1, 2. а) Иегованыҥ ишчилеринде кандый алаҥзыштар болордоҥ айабас? б) Бис бу јӧрмӧлдӧ нени шӱӱжерис?

 БИСТИҤ ончобыста, канча да јашту болзоос, кезикте алаҥзыштар a болуп јат. Темдектезе, карындашка Иегова оны баалап турган деп бӱдерге кӱч болот. Мынаҥ улам ол сууга чӧҥӱрилер бе, јок по деп алаҥзып јат. Эмезе аканы сананып ийектер, ол јиит тужында акчалу ишке кирердиҥ ордына Иеговага кӧп иштеген. Је эмди билезин јеткилдеп болбой турганынаҥ улам, ол тушта чын эттим бе деп сананып јат. Јаан јашту ака-эјелерде бойыныҥ кӱчтери. Темдектезе, јажы јаанап калган эјени сананып ийектер. Ол алдында јеҥил бӱдӱрип ийетен ишти эмди ийде-кӱчи астап калганынаҥ улам бӱдӱрип болбой турганына тыҥ кунугып јат. Слерде мындый сурактар болот по: «Иегова мени баалап турган ба? Иеговага кӧп иштеерге болуп чыгарган јӧптӧрим чын болды ба? Эмди менеҥ Иеговага туза бар ба?»

² Мындый санааларды ајару јок артыргыспас керек. Нениҥ учун дезе олордоҥ улам бистиҥ Иеговага бӱткенис уйадап, ого иштебей барардаҥ айабазыс. Иегова бисти баалап турган ба, чыгарган јӧптӧрис чын болгон бо, бис эмди Иеговага керек пе деп сурактарда алаҥзып турган болзоос, Агару Бичик биске канайып болужарын бу јӧрмӧлдӧ шӱӱжип ийерис.

 АЛАҤЗЫШТАРДЫ ЈОГОЛТОРГО НЕ БОЛУЖАР?

3. Алаҥзыштар болуп турза, биске нени эдер керек?

³ Бисте алаҥзыштар болуп турза, Кудайдыҥ Сӧзине баштанар керек. Анайып бис Иеговала најылыгысты тыҥыдып аларыс, кӧгӱс јанынаҥ бек болорыс, анайда ок бӱдӱмјибисти неге де уйададарга бербезис (1 Кор. 16:13).

4. «Ончозын ченеп кӧрӱгер» деген сӧстӧр нени темдектейт? (1 Фессалоникадагыларга 5:21).

⁴ 1 Фессалоникадагыларга 5:21 кычырыгар. Ајаруга алдаар ба, Агару Бичик бисти «ончозын ченеп кӧрӱгер» деп кӱӱнзедет. Мыны канайып эдер? Та неге де бӱдердеҥ озо, ол Агару Бичикке келижип турган ба, јок по деп бӱдӱмјиленип алар керек. Темдектезе, јиит уул Кудай оны баалап турганында алаҥзып јат. Је башка келген кандый ла санаа чын болбой јат. Оныҥ учун ого Агару Бичикти ачып алала, Иегова ол керегинде нени сананып турганын билип алар керек.

5. Бис сурагыстыҥ каруузын Иегованаҥ канайып «угарыс»?

⁵ Агару Бичикти кычырып јатсаас, Иеговала куучындажып тургандый болот. Кандый бир суракта Иегованыҥ кӧрӱмин билип аларга турган болзоор, албаданар керек. Слерди јилбиркедип турган тема аайынча ӱлгерлерди Агару Бичиктеҥ бедирегер. Мыны эдерге бистиҥ бичиктерди шиҥдеп кӧрӱгер (Укаа 2:3—6). Иегованыҥ кӧрӱмин оҥдоп аларга ла ол слерди башкарзын деп, ого мӱргӱгер. Оноҥ слердиҥ айалгага келишкедий библиялык принциптерди ле тузалу јетирӱлерди бедирегер. Анайда ок слердиҥ айалгага келижип турган јебрен ӧйдӧги Кудайдыҥ ишчилериниҥ темин шиҥдегени тузалу болор.

