1. Нениҥ учун Иегова бисти кемле де тӱҥдештирбей јат?

ИЕГОВА ончо јайаандарын башка-башка эдип јайаган. Ӧзӱмдерди, тындуларды, ол тоодо, кижини де. Јердиҥ ӱстинде слерге тӱҥей кижи јок. Оныҥ учун Иегова бисти кемле де тӱҥдештирбейт. Ол бистиҥ кылык-јаҥысты ла јӱрегисте не барын јакшы билер (1 Сам. 16:7). Анайда ок нени јакшы эдип билеристи, нени эдип болбозысты ла кандый айалгада чыдаганысты да билер. Кудай бистеҥ эдип болбос неме некебейт. Оныҥ учун биске бойыска Иегованыҥ кӧзиле кӧрӧргӧ ӱренер керек. Анайып ӱренип алзаас, бийиркенбезис ле бойысты уйан кӧрбӧзис (Рим. 12:3).

2. Бойысты улусла нениҥ учун тӱҥдештирбес керек?

² Бисле кожо ӧмӧ-јӧмӧ иштеп јӱрген ченемелдӱ чындык ака-эјелер бары кандый јакшы (Евр. 13:7). Бис олордоҥ тем алып, јарлаар иштиҥ темигӱлерин тыҥыдар аргалу (Флп. 3:17). Је олордоҥ тем алары ла бойысты олорло тӱҥдештирери чек эки башка неме болот. Бис бойысты улусла тӱҥдештирип турзаас, олорго кӱйӱнип, кунугып, бойысты неге де турбас кижи деп сананар болорыс. Ол эмезе ака-эјелердеҥ артык болорго албаданарыс. Ӧткӧн јӧрмӧлдӧ ӱренгенисле, мынаҥ улам Иеговала колбуларыс ӱрелердеҥ айабас. Оныҥ учун Иегова бистерди мынайып кӱӱнзедет: «Кажы ла кижи бойыныҥ керектерин ченезин [«бойын улусла тӱҥдештирбезин», ЈТ], ол тушта ӧскӧ улустаҥ эмес, бойы-бойында јараду алар» (Гал. 6:4).

3. Слер бойоордыҥ кандый кӧгӱс једимдереердеҥ сӱӱнчи аладыгар?

³ Иегова слерди бойоордыҥ кӧгӱс једимдереер учун сӱӱнзин деп кӱӱнзейт. Темдектезе, слер чӧҥӱрилип  калган болзогор, бу амадуга јединип алганаар учун сӱӱнер аргалу. Бу јӧпти слер бойоор Иегованы сӱӱп турганаардаҥ улам чыгарганаар. Оноҥ бери кандый једимдерге јеткенеерди сананып ийзегер. Агару Бичикти, алдындагызына кӧрӧ, кажы ла кӱн кычырып, јазап шиҥдеп турган болороор. Анайда ок мӱргӱӱлдереер де акту јӱректеҥ ле тереҥ болуп калган болор (Сар. 141:2). Эмезе јарлаар иште бойоорды јайым тудунып, јарлаар иштиҥ јепселдериле јакшы тузаланадыгар. Ол эмезе Иеговала најылажып турганаардаҥ улам јакшы эш-нӧкӧр, ада-эне болуп калган болороор. Мындый једимдереерди кӧрӱп, слер јаан сӱӱнчи алар аргалу.

4. Бу јӧрмӧлдӧ нени шӱӱжерис?

⁴ Бис ака-эјелериске де бойыныҥ кӧгӱс амадуларын кӧрӱп, сӱӱнчи алзын деп, болужар аргалу. Анайда ок олорго бойын ака-эјелерле тӱҥдештирбезин деп болужар аргалу. Бу јӧрмӧлдӧ ада-энелер, эш-нӧкӧрлӧр, аксагалдар, анайда ок ака-эјелер мыны канайып эдер аргалу деп шӱӱжерис. Бого коштой једингедий амадулар тургузарга болужатан библиялык принциптер кӧрӧрис.

5. Ефестегилерге 6:4-лӧ болзо, ада-энелерге нени этпес керек?

⁵ Ада-энелер балдарын ӧскӧ балдарла тӱҥдештирип, олордоҥ эдип болбос немени некеп турза, балдар бойлорын неге де турбас, уйан деп сананардаҥ айабас. (Ефестегилерге 6:4 кычырыгар.) Сачико * деп эје мынайып куучындаган: «Ӱредӱчилерим мени класстыҥ эҥ артык ӱренчиги болор деп сананган. Анайда ок адам ла ӱредӱчилерим Иегованыҥ Керечилери керегинде јакшы сананзын деп, энем де мени јакшы ӱрензин деп, айдып туратан. Керек дезе, ончо экзамендерди де јакшы табыштырзын деп кӱӱнзеген. Је андый болор аргазы јок деп мен билгем. Школды божотконымнаҥ бери канча јыл ӧдӱп те калган болзо, кезикте Иегованы сӱӱндирип тургам ба, јок по деп алаҥзып јадым».

