1. Бис Иегованыҥ Керечили болгоныска нениҥ учун сӱӱнип, оморкоп јадыс?

ИЕГОВАНЫҤ КЕРЕЧИЗИ болорго кандый јаан сӱӱнчи! Кудайдыҥ адын аданганыска тыҥ оморкоп јадыс! Оныҥ адын аданган болорыста бу атты мактап, јарлаар ишке ле ӱренчиктер белетеер ишке туружадыс. Оныҥ учун бис ӱргӱлји јӱрӱмге апаратан чындыкты керексиген улустыҥ ончозына Кудайдыҥ ишчизи болорго болужып берзеес, јаан сӱӱнчи аладыс (Ап. ижи 13:48). Канайып Иисус јарлаар иште болгон јилбилӱ учуралдарды угуп сӱӱнетен, анайып ла бис те сӱӱнедис (Лука 10:1, 17, 21).

2. Агару иш биске јаан учурлу деп недеҥ кӧрӱнет?

² Бис агару ишке чала-была турушпай јадыс, нениҥ учун дезе бу биске јаан учурлу иш болот. Апостол Павел Тимофейге мындый сӧстӧр бичиген: «Бойыҥа ла ӱредӱге ајарыҥкай бол. Мында турумкай бол. Анайда эдип, бойыҥды да, сени угуп турган улусты да аргадап аларыҥ» (1 Тим. 4:16). Каандык керегинде јар улустыҥ јӱрӱмин аргадайт. Оныҥ учун бис јаантайын бойыска ајарыҥкай болодыс. Кудайдыҥ Каандыгына багынып турган улус болорыста, бис кажы ла эткен керегисте Иегованы мактаарга кӱӱнзейдис (Флп. 1:27). Анайда ок, улусты неге ӱредедис, бойыс та анайда ла јӱредис. Айдарда, бойыска ајарыҥкай болгоныс јарлаар ишке јакшы белетенгенистеҥ ле Иегованаҥ болуш сураганыстаҥ кӧрӱнип јат.

3. Кезикте улус Каандык керегинде јарды канайып угат? Тем куучындап беригер.

³ Је кезикте канайда јарлазаас, чындыкка тоолу ла улус келет. Кезикте чек кем де келбей јат. Санаагарга кирип турган болбой Исландияда јаткан Георг Линдал деп аканыҥ учуралы. Ол 1929 јылдаҥ ала 1947 јылга јетире бӱдӱн Исландияда јаҥыс болчок Керечи болгон. Бу јылдарда  ол канча муҥ бичиктер таркаткан. Је чындыкты тӱҥей ле кем де јуутпаган. Георг ака бичиген: «Кӧп улус чындыкка удура болуп калган. Је кӧп сабазы чындыкты бир де керексибегендер». Оноҥ Исландиядӧӧн Галаадты божоткон улус келген. Је олор до јӱк тогус јыл јарлаган кийнинеҥ улус Иеговага јӱрӱмин учурлап, сууга чӧҥӱрилип баштаган *.

4. Улус бисти укпай турза, эмезе кӧгӱс јанынаҥ ӧспӧй турза, бисте кандый сезимдер болот?

⁴ Улус сӱӱнчилӱ јарды укпай турза, эмезе ӱренип турган улузыс кӧгӱс јанынаҥ ӧспӧй турза, биске ачынчылу болуп јат эмей. Апостол Павел де «меге сӱрекей эрикчил, јӱрегимде токтобос сыс» деген. Нениҥ учун дезе кӧп саба еврейлер Иисусты Мессия деп бӱтпеген (Рим. 9:1—3). Темдектезе, слер кандый бир кижиге Агару Бичикле ӱредӱ ӧткӱрип јадаар. Слер бу ӱредӱлерге јакшы белетенип, ӱренип турган кижи учун мӱргӱп турганаар. Је ӱренип турган кижи кӧгӱс јанынаҥ ӧспӧй турарда, слерге бу ӱредӱни артыргызарга келижип јат. Ол эмезе слердиҥ ӱреткен улузаардыҥ кемизи де сууга чӧҥӱрилбеген. Мында слер бурулу ба? Иегова слердиҥ ижеерди јаратпай турган ба? Мыны билип аларга бу јӧрмӧлдӧ эки сурак шӱӱжип ийерис: 1) Бистиҥ эткен ижистиҥ тузазы недеҥ кӧрӱнет? 2) Агару ишке чын кӧрӱмдӱ болорго биске не болужар?

