1, 2. Ака-эјелер сууга чӧҥӱрилип јаткан ӧйдӧ нени кӧрӧдис? Биске нени шӱӱп сананар керек?

 СЛЕР сууга чӧҥӱрилерге турган ака-эјелерди кӧрӱп јадаар деп сананып ийзеер де. Олор куучын-эрмек айдып јаткан аканыