1, 2. 2018 јылда бастыра јердиҥ ӱстинде миллиондор тоолу улусты кандый туштажу бириктирер? (Јӧрмӧлдиҥ бажындагы јурукты кӧрӱгер.)

2018 јылда тулаан айдыҥ 31-чи кӱни миллиондор тоолу улуска аҥылу кӱн болор. Кӱн ашкан кийнинде бастыра јердиҥ ӱстинде Иегованыҥ Керечилери ле ӧскӧ дӧ кӧп улус Иисус Христостыҥ божогон кӱнин эске алатан Эҥирди ӧткӱрерге јуулыжар. Бу туштажуныҥ кажы ла јыл бӱдӱн јердиҥ улузын бириктирип турганы сӱреен кайкамчылу!

² Мындый аҥылу туштажуга бастыра јердиҥ ӱстинде миллиондор тоолу улустыҥ јуулышканын кӧрӱп, Иеговага ла Иисуска кандый сезимдер келер деп сананып ийзеер. Агару Бичиктиҥ судурыла болзо, кем де тоолоп болбос «ончо уктардаҥ, ӱйелердеҥ, калыктардаҥ ла тилдердеҥ» болгон «кара-бајырт улус»: «Улусты ширееде отурган Кудайыс ла Кураан аргадайт» — деп, тыҥ ӱнденип кыйгырыжар (Ачыл. 7:9, 10). Чындап та, Кайраканныҥ  Эҥирин ӧткӱрери — Иегованы ла Иисусты мактаар кайкамчылу арга болот!

3. Бу јӧрмӧлдӧ бис кандый сурактар шӱӱп кӧрӧрис?

³ Бу јӧрмӧлдӧ бис мындый сурактар шӱӱп кӧрӧрис: 1) Кайраканныҥ Эҥирин ӧткӱрерге, бистиҥ кажыбыс ла канайып белетенер аргалу? 2) Бу туштажу Кудайдыҥ албатызын канайып бириктирет? 3) Бирлик болорына бис канайып јӧмӧжӧр аргалу? 4) Кайраканныҥ Эҥири калганчы катап качан болор?

4. Кайраканныҥ Эҥирине нениҥ учун албаданып келер керек?

⁴ Бу тужтажуда нениҥ учун болор керек? Јунныҥ туштажулары — Кудайга бажырарыныҥ бӧлӱги деп ундыбай јадыс. Оныҥ учун кажы ла јылда болуп турган эҥ учурлу туштажуга келерге албаданган улусты Иегова ла Иисус баалап јат деп, бис алаҥзыбай јадыс. Иегова ла Иисус бисти бу туштажуны болор-болбос шылтактаҥ улам качан да божотпос деп билип турзын. Христиан туштажуларды баалап турганыс бистиҥ керектеристеҥ кӧрӱнип турган болзо, Иеговада бистиҥ адысты «эзем бичигинде» — «јӱрӱмниҥ тӱрбегинде» кичееп алатан база бир шылтак болор. Ондо ӱргӱлји јӱрӱм алатан улустыҥ ады-јолы бичилген (Мал. 3:16; Ачыл. 20:15).

5. Кайраканныҥ Эҥиринеҥ озо, «бӱдӱп турганыгар ба деп, бойыгарды... ченегер» деген сӧстӧрди канайып тузаланарга јараар?