5. Бис канайып та албаданып иштезеес, кезикте нениҥ учун бистиҥ ижис једимдӱ болбой јат?

⁵ Агару Бичикте Кудайдыҥ сӧзин бӱдӱрип јӱрген кижи «нени ле эткенде ол ӱзе эдип алар» деп айдылат (Сар. 1:3). Је бу сӧстӧрди мынайып сананбас керек: мен Кудайдыҥ ижин эдип јӱрзем ӱзе ижим једимдӱ болор, кандый да буудактар болбос деп. Нениҥ учун бис бойыс та, айландыра улус та толо кемдӱ эмес. Мынаҥ улам јӱрӱмниҥ кӱчи коркыш (Иов 14:1). Анайда ок чындыкты угар кӱӱни јок улус бар. Олордоҥ улам бис ачык јарлап болбой јадыс (1 Кор. 16:9; 1 Фес. 2:18). Андый болзо, бис канайып иштезеес, Иегова бистиҥ ижисти једимдӱ деп кӧрӧт? Бу сурактыҥ каруузын билип аларга библиялык кезик принциптер кӧрӱп ийектер.

6. Иегова бистиҥ ижисти качан једимдӱ деп кӧрӧт?

⁶Иегова бистиҥ албаданып иштегенисти ле турумкай болгонысты баалап јат. Иегова бистиҥ ижисти качан једимдӱ деп кӧрӧт? Качан улус бисти укпай да турза, је бис Кудайысты сӱӱп, оноҥ ло ары јарлап турзаас. Павел айткан: «Кудай чындык. Ол эдип јӱргенигерди ле сӱӱжигерди ундыбас. Слер агаруларга болушканыгар, эмди де болужадыгар. Мынызыла Оны сӱӱп турганыгарды кӧргӱзип јадыгар» (Евр. 6:10). Оныҥ учун бистиҥ ӱреткен улус сууга чӧҥӱрилбеген де болзо, је Иегова бистиҥ ижисти ле сӱӱжисти баалап јат. Бого ло  коштой Павел Коринфтегилерге айткан: «Кӧп иштеп јӱргенигер Кайракан алдында калас эмес» (1 Кор. 15:58). Бу сӧстӧр биске де айдылган, чындыкка кемди де экелип болбогон до болзоос.

7. Павелдиҥ агару ишке кӧрӱминеҥ бис неге ӱренедис?

⁷ Павел ченемели јаан миссионер болгон. Ол кӧп јуундар тӧзӧгӧн. Андый да болзо, кезик улус оны тӱҥей ле јамандап туратан. Је јилбилӱ немези дезе, Павел олорго кандый каруу бергени: ол олорго кӧп улуска Христостыҥ ӱренчиги болорго болужып бергем деп айтпай, «мен олордоҥ кӧп... иштеп јадым» дегени (2 Кор. 11:23). Айдарда, Павел кӧп улусты чындыкка экелгенин тоолоды ба? Јок. Оныҥ учун бис те Павел чилеп ундыбай јӱректер, Иегова бистиҥ албаданып иштеп јӱргенисти ле турумкай болгонысты баалап турган деп.

8. Агару ишти бӱдӱрип тура, биске нени ундыбас керек?

