Jeuwá nʉwarunhʉnyeʼri azi narizʉna nʉnáy meʼzʉna no. Ari wirakoʼku zaná peykʉn nariri mʉchéy kʉnika awkwéy nanuʼ neyka ni meʼzano. Nanʉndi ɉumamʉ kʉnʉneʼki arúnhʉkwa neykari kʉnanuʼ narizáy meʼzano. Ey ʉweʼki, Jeuwari azi kinki neyka nanʉnno. Azʉgaʼkʉnamʉ Bibriáseʼri ari eméy neyka ni niwikeyri awiri ari puré niwinwʉna ni wásʉya ni.

1. Iari Niwipawri chwʉkwéy nanuʼ nanʉnno.

«Niwipawri ánugwe neyka ni» (Juan 4:24). Jeuwari niwizana gʉchʉ awiri huesu kʉnanuʼ neyka ni. Ari ánugwe nariri kuʼnawa kwʉn nuga neyka ni. Ey ʉwameʼ, chwʉkwéy niwikʉnanuʼ neyka ni.

2. Jeuwari aziri neyka nanʉnno.

Jeuwá chwʉkwéy nanuʼ neyka neki, manʉ́nkaʼri ɉwaʼsa awi ari emí neyka ni niweʼzʉn ʉweʼri aguzanʉnpana awi ɉwaʼsa awʉnʉngwa niweʼzʉna ni. Bibriáseʼri «Jeuwari nʉnʉkin reʼgúkʉkwa neyka aguzʉna ni awiri a sí kinki aʼzari zoyari chusuʼ neyka ni» wásʉya ni (Salmo 37:28). Ayeygwi «du du arunhiri chʉwi niwinkʉniga» ni, awi chʉwi aʼzanʉn nugari chʉwi kʉnisi igunámʉsa ʉwa ni (Santiago 5:11). «Anugweseʼ chʉwi riwʉnari Jeuwaseʼ mʉchéy kʉnʉna ni; kwa riwanuʼkʉchʉ neykari aseʼ ikwa ʉwa ni» (Salmo 34:18). Ey ʉwameʼ, waniga neykasin zeyzey aʼkusʉkwéy nariri kwa riwanuʼ nanʉngwa aʼkusʉkweygwi nʉnní ey meʼzare. Eméy ʉweʼri ikʉ du nanuʼ nari zweinʉngwa aʼzʉneʼri Niwipáw anugweseʼ ʉnkumʉchʉsʉngwasa zʉʼn ʉwa ni (Salmo 78:40, 41). Ey ʉweʼki, du nari zweinʉngwa aʼzʉnari Niwipáw anugweseʼ zeyzey aʼkusa ʉwa ni (Proverbios 27:11seʼ aʼgwa ú).

3. Azi nari Jeuwá niwinhaguzʉna chwizʉnhasa awaki nuga no.

Bema gwasiri ingumʉ́n chwizʉnhasa ʉwa neykari zaguzanamʉ neyka ni. Ey awi nʉ́nkʉri, Niwipáw zaguzanamʉ kʉnʉna ni (1 Juan 4:8). Jeuwari Azʉgaʼkʉnámʉseʼ pari ey awi inʉ gow una neykaseʼ pari niwinhaguzʉna chwizʉnhásʉya ni (Hechos 14:17seʼ aʼgwa ú). Azi kawi niwigow una neyka sí warunha awʉnke. Ínʉri eméy aʼbúnʉyʉn niweʼzariri zeyzey reʼkusi zamayʉkwéy niwikʉnariri, zámʉri anéy aʼzʉni meʼzanʉkwéy neyka ni. Ari kukwéy neykásinri zeyzéykʉchʉ niweʼzʉnari aʼzʉna ni.

 INGUMɄ́N RIWIɄKWASI

5. Jeuwá du arúnhʉya nameʼ ingumʉ́n ɉwaʼsa awʉn niweʼɉúnʉya ni

Moiseri Niwipáw gugín kaʼmʉkánʉya nʉnna ni. Ey ʉwámeʼri, du ɉwaʼsa awʉn aʼɉurín. Ey awi Moiseseʼ Niwipáw eméy kein: «Du miɉwaʼsi zweykwéy nʉkʉnanʉngwasi minhíngunʉ naʼzawía ú» (Éxodo 33:13). Ey ʉwameʼ, Jeuwáseʼri a azi neyka nanʉndi aya sí kʉrá kuwasey azawía uyʉn. Éxodo 34:4-6seʼ aʼgwa unayu, ema sí rimasey awkwa:

• Jeuwá azi neyka Moiseseʼ kʉrá zakaʼchoʼsi kʉya uye.

• Jeuwá azi neyka sí ingumʉ́n miguzʉna no.

 RIGAWIɄWA NEYKA

Jeuwari ánugwe nameʼ chwʉkwéy nanuʼ neyka ni. A du arúnhʉya kawari zaguzanamʉ kʉnʉna nameʼ neyka ni.

Rigʉnchunhasʉkwasi

• Iari Jeuwá chwʉkwéy niwikʉnanuʼ nanʉnno.

• Ánugwe seymʉkeri ínʉri nanʉnno.

• Iʼngwí Jeuwá duna neyka chwizʉnhasʉyari bemari nanʉnno.