САНАНЫП ИЙЗЕЕР ДЕ: слер музейдӧӧн экскурсияга келгенеер. Музейдиҥ залдарыла базып, слер экспонаттардыҥ кӧп сабазыныҥ ӧҥи ӧчӱп, эскирип, јарылып калганын кӧрӧдӧӧр. А кезик экспонаттар бӱдӱн эмес, олордыҥ кезик бӧлӱктери јок. Је бир кайкамчылу неме: экспонаттардыҥ бирӱзи сӱреен јакшы кичеелип калган, керек дезе оныҥ оок-теек те немелерин ајыктап кӧрӧргӧ јараар. «Бу кийнинде ӧйдӧ эдилген бе?» — деп, слер гидтеҥ сурайдаар. «Јок, бу бистиҥ јебрен экспонаттардыҥ бирӱзи, оны бир де катап јаҥыртпаган» — деп ол айдат. «Мыны сӱреен јакшы кичееген ошкош не?» — деп, слер јилбиркейдеер. «Јок, ол салкынга да табарткан, јаашка да ӧткӧн. Јаман улус та оны канча катап ӱреерге албаданган» — деп, ол каруу берет. Слер алаҥ кайкап, сураар болороор: «А ол недеҥ эдилген?»

Агару Бичикти мындый кайкамчылу экспонатла тӱҥдештирерге јараар. Бистиҥ ӧйгӧ јетире ӧскӧ дӧ јебрен бичиктер кичеелип калган. Је олордыҥ кӧп сабалары ӧйлӧр ӧткӧнинеҥ улам тыҥ ӱрелип калган. Анайда ок ондогы јер-телекей керегинде бичилгени эмдиги ӧйдиҥ керелерине чек келишпей турган. Ондо бичилген эмденетен эп-аргалар су-кадыкка туза јетирердиҥ ордына каршузын јетирет. Кӧп јебрен колбичимелдердеҥ јӱк бӧлӱктери арткан, не дезе, олордыҥ тексттериниҥ кӧп сабазы чек јок эмезе тыҥ ӱрелип калган.

Агару Бичик ӧскӧ јебрен бичиктерге кӧрӧ тыҥ аҥыланат. Оны бичип баштаганынаҥ бери 3 500 јылдаҥ ажыра ӧй ӧткӧн дӧ болзо, ол бистиҥ ӧйгӧ јетире бир де солынбай једип келген. Канча јылдардыҥ туркунына оны јоголторго санангылаган — оны ӧртӧгилеген де, токтоткон до, шооткылаган да, је ол бу ончо табаруларды ӧдӱп чыккан. Улустар наука јанынаҥ шиҥжӱ эдип, ачылталар эдерде, Агару Бичик бир де эскиребеген, карын бойыныҥ ӧйин канча катап озологон деп јарт кӧрӱне берген. («Устарела или же опередила свое время?» деген рамканы кӧрӱгер.)

Слер сураар болороор: «Агару Бичикте бичилген јӧптӧр бӱгӱнги кӱнде тузалу болор бо?» Бу сурактыҥ каруузын билип аларга, мынайып сананып кӧрӧӧр, бӱгӱнги кӱнде улусты эҥ ле тыҥ не санааркадат? Кӧп сабазы ол јуу-согуштар, ар-бӱткенди киртиткени, каршулу керектер ле коррупция деп айдар. А эмди тӧмӧнги берилген Агару Бичиктиҥ принциптерин кычырып ийеле, бойоордоҥ сурагар: «Улус бу принциптерле јӱрген болзо, јӱрӱм јакшы болор беди?»

УЛУСЛА АМЫР-ЭНЧӰ ЈӰРЕРИ

«Улус ортодо амыр јайап турган улус ырысту, нениҥ учун дезе олор Кудайдыҥ балдары деп адалар» (Матфей 5:9, ЈТ). «Аргалу болзогор, ончо улусла амыр јӱригер» (Римдегилерге 12:18).

КИЛЕЕРИ ЛЕ ЈАМАНДЫ ТАШТААРГА БЕЛЕН БОЛОРЫ

«Килемкей улус ырысту, нениҥ учун дезе олорды Кудай килеер» (Матфей 5:7, ЈТ). «Бой-бойыгарга чыдамкай болыгар, кем кемигерге комыдалду болзо, акту јӱректеҥ јаманын таштагар. Иегова a Кудай јаманыгарды акту јӱректеҥ таштаганы чылап, слер де бой-бойоордыҥ јаманыгарды таштап туругар» (Колоссыдагыларга 3:13, ЈТ).

УЛУСТЫ УГЫ-ТӦЗИЛЕ ЫЛГАБАЗЫ

«Јер-ӱстинде јӱрзин деп, ол [Кудай] бир кижинеҥ ончо албатыларды јайаган» (Апостолдордыҥ ижи 17:26, ЈТ). «Кудай улустыҥ чырай-бӱдӱжине кӧрбӧй турганын эмди чындаптаҥ оҥдоп јадым. Је кандый ла калыкта Оноҥ айап, чыныла эдип јӱрген кижи Ого јарап јат» (Апостолдордыҥ ижи 10:34, 35).