⁸Бистиҥ ижис Иегованы сӱӱндирип јат. Бир катап Иисус 70 ӱренчигин јарлаар ишке ийген. Оноҥ олор сӱӱнчилӱ јанып келеле, Иисуска мынайда айттылар: «Кайракан, Сениҥ адыҥды адап јакарганыста, шилемирлер де биске багып турдылар!» Је Иисус олорго: «Јелбистер слерге багып турганына сӱӱнбегер, ады-јолыгар теҥериде бичилгенине сӱӱнигер!» — деген (Лука 10:17—20). Иисус билген болгон, мындый јилбилӱ, сӱӱнчилӱ учуралдар јаантайын ла болбос деп. Ол јетен ӱренчиктиҥ јарлаган улузы Христостыҥ ӱренчиги болуп калган ба, јок по бис билбезис. Оныҥ учун Иисус андый сӧстӧриле ӱренчиктерин мындый немеге ӱредерге сананган: улус сӱӱнчилӱ јарды угуп турза јакшы эмей, је эҥ јаан сӱӱнчи — агару ишке албаданып туружып, Иегованы сӱӱндиргени болуп јат.

9. Кӱчтер де болуп турза, је оноҥ ары јарлап турзаас кандый кайрал аларыс? (Галаттарга 6:7—9).

⁹ Галаттарга 6:7—9 кычырыгар. Кандый да кӱчтер болотон болзо, оноҥ ло ары јарлап турган болзоос, ӱргӱлји јӱрӱм аларыс. Бис чындыктыҥ ӱренин отургызып, сугарып турган болзоос, Павелдиҥ айтканыла, «тынга болуп» ӱрендеп јадыс. Ӧскӧртӧ айтса, агару тын кайдӧӧн ууланат, бис ары ла барып иштенедис. Је колысты бош салбай иштенип турган болзоос, Иегова биске: «Тыннаҥ ӱргӱлји јӱрӱмди јууп алар[ыгар]» — деп айдат. Иегова бу кайралды слердиҥ ӱреткен улузыгар сууга чӧҥӱрилбезе де берер.

10. Улус чындыкты угар ба, укпас па недеҥ камаанду?

¹⁰Кижи чындыкты угар ба, јок по озо ло баштап оныҥ јӱрегинеҥ камаанду. Бу шӱӱлтени Иисус аш ӱрендеечи керегинде укаа сӧслӧ јартаган. Аш ӱрендеечи ӱрен чачарда, ӱрен башка-башка јерге тӱшкен. Јӱк ле јакшы јерге тӱшкен ӱрен ӧзӱп, тӱжӱм экелген (Лука 8:5—8). Башка-башка јер — улустыҥ јӱрегин кӧргӱзет (Лука 8:11—15). Канайып отургызылган ӱренниҥ тӱжӱм экелери аш ӱрендеечинеҥ камаанду болбой јат, анайып ла кижиниҥ јӱрегине отургызылган чындыктыҥ ӱрени тӱжӱм экелер бе, јок по бистеҥ камаанду эмес. Бистиҥ молју — Каандыктыҥ ӱренин оноҥ ло ары отургызары. Апостол Павелдиҥ айтканыла «кажызы ла канча кире кӱчин салып иштегениле јал алар», је јеткен једимдериле эмес (1 Кор. 3:8).

11. Иегова Нойды нениҥ учун јакшы јарчы деп кӧргӧн? (Кадарындагы јурукты кӧрӱгер.)

¹¹ Иегованыҥ ишчилериниҥ тӱӱкизин кӧрзӧ, алдынаҥ ла бери кӧп саба улус Кудайдыҥ сӧзин керексибей јат. Темдектезе,  Нойдыҥ ӧйин сананып ийектер. Ол чынныҥ јарлыктаачызы болуп, Кудайдыҥ сӧзин 40—50 кире јыл јарлаган (2 Петр 2:5). Улус Кудайдыҥ сӧзин угар деп, Ной иженген ле болор. Је Иегова айалганы озодоҥ билер болгон. Ол Нойго мынайып айткан: «Сен бойыҥ, уулдарыҥ, ӱйиҥ, келиндериҥ керепке отурарыгар» (Баш. 6:18). Соҥында Ной ковчегке кӧп лӧ улус батпайтан эмтир деп оҥдоп ийген болор (Баш. 6:15). А бис эмди билерис, ол ӧйдӧ Нойды кем де укпаган деп (Баш. 7:7). Андый болордо Иегова Нойды јаман јарчы деп кӧргӧн бӧ? Јок. Бир де андый эмес! Нойдыҥ ижи карын да једимдӱ болгон. Нениҥ учун дезе Кудай ого канай айткан, ол ӱзе ле анайып ла эдип салган (Баш. 6:22).

