1. Кӧп улус ишке кандый кӧрӱмдӱ?

СЛЕРДИҤ јереердиҥ улузы ишке кандый кӧрӱмдӱ? Бӱгӱнги кӱнде кӧп ороондордыҥ улузы, алдындагызына кӧрӧ, кӧп иштеп баштаган. Анайып олордо билезине де, амыраарга да, кӧгӱс јанынаҥ азыранарга да ӧй артпай јат (Јарл. 2:23). Је кезик улус иштеерге сӱӱбей турган, оныҥ учун иштенбеске болуп, олор кандый ла шылтактар табадылар (Укаа 26:13, 14).

2, 3. Иегова ла Иисус ишке кандый кӧрӱмдӱ?

² Иегова ла Иисустыҥ ишке кӧрӱми бу телекейдиҥ кӧрӱминеҥ чек башка. Иегова иштеерге сӱӱп јат. Бу керегинде Иисустыҥ айтканынаҥ кӧрӱнет: «Адам Бойыныҥ керегин эмдиге јетире эдет, Мен де эдип јадым» (Иоанн 5:17). Сананып ийзеер де, ал-камык кӧгӱс јайаандарды ла учы-кыйузы јок Орчылаҥды јайаарга, сӱрекей кӧп иш эдилген. Анайда ок јердиҥ ӱстиндеги сӱреен јараш јайаандардыҥ кӧбин сананып ийзеер! Сарнаачыныҥ мынайып айтканы чын: «Эткен керектериҥниҥ кӧбин, о Иегова! Мыны ончозын сен ойгорыҥла јайагаҥ. Јер сениҥ јайаандарыҥла толгон» (Сар. 104:24).

³ Иисус Адазынаҥ тем алган. Кудай «теҥерини белетеп турарда», Укаа сӧстӧрдӧ оныла кожо болгон Иисус — ойгор эдип, сӱрлеп кӧргӱзилген. Ол Иегованыҥ «ус ишчизи» болгон (Укаа 8:27—31). Соондо Иисус јерге де келерде, Иегованыҥ јакарузын сӱреен јакшы бӱдӱрип салган. Иисуска Иегованыҥ јакарузын бӱдӱрери — курсак јиирине тӱҥей болгон. Иисустыҥ јердеги эткен ончо керектери оны Кудай ийген деп керелейт (Иоанн 4:34; 5:36; 14:10).

4. Иегова ла Иисус амыраарына кандый кӧрӱмдӱ?

⁴ Иегова ла Иисус јаантайын иштеп турарда, бис те амыраш  јогынаҥ иштеп болорыс па? Јок, анайып иштеп болбозыс. Иегова качан да арыбай јат, оныҥ учун ого амыраш керек јок. Је Агару Бичикте Иегова теҥерини ле јерди јайаган кийнинде, «ижин божодып, амырап баштаган» деп айдылат (Чыг. 31:17). Бу сӧстӧр, Иегованыҥ јайаандар јайаар ижин токтодып, бойыныҥ ижиле јакшызынып баштаганын кӧргӱзет. Иисус та агару ишти јерде бӱдӱрерге кӧп иштеген, је најыларыла ажанып, амыраарын ундыбаган (Матф. 14:13; Лука 7:34).

5. Кезик ака-эјелерге нени эдерге кӱч болот?

⁵ Агару Бичик Кудайдыҥ ишчилерин иштеҥкей ле јалкуурбас болорына кӱӱнзедет (Укаа 15:19). Бистиҥ кӧбизис билезин јеткилдеерге иштеп јат. Анайда ок бис ончобыс, Христостыҥ ӱренчиктери болуп, сӱӱнчилӱ јарды јарлап иштенедис. Је биске јеткилинче амыраар керек. Слерге ишти, јарлаар ишти ле амырашты кажызын ла бойыныҥ јерине тургузарга јеҥил бе? Канча кире иштеерин ле канча кире амыраарын билип аларга нени эдер керек?

6. Марк 6:30—34-тӧ бичилген учуралдаҥ, Иисус ишке ле амырашка чын кӧрӱмдӱ болгон деп, канайып кӧрӱнет?

