Niwipawri du aʼzari kwʉndi niwinwʉna ni. Ari niwinhaguzʉna nameʼ, Kaʼa awiri ayʉnke kwey ʉwa gow una ni. Tʉkin pari ikʉ pin zʉnáy du aʼzari kukwéy kʉnanʉngwásiri, bin zanuʼgwi chʉwi meʼkúsʉkwa neyka kʉchunha awʉngwa ni. Jeremías 29:11 aʼgwa ú.

Chʉwi zanamʉ awiri wichi zweykwa neykari sakuku ɉináseʼri kaʼnugweri kʉchunha awʉn aʼɉuri winnakʉn nugeʼ neki, awkwéy kʉnanuʼ nari nakʉn nuga ni. Ey ʉweʼki, duna gaʼkʉnamʉ níwizey nari ey kwʉya ni, Niwipawri bin zanuʼgwi sakuku ɉina kʉchunha awiri aseʼ reʼgukʉngwasi ʉnkaʼguna sakuku nari choʼo awʉngwa ni. Azey pówruri tanʉ aʼzari winkwʉngwa ni. Isaías 25:8; 33:24; Daniel 2:44 aʼgwa ú.

Eygwi chʉwi zanamʉ kuʼ nanʉngwásiri, Niwipawseʼ yow ikʉ du nanuʼ neykari kʉchunha awʉngwa ni (Sofonías 2:3). Bin zanʉngeʼri eméy nikʉngwa nanʉnno. Bibriaseʼ chʉwi zanamʉ zari zwein nugari, Niwipawseʼ bin zanuʼgwi eméy nika awʉngwa nameʼ izʉna ni yeyka ni. 2 Timoteo 3:1-5 aʼgwa ú.

Bibria riwín nusi Niwipáw ɉwaʼsamʉ kawa ni. Eymari achʉna agʉmʉsinʉ aguzari papérisin gaʼ reʼkugaʼsa ʉwa nánʉkin neyka ni. Bibriari eméy nisi zeyzey meʼzari kukwéy nʉnní awiri aʼkwa kukwéy niwikʉnanʉngwásiri, eméy nikamʉ kawa ni niwikʉya ni. Bibria riwía nari neki minzanuʼ nanʉngwa ni. Ey ʉweʼki, riwiuʼ nʉn awʉnʉngwa neki reʼkusuʼ nánʉkwa, eméy du zanʉngwa neykari nizátikumuʼ nanʉngwasi. Luka 6:22, 23; Apocalipsis 14:6, 7 aʼgwa ú.