6. Јуунныҥ туштажулары биске алаҥзыштарды јоголторго канайып болужат?

⁶ Анайда ок Иегова бисле јуунныҥ туштажуларында куучындажат. Бис јаантайын јуунныҥ туштажуларына јӱрӱп турган болзоос, сурактарыска карууларды кандый бир куучын-эрмектеҥ эмезе ака-эјелердиҥ берип турган карууларынаҥ аладыс (Укаа 27:17). Је эмди кезикте Кудайдыҥ ишчилеринде кандый алаҥзыштар болуп турганын кӧрӱп ийектер.

ИЕГОВА МЕНИ БААЛАП ТУРГАН БА?

7. Кезикте улуста кандый сурак чыгат?

⁷ «Иегова мени баалап турган ба?» деп сурак сенде качан бирде болгон бо? Эйе болзо, сен бойыҥды јер-телекейди јайаган Кудайга качан да најы болуп албазыҥ деп сананган болорыҥ. Мындый санаа Давид каанда база болгон болор. Ол Иегованы улуска ајару эдип турганын кайкап, Кудайдаҥ мынайып сураган: «Иегова, сенеҥ ајару аларга, кижи нени эткен? Сениҥ ајарууҥа тургадый, тегин кижи кем андый?» (Сар. 144:3). Иегова сени баалап турган деп, кайдаҥ билип алар?

8. Иегова улусты кӧрӱп тура, ајарузын неге эдет? (1 Самуил 16:6, 7, 10—12).

⁸ Агару Бичиктеҥ Иегова ончо улуска, керек дезе улустыҥ кӧзинде кӧрӱмјилӱ эмес те улуска, ајару эдет деп билип алганыс. Темдектезе, Иегова Самуилди Иессейдиҥ уулдарыныҥ бирӱзин Израильдиҥ кааны эдип майлап салзын деп јакарган. Иессей ончо уулдарын келзин деп айткан, а ондо сегис уул болгон. Је јӱк кичинек уулын, Давидти b,  ол кычырбаган. Је Иегова Давидти талдап алган. (1 Самуил 16:6, 7, 10—12 кычырыгар.) Не дезе ол Давидтеҥ улус кӧрӱп болбогодый неме кӧргӧн, бу уул Иегованы тыҥ сӱӱген.

9. Иегова сени јакшы билер деп недеҥ кӧрӱнет? (Јурукты база кӧрӱгер.)

⁹ Иегова сени баалап турганын канайып кӧргӱзет? Ол шак ла сениҥ айалгаҥга келишкедий јӧптӧр берет (Сар. 32:8). Мынаҥ ол сени јакшы билер деп кӧрӱнет эмес пе? (Сар. 139:1). Иегованыҥ јӧптӧрин тузаланып, бу јӧптӧрдиҥ тузазын кӧрӱп турзаҥ, ол сени баалап турган деп оҥдоп ийериҥ (1 Лет. 28:9; Ап. ижи 17:26, 27). Кудай сениҥ ого иштеерге ле оны угарга албаданып турганыҥды кӧрӱп јат. Ол сениҥ јакшы кылык-јаҥдарыҥды баалап јат ла сенле најылажарга кӱӱнзеп јат (Иер. 17:10). Сен оныла најылажарга кӱӱнзей берзеҥ, ол тыҥ сӱӱнер (1 Иоанн 4:19).

МЕН ЧЫН ЈӦПТӦР ЧЫГАРГАМ БА?

10. Алдында чыгарган јӧптӧристи сананзаас, бис неде алаҥзып баштардаҥ айабазыс?

¹⁰ Кезик ака-эјелер алдында чыгарган јӧптӧрин сананып, чын талдаш эткен бе деп алаҥзып баштайт. Олор Иеговага кӧптӧдӧ иштеерге, јакшы ижин эмезе бизнезин артыргызып салгандар. Анайып кӧп јылдар ӧдӱп калган. Олор карьера эткен улусты бир де неге де санааркабай, јараш јӱрӱм јӱрӱп турган деп сананып турган болор. Оныҥ учун олордо мындый алаҥзыштар боло берердеҥ айабас: «Иеговага иштеерге болуп, кандый бир немени артыргызып салганым чын болгон бо? Ол эмезе мен та нени де јылыйтып салгам ба?»

11. 73-чи Сарынныҥ чӱмдеечизи недеҥ улам кунуккан?

¹¹ Слерде мындый ла санаалар болуп турган болзо, 73-чи Сарынды кӧрӱгер. Оныҥ чӱмдеечизи бого ло тӱҥей айалгада  болгон. Кудайга иштебей турган улус, оныҥ санаазыла, јараш јӱрӱм јӱрӱп турган, су-кадык ла бай деп билдирген (Сар. 73:3—5, 12). Олорго кӧрӧ оныҥ јӱрӱми учуры јок ло туза јок деп билдиретен. Мындый јаман санаалардаҥ улам ол мынайып айткан: «Мен кажы ла кӱн кыйналгам» (Сар. 73:13, 14). Ол мыны канайып ӧдӱп чыккан?

12. Сарнаачыга јаман сезимдерин ӧдӱп чыгарга не болушкан? (Сарын 73:16—18).

¹² Сарын 73:16—18 кычырыгар. Сарнаачы Иегованыҥ агару јерине кирген. Анда токуналу айалгада, Кудайдыҥ ишчилериниҥ ортозында оныҥ кӧрӱм-санаазы чек солына берген. Сарнаачы Кудайга иштебей турган улустыҥ јадын-јӱрӱми јакшы да болзо, је олордо келер ӧйгӧ ижемји јок деп оҥдогон. Ол Иеговага иштеерин баштапкы јерге тургузып, чын талдаш эткен эмтир. Мынаҥ улам ол токунай берген. Анайып ийде-кӱч алынала, Иеговага оноҥ ло ары иштеген (Сар. 73:23—28).

13. Чыгарган јӧптӧрӧӧрдӧҥ улам санааркап турган болзоор, нени эдерге јараар? (Јурукты база кӧрӱгер.)

¹³ Алдында чыгарган јӧптӧрӧӧрдӧҥ улам санааркап турган болзогор, токунал аларга нени эдерге јараар? Слерде эм тура бар алкыштараардыҥ ончозын шӱӱп сананыгар. Слерди Иегова јарадып јат, оныҥ учун слер эҥ ле бай кижи! Анайда ок Иегова слерге сӱреен кӧп сыйлар белетеп салган. Олордыҥ кезигин слер сананбаган да болороор. Је Кудайга иштебей турган улусла не болор? Олор јӱк ле бӱгӱнги кӱнниҥ једимдериле јакшызынып јӱрет. Келер ӧйдӧ олордыҥ иженер де немези јок (Сар. 145:16).  Сананып ийзеер де, слер ӧскӧ јӧп чыгарган болзоор, эмди јӱрӱмеер кандый болор эди? Је бир немеде алаҥзу јок: слер Иегованы ла јуугаарды сӱӱп турганаардаҥ улам јӧп чыгарзаар, јӱрӱмеер ырысту ла једимдӱ болор.

МЕН ЭМДИ ИЕГОВАГА КЕРЕК ПЕ?

14. Кезик христиандарда кандый кӱчтер болот? Мынаҥ улам олордо кандый сурак чыгат?

¹⁴ Јажы јаанаганынаҥ улам, су-кадыгы уйадаганынаҥ улам эмезе инвалидностьтоҥ улам Иегованыҥ кезик ишчилери алдындагызына кӧрӧ, кӧпти эдип болбой јат. Мынаҥ улам олор бойлорынаҥ туза јок деп сезип: «Эмди мен Иеговага керек пе?» — деп сананат.