⁶ Ишке чын кӧрӱмдӱ болор керек. Соломон каан агару тынныҥ болужыла мынайып бичиген: «Кажы ла немеде бойыныҥ ӧйи бар, кажы ла керекти эдетен ӧй бар». Анайда ок отургызатан, тудатан, ыйлайтан, каткыратан ла бијелейтен ӧй бар деп айткан (Јарл. 3:1—8). Эйе, биске иштеер де керек, амыраар да керек. Иисус ишке ле амырашка чын кӧрӱмдӱ болгон. Бир катап элчилерде јарлап јӱреле «ажанарга да бош јок болгон». Ол тушта Иисус олорго: «Аалга јерге барып, эмеш тыштанып алыгар» — деп айткан. (Марк 6:30—34 кычырыгар.) Иисуста ла оныҥ ӱренчиктеринде кезикте јеткилинче амырап алатан арга болбогон до болзо, је амыраш тӱҥей ле керектӱ деп, Иисус оҥдоп туратан.

7. Суббот кӱн керегинде јасакты шӱӱжип, бис неге ӱренип аларыс?

⁷ Биске кезикте амыраар керек эмезе јаантайын эдип турган ижистеҥ башка нени-нени эдер керек. Мынайып эдери неделе сайын ӧткӱрилетен суббот кӱн керегинде јасактаҥ кӧрӱнет. Бу јасакты Кудай бойыныҥ јебрен албатызына берген. Бӱгӱнги кӱнде бис Моисейдиҥ јасагын бӱдӱрбей турган да болзоос, је суббот кӱн керегинде јасактаҥ кӧп немеге ӱренер аргалу. Анайып, ишке ле амырашка бойыстыҥ кӧрӱмисти билип аларыс.

8. Чыгыш 31:12—15-ле болзо, суббот кӱн неге керектӱ болгон?

⁸ Кудайдыҥ Сӧзинде айдылганыла, Кудай ончо немени алты «кӱнниҥ» туркунына јайаган. Мыныҥ кийнинде, ол база нени де јайабаган (Баш. 2:2). Је Иегова иштенерге сӱӱп јат, оныҥ учун ол ӧскӧ дӧ иш эдип, «эмдиге јетире» иштенет (Иоанн 5:17). Израильтяндардыҥ неделе сайын ӧткӱрилген суббот кӱни, Башталганында бичилген Иегованыҥ амыраар кӱнине тӧзӧлӧнип тургузылган. Иегованыҥ айтканыла болзо, суббот кӱн Кудайла олордыҥ аҥылу колбуларын ла Египеттеҥ јайымдалганын эске алындырган. Бу кӱн «бастыра иштеҥ амырайтан» ла «Иеговага беретен агару кӱн» болгон. (Чыгыш 31:12—15 кычырыгар *.) Анайда ок бу кӱнде кемге де иштеерге јарабас, ол тоодо балдар да, кулдар да, керек дезе айылдыҥ тындулары да иштенбес  учурлу (Чыг. 20:10). Анайып, израильтяндар кӧгӱс керектерге кӧп ајару эдер аргалу болгон.

9. Иисус Христостыҥ ӧйинде суббот кӱн керегинде кандый јастыра кӧрӱм болгон?

⁹ Суббот кӱн керегинде јасак Кудайдыҥ албатызына тузалу болгон. Је Иисус Христостыҥ ӧйинде кудай јаҥдардыҥ башчылары суббот кӱн јанынаҥ ӧйинеҥ ӧткӱре кату некелтелер тургузып алган. Олордыҥ айтканыла бу кӱнде, керек дезе, аштыҥ мажагын да ӱзерге эмезе оору улусты да јазаарга јарабас болгон (Марк 2:23—27; 3:2—5). Је олордыҥ кӧрӱми Кудайдыҥ кӧрӱминеҥ чек башка болгонын, Иисус угарга белен улуска јартап туратан.

10. Матфей 12:9—12-ле болзо, Иисус суббот кӱнге кандый кӧрӱмдӱ болгон?

