RIWIɄKWEYNA 19

Jeuwá sí gaʼyeyka ɉinari kristianu ta kinki yeyka ki nanʉnno

A’CHUNɄNGWASI

Jeuwá sí gaʼyeyka nʉnkurari kristianu ta kinki anaʼnʉnno niweʼzʉna ni. Ey ʉwameʼ, bemaʼba pari aʼzawiʉya no, ey awi iari Jeuwá sí gaʼyeyka niwiɉwaʼkumʉnno, azi nisi zaguzʉna kinki chwizʉnhakumʉya no, riwiʉkwa nʉngwa ni.

1. Jeuwá sí gaʼyeyka ɉinari bemaʼba pari zawín nʉngwa aʼzʉna no.

Jesuri Niwipáw eyméy kein: «Migaʼkʉnámʉri ta kinki neyka ni» (Juan 17:17). Jesú niʼnaygwi nikʉnʉngwa niweʼzʉna ni: Niwipáw Zʉgaʼkʉnámʉseʼ pari kinki aʼzawiʉya ni. 1870seʼri ingʉ zʉguró nánʉkin Niwipáw Zʉgaʼkʉnamʉ du izatakʉnpana ʉwa kwayʉn, ikʉnhaseʼ winarunhʉyari Bibriaseʼ pari narín. Iglesiaseʼ winzawiʉya neykasin ʉnkʉrigʉnsi nanuʼ nareʼki ʉnkʉriwiana neykari iʼngéygwiseʼ kʉbasa uyʉn. a

2. Iari Jeuwá sí gaʼyeyka azaʼkinuga no.

Jeuwari a kaʼmʉkari a sí ta wasey zoya ʉwari nʉʼn sí gaʼyeyka nanʉnno aʼzʉna ni (Hebreos 11:4-12:1). Birindi Niwipawri azʉpowru «nʉʼn sí gaʼyeyka anʉni» kein (Isaías 43:10seʼ aʼgwa ú). Jesú Gaʼyeyka nʉnʉnin gwaʼna ni. (Apocalipsis 1:5). Ey ʉwameʼ, 1931seʼri Jeuwá sí gaʼyeyka zaʼkinukʉngwa anisin. Ey ʉwameʼ zeyzey niweʼzʉna ni.

3. Jeuwá sí gaʼyeyka Jesú niʼnaygwi zaguzʉna ni.

Jesuri akʉriwiʉya aguzʉna nʉnameʼ asinamʉ nánʉkin aʼchwʉya narín. (Marcos 3:35seʼ aʼgwa ú). Pin zʉnáy Jeuwá sí gaʼyeyka ɉinari akingwi niweʼzʉna nameʼ iʼba ʉnkʉnari azoya ni. Ey ʉwameʼ, aʼmía kwa cheyrwa nenanʉnke sinamʉ nánʉkin niweʼzʉna ni (Filemón 1, 2). Ey awiri, «niwisinamʉ ánugwe sí neykásinri riguzari» zwein nʉngwa niweʼzʉna ni. (1 Pedro 2:17). Sʉmʉ ɉuna naseʼ zaguzʉna chwizʉnhakumʉya ni, niwisinamʉ ánugwe sí neyka chʉwi aʼzanʉn nugeʼ igunamʉsʉnʉngwa niweʼzanʉn nusi neyka ni.

INGUMɄ́N RIWIɄKWASI

Jeuwá sí gaʼyeyka ɉina du ɉwaʼsa awiri iari kristianu kinki nanʉnno meʼzari sékʉnʉn awʉndi.

Kristianu kinki winneykari Bibriaseʼ aʼnikwʉyáy nisi zoriri iʼngéygwiseʼ kʉbasagwi ʉwa ni.

4. Arúnhʉya neykari Bibriaseʼ pari neyka ni

Jeuwari Bibriaseʼ ta aʼnikwʉn nugari ingumʉ́n ɉwaʼkuma awʉngwa ni yana narín. Daniel 12:4seʼ aʼgwa unayu, ema sí rimasey awkwa:

Jeuwá kaʼmʉkánʉya ɉina Bibria ingumʉ́n du sékʉnʉn awʉndi azi nanʉngwa nise.

Ingʉ zʉguró nánʉkin Bibria emí nisi winizataka una ni meʼzari sékʉnʉn ú. WIDEW chwa unayu, ema sí rimasey awkwa:

WIDEW: Ta neyka takʉn nuʼna (7:45)

Widéwseʼri Carlos Russell awiri asin winnanʉn nugari, azi nisi Bibria sekʉnánʉya nare.

