1, 2. Моисей јада каларда, Иисус Навин кандый кӱч айалгада болуп калган?

«МЕНИҤ ишчим Моисей јада калды. Оныҥ учун бу албатыла кожо Иордан сууны кечип, Израильдиҥ уулдарына берилетен јерге бар» — деп айткан Иегованыҥ сӧстӧри Иисус Навинниҥ кулагына эмдигенче угулып турды (Иис. Н. 1:1, 2). Иисус Навин 40 јыл кире Моисейдиҥ болушчызы болгон, је эмди ого оныҥ ордына башчы болор керек.

² Израиль албатыныҥ мындый солунды канайып алынарын сананып, ол санааркаган болор, нениҥ учун дезе Моисей узак ӧйдиҥ туркунына олордыҥ башчызы болгон (Јаҥ. т. 34:8, 10—12). Иисус Навин 1:1, 2-де бичилген сӧстӧр керегинде библиялык бир справочникте мынайып айдылат: «Јаҥныҥ солынганы — азыйгы  да ӧйдӧ, бӱгӱнги де ӧйдӧ ороонныҥ кӱч ӧйи болот, нениҥ учун дезе андый ӧйдӧ ороонныҥ амыры чочыдылу айалгада боло берет».

3, 4. Иисус Навинниҥ Иеговага бӱткени калас болбогон деп, нениҥ учун айдарга јараар? Бисте кандый сурак чыгардаҥ айабас?

³ Иисус Навин санааркаган да болзо, берилген јакаруны удабай ла бӱдӱрип баштаган (Иис. Н. 1:9—11). Ол Иеговага иженген, оныҥ учун Иегова ого башкартулар берген ле израильтяндарды ангел ажыра башкарган деп, Агару Бичикте айдылат. Бу ангел Агару Бичикте Сӧс деп адалган Кудайдыҥ тун туулган Уулы болгон болор (Чыг. 23:20—23; Иоанн 1:1).

⁴ Иегованыҥ болужыла Израильдиҥ башчызыныҥ солынганы амыр-энчӱ ӧткӧн. Бӱгӱнги кӱнде Иегованыҥ организациязында база јаан солынталар болуп јат. Оныҥ организациязыныҥ токтобозынаҥ ичкери барып јатканын кӧрӱп, мындый сурак чыгардаҥ айабас: «Бис Иисус Христос Башчыбыска нениҥ учун бӱдер учурлу?» (Матфей 23:10 кычырыгар.) Бу сурактыҥ каруузын аларга, Иегова озогы ӧйдӧ солынталар тушта албатызын канайып башкарганын шӱӱжип ийектер.

5. Иисус Навин Иерихонныҥ јанында кемге туштаган? (Јӧрмӧлдиҥ бажындагы јурукты кӧрӱгер.)

⁵ Израильтяндар Иордан сууны кечип барарда, Иисус Навин Иерихонныҥ јанында, кылыш тудунган таныш эмес кижиге туштаган. Иисус Навин оноҥ: «Сен бис учун ба эмезе бистиҥ ӧштӱлерис учун ба?» — деп сураган. Иисус Навин, бу кижини Кудайдыҥ албатызын корулаарга келген «Иегованыҥ черӱзиниҥ јайзаҥы» деп билип ийеле, алаҥ кайкаган! (Иисус Навин 5:13—15 кычырыгар *.) Библиялык ӧскӧ ӱлгерлерде Иегова бойы Иисус Навинле куучындашкан деп айдылып та турган болзо, је чынынча Кудай оныла, озогы ла ӧйлӧрдӧ чылап, ангел ажыра куучындашкан (Чыг. 3:2—4; Иис. Н. 4:1, 15; 5:2, 9; Ап. ижи 7:38; Гал. 3:19).

6—8. а) Иегованыҥ кезик башкартулары нениҥ учун саҥ-тескери деп билдирген болор? б) Бу башкартуларды нениҥ учун ойгор ло ӧйинде берилген деп айдарга јараар? (Сносканы кӧрӱгер.)

⁶ Иисус Навинге Иерихонды јуулап алатан башкартулар берилген. Олордыҥ кезиги баштап тарый саҥ-тескери деп билдирердеҥ айабас болгон. Темдектезе, Иегова ончо эр улусты кестирӱ этсин деп јакарган, је мынаҥ улам олор канча кӱнге јуулажып болбос эди. Иегова кестирӱни нениҥ учун бу ла ӧйдӧ этсин деген? (Баш. 34:24, 25; Иис. Н. 5:2, 8)

⁷ Израильдиҥ черӱчилдери кестирӱни бу ӧйдӧ этсе, јууктарын ӧштӱлердеҥ корулап болбос деп сананган  болор. Је кенетийин «Иерихон Израильдиҥ уулдарынаҥ коркып, эжиктерин тыҥыда бӧктӧп алган» деп табыш угулган (Иис. Н. 6:1). Айалга мынайып солына берерде, израильтяндар Иеговага оноҥ тыҥ бӱдӱп баштаган.

⁸ Анайда ок Иегова Иерихонго табару этпезин деп айткан. Оныҥ ордына израильтяндар каланы алты кӱнниҥ туркунына, бир кӱнге бир катап, айландыра базар учурлу болгон. Је јетинчи кӱнде каланы јети катап айландыра базар керек болгон. Кезик јуучылдар: «Бис мынайып тегине ле ийде-кӱчисти ле ӧйисти јылыйтарыс!» — деп сананган болор. Је Израильдиҥ Башчызы, Иегова, нени эдип јатканын билер болгон. Оныҥ айтканыныҥ бӱткӱлинче бӱдӱп калганы израильтяндардыҥ бӱткенин тыҥыткан ла олорды Иерихонныҥ казыр черӱчилдериле јуулажарынаҥ јайымдаган (Иис. Н. 6:2—5; Евр. 11:30) *.

9. Иегованыҥ организациязыныҥ башкартуларын нениҥ учун бӱдӱрер керек? Тем куучындап беригер.

⁹ Бу учуралдаҥ неге ӱренип аларга јараар? Кезикте бис Иегованыҥ организациязында нениҥ учун солынталар болуп турганын јетире оҥдобой јадыс. Темдектезе, электронный эдимдерле таҥынаҥ ӱренген ӧйдӧ, јарлаар иште ле јуунныҥ туштажуларында тузаланарында, баштап тарый алаҥзыган болорыс. Је олорды тузаланып баштайла, јакшызын  кӧрӱп баштаганыс. Анайып Иегованыҥ организациязыныҥ солынталарыныҥ тузазын кӧрӱп, бистиҥ бӱдӱмјибис ле ака-эјелерисле бирлигис тыҥыйт.

10. Иерусалимдеги башкару јӧпкӧ кестирӱ керегинде сурактыҥ аайына чыгарга кем болушкан?

¹⁰ Корнилийдиҥ христиан јаҥга киргени 13 јылдаҥ ажа берген, је еврей укту кезик христиандар, эмдигенче кестирӱ эдер керек деп сананган (Ап. ижи 15:1, 2). Мынаҥ улам Антиохияныҥ акаларыныҥ ортозында оҥдошпостор башталган, оныҥ учун бу сурактыҥ аайына чыгарга, Павелди Иерусалимдӧӧн башкару јӧпкӧ аткаратан јӧп чыгарылган. Је бу башкартуны кем берген? Павелдиҥ сӧстӧриле болзо, ол Иерусалимдӧӧн «ачылта болгонынаҥ» улам барган. Айдарда, башкару јӧптиҥ берген башкартузы шак ла Иисус Христостоҥ болгон (Гал. 2:1—3).

11. а) Еврей укту христиандар кестирӱ јанынаҥ суракта кандый кӧрӱмдӱ болгон? б) Павел Иерусалимдеги аксагалдарга јӧмӧжип турганын канайып кӧргӱскен? (Сносканы база кӧрӱгер.)

¹¹ Башкару јӧп Христостыҥ башкартузыла еврей эмес христиандардаҥ кестирӱ эдери некелбей јат деп чокум-јарт јӧп берген (Ап. ижи 15:19, 20). Је бу јӧптиҥ кийнинеҥ кезик еврей укту христиандар канча јылдардыҥ туркунына бойыныҥ уулдарына кестирӱ эдерин токтотпогон. Је качан Иерусалимдеги аксагалдарга Павел Моисейдиҥ јасагын бӱдӱрбей турган деп, куучындар угулып келерде, олор ого јакару берген (Ап. ижи 21:20—26) *. Павел улусты Моисейдиҥ јасагын бӱдӱрип турганында бӱдӱмјилеерге, бойыла кожо тӧрт кижи алып, ӧргӧӧдӧ арутанар учурлу болгон. Павелге бу јакару саҥ-башка деп билдирген болор. Нениҥ учун дезе еврей укту христиандардыҥ кестирӱ керегинде оҥдомолы јастыра болгон деп ол билген. Је аксагалдардыҥ ака-эјелер ортодо амыр кичеерге турганын Павел оҥдоп, јобош болуп бу јакаруны бӱдӱрип салган. Је Иисустыҥ ӧлӱминиҥ кийнинеҥ Моисейдиҥ јасагын бӱдӱрери некелбей турарда, Иисус бу сурактыҥ аайына нениҥ учун андый узак ӧйдиҥ туркунына чыкпаган? (Кол. 2:13, 14).

12. Христос кестирӱ керегинде сурактыҥ аайына тургуза ла нениҥ учун чыкпаган?

¹² Кандый бир сурактардыҥ чокумдап јарталганыла јӧпсинерге ӧй керек болот. Андый айалга еврей укту христиандарда болгон (Иоанн 16:12). Олордыҥ кезиги кестирӱ эмдигенче ле Иеговала аҥылу колбуларды кӧргӱзип турган деп сананган (Баш. 17:9—12). А кезиги кестирӱни этпей барза, ӧскӧ еврейлерге истедип баштаарынаҥ коркыган (Гал. 6:12). Је соондо Христос элчи Павелдиҥ самаралары ажыра оноҥ до ӧскӧ башкартулар берген (Рим. 2:28, 29; Гал. 3:23—25).

13. Христостыҥ башкартуларыныҥ ончозын бӱдӱрерге, биске не болужар?

¹³ Иегованыҥ организациязында солынталар кандый шылтактаҥ улам болуп турганын јетире оҥдобой турзаас, Христос озогы ӧйлӧрдӧ Кудайдыҥ албатызын канайып башкарган деп, шӱӱп сананарга јараар. Христос Иегованыҥ ишчилерин корулаарга ла олордыҥ бӱдерин ле бирлигин тыҥыдарга, Иисус Навинниҥ ӧйинде де, баштапкы чакта да ойгор башкартулар берген (Евр. 13:8).

14—16. Христос биске кӧгӱс јанынаҥ болужат деп, «бӱдӱмјилӱ ле керсӱ кулдыҥ» башкартуларынаҥ канайып кӧрӱнет?

¹⁴ Иисус бисти сӱӱп, кӧгӱс јанынаҥ болужып турган деп, «бӱдӱмјилӱ ле керсӱ кулдыҥ» керектӱ ӧйдӧ берип турган јӧптӧринеҥ кӧрӱнет (Матф. 24:45). Тӧрт балалу Марк айдат: «Сатана јуундарды уйададарга, билелерге табару эдет. Је эмди бисте кажы ла неделеде билелик бажырыш ӧткӱретен эҥир бар, анайып билениҥ бажы јуук улузын кичеер керек деп оҥдоп јат».

¹⁵ Иисустыҥ башкарузын кӧрӱп, оныҥ бисти кӧгӱс јанынаҥ ӧссин деп кӱӱнзеп турганын оҥдоп јадыс. Патрик деп аксагал: «Кезик улус амыраар кӱндерде јарлаар иштиҥ туштажузына кичинек бӧлӱктерле јуулышсын деп айдылганын озо баштап јаратпаган. Је мындый јаҥы башкартунаҥ Иисус уйалчаҥ ла эрчимдӱ јарлабай турган јарчыларды ундыбай турган деп кӧрӱнет. Мынаҥ улам андый ака-эјелер бойын тузалу ла керектӱ деп сезип, соондо кӧгӱс ӧзӱм алынган» — деп айдат.