¹⁰ Иисус ла оныҥ иудей укту ӱренчиктери суббот кӱн керегинде јасакты бӱдӱрген, нениҥ учун дезе олор Моисейдиҥ јасагын бӱдӱрер учурлу болгон *. Је Иисус бойыныҥ сӧстӧриле, эткен керектериле суббот кӱнде јакшы керектер эдеринде, ол эмезе улуска болужарында јаман неме јок деп кӧргӱскен. Ол мынайып айткан: «Суббот кӱнде јакшыны эдерге јараар». (Матфей 12:9—12 кычырыгар.) Бу сӧстӧрлӧ болзо, суббот кӱнде јакшы керектер эткен кижи јасакты буспай јат. Иисустыҥ керектеринеҥ, суббот кӱн керегинде јасактыҥ учурын оҥдоп турганы кӧрӱнет. Анайып, албаты кӱнӱҥ сайын эдип турган ижинеҥ амырап, кӧгӱс керектер эдер аргалу болгон. Иисусты чыдаткан биле суббот кӱнде кӧгӱс керектер  эткен болор. Бу дезе, оныҥ чыккан калазында Иисусла болгон учуралдаҥ кӧрӱнет. Луканыҥ Сӱӱнчилӱ јарында мынайып айдылган: «Ол Назарет алтайына келди. Бойыныҥ јаҥыла суббот кӱнде синагогага кирип, Агару Бичикти кычырарга ӧрӧ турды» (Лука 4:15—19).

11. Ишке кандый кӧрӱмдӱ болоры јанынаҥ Иисуска кем јакшы тем болгон?

¹¹ Иосиф бойыныҥ азыраган уулын, Иисусты, јӱк ле агашла узанар эдип ӱреткен эмес, је ишке Кудайдыҥ кӧрӱмин алынарга болушкан (Матф. 13:55, 56). Анайда ок Иосиф бойыныҥ јаан билезин јеткилдеерге, кажы ла кӱн уур иш эдип турганыла Иисуска јакшы тем болгон. Анайып Иисус бойы да кӧп уур иш эткен. Оныҥ да учун соондо ол бойыныҥ ӱренчиктерине: «Иштеп јӱрген кижи ижи учун кайралын алар учурлу» — деп айткан (Лука 10:7).

12. Павел ишке кандый кӧрӱмдӱ болгон?

¹² Элчи Павелди дезе, база уур иш эткен деп айдарга јараар. Је Павел баштапкы јерге Иисус керегинде ле оныҥ јарын јарлаарын тургускан. Андый да болзо, ол бойын јеткилдеерге иштеп туратан. Оныҥ сӧстӧриле болзо, Фессалоникадагы ака-эјелер Павелдиҥ «кемди де кӱчсиндирбеске, бойын килебей, тӱн-тӱш иштеп» јӱргенин билер болгон (2 Фес. 3:8; Ап. ижи 20:34, 35). «Иш» деген сӧслӧ Павел байкандар кӧктӧгӧн ижин айткан болор. Ол Коринфте болордо, Акила ла Прискиллада јадып, олорло кожо байкандар эткен. Је «тӱн-тӱш» иштегени деп айдылганы, Павелди бу ишке бастыра ӧйин берген деп кӧргӱспей јат. Темдектезе, ол суббот кӱндерде иштебеген. Мынайып ол, суббот кӱнде база иштебей турган иудейлерге јарлаар аргалу болгон (Ап. ижи 13:14—16, 42—44; 16:13; 18:1—4).

13. Павелдиҥ теминеҥ бис неге ӱренедис?

¹³ Элчи Павел бистерге јакшы тем болот. Ого иштеерге келишкен де болзо, је «Сӱӱнчилӱ Јар јарла[ар]» ишке ол јаантайын туружарга албаданган (Рим. 15:16; 2 Кор. 11:23). Павел ака-эјелерди база анайып јӱрзин деп кӱӱнзеткен. Темдектезе, Коринфтеги ака-эјелерди: «Кайраканга иштеерине бастыра бойыгарды беригер» — деп кычырган (1 Кор. 15:58; 2 Кор. 9:8). Анайда ок Акила ла Прискилланы «Иисус Христоско [оныла кожо] иштеп јӱрген улус» деп адаган (Рим. 12:11; 16:3). Иегова керек дезе Павелди мындый сӧстӧр бичизин деп кӱӱнзеткен: «Иштеер кӱӱни јок кижи ажанба[зын]». Бу принципти јаҥыс ла телекейдиҥ ижине эмес, је јарлаар да ишке тузаланарга јараар (2 Фес. 3:10).

14. Иоанн 14:12-де бичилген Иисустыҥ сӧстӧри нени кӧргӱзет?