⁵ Кайраканныҥ Эҥиринеҥ канча да неделе озо, Иеговала колбулараар керегинде мӱргӱӱлде шӱӱп сананарга ӧй табыгар. (2 Коринфтегилерге 13:5 кычырыгар.) Элчи Павел Коринфтеги ака-эјелерге јӧп берген: «Бӱдӱп турганыгар ба деп, бойыгарды... ченегер». Мыны канайып эдер? Темдектезе, бойыстаҥ мынайып сураарга јараар: «Иегованыҥ бойыныҥ табын бӱдӱрерге тузаланып турган сок јаҥыс организациязына кирип турганыма алаҥзыбайдым ба? Мен јарлаар ишке ле ӱренчиктер белетеерине бастыра ийде-кӱчимди бередим бе? Бис калганчы кӱндерде јададыс ла Сатананыҥ башкарузы удабас јоголып калар деп, акту кӱӱнимнеҥ бӱдӱп турганым керектеримнеҥ кӧрӱнет пе? Учурланган тужымда Иеговага ла Иисуска канайып тыҥ бӱткем, эмди де анайып ла бӱдедим бе?» (Матф. 24:14; 2 Тим. 3:1; Евр. 3:14). Бу сурактарды шӱӱп сананганы бойысты шиҥдеп кӧрӧргӧ болужар.

6. а) Ӱргӱлји јӱрӱмге кандый јол апарат? б) Бир аксагал Кайраканныҥ Эҥирине кажы ла јыл канайып белетенет, бис оноҥ кандый тем алар аргалу?

⁶ Кайраканныҥ Эҥириниҥ јаан учурын јартап турган бистиҥ бичиктерди кычырып, шӱӱп сананыгар. (Иоанн 3:16; 17:3 кычырыгар.) Ӱргӱлји јӱрӱмге јӱк ле бир јол апарат. Ӱргӱлји јӱрӱмди алатан сок јаҥыс арга — Иегова керегинде билгирлер алары ла Оныҥ тун туулган Уулына, Иисус Христоско, бӱдери. Бу Эҥирге белетенип аларга, Иеговага ла Иисуска јууктаарга болужатан темаларды шиҥдегер. Темдектезе, узак ӧйгӧ аксагал болуп турган аканыҥ темин кӧрӱп ийеектер. Ол кӧп јылдардыҥ туркунына  «Каруулчы бакананаҥ» Кайраканныҥ Эҥири керегинде ле Иегова ла Иисус биске сӱӱжин канайып кӧргӱскени керегинде јӧрмӧлдӧр јууйт. Ол ака Кайраканныҥ Эҥиринеҥ канча да неделе озо бу јӧрмӧлдӧрди ойтодоҥ кычырып, бу туштажуны нениҥ учун ӧткӱрер керек деп шӱӱп сананат. Кезикте оныҥ јууган јӧрмӧлдӧрине бир-эки јӧрмӧл кожулат. Бу ака јууп алган јӧрмӧлдӧрди ойтодоҥ кычырып, анайда ок Агару Бичикти Кайраканныҥ Эҥирин байрамдаар ӧйдӧ кычыратан графикле лаптап кычырып, кажы ла јыл бойына јаҥы шӱӱлте табат. Је эҥ ле учурлузы — јылдаҥ јылга Иеговага ла Иисуска аканыҥ сӱӱжи тыҥыйт. Слер де анайып шиҥдезеер, Иеговага ла Иисуска сӱӱжигер тыҥыыр ла олорго оноҥ тыҥ быйанду болуп калараар. Анайып, Кайраканныҥ Эҥири слерге чыннаҥ ла аҥылу туштажу болор.

7. а) Иисус Кайраканныҥ Ажын ӧткӱрзин деп јакару берген эҥирде не керегинде мӱргӱген? б) Иегова Иисустыҥ мӱргӱӱлине каруузын берген деп, недеҥ кӧрӱнет?

⁷ Иисус теҥеридеги Адазыла бирлик болгон. Ол Кайраканныҥ Ажын байрамдазын деп јакарган эҥирде, ӱренчиктери андый ла ок бирлик болзын деп мӱргӱген. (Иоанн 17:20, 21 кычырыгар.) Иегова бу мӱргӱӱлге каруузын берген бе? Берген эмей. Кайраканныҥ Эҥирин ӧткӱрери Иегованыҥ Керечилериниҥ бирлик болгонын сӱреен јакшы керелейт: бастыра јердиҥ ӱстинде Кудай бойыныҥ Уулын јердӧӧн ийген деп бӱдӱп турган башка-башка албатылар ла эдиниҥ ӧҥи башка миллиндор тоолу улус јуулыжат. Кезик јерлерде кудайлык туштажуларда угы-тӧзи башка улус кожо јуулышпай јат, оныҥ учун андый туштажуларды улус јаратпай јат. Је Иеговага ла Иисуска мындый бирлик сӱреен јарайт.

8. Иегова Иезекииль ажыра нени судурлаган?

⁸ Мындый бирликке Иегованыҥ албатызы кайкабай јат, нениҥ учун дезе мындый болор деп, Кудай озодоҥ айдып салган. Иегова Иезекиильге бирӱзинде «Иудага» деп бичилген, экинчизинде «Иосифке» деп бичилген эки тайакты бириктирип ийзин деп јакарганыла нени айтканын эске алып ийеектер. (Иезекииль 37:15—17 кычырыгар *.) «Ищите Царство, а не материальных благ» деген брошюрада «Кычыраачылардыҥ сурактарында» мынайып бичилген: «Израиль албаты Берилер болгон јерге кайра јанып келзе, ойто бир албаты болуп калар деп, Иегова бойыныҥ Иезекииль судурчызы ажыра сӧзин берген. Анайда ок калганчы кӱндерде Кудайга бажырып турган улус бир албаты болуп калар деп судурлаган».

9. Кайраканныҥ Эҥирин ӧткӱрери Иезекиильдиҥ судурыныҥ бӱткенин канайып керелейт?

⁹ 1919 јылдаҥ ала Иегова Иуданыҥ тайагы деп сӱрлеп кӧргӱзилген майлаткандарды арайынаҥ јууп,  бириктирген. Оноҥ олорго јерде јадатан ижемјилӱ христиандар, ол эмезе Иосифтиҥ тайагы, кожулып баштаган. Анайып Кудайдыҥ ишчилериниҥ эки бӧлӱги «јаҥыс ӱӱр» болуп калган (Иоанн 10:16; Зах. 8:23). Иегова бу эки тайакты бириктирип, бойыныҥ колында бир тайак эдип салар деп сӧзин берген (Иез. 37:19). Бӱгӱнги кӱнде теҥериде де, јерде де јадатан ижемјилӱ христиандар кожо бирлик иштегилейт. Олорло макталган Каан — Иисус Христос башкарат. Ол Иезекиильдиҥ судурында Кудайдыҥ «Давид ишчизи» деп адалган (Иез. 37:24, 25). Кайраканныҥ Эҥиринде бис кажы ла јыл Иезекиильдиҥ бичигинде судурлалган кайкамчылу бирликти кӧрӧдис: майлаткандар ла «ӧскӧ койлор» Христостыҥ ӧлӱмин эске алатан Эҥирди ӧткӱрерге, јуулыжып јат. Мындый бирликти кичеерге ле тыҥыдарга бистиҥ кажыбыс ла нени эдер аргалу?

10. Кудайдыҥ албатызы бирлик болзын деп, бис канайып јӧмӧжӧр аргалу?

¹⁰ Баштапкызында, јобош болорго албаданып турзаас, бирликке јӧмӧжӧдис. Иисус ӱренчиктерин јобош болзын деп ӱреткен (Матф. 23:12). Бистиҥ јӱрегис јобош болзо, ого бу телекейдиҥ бийиркенер кӱӱн-санаазы кирбес.  Анайда ок јобош болзоос, каруулу акаларга сӧсуккур болорыс. Мындый кӱӱн-санаа бӱдӱн јуунныҥ бирлигине јӧмӧжӧт. Је јобош болгоныс озо ло баштап Иегованы сӱӱндирет, не дезе «Кудай бийиркектерге удурлажат, јобожыгандарга јакшылык берет» (1 Пет. 5:5).

11. Кайраканныҥ Эҥиринде тузаланып турган сӱр-темдектердиҥ учурын шӱӱп сананганы бирлигиске канайып јӧмӧжӧт?