ЈЕРДИ ЧЕБЕРЛЕЕРИ

Иегова Кудай «Эдем садты кичееп кӧрӱп турзын деп, анда кижи јаттыргызып» салган (Башталганы 2:15). Кудай «јерди кырып тургандарды» јоголтып салар (Ачылта 11:18).

АЧЫРКАШТЫ ЛА БАЛЫР ЈӰРӰМДИ КӦРӦР КӰӰНИ ЈОК БОЛОРЫ

«Ачынатып неме јуурынаҥ чеберленигер, кижиниҥ јӱрӱми јӧӧжӧзиниҥ кӧбинеҥ камаанду эмес» (Лука 12:15, ЈТ). «Ортогордо балыр јӱрӱм, быјар, ачыркаш деген немелер керегинде куучын да болбозын. Андый немелерди агару улус этпес учурлу» (Эфестегилерге 5:3, ЈТ).

АК-ЧЕК ЛЕ ИШТЕҤКЕЙ БОЛОРЫ

«Ончозында чын эдип јӱрерге кӱӱнзейдис» (Еврейлерге 13:18). «Ууры эткен кижи база ууры этпезин. Карын...бойыныҥ колыла албаданып иштезин» (Эфестегилерге 4:28, ЈТ).

УЛУСКА БОЛУЖАРЫ

«Кунуккандарды токунадыгар, чине јокторго болужыгар, ончо улуска чыдамкай болугар» (1 Фессалоникадагыларга 5:14, ЈТ). «Ӧскӱс-јабыстарга ла тул ӱй улуска ачу-коронында килемји эдери» (Иаков 1:27).

Бу јӱк ле јараш сӧстӧр эмес. Агару Бичик бу принциптерди баалаарга ла јӱрӱмде тузаланарга болужат. Сананып ийзеер де, кажы ла кижи бу принциптерле јӱрген болзо, кандый кӧп кӱчтер болбос эди! Айдарда, Агару Бичиктиҥ јӧптӧри бӱгӱнги кӱнде сӱреен тузалу. Је Агару Бичик бӱгӱнги кӱнде слерге канайып болужар аргалу?

Бир ойгор кижи мындый сӧстӧр айткан: «Ойгор болоры керектердеҥ кӧрӱнет» (Матфей 11:19, ЈТ). Слер бу сӧстӧрлӧ јӧп пӧ? Јӧп ойгор бо деп, ол неге экелгенинеҥ кӧрӱнет. Слер мынайып сураар болороор: «Агару Бичик —тузалу бичик болзо, мениҥ јӱрӱмим оҥдоло берер керек. Ол мениҥ уур-кӱчтеримниҥ аайы-бажына канайып чыгар?» Бир ӱй кижиниҥ темин кӧрӱп ийектер.

Ирина b сӱӱнчилӱ ле јилбилӱ јӱрӱм јӱрген болгон. Је кенетийин ӱзе неме солына берди. Озо баштап оныҥ кызы божоп калган. Оноҥ ӧбӧӧни оны чачып ийген. Анайда ок Иринада акча-манатла кӱчтер башталган. Ирина куучындайт: «Эмди мен кем: менде кызым да, ӧбӧӧним де, айлым да јок. Мениҥ кӧксим чек куруталып калды: нени де эдеер, нени де сананар кӱч јок».

Ирина јӱрӱминде болгон кӱч айалгалардаҥ улам Агару Бичиктеги: «Јӱрӱмистиҥ узуны, јаан ла болзо, јетен-сегизен јылга улалып, кыйын-шырала толо. Јӱрӱмис тӱрген ӧдӱп, уча берет» — деген сӧстӧр чын деп оҥдогон (Сарын 90:10).

Ирина болуш бедиреп, Агару Бичикке баштанган, ол ого спасательный круг болуп калган. Кӧп улус Агару Бичик кайкалдар эдер ле оныҥ јӧптӧрин тузаланганы кижиниҥ јӱрӱмин солыыр аргалу деп бӱдӱмјиленгенин оноҥ арыгы статьялардаҥ кӧрӱнет. Агару Бичик статьяныҥ бажындагы айдылган музейдеги шедеврдий болот. Ал-камык бичиктер ӧйдӧҥ улам эскирип калат, је Агару Бичик олордоҥ тыҥ аҥыланып јат. Шылтагы ол кандый «материалдаҥ» эдилгенинде болор бо? Агару Бичикте чыннаҥ ла улустыҥ эмес, Кудайдыҥ санаазы бичилген деп бӱдерге јараар ба? (1 Фессалоникадагыларга 2:13).

Јӱрӱм кыска ла уур-кӱчтерле толо деп, слер јӧпсинер болороор. Анчада ла кӱч болуп турза, слер јӧпти ле болушты кайдаҥ бедирейдигер?

Агару Бичик слерге канайып болужар аргалу деп билип алыгар. Ол канайып:

1. кичееп јат;

2. јайымдап јат;

3. ийде-кӱч берип јат.

Оноҥ арыгы статьяларда библиялык јӧптӧр јӱрӱмде канайып болужар аргалу деп шӱӱжилер.