15. 71-чи Сарынныҥ чӱмдеечизи неде алаҥзыбаган?

¹⁵ 71-чи Сарынныҥ чӱмдеечизинде андый ла ок санааркаштар болгон. Ол мӱргӱген: «Чагым та чыкса, мени артыргыспа» (Сар. 71:9, 18). Сарнаачы ийде-кӱчи чыгып турганын сезип те турган болзо, Иеговага чындык јӱрген тушта, Кудай ого болужар деп бир де алаҥзыбаган. Бӱгӱнги де кӱнде Иегова солынбаган: бойыныҥ айалгазында эҥ артыгын берип турган ишчилерин ол баалап јат (Сар. 37:23—25).

16. Јажы јаанап калгандар Иеговага да, улуска да нени берер аргалу? (Сарын 92:12—15).

¹⁶ Бистиҥ кару јажы јаанап калган ака-эјелерис! Бойоорго Иегованыҥ кӧзиле кӧрӧргӧ албаданыгар. Ол слерге чыдалыгар чыгып та турган болзо, кӧгӱс јанынаҥ чечектеерге болужар. (Сарын 92:12—15 кычырыгар.) Нени эдип болбозыгарга эмес, карын нени эдип ийереерди сананыгар. Иеговага оноҥ ло ары иштеп турганаар ака-эјелердиҥ кӱӱнин кӧдӱрет. Анайда ок слер олорго ајару эдип, олордыҥ бӱдӱмјизин тыҥыдар аргалу.  Ака-эјелерге бу ӧйдиҥ туркунына Иегова слерге канайып болушканын ла келер ӧйдӧҥ, анчада ла нени сакып турганаарды куучындап туругар. Анайда ок слер олор учун мӱргӱп турзаар, олор слерге јаан быйанду болор! (1 Пётр 3:12). Айдарда, бистиҥ кажыбыс ла кандый да айалгада болзоос, Иеговага да, ака-эјелерге де нени-нени берер аргалу.

17. Бойысты улусла нениҥ учун тӱҥдештирбес керек?

¹⁷ Слер Иеговага кӧпти берип болбой турган болзоор, санааркабагар. Ол слердиҥ ончо эдип турган ижигерди баалап јат. Слер бойоорды ӧскӧ улусла тӱҥдештирип турган болороор, је анайып этпегер. Нениҥ учун дезе Иегова слерди кемле де тӱҥдештирбей јат (Гал. 6:4). Сананып ийзеер де: Мария Иисуска баалу-чуулу, јараш јытту ӱс сыйлаган (Иоанн 12:3—5). А јокту тул ӱй кижи сый эдип, эки оок јес акча салган (Лука 21:1—4). Је Иисус бу эки ӱй кижини тӱҥдештирбеген. Ол олордыҥ сыйларыныҥ баазын эмес, је Кудайга бӱдӱмјизин кӧргӧн. Иегованыҥ кӧрӱми база андый. Оныҥ учун бис сыйларысты сӱӱштеҥ ле бӱдӱмјибистеҥ улам эдип турзаас, Иегованы тыҥ сӱӱндиредис.

18. Биске алаҥзыштарды јоголторго не болужар? ( «Иегованыҥ сӧстӧри алаҥзыштарды јоголторго болужар» деген рамканы база кӧрӱгер.)

¹⁸ Бистиҥ кажыбыста ла каа-јаада алаҥзыштар болот. Оны бис Агару Бичиктиҥ болужыла јоголтып ийер аргалу. Бойоордыҥ сурактараардыҥ карууларын оноҥ бедирегер. Ол тушта слердиҥ алаҥзыштараар јоголып, Иегова слерди баалап турган деп бӱдӱп баштараар. Ого болуп ончо артыргыскан немелереерди Иегова кӧргӧн, ол слерди алкыш јок артыргыспас. Ол бойыныҥ чындык ишчилерин тӱгенбес сӱӱжиле сӱӱп ле баалап јат.