12. Иеремияга сӱӱнчизин јылыйтпаска не болушкан?

¹² Судурчы Иеремия база канча јылдар јарлаган. Оны да кӧп улус укпаган. Керек дезе, ого удурлажып эштеп тургулайтан. Мынаҥ улам Иеремия чӧкӧй береле, «айса нени де куучындабазым» деп сананган. Је ол јарлабай отурып болбоды (Иер. 20:8, 9). Ого чӧкӧбӧскӧ ле сӱӱнчизин јылыйтпаска не болушкан? Баштапкызында, Иеремияныҥ куучындаган јары улуска келер ӧйгӧ ижемји берген (Иер. 29:11). Экинчизинде, ол Иегова Кудайдыҥ адынаҥ јарлап турганына оморкогон (Иер. 15:16). Бӱгӱнги кӱнде бистиҥ јарлап турган јарыс бу карачкы телекейде јаткан улуска база ижемји берип јат. Анайда ок, бис Иегованыҥ адын аданып, оныҥ Керечилери болодыс. Бу эки шӱӱлтени ундыбай турзаас, улус бисти укпай да турза, сӱӱнчибисти јылыйтпазыс.

13. Марк 4:26—29-та бичилген Иисустыҥ укаа сӧзи бисти неге ӱредет?

¹³Кижиниҥ ич-кӧгӱзи араайынаҥ ӧзӧт. Бу шӱӱлте Иисустыҥ укаа сӧзинде бичилген Марк 4:26—29 (кычырыгар). Кыраачы ӱренди отургызып салала, уйуктап јатса, ӱрен араайынаҥ ӧзӱп јат. Ол оныҥ ӧзӱмин тӱргендедип болбос. Кижиниҥ кӧгӱс ӧзӱми база анайып ла арай болот. Ол баштап тарый кӧрӱнбей де турар. Бис кижиниҥ кӧгӱс ӧзӱмин тӱргедедип болбозыс. Оныҥ учун кижи слердиҥ сакыганаарла тӱрген ӧспӧй турза, бир де санааркабагар, колоорды бош салбагар. Канайып кыра ижинде ӱренниҥ ӧзӱмин сакыыр керек, анайып ла ӱренчиктер белетеер иште чыдажып сакыбаганчас неме болбос (Иак. 5:7, 8).

14. Кезикте улустыҥ кӧгӱс јанынаҥ ӧзӧрин канча јылдар сакыырга келижет деп, кандый тем кӧргӱзет?

¹⁴ Кезик јерлерде ӱренип турган кижиниҥ сууга чӧҥӱрилерин канча јылдар сакыырга келижет. Темдектезе андый учурал Глэдис ле Руби Аллен деп эје-сыйындарда болгон. Олорды 1959 јылда Канаданыҥ Квебек деп провинциязындӧӧн текши пионерлер этире аткарган *. Андагы улус улустыҥ кӧрӱм-санаазынаҥ коркып, чочып туратан. Анайда ок католический серкпенеҥ камаанду болгылаган. Глэдис эје куучындайт: «Бис кажы ла кӱн айылдар сайын сегис саат јарлап јӱретенис. Је биске кем де эжигин ачпас болгон! Карын эжигиндӧӧн базып ла келзеес, эжигиниҥ жалюзизин тӱжӱрип ийгилеер. Мынайып бис эки јыл јарлаганыс. Је бис чӧкӧбӧгӧнис». Бир эмеш ӧйдӧҥ улус Иегованыҥ Керечилерин эмеш тооп эштеп баштагылаган. Кезиги дезе Агару Бичикти де ӱренерге кӱӱнзей бергендер. Эмди Квебекте ӱч је ле деген јуун бар (Иса. 60:22).

