INU NKWEEN̄ 59
Owu Mokọt Ime Tukutuku
Sọnja mgbọ me isi, otutuuk ebi eyi Karais mechichini ukeme mè iyaka ire tukutuku. Ire eyi morọ ibe eji efieek owot ni?
1. Keke orọ ikpoboke eji chieen̄ ire etutuku eji?
Baibul itumu ibe: “Ebi ene mêrọ ikeme ebi geelek ìchechieek me lek kè Jisọs Karais, mè ikiluk ugwem òkinyi Awaji umin.” (Timọti Eyi Òso Iba 3:12) Mitutuku Jisọs mije ikarege okpọkọ ge me lek inyọn̄ kè Setan. Eji si kpere okpọkọ ge me lek inyọn̄ yi, eya orọ, ikakike eji chieen̄ mgbọ geelek ebi mkpulu mè iyaka ire ebi uwu uriaak esikitutuku eji.—Jọn 15:18, 19.
2. Ike owa ke eji ebesa ineen̄ lek inyi tukutuku?
Eji merọ ibe utoon̄-ejit kiji me lek Jioba inye me mgbọ keyi. Kisan̄a mgbọ sibi kisa riaak uriaak nyi ọmọ mè kifuk Usem kan̄ egwe geelek. Kisi nkween̄mkpọ ntitiin̄ mgbọ geelek. Otutuuk inu chi monyi owu unye oweekbe isasa ichichini tukutuku me lek unye-ejit, ikerere ibe ke ikinan̄a me ubọk ebi ototun̄ ukan̄ kwun̄. Ogwu ikwaan̄ Pọọlu, ogwu etutukube owuwa mgbọ ige ibe: Jioba “ore ogwu òkitap ubọk inyi emi, ukpook ìkpotet emi.”—Ebi Iburu 13:6.
Eji mekọt ikaan̄ unye-ejit si sa me ikekilook ata etip mgbọ geelek. Ikekilook ata etip ikijeen̄ eji ibe etoon̄ ejit me lek Jioba mè etim egak ikekitet ukpook ene. (Urọk 29:25) Ire okọt ikaan̄ unye-ejit isasa ikilook ata etip me mgbọ keyi, omokup me mbem-lek ikekilook ata etip ikerere me mgbọ ebi mkpulu ekisa igbagban ikwaan̄ kiji.—Ebi Teselonaika Eyi Adasi 2:2.
3. Ike owa ke eji ebesa ikaan̄ oruru sa me ikekime tukutuku?
Me atikọ, eji kpekinwọọn̄ ibe eketutuku eji, ire, eji esikọt ime tukutuku, ikirọ ibe ichechieek kiji inye. Eji metaba lek iriaak me lek Jioba mije eji mimun̄ ntap-ubọk kan̄ me mgbọ eji ekikeek ibe ke eji kpebekọt ime. (Fuk Jemis 1:2-4.) Ikinaan̄ Jioba imumun̄ ubọk eji ekibọkọ ukwook, ire, ikibele ọmọ ejit imumun̄ ibe ke eji mekikọt ime. Baibul ibe: “Ire enyi ime osusut ebi ene esutbe enyi mije ata inu enyi erọbe, Awaji môbele ejit me lek kinyi.” (Pita Eyi Adasi 2:20) Mkpukpe Jioba obokpe inyi otutuuk ebi ikisa me ime ikigbe utoon̄-ejit ire ugwem ikakaan̄ge itata me inyọn̄ eyi kpunu ebi ibeyaka ikeke ikeme ata ntọbọ-ebum.—Matiyu 24:13.
KWEEN̄ GBAALEK
Week riọọn̄ inu orọrọ ifetbe ibe ke eji mekọt ikigbe utoon̄-ejit inyi Jioba ikerere me mgbọ ekitutuku eji, mè ubọk ibosa ikpe eji mkpukpe.
4. Owu mokọt ime ukeme ebi ototun̄ ukan̄
Jisọs iriọọn̄ ijaan̄ ibe ke usini ebi ototun̄ ukan̄ kiji kpebeweek ibe eji etọbọ ebum enyi Jioba. Fuk Matiyu 10:34-36, mè igbaan̄ ikpa idodo yi:
-
Keke obokọt irọ ire ene ge me ototun̄ ukan̄ itumu ifieek itọtọbọ ebum inyi Jioba?