¹⁴ Јарлаар иш ле ӱренчиктер белетеер иш — калганчы кӱндерде бӱдӱретен эҥ ле јаан учурлу иш болуп јат. Керек дезе, Иисус бойыныҥ ӱренчиктери керегинде судурда, олор Ӱредӱчизинеҥ де јаан иш эдер деп айткан! (Иоанн 14:12 кычырыгар.) Бу сӧстӧр, бисти Иисус чылап кайкалдар эдерис деп кӧргӱспей јат, је бис Иисуска кӧрӧ, канча киреге кӧп улуска јарлаарыс ла ӱренчиктер белетеерис, анайда ок канча киреге узак ӧйгӧ јарлаарыс деп кӧргӱзет.

15. Бойыска кандый сурактар берер керек, нениҥ учун?

¹⁵ Слер иштеп турган болзогор, бойыгардаҥ мынайып сурагар: «Улус мени иштеҥкей кижи деп кӧрӧт пӧ? Ижимди ӧйинде бӱдӱрип, оны чыҥдый эдедим бе?» «Эйе» деп каруу берген болзогор, слерди ижигердиҥ јааны баалаар болор. Анайда ок слерле кожо иштеп турган улус сӱӱнчилӱ јарды јакшы угардаҥ айабас. Эмди дезе, бойыгарга мындый сурактар берип кӧрӱгер: «Јуун мени албадаҥкай јарчы ла ӱредӱчи деп билет пе? Мен улусла куучындажарга јазап белетенедим бе? Јилбиркеген улуска тӱрген барадым ба? Јарлаар иштиҥ кандый ла бӱдӱмдерине јаантайын  туружадым ба?» Каруугар «эйе» болзо, бу иш слерге сӱӱнчи экелер.

16. Амыраарына Иисустыҥ ла элчилердиҥ кӧрӱми бӱгӱнги улустыҥ кӧрӱминеҥ незиле башка?

¹⁶ Иисус ого бойына да, оныҥ ӱренчиктерине де кезикте амырап турар керек деп оҥдоп туратан. Је алдындагы да, эмдиги де ӧйдиҥ кӧп улузы, Иисустыҥ укаа сӧзинде: «Амыра, ичип-ји, јырга» — деп сананган бай кижи чилеп јӱргилейт (Лука 12:19; 2 Тим. 3:4). Бу кижи јӱк ле амырап ла јӱрӱмге јакшызынып јӱрерге кӱӱнзеген. Је Иисус ла элчилер соот-јыргалга чек башка кӧрӱмдӱ болгон.

17. Бис амыраар ӧйисти канайып тузаланадыс?

¹⁷ Бис Иисустаҥ тем алып, амыраар ӧйисти јӱк ле амыраарга эмес, је јарлаар ишке туружарга ла христиан туштажуларга јӱрерге тузаланадыс. Ӱренчиктер белетеерин ле туштажуларга јӱрерин бис тыҥ баалап јадыс. Бу кӧгӱс керектерге бойыстыҥ ӧйисти берип, ончо кӱчистеҥ албаданып турзаас, Иегованы сӱӱндирип јадыс (Евр. 10:24, 25). Керек дезе отпусктыҥ да ӧйинде, ӱренижип калган кӧгӱс графигисти буспай јадыс. Оныҥ учун кайда да јӱрзеес, туштажуларга јӱредис ле улусла Агару Бичик керегинде куучындажар арга бедирейдис (2 Тим. 4:2).

18. Бистиҥ Кааныс, Иисус Христос, биске нени кӱӱнзейт?

¹⁸ Бистиҥ Кааныс, Иисус Христос, бистеҥ эдип болбос неме некебей јат ла ишке ле амырашка чын кӧрӱмдӱ болорына болужып јат. Бу бисти тыҥ сӱӱндирет! (Евр. 4:15). Ол бисти јеткилинче амырап турзын деп кӱӱнзейт. Је бу ок ӧйдӧ бойысты јеткилдеерге иштенип турзын ла ӱренчиктер белетеер сӱӱнчилӱ ишке турушсын деп кӱӱнзеп јат. Келер јӧрмӧлдӧҥ, Иисус бисти калју кулданыштаҥ јайымдаарга нени эткен деп билип аларыс.