¹¹ Экинчизинде, Кайраканныҥ Эҥиринде тузаланып турган сӱр-темдектердиҥ учурын шӱӱп сананганыс, ака-эјелерле бирлик болорго болужат. Бу Эҥирди ӧткӱрердеҥ озо, је анчада ла ӧткӱрилип јаткан ӧйдӧ, ачытпаган калаштыҥ ла кызыл аракыныҥ учурын шӱӱп сананыгар (1 Кор. 11:23—25). Калаш Иисус Христостыҥ бистер учун тайылга эдип берген кинчек јок эди-канын темдектейт, а кызыл аракы — тӧгӱлген канын. Је бу сӱр-темдектердиҥ јӱк учурын билериле болорзынбас керек. Не дезе толынты — Иегова ла Иисустыҥ улу сӱӱжин кӧргӱзет. Иегова сӱӱжинеҥ улам бис учун бойыныҥ Уулын берген. А Иисустыҥ сӱӱжи бистер учун јӱрӱмин кысканбай бергенинеҥ кӧрӱнген. Бу керегинде шӱӱп сананганы олорды сӱӱрге кӱӱнзедер. Иегованы сӱӱп турганыс бисти ака-эјелерисле бириктирет ле бирлигистиҥ курчузын тыҥыдат.

12. Иисустыҥ каан ла оныҥ кулдары керегинде укаа сӧзи, Иегова бисти улустыҥ јаманын таштазын деп кӱӱнзеп турганын канайып кӧргӱзет?

¹² Ӱчинчизинде, улустыҥ јаманын акту кӱӱнистеҥ таштап турзаас, бирликти кичеейдис. Анайып бис Иисустыҥ толынты тайылгазы учун быйанду болгонысты кӧргӱзер аргалу. Оноҥ улам бистиҥ кинчектерис ташталып јат. Матфей 18:23—34-тӧ бичилген Иисустыҥ укаа сӧзин шӱӱп кӧрӱгер. Бойыгардаҥ сурагар: «Мен Иисустыҥ ӱреткени аайынча јӱрерге кӱӱнзейдим бе? Мен ака-эјелеримге чыдамкай болуп, олорды оҥдоп тургам ба? Мени ачындырган улустыҥ јаманын таштаарга меге јеҥил бе?» Кезик кинчектерди толо кеминде эмес болгоныстаҥ улам, таштаарга кӱч болот. Је Иегова бисти нени этсин деп кӱӱнзеп турганын оҥдоорго, бу укаа сӧс болужат. (Матфей 18:35 кычырыгар.) Бис акту кӱӱнинеҥ јаманын алынып турган ака-эјелеристиҥ кинчектерин таштабазаас, Иегова да бистиҥ кинчектеристи таштабас деп, Иисус јартаган. Бу шӱӱлтени јазап шӱӱп сананар керек! Биске бирлигисти кичеерге, Иисустыҥ јакарганыла улустыҥ јаманын таштаар керек.

13. Амырды јайаарга албаданганыс бирликке канайып јӧмӧжӧт?

¹³ Ака-эјелеристиҥ јаманын таштап турзаас, амырды јайаарга кӱӱнзегенисти кӧргӱзедис. Элчи Павел христиандарды: «Тынныҥ бирлигин корулап аларга ончо кӱчигерди салыгар» — деп кӱӱнзеткен (Еф. 4:3). Кайраканныҥ Эҥирин ӧткӱрердеҥ озо, је анчада ла ӧткӱрилип јаткан ӧйдӧ, улуска канайып баштанып турганаарды јазап шӱӱп сананыгар. Бойыгардаҥ сурагар: «Улус мени ачынганын кӧксинде јууп турган кижи деп билер бе? Эмезе улус мени амырды ла бирликти кичеерге, бастыра кӱчин салып турган кижи деп билер бе?» Бу сурактарды јазап шӱӱп сананар керек.

14. Бис бой-бойысты сӱӱп, канайып чыдамкай болор аргалу?