Inyi omun̄ inu njeen̄ ge ofolek eyi, fit FIDIO yi, mè igbaan̄ ikpa idodo yi ogọgọọk.
-
Keke ke oborọ ire ogwu uwu kwun̄ mè iyaka ire ogwu unene kwun̄ ikisa irọrọ ibe okayaka ikitọbọ ebum inyi Jioba?
Fuk Okwa Itọn̄ 27:10 mè Mak 10:29, 30. Osifuk ere Baibul chi ge ge isan̄a, igbaan̄ ikpa idodo yi:
-
Ike owa ke use yi obosa itap ubọk inyi owu oje otibi ukeme obonan̄a me ubọk ebi ototun̄ ukan̄ kwun̄ mè iyaka ire ebi unene kwun̄?
5. Kweek nye kitọbọ ebum nyi Jioba ikerere me irek tukutuku
Iweek unye-ejit isasa ikitọbọ ebum inyi Jioba me mgbọ ebi ofifi ife ekisa ikpukput eji. Fit FIDIO yi, mè igbaan̄ ikpa idodo yi ogọgọọk.
-
Ike owa ke akpat ukot ejeen̄be me fidio yi osa inyi owu unye-ejit?
Fuk Ikwaan̄ 5:27-29 mè Ebi Iburu 10:24, 25. Esifuk ere Baibul chi ge ge isan̄a, igbaan̄ ikpa idodo yi:
-
Keke orọ ikupbe ufiak ibe eji ekup enye eketọbọ ebum enyi Jioba ikerere me mgbọ ebi mkpulu ebe mè eji ekaya isibi uko mè iyaka ire isi nkween̄mkpọ ntitiin̄?
6. Jioba motap ubọk inyi owu okọt ome
Ebi Ata-Ikọ Jioba ikup me otutuuk linyọn̄ yi mekikup inye ikigbe utoon̄-ejit inyi Jioba ikerere me mgbọ ekitutuku ema. Inyi omun̄ inu otatap ubọk inyi ema, fit FIDIO yi. Mè igbaan̄ ikpa idodo yi ogọgọọk.
-
Me emen fidio yi, keke otap ubọk inyi bọn ute chi ekọt eme?
Fuk Ebi Rom 8:35, 37-39 mè Ebi Filipai 4:13. Esifuk ere Baibul chi ge ge isan̄a, igbaan̄ ikpa idodo yi:
-
Ike owa ke ere Baibul yi osa inyi owu unye-ejit ibe ke omokọt ime ntọ-mkpọ?
Fuk Matiyu 5:10-12, mè igbaan̄ ikpa idodo yi:
-
Keke orọ obokọt ikibele ejit ikerere me irek tukutuku?
Efie efie ebi ikitọbọ ebum inyi Jioba mikọt ime tukutuku. Owu si mokọt ime!
USINI ENE EKIBE: “Mkpabakọt ime tukutuku.”
-
Owa me Baibul obokọt inyi ema unye-ejit ema eweekbe?
ME MGBIDIM
Jioba imọnọ efuuk eji ekitap isasa ikitọbọ ebum inyi ọmọ ibene ikerere me mgbọ ekitutuku eji. Sa me ntap-ubọk kan̄, eji mekọt ime tukutuku!
Idodo
-
Keke orọ ikpoboke ebi eyi Karais chieen̄ ire etutuku ema?
-
Keke ke oborọ me mgbọ keyi isasa ineen̄ lek iban tukutuku?
-
Keke obokọt itap ubọk inyi owu okaan̄ unye-ejit ibe ke omokọt itọbọ ebum inyi Jioba ikerere me irak ntọ-mkpọ geelek?
WEEK
Kpọ ubọk gwun̄ ute ijija ge osabe ikpa ubọk Jioba osa itap ubọk inyi ọmọ ikọt ime me mgbọ ọmọ okupbe me mkpọn mije ikamọnọge agan̄.
Kpọ mkpọ otatap ubọk irọ inyi olom mè nwa ge ekup enye eketọbọ ebum enye Jioba me owuwa acha ikerere me irak ukeme.
Kween̄ ubọk obosa ikichichini tukutuku me lek unye-ejit.
Ike owa ke eji ebekimun̄ ukeme okinan̄a me ototun̄ ukan̄, ike owa si ke eji ebesa ime ufialek ikisa inu?
“The Truth Brings, ‘Not Peace, But a Sword’” (The Watchtower, October 2017)
