1—2. Укаа сӧстӧр 4:25-ти канайып тузаланар? Темдер куучындап беригер.

ӰЧ ТЕМ кӧрӱп ийектер. Јажы јаан эје алдындагы јӱрӱмин эске алынат. Бу эјениҥ эмдиги јӱрӱми кӱч болуп та калган болзо, канча кире аргазы бар Иеговага оноҥ ло ары иштеп јат (1 Кор. 15:58). Эје бойын ака-эјелерле кожо райда деп сананып јӱрет. Эмди база бир эјениҥ теми. Оны јуунныҥ кижизи ачындырган да болзо, ол ого ачынбай јат (Кол. 3:13). А эмди аканыҥ теми. Ол алдында јаман керектер эткен де болзо, оны сананбай, Иеговага чындык болорго албаданат (Сар. 51:10).

² Бу ӱч кижиниҥ теми незиле тӱҥей? Олор ӧткӧн немени ундыбаган да болзо, алдындагы ӧйлӧ јӱрбей јат. Нениҥ учун дезе бу ака-эјелердиҥ кӧстӧри ичкери кӧрӧт. (Укаа сӧстӧр 4:25 кычырыгар *.)

3. Нениҥ учун ичкери кӧрӧр керек?

³ Биске нениҥ учун ичкери кӧрӧр керек? Нениҥ учун дезе јаантайын кайра кӧрӱп турган кижи ичкери барып болбос. Анайып ла бис јаантайын ла ӧткӧн ӧйлӧрди сананып турзаас, Иеговага јазап иштеп болбозыс (Лука 9:62).

4. Бу јӧрмӧлдӧ нени шӱӱжерис?

⁴ Бу јӧрмӧлдӧ бис недеҥ улам ӧткӧн ӧйлӧ јӱрердеҥ  айабазыс деген сурак кӧрӱлер *: 1) ӧткӧн ӧйлӧрди сананып турзаас, 2) кемге-кемге ачынган болзоос, 3) ӧйинеҥ ӧткӱре јинип турзаас. Мындый айалгада кийниндезин ундып, ичкери кӧрӧргӧ библиялык принциптер болужар (Флп. 3:13).

5. Экклезиаст 7:10 бисти канайып сананбазын деп кӧргӱзет?

⁵ Экклезиаст 7:10 кычырыгар *. Бу ӱлгерде: «Ӧткӧн ӧйлӧр кандый јакшы болгон эди» — деп айдарга јарабас деп айдылбай јат. Нениҥ учун дезе ӧткӧн немени сананары — Кудайдыҥ сыйы. Бу ӱлгерде мынайып айдылат: «„Озогы ӧйлӧр бӱгӱнги кӱндерге кӧрӧ нениҥ учун јакшы болгон?“ — деп сураба», ӧскӧртӧ айтса, алдындагы ла эмдиги ӧйди тӱҥдештирбес керек. Нениҥ учун дезе тӱҥдештирзе, кижи эмдиги јӱрӱминеҥ јакшы неме кӧрбӧй барар.

6. Нениҥ учун алдындагы ӧйди эмдиги ӧйдӧҥ јакшы болгон деп сананбас керек? Тем куучындап беригер.

⁶ Нениҥ учун алдындагы ӧйди эмдиги ӧйдӧҥ канча кире јакшы болгон деп сананып јӱрбес керек? Нениҥ учун дезе јаман немелерди кижи ундып салат. Јебрен Израильдиҥ темин эске алынып ийектер. Олор: «Бис Египетте балык, огурчын, арбуз, порей, согоно ло чеснок јигенис» — деп комыдашкан (Тоол. 11:5). А кату кулданышта јӱргенин ундып салгандар (Чыг. 1:13, 14; 3:6—9). Израильтяндар Иегованыҥ болужын бир де кӧрбӧй барган. Иегова олорго коркышту тыҥ ачынган.

7. Бир эјеге кунукпаска не болушкан?

⁷ Ӧткӧн ӧйлӧрди кӧп сананбаска нени эдер керек? Бир эјениҥ темин кӧрӱп  ийектер. Ол Бруклинниҥ Бет-Элине 1945 јылда иштеп келген. Тоолу јылдаҥ Бет-Элде иштеп турган акага барган. Кийнинде ол ака 1976 јылда оорый береле, божоорын билип, эјеге мындый сӧстӧр айткан: «Бис эптӱ-јӧптӱ јуртадыс. Кӧп улуста анайып келишпей јат. Ӧткӧн ӧйлӧрди сананып јӱретени Иегованыҥ сыйы болуп јат. Је сен кӧп санааркаба, бойыҥды бир де бурулаба. Јакшы ӧйлӧр санааҥга кирип турар, је олорды сананып, кунугардыҥ ордына Кудайга кӧп иштен. Кӧксиҥдеги ачууҥ араайынаҥ токунап калар». Кандый јакшы сӧстӧр дезеер!