Riwía ú

Bunsi chʉneri ingiti aʼkisi zoyeʼri inʉ ingumʉ́n chukwéy niwikʉnʉna zaná nari, Niwipawri Azʉgaʼkʉnamʉ aʼnoʼkwʉn niwingwásiri ingiti ingiti niwingunámʉsi zoyaki nuga ni. Ey ʉwameʼ, ey naʼbari azi arunhákumʉya nʉna neykari itákuma awaki nuga ni (Proverbios 4:18seʼ aʼgwa ú). Bibria ʉntákumuʼ neyka ni, ey ʉweʼki, manʉnkaʼ ingumʉ́n aʼnoʼsi azoyaygwi arunhákumʉya neykari itaʼsigwi azoya ni.

5. Jeuwá sí aseykumʉya ni

Iari Jeuwá sí gaʼyeyka niwizaʼkinukʉngwa nise. WIDEW chwa unayu, ema sí rimasey awkwa:

WIDEW: Zaʼkinukʉkwa emí gwasi izʉna ni wásʉya (2:40)

Jeuwá sí gaʼyeyka niwizaʼkinugeʼri, iari aʼgwa sí kawa no.

Iari Jeuwari ikʉ a sí gaʼyeyka nanʉngwa nari ʉnkaʼguka uye. Umʉngwi urigasey ukumaki nuga nameʼ, ikʉnhari a sí ta wasey awʉngwasi nanʉn nuga ni. Azi nari urigasey ukumaki nuga nanʉnno meʼzari bay sekʉnanʉn.

Iʼngwiri Niwipáw kaʼmʉkanʉkwásiri inʉ mikʉnari kinki nanamʉ kawa ni winyeyka ni. Ey ʉweʼki, ta nanʉnno. Levítico 26:1seʼ aʼgwa unayu, ema sí rimasey awkwa:

Niwipawri muñeku kwa iʼngeygwi ɉunasin kaʼmʉkana unari aʼzanʉnno.

Iʼngeygwi neykari Jesuri Niwipáw na ni winyeyka ni. Ímari ta ki nanʉnno Juan 20:17seʼ aʼgwa unayu, ema sí rimasey awkwa:

Niwipáw awiri Jesuri aya kingwi ki nanʉnno.
Jeuwari a sí awiri agʉmʉsinʉ sí ta waseykumʉngwasi gaʼyeyka gaʼsa unameʼ, azi meʼzano.

6. Diʼkin rinhaguzari azoya ni

Bibriáseʼri gʉcha gugín nánʉkwa zaná nari kristianu ɉinari kʉwaʼkʉya ni. 1 Corintios 12:25, 26seʼ aʼgwa unayu, ema sí rimasey awkwa:

Kristianu ta kinki neykari iʼngeygwi niwisinamʉ chʉwi aʼzanʉn nukʉndi, azi níkʉkwa kawʉnno.
Jeuwá sí gaʼyeyka ɉinari azi nisi riguzʉna kinki chwizʉnhásʉyʉn meʼzʉn awaki nuga no.

Jeuwá sí gaʼyeyka ɉinari asinamʉ ánugwe sí chʉwi aʼzanʉn nugeʼri igunámʉsa awʉnʉngwa aʼzʉna ni. Eyméy ʉwa ni meʼzʉn awʉngwasi WIDEW chwa ú. Unayu, ema sí rimasey awkwa.

WIDEW: Haitíri huracán Matthew zaʼkinuga zʉʼn una (5:29)

Jeuwá sí gaʼyeyka ɉina asinamʉ ánugwe sí neyka igunámʉsa ʉwari zaguzʉna chwizʉnhásʉyʉn meʼzano.

Kristianu kinki neykari iʼngeygwi aguzari igunámʉsa ʉwa ni.

IʼNGWINÉ YEYKARI: «Jeuwá sí gaʼyeyka ɉinari rigasáy zʉʼn winzoya naʼkinó».

Azi nʉkʉyʉnno.

RIGAWIɄWA NEYKA

Jeuwá sí gaʼyeyka ɉinari iʼngwikin winʉnkʉnari Niwipáw kaʼmʉkánʉya ni. Ayeygwi winarúnhʉya neyka Bibriaseʼ pari nariri, Jeuwá sí ta neyka iʼngéygwiseʼ kʉbasʉnʉngwa aʼzʉna ni.