taiñ publicacion trürümfi pu nazareo ti pu cüdahuelquefilu ta Jehová fill antü. Huelu tüfachi troquiñ mu peaiñ com pu poyequefilu Jehová inayentuafuingün pu nazareo.
c Tati pu Israel che nazareongerpulu, elungequelafuingün quiñe doi falin cüdau ñi femal.
d ¿CHEM PENGELI TI ADENTUN? Quiñe huentru tañi nazareongen mu pepi coneltulai lan mu quiñe tañi pu che. Yengelu tañi rüngalngeal, tati nazareo camapu ngüneltulefui.