8. Ӧткӧн ӧйлӧ јӱрбеске албаданган эјениҥ јӱрӱми кандый болды?

⁸ Бу эје ӧбӧӧниниҥ сӧстӧриле јӱрген. Ол божоордыҥ божогончо, 92 јашка јетире Иеговага чындык иштеген. Эје мынайып куучындаган: «Иеговага ӧйимди толо берип, 63 јылдаҥ ажыра иштегем. Мен чыннаҥ ла ырысту јӱрӱм јӱргем. Чын сӱӱнчини телекейлик карындаштыкта јӱргени ле ака-эјелерле јердеги райда јӱрери берет. Бис Иегова Кудайыска, Улу Јайаачыбыска, јажын-чакка кожо иштеп јӱрерис» *. Бу эје ӧткӧн ӧйлӧ јӱрбегениле биске сӱрекей јакшы тем артыргыскан.

9. Ачынбаска, анчада ла качан кӱч болот?

⁹ Левит 19:18 кычырыгар *. Бисти актуга ла бурулап салза, кӱч болордоҥ айабас. Анчада ла јуук најыбыс, тӧрӧӧндӧрис эмезе јууннаҥ кем-кем бурулаган болзо. Бир катап мындый учурал болгон. Бир эје база бир эјени:  «Сен менеҥ акча уурдагаҥ» — деп бурулаган. Кийнинде бурулаган эје јастырганын оҥдоп ийеле: «Јаманымды ташта» — деп сураган. Је актуга бурулаткан эје дезе, бу учуралды чек бажынаҥ чыгарып болбой турды. Слерде мындый учурал болгон бо? Слер шак ла мындый айалгада болбогон до болзоор, је тӱҥей ле та кемге де, та качан да тыҥ ачынган болороор.

10. Биске ачынбаска не болужар?

¹⁰ Ачынбаска не болужар? Иегова ӱзе немени кӧрӱп турган деп ундыбагар. Ол слерди де кӧрӱп јат, слерге улустыҥ јаман баштанганын да кӧрӱп јат (Евр. 4:13). Ол бистиҥ сезимдеристи оҥдоп јат (Иса. 63:9). Анайда ок келер ӧйдӧ Иегова бастыра јаманды јоголтып салар (Ачыл. 21:3, 4).

11. Улустыҥ јаманын таштазаас, кандый туза болот?

¹¹ Јаманын таштазаас, бойыска ла тузалу болор. Мыны акча уурдаган деп бурулаткан эје де оҥдогон. Агару Бичикте айдылганыла, бис улустыҥ јаманын таштазаас, Иегова да бистиҥ јаманысты таштаар (Матф. 6:14). Эје айдат: «Мен эјениҥ јастыразын јаратпай та тургам болзом, је ого ачу тутпай баргам». Оныҥ учун эје Иеговага сӱӱнчилӱ иштеп јат.

12. 1 Иоанн 3:19, 20 бисти неге ӱредет?

¹² 1 Иоанн 3:19, 20 кычырыгар. Кажы ла кижи бойын кезикте јинип јат. Темдектезе, кезик улус чындыктаҥ озо эткен кинчеги учун јинип јат. А кезиги чӧҥӱрилген кийнинеҥ эткен кинчеги учун јинип јат (Рим. 3:23). Је бойыстыҥ јастырагысты кӧрӱп турганыста јакшы немези база бар. Нениҥ учун дезе анайып бис тӱзединер керек деп оҥдоп, база анайып јастырбаска албаданып јадыс (Евр. 12:12, 13). Бис ончобыс јастырбай јӱрерге албаданып та турзаас, Агару Бичикле болзо, «кӧп јастырып јадыбыс» (Иак. 3:2; Рим. 7:21—23).

13. Нениҥ учун бойысты ӧйинеҥ ӧткӱре јинбес керек?

¹³ Бис јастырабысты алынзаас эмезе Кудай бистиҥ јастырабысты таштап та салза, кезикте бойысты ӧйинеҥ ӧткӱре јинип јадыс. Мындый учуралда јаан каршу болордоҥ айабас (Сар. 31:10; 38:3, 4). Бойын ӧйинеҥ ӧткӱре тыҥ јинген эје мынайып куучындайт: «Мен бойымныҥ јастыраларымнаҥ улам Иеговага тыҥ албаданбай иштегем. Нениҥ учун дезе меге не де болушпас деп санангам». Бого тӱҥей санаалар бистерде де болот. Је андый санааларга бастыртпас керек. Нениҥ учун дезе мынаҥ улам бойыска чӧкӧй берзеес, бис Сатананы сӱӱндирерис. Мындый ӧйдӧ Иегова бистеҥ чӧкӧбӧгӧн деп, ундыбас керек. (2 Коринфтегилерге 2:5—7, 11 тӱҥдештиригер.)

14. Бистиҥ кинчегисти Иегова таштап салган деп, кайдаҥ билип алар?