¹⁴ Тӧртинчизинде, бис улуска сӱӱштиҥ Кудайы Иегова чылап баштанып турзаас, бирликке јӧмӧжӧдис (1 Иоан. 4:8). Биске качан да мынайып сананбас керек: «Мен ака-эјелерди сӱӱп те турган болзом, је олордыҥ ончозыла најылажарга кӱӱнзебейдим». Оноҥ башка Павелдиҥ Ефестегилерге 4:2-де (ЈТ) бой-бойыгарды сӱӱп, чыдамкай болугар деп кӱӱнзедип айткан јӧбиле јӱрбей турганыс кӧрӱнер эди. Павел бой-бойыгарга јаҥыс ла чыдамкай болзын деп эмес, је мыны сӱӱжинеҥ улам этсин деп айткан. Мынайып эдери сӱреен јаан учурлу. Бистиҥ јуундарда башка-башка улус бар, је олорды ончозын Иегова экелген (Иоанн 6:44). Не дезе, Иегова олордыҥ јакшызын кӧрӱп, олорды сӱӱп баштаган. Иегова бу улусты сӱӱп турарда, бис канайып сӱӱбейтенис. Бис Иегованыҥ јууктарыгарды сӱӱгер деген јакарузын бӱдӱрер учурлу! (1 Иоан. 4:20, 21).

15. Кайраканныҥ Эҥирин калганчы катап ӧткӱретен кӱн келер деп бис кайдаҥ билерис?

¹⁵ Удабас Кайраканныҥ Эҥирин калганчы катап ӧткӱрерис. Бис мыны кайдаҥ билерис? Павел Коринфтегилерге бичиген 1-кы самаразында майлаткан христиандар кажы ла јыл Эҥирди байрамдаарына туружып, «Кайракан келбейинче» оныҥ ӧлӱмин јарлап јат деп айткан (1 Кор. 11:26). Иисус та ӱренчиктерине калганчы кӱндерди куучындап турарда, бойыныҥ келери керегинде айткан. Ол болотон улу тӱбек керегинде мынайып айткан: «Теҥериде Кижи Уулыныҥ билдизи кӧрӱнер, јердеги ончо калыктар ыйлажып, улу кӱчтӱ ле мактулу Кижи Уулы теҥериниҥ булудыла келип јатканын кӧрӱп ийер. Ол Бойыныҥ ангелдерин ӱнгӱр табышту амыргылу ийер, олор Оныҥ талдап алгандарын ак-јарыктыҥ тӧрт талазынаҥ, теҥериниҥ бир учынаҥ экинчи учына јетире јуур» (Матф. 24:29—31). Јердеги јаткан майлаткандардыҥ ончозы теҥериде јӱретен кайралын алып ийзе, ангелдер талдалгандарды јууп алар. Бу, улу тӱбек башталган кийнинеҥ, је Армагеддон башталгалакта болор. Оныҥ кийнинде Иисуска башкарткан 144000 майлаткандардыҥ ончозы јердиҥ каандарыла јуулажар (Ачыл. 17:12—14). Кайраканныҥ калганчы Эҥири Иисус майлаткандарды теҥеридӧӧн јууп апарардаҥ озо болор.

16. Слер бу јылда Кайраканныҥ Эҥирине нениҥ учун келерге турганыгар?

¹⁶ 2018 јылда тулаан айдыҥ 31-чи кӱнинде болотон Кайраканныҥ Эҥирин божотпоско, бек шӱӱп алыгар. Анайда ок Иегованаҥ слерге оныҥ албатызыныҥ бирлигине јӧмӧжӧргӧ болушсын деп сурагар. (Сарын 133:1 кычырыгар *.) Бис качан бирде бу Эҥирди калганчы катап ӧткӱрерис деп ундыбагар. Ол кӱн келгелекте бу јаан учурлу туштажуга келип тураактар ла анчада ла Эҥирди ӧткӱрген ӧйдӧ кӧрӱнип турган бирлигисти баалап тураактар!