¹⁶ Христос јӱк ле кӧгӱс керексиништеристи кичееп турган эмес, је бӱгӱнги кӱнниҥ эҥ јаан учурлу ижин —  сӱӱнчилӱ јарды јарлаарын баштапкы јерге тургузарга болужып јат. (Марк 13:10 кычырыгар.) Аксагал болуп кӧстӧлгӧни јаан удабаган Андре ака Кудайдыҥ организациязындагы јаҥы башкартуларды јаантайын бӱдӱрерге албаданып јат. Ол мынайып айдат: «Бет-Элде иштеп турган ака-эјелердиҥ тоозы астадылганынаҥ чактыҥ учы јууктаганы кӧрӱнип јат, оныҥ учун бастыра ийде-кӱчти јарлаар ишке салар керек».

17, 18. Кудайдыҥ организациязыныҥ солынталарын шӱӱп сананганы нениҥ учун тузалу болор эди?

¹⁷ Бистиҥ Кааныстыҥ, Иисус Христостыҥ, берип турган јакарулары јаантайын туза экелет. Оныҥ учун бис јаан удабаган солынталардаҥ кандый туза болгонын шӱӱп сананар учурлу. Анайда ок билелик бажырышта туштажуларыстыҥ ла јарлаар ижистиҥ солынталары слерге канайып болушканын шӱӱжерге јараар.

¹⁸ Иегованыҥ организациязыныҥ башкартуларыныҥ амадузын ла тузазын оҥдоп турзаас, олорды кӱӱнзеп бӱдӱрерис. Темдектезе, кепке базып чыгаратан бичиктерди астадып, јаҥы технологияларга кӧчӧри, Каандык керегинде јарды јарлайтан иште тузаланар акчаны чеберлеп аларга болужат. Мыны ундыбай турзаас, бистиҥ сайттагы электронный бичиктерле, аудио ло видеоматериалдарла кӧптӧдӧ тузаланарыс. Анайып, Кудайдыҥ организациязыныҥ акча-јӧӧжӧзи ойгор тузаланылзын деп кӱӱнзеп турган Христоско јӧмӧжип турганыс кӧрӱнер.

19. Бис нениҥ учун Башчыбыска јӧмӧжӧр учурлу?

¹⁹ Бистиҥ Башчыбыска, Христоско, јӧмӧжип турганысла ака-эјелеристиҥ бӱдерин ле бирлигин тыҥыдып јадыс. Андре ака мынайып айдат: «Бет-Элде иштеери токтодылып, јаҥы айалгага эптежип турган ака-эјелерди тооп, Христоско оноҥ тыҥ бӱдӱп баштагам. Олор Иегованыҥ организациязынаҥ артпай, кандый ла ишти сӱӱнип бӱдӱрет».

20, 21. а) Бистиҥ Башчыбыска нениҥ учун бӱдерге јараар? б) Келер јӧрмӧлдӧ кандый сурак шӱӱжилер?

²⁰ Удабас Иисус Христос Башчыбыс, «коркынчылу керектер эдер» ле јеҥӱ алар (Сар. 45:4; Ачыл. 6:2). Је эм тургуза ол бисти келер ӧйдӧ тирилетен улусты ӱредерине ле јерди рай эдип кубултарына белетеп јат.

²¹ Бис райда јадарга турган болзоос, Кааныбыска алаҥзу јогынаҥ бӱдер учурлу. (Сарын 46:1—3 кычырыгар *.) Је кезикте јӱрӱмисте сакыбаган јанынаҥ болуп турган солынталарга эптежерге кӱч болот. Мындый айалгада јӱрегистеги амырды ла Иеговага бӱдӱп турганысты кичеерге не болужар? Бу сурак келер јӧрмӧлдӧ шӱӱжилер.