¹⁴ Слер бойоордоҥ мынайып сурап турган болороор: «Мениҥ кинчегимди Иегова таштап салган деп, кайдаҥ билип алар?» Каруузы кӧп јылдар кайра чыккан «Каруулчы шибееде» бар. Ондо мынайып бичилген: «Слер улам сайын јастырып, бойыгардаҥ чӧкӧп турган [болороор]... Је бойыгарды ӧйинеҥ ӧткӱре јинбегер. Иегова слердиҥ кинчегерди таштабаган деп сананбагар. Ол Сатана слерди кинчегер  ташталбас деп санандырат. Карын јастырагарды оҥдоп, бойыгарды јинип турганаардаҥ слерде тӱзединетен арга бар деп кӧрӱнет. Андый болзо, слер кинчектиҥ олјозына кирбегенер. Оныҥ учун канайып бала адазынаҥ болуш сурайт, анайып ла слер Иегованаҥ, канча да катап јастырган болзогор, болуш сурагар. Ол тушта Иегова слердиҥ јаманыгарды акту јӱрегинеҥ таштап, слерге ару уйат берер» *.

15, 16. Кезик ака-эјелер Иегова олордыҥ кинчегин таштап салган деп оҥдоп алала, нени сескен?

¹⁵ Кӧп ака-эјелер Иегова олорды сӱӱп турган деп оҥдоп ийеле, токунап калган. Темдектезе, бир акага «Библия меняет жизнь» деп рубрикадагы эјениҥ бир учуралы болушкан. Ол эјеге сууга чӧҥӱрилген де кийнинеҥ Иегова оны сӱӱп турган деп бӱдерге кӱч болгон. Нениҥ учун дезе јӱрӱминде ол јакшы неме кӧрбӧгӧн. Је толынты керегинде јазап шӱӱп сананган кийнинде, оныҥ кӧрӱми солынган *.

¹⁶ Бу эјениҥ теми акага канайып болушкан? Ака мынайып куучындайт: «Јиит тужымнаҥ ла ала порнография кӧргӧм. Бу јуукта тудунып болбой калала, база ла катап кӧрӱп ийгем. Оныҥ учун аксагалдарга баштангам. Олор меге Иегованыҥ сӱӱжин ле јалакайын кӧрӧргӧ болушкан. Оноҥ бери канча кире тӱзединип калган да болзом, је кезикте тӱҥей ле бойымды јинип баштайдым. Иегова мениҥ кинчегимди таштабас деп ле ол мени сӱӱбей јат деп санаалар келип јат. Је [эјениҥ теминеҥ] оҥдогонымла, Иегова мениҥ кинчегимди таштабас деп сананып турганымнаҥ толынты тайылгага бӱтпей турганым кӧрӱнет. Бу јӧрмӧлди керек ле болзо кычырып турарга, оны журналдаҥ кезип алгам».

17. Апостол Павелге бойын ӧйинеҥ ӧткӱре јинбеске не болушкан?

 ¹⁷ Эмди дезе, апостол Павелдиҥ темин кӧрӱп ийектер. Ол христиан болордоҥ озо, кӧп кинчектер эткен. Је кинчектери учун бойын јинип јӱрбеген (1 Тим. 1:12—15). Нениҥ учун дезе оныҥ кинчектерин толынты тайылга бӧктӧп салган деп бӱткен (Гал. 2:20). Оныҥ учун ол бойыныҥ кинчектерине санааркап јӱрбеген, карын Иеговага кӧптӧдӧ иштеерге албаданган.

18. Бу јӧрмӧлдӧҥ неге ӱренип алдыс?

¹⁸ Бу јӧрмӧлдӧҥ неге ӱренип алдыс? 1) Ӧткӧн ӧйлӧрди сананары — Иегованыҥ сыйы. Је ӧткӧн ӧйлӧр кандый да јакшы болгон болзо, келер ӧй оноҥ јакшы болор. 2) Бисти кем-кем ачындырган да болзо, оныҥ јаманын таштаар керек. Ол тушта биске Кудайга иштеер буудак болбос. 3) Бойысты ӧйинеҥ ӧткӱре јинбес керек. Нениҥ учун дезе мынаҥ улам сӱӱнчибис јылыйар. Оныҥ ордына Павел чилеп, Иегова бистиҥ јаманысты таштап салган деп бӱдер керек.

19. Ӱргӱлји јӱрӱмде ӧткӧн неме санаага келбес деп, нениҥ учун бӱдӱп јадыс?

¹⁹ Иегова биске ӱргӱлји јӱрӱм берерге турган. Ондо Агару Бичикте айдылганыла, «озогызы санаага да, јӱрекке де келбес» (Иса. 65:17). Јажы јаан ака-эјелер ойто јиит болуп калар (Иов 33:25). Оныҥ учун ӧткӧн ӧйлӧ јӱрбектер. Оныҥ ордына ичкери кӧрӱп, ӱргӱлји јӱрӱмге бастыра кӱчистеҥ албаданактар.