RIWIɄKWEYNA 6
Wichana neykari chʉká aʼzanikʉkwéy nanʉnno
1. Wichana neykari azi nanʉngwa nanʉnno
Jesú Kaʼseʼ nʉnkweʼri, a zʉɉúnʉkʉnʉ Lázaro wicha una ni. Ari Jerusalén mʉchéy Betania ayaʼba kwʉya nʉnna ni. Jesú eymekʉ kinkumayeʼri, Lázaro wichanari maʼkeywa ɉwía ʉnzʉnna. Jesuri wichana zʉsinamʉ Marta awiri Mariasin kaʼ ikumanekʉ keywʉ zoyana, bin zanuʼgwi íkʉri reʼmasi keywʉ zanikʉnpʉnna. Jesuseʼ wichana chʉká aʼkusa uyeʼri, Marta awiri Mariari azi zeyzey aʼzʉnnʉnno. Juan 11:21-24, 38-44 aʼgwa ú.
Duna gaʼkʉnamʉ Bibriaseʼ wasʉyari, wichana neykari eygwi chʉká aʼzanika awʉngwa ni wásʉya ni. Martari wichana neykari Jeuwaseʼ Kaʼseʼ eygwi chʉká aʼkusa awʉngwa ná kinki aʼzʉna nʉnna ni. Job 14:14, 15 aʼgwa ú.
2. Wicha ʉwari azi nikʉnno
Niwipawseʼ Adán kʉyanari: «Kaʼpʉrʉ gwʉn nʉnanʉndi, kaʼpʉrʉ kingwi nʉnika awʉngwa ni» (GÉNESIS 3:19).
Íkʉri kaʼpʉ́rʉseʼ pari niwibunna neyka ni (Génesis 2:7; 3:19). Gʉchʉ awiri ɉwa niwikʉnari kéywʉri aykʉnʉ́kʉchʉ ánugwe niwikawá neyka neki ananuʼ neyka ni. Wicha ʉwari áykʉnʉ kwʉn neki zweiʼ nari, tikuma zʉʼn ʉwa ni. Wicha ʉwari arúnhʉkwa neyka itikuma zʉʼn ʉwa ni. Ey ʉwameʼgwʉn, wichana neykari azi naʼzʉnʉn aʼzari aʼzanuʼ neyka ni. Ey ʉwameʼ, Lázaro eygwi chʉká anaʼkusa ukumayeʼri, eméy naʼzarin neki yuʼ nʉnna ni. Eclesiastés 9:5, 6, 10 aʼgwa ú.
Iʼngwí aʼzʉnari ʉnwicha ʉwari Niwipáwseʼri chʉwi aʼkusʉn nuga ná aʼzʉna ni. Ey ʉweʼki, eméy neki auʼ neyka ni. Ayʉn nukuwaygwi, wichana neykari azi naʼzʉnʉn aʼzari aʼzanuʼ neyka ni. Ey ʉwameʼ, Niwipawri chʉwi meʼkusa awkwa ni ayari, digasáy ey aya ni. Jeuwari eméy níkʉkwa warunhá awkwa kineki aguzanuʼ neyka nameʼ, urigaséykumey ey aya ni. Jeremías 7:31 aʼgwa ú.
Widew Wicha ʉwari azi nikʉnno chwa ú
3. Wichana neykásinri rimasey awkwéy ki nanʉnno
Wichanari asaiʼ nariri noʼkʉkwéy kʉnanuʼ neyka ni (Salmo 115:17). Ey ʉweʼki, iʼngwiné ánugwe ɉina du nanuʼ neykari, ikʉ ʉnwichana asʉyʉn aʼchukwéy í aseykwéy kʉnʉna ni (2 Pedro 2:4). Ey ʉwameʼ, wichanasin rimaseywa yʉkwari Jeuwáseʼri aguzanuʼ neyka ni. Deuteronomio 18:10, 11 aʼgwa ú.
4. Azi nʉnnari chʉká aʼzanika uniko
Sʉmʉ ikʉ wichana neykari eygwi Kaʼseʼ kwʉngwasi chʉká aʼzanika awʉngwa ni. Iʼngwí ikʉ Jeuwá ɉwaʼsuʼ nariri du nanuʼ nari zoyana nenʉ́n chʉká aʼzanika awʉngwa ni. Lucas 23:43, TNM; Hechos 24:15 aʼgwa ú.
Ikʉ chʉká aʼzanigari Niwipáw sí ʉnkʉriwía awkwéy kʉnariri, Jesú síri ta naʼnó aʼzari ʉnkaʼnoʼkwa awkwéy kʉnanʉngwa ni (Apocalipsis 20:11-13). Ayéy ki ʉnkaʼnoʼkwa unigeʼri, Kaʼseʼ du aʼzari aʼkwa kukwéy kʉnanʉngwa ni. Juan 5:28, 29 aʼgwa ú.
5. Jeuwaseʼ ikʉ chʉká aʼkusa awʉngwa neykari azi warunhamʉ kawʉnno
Jeuwá ikʉ chʉká aʼkusa awʉngwa neykari a niwinhaguzʉna nariri chʉwi niwinkʉnika ʉwa chwizʉnhasi neyka ni. Niwipawri Agʉmʉsinʉ Jesú níwizey nari wichʉngwasi gaʼsa unameʼ, eymari anʉnchona awʉngwa ná niweʼzʉna ni. Mari ikʉ chʉká aʼzanisi nanʉngeʼri, bema íkʉri chwʉn meʼɉuno. Juan 3:16; Romanos 6:23 aʼgwa ú.