15. 1 Коринфтегилерде 3:6, 7-де ӱренчиктер белетеери керегинде бис нени билип аладыс?

¹⁵Ӱренчиктер белетеери јаҥыс кижиниҥ ижи эмес. Ӱренип турган кижи  сууга чӧҥӱрилзин деп, бастыра јуун болужып јат. (1 Коринфтегилерге 3:6, 7 кычырыгар.) Темдектезе, ака јарлап јӱреле, кижиге буклет эмезе журнал артыргызып, такып келерге куучындажып алган болзын. Је оноҥ ого такып барарга келишпей турарда, ол ӧскӧ аканы сурап јат. Бу ака барала, Агару Бичикле ӱредӱ баштап ийген. Оноҥ ол ӱредӱге башка-башка ака-эјелер кычырат. Олордыҥ кажызы ла ӱренип турган кижиге Иеговала јууктада таныжарга болужат. Анайып бу ака-эјелер ончозы чындыктыҥ ӱренин сугарат. Оноҥ ӱренип турган кижи сууга чӧҥӱрилерде ӱренди чачканы да, кескени де сӱӱнип јат (Иоанн 4:35—38).

16. Су-кадыгыс уйадап, јажыс јаанай бергенинеҥ улам јарлаар иште сӱӱнчисти јылыйтпаска биске не болужар?

¹⁶ Бистиҥ кезигис су-кадыгыс уйадаганынаҥ улам, јажыс јаанаганынаҥ улам јарлаар ишке ле ӱренчиктер белетеер ишке эрчимдӱ туружып болбой јат. Андый да болзо, бис ончобыс бир ле ишке јӧмӧжип турганыска сӱӱнер аргалу. Темдектезе, Давид каанныҥ учуралын кӧрӱп ийектер. Ол 600 јуучылыла кожо амаликитяндар олордыҥ билелерин, јӧӧжӧзин јуулап апарып апарган деп угуп ийгилеген. Оныҥ учун олор амаликитяндардыҥ кийнинеҥ сӱрӱжип баргылаган. Је 200 јуучылы коркышту тыҥ арыйла, оноҥ ары барып болбогон. Андый да болзо, Давид арткан амаликитяндарды јеҥип алган. Јеҥӱниҥ кийнинеҥ амаликитяндардаҥ айрып алган јӧӧжӧни Давид бастыра 600 јуучылына теҥ ӱлештирген (1 Сам. 30:21—25). Бу учуралда сӱреен јаан ӱредӱ бар. Ӱренип турган кижиниҥ чӧҥӱрилгени бастыра јуунныҥ јеҥӱзи болуп јат. Оныҥ учун слер агару ишке канча кире аргагар бар акту јӱрегердеҥ турушкан болзоор, слер бастыра јуунла теҥ ле иштеген болодоор.

17. Бис Иеговага нениҥ учун быйанду болодыс?

¹⁷ Иегова бисти једимдӱ ишчи деп кӧрӱп турганына быйанду болодыс. Ол оҥдоп јат, бис улусты Каандык керегинде јарды уксын деп албадап болбозыс деп. Иегова озо ло баштап бистиҥ акту кӱӱнистеҥ албаданып иштенгенисти баалап јат. Ол бисти шак ла бу учун кайралдаар (Иоанн 14:12). Бого ло коштой јуунныҥ ижине канча ла кире туружып турган болзоос, сӱӱнчини јылыйтпаска нени эдер керек деп ол биске јартап берип јат. Оныҥ учун бир де алаҥзыбагар, слер чӧкӧбӧй, колоорды бош салбай иштенип турган болзоор, Иегова слерди једимдӱ ишчи деп кӧрӧт.