6. Сарын 131:1, 2-деги сӧстӧрдӧҥ ада-энелер неге ӱренер аргалу?

⁶ Сарын 131:1, 2-де (кычырыгар) ада-энелерге тузалу ӱредӱ бар. Давид каан «улу болорына ла мак аларына јӱткӱбеген» деп айткан. Давидтиҥ јобош болгоны оны токунаткан ол эмезе ого  бойынаҥ ӧйинеҥ ӧткӱре кӧпти сакыбаска болушкан. Ада-энелер Давидтиҥ сӧстӧринеҥ неге ӱренер аргалу? Олор јобош ло бойыныҥ кемин билип турза, бойынаҥ ла балдарынаҥ эдип болбос немени некебес. Ада-энелерге балдарыныҥ нени јакшы эдип турганын, нени эдип болбой турганын ајаруга алып, олорго једингедий амадулар тургузарга болужар керек. Мынайып, балдар ада-энезиниҥ сӱӱжин сезер. Марина деп эје мынайып куучындаган: «Энем мени акамла да, карындажымла да, анайда ок ӧскӧ балдарла качан да тӱҥдештирбеген. Ол меге кажы ла кижиниҥ јайалтазы башка ла Иегова бистиҥ кажыбысты ла сӱӱп јат деп айдып туратан. Оныҥ учун мен бойымды улусла тӱҥдештирбейтем».

7, 8. Ӧбӧӧни ӱйин тооп турганын канайып кӧргӱзер аргалу?

⁷ Христиан эр кижи ӱйине кӱндӱ эдер учурлу (1 Петр 3:7). Ӧскӧртӧ айтса, ого ӱйин тооп ла баалап турар керек. Ол ӱйинеҥ эдип болбос немени некебейт ле оны ӧскӧ ӱй улусла тӱҥдештирбейт. Нениҥ учун тӱҥдештирбес керек? Ӧбӧӧни Иегованыҥ Керечизи эмес Роза эјениҥ темин кӧрӱп ийектер. Ӧбӧӧни оны баалабай, ӧскӧ ӱй улусла јаантайын тӱҥдештирип турарда, Роза эје бойын неге де турбас, оны кем де качан да сӱӱбес деп сананган. Ол бойы мынайып айдат: «Эмди дезе, Иегова мени баалап турган деген сӧстӧр сӱреен керектӱ болот». Христиан эр улус ӱйлерин тооп јат. Нениҥ учун дезе ӱйлерине канайып баштанганынаҥ олордыҥ Иеговала колбулары ла билениҥ ырызы камаанду деп оҥдогылайт *.

⁸ Ӱйин тооп турган эр кижи ӱйи керегинде улуска ла оныҥ бойына јакшыны айдып, оны мактайт (Укаа 31:28). Ӧткӧн јӧрмӧлдӧ айдылган Катеринага ӧбӧӧни бойын уйан кӧрбӧскӧ болужат. Катерина эјени јаш тужында энези јамандап, ӧскӧ кызычактарла тӱҥдештирип туратан. Мынаҥ улам ол бойын улусла тӱҥдештирип, Иегованыҥ Керечизи де болуп каларда, мындый сезимдери чыгып келетен. Је ӧбӧӧни ого, бойына чын кӧрӱмдӱ болорго болушкан. Катерина эје мынайып куучындаган: «Ӧбӧӧним мени сӱӱп јат. Мени јакшы керектерим учун мактап, мен учун мӱргӱп јат. Анайда ок Иегованыҥ јакшы кылык-јаҥдарын эске алындырат. Бу меге бойым керегинде јаман сананбаска болужат».

9, 10. Аксагалдар бойын ӧскӧ улуска кӧрӧ јаман деп сананып турган эјеге канайып болушкан?

⁹ Бойын улусла тӱҥдештирип турган ака-эјелерге аксагалдар канайып болужар аргалу? Хануни деп эјениҥ темин кӧрӱп ийектер. Кичинек тужында оны кем де мактабаган. Ол айдат: «Мен уйалчаҥ болгом. Ӧскӧ балдар менеҥ артык деп сананып туратам. Оныҥ учун мен бойымды јаантайын улусла тӱҥдештиретем. Сууга чӧҥӱрилип, пионердиҥ ижин де баштап салган болзом, ака- эјелер мени баалап турган деп бӱдерге кӱч болгон». Је эмди ол Кудайга сӱӱнчилӱ иштеп јат. Хануни эјеге кӧрӱмин солыырга не болушкан?

¹⁰ Оныҥ айтканыла, јаан болушты ого аксагалдар јетирген. Олор оны јакшы тем кӧргӱзип турган деп мактап, јуунга керектӱ деп бӱдӱмјилеп туратан. Хануни мынайып бичиген: «Аксагалдар меге  сыйындарга болужып турзын деп јакарып туратан. Мынаҥ улам мен бойымды јуунга керектӱ деп оҥдогом. Олордыҥ мени мактап, 1 Фессалоникадагыларга 1:2, 3-теги сӧстӧрди кычырганы эмдиге јетире санаама кирет. Бу мениҥ јӱрегимди тыҥ томулткан. Аксагалдардыҥ мындый болужы учун мен јаан быйанду. Мынаҥ улам Иегованыҥ организациязында бойымныҥ јеримди баалап баштагам».

11. Ал-санаага тӱжӱп калган ака-эјелерге бис канайып болужар аргалу? (Исаия 57:15).

¹¹ Исаия 57:15 кычырыгар. Иегова ал-санаага тӱжӱп калган улусты кичееп, кӧрӱп јат. Андый ака-эјелерге јӱк ле аксагалдар эмес, је бистиҥ кажыбыс ла болужар аргалу. Мындый аргалардыҥ бирӱзи бой-бойыска акту јӱрегистеҥ ајару эдери. Иегова бойыныҥ койлорын баалап јат, оныҥ учун бисти бой-бойын сӱӱзин деп, кӱӱнзеп јат (Кол. 3:12). Бойын уйан деп сананып турган ака-эјелерге бис база канайып болужар аргалу? Биске јобош болуп, бойыстыҥ јайалталарысла мактанбас керек. Нениҥ учун дезе бойыска јаан ајару эдип турзаас, ака-эјелер кӱйӱне берердеҥ айабас. Карын, бис бойыстыҥ јайалталарысты ла билгирлеристи бой-бойыска болужарга тузаланадыс (1 Петр 4:10, 11).

12. Иисуска нениҥ учун тегин улус тартылган? (Кадарындагы јурукты кӧрӱгер.)

¹² Иисус ӱренчиктериле канайып баштанганынаҥ бис кӧп немеге ӱренер аргалу. Ол јерде јӱрген эҥ улу кижи де болгон болзо, јобош ло улуркабас јӱректӱ болгон (Матф. 11:28—30). Ол кӧп билгирлерлӱ ле сагышту болгоныла бир де мактанбаган. Ол тегин улуска јарт болзын деп, јӱрегин томулткадый темдер тузаланып ӱреткен (Лука 10:21). Иисус бийиркек кудай јаҥныҥ башчыларына кӧрӧ Кудай кажы ла кижини баалап турган деп кӧргӱскен (Иоанн 6:37). Ол кемди де ылгабаган, бастыра улуска тоомјылу баштанган.

13. Иисус ӱренчиктерин сӱӱген ле олорго јалакай баштанган деп недеҥ кӧрӱнген?

¹³ Иисус ӱренчиктерин сӱӱген ле олорго јалакай баштанган. Ол ӱренчиктериниҥ јайалталары да, айалгалары да башка деп билген. Оныҥ учун олордыҥ молјулары ла једимдери бир тӱҥей болбос деп оҥдогон. Је Иисус олордыҥ кажызын ла ижин акту јӱректеҥ бӱдӱргени учун баалаган. Мыны оҥдоорго, Иисустыҥ талант акча керегинде укаа сӧзи болужат. Бу укаа сӧстӧги кижи кулдарын јууйла, олордыҥ кажызына ла «кирезинче» талант акча берген. Кулдардыҥ экӱзи јакшы иштенген, је олордыҥ бирӱзи бийине кӧп талант акча экелген. Је андый да болзо, бий кижи олорды мактап, экилезине: «Јакшы керсӱ ле бӱдӱмјилӱ кул» — деп айткан (Матф. 25:14—23).

14. Бис Иисустаҥ тем алып, ака-эјелерди канайып сӱӱрис ле олорго јалакай баштанарыс?

¹⁴ Иисус бисти де сӱӱп, биске јалакай баштанат. Ол бистиҥ јайалталарыс ла айалгаларыс башка деп оҥдоп јат. Је бис ижисти бойыстыҥ кӱчис јеткенче эдип турзаас, ол сӱӱнет. Биске Иисустаҥ тем алар керек. Ака-эјелер бистеҥ улам бойлорын эш-кереги јок деп сананбазын эмезе ӧскӧ ака-эјелер чилеп кӧп иштенип болбой турган деп кунукпазын. Карын, олорды Иеговага бастыра ийде-кӱчинеҥ иштеп турган деп мактагар.

15, 16. Эјеге једингедий амадулар тургусканы канайып болушкан?

¹⁵ Кӧгӱс амадулар тургузып турзаас, бис ырысту болорыс ла јӱрӱмис калас  болбос. Је биске улустыҥ эмес, бойыстыҥ айалгаларысты ла јайалталарысты кӧрӱп, једингедий амадулар тургузар керек. Једингедий амадулар тургузып турзаас, бис чӧкӧнбӧзис те, ал-санаага тӱшпезис те (Лука 14:28). Эмди Мидори деп пионер эјениҥ темин кӧрӱп ийектер.

¹⁶ Мидори эјениҥ Керечи эмес адазы оны карындажыла, сыйнызыла, анайда ок кожо ӱренген балдарыла јаантайын тӱҥдештирген. Мидори эје айдат: «Мен бойымды эш-кереги јок кижи деп санангам». Је јаанап келеле, оныҥ бойына кӧрӱми солынган. Мидори эје оноҥ ары куучындайт: «Мен Агару Бичикти кажы ла кӱн кычырып јадым. Нениҥ учун дезе анайып мениҥ јӱрегимде амыр болот, анайда ок Иегова мени сӱӱп турган деп сезедим». Бого коштой ол једингедий амадулар тургузып, бу амадуларына јединерге Иегованаҥ болуш сурап јат. Мынаҥ улам ол бойыныҥ кӧгӱс амадуларына једингенин кӧрӱп, сӱӱнер аргалу.

17. Санаабысты солыырга не эдер керек? Бу кандый једимге экелер?

¹⁷ Бойыска чын кӧрӱмдӱ болорго ӧй керек болот. Оныҥ учун Иегова бисти санаабысты оноҥ ло ары солызын деп кӱӱнзедет (Еф. 4:23, 24). Санаабысты солыырга биске мӱргӱӱр, Агару Бичик кычырар ла кычырганысты шӱӱп сананар керек. Бу керектерди кӱнӱҥ сайын эдерге, Иегованаҥ болуш сурагар. Кудайдыҥ агару тыны слерге бойоорды улусла тӱҥдештирбеске болужар. Анайда ок Иегова слерге кӱйӱнип эмезе бийиркенип баштаганаарды кӧрӱп ийерге ле бу јаман кылык-јаҥдардаҥ капшай айрыларга болужар.

18. 2 Летопись 6:29, 30 бистиҥ јӱрегисти канайып токунадат?

 ¹⁸ 2 Летопись 6:29, 30 кычырыгар. Иегова бистиҥ јӱрегисте не барын билер. Анайда ок бисти јастыраларысла, бу телекейдиҥ тыныла тартыжып турганысты билер. Мыны кӧрӱп, Иегова бисти оноҥ тыҥ сӱӱп јат.

19. Иегова биске сӱӱжин кандый темниҥ болужыла кӧргӱзет?

¹⁹ Иегова бисти сӱӱп турганын кӧргӱзерге, эне кижиниҥ балазына карузып турганыныҥ темин тузаланат (Иса. 49:15). Рэйчел деп эје мынайып куучындаган: «Мениҥ Стефани кызым чыгатан ӧйине јетпей чыккан. Мен оны баштап ла кӧрӧримде, ол андый кичинек ле арга јок болгон. Оныҥ учун ол баштапкы айларында больницада болгон, је врачтар меге оны колго аларга јарадып туратан. Мынайып, бу ӧйдиҥ туркунына бис бой-бойыска јуук болуп калганыс. Эмди Стефаниге алты јаш. Ол бойыла јажыт балдарга кӧрӧ кичинек кӧрӱнет. Мен оны јӱрӱми учун тартыжып, меге јаан сӱӱнчи экелгени учун тыҥ сӱӱп јадым». Кудай бисти ого чындык артарга тартыжып турганыс учун анайып ла тыҥ сӱӱп јат. Бу бисти сӱреен тыҥ токунадат.

20. Иегованыҥ ишчизи нениҥ учун сӱӱнчилӱ болор аргалу?

²⁰ Сен Иеговага иштеп јадыҥ, оныҥ учун сени сӱӱп турган оныҥ јаан билезине киредиҥ. Иегова бойы да сени баалап јат. Ол сени бойына улустаҥ артык болгоныҥ учун эмес, је оноҥ ӱренип, солынарга белен јобош кижи деп кӧргӧни учун јууктадып алган (Сар. 25:9). Сениҥ албаданып, иштенип турганыҥды Иегова баалап јат деп бир де алаҥзыба. Турумкай болуп, Иеговага чындык артып турганыҥ јӱрегиҥ јалакай ла јымжак деп кӧргӱзет (Лука 8:15). Оныҥ учун Иеговага бойыҥныҥ бастыра кӱчиҥнеҥ оноҥ ло ары иште. Анайып, сен бойыҥныҥ једимдериҥди кӧрӱп, сӱӱнчилӱ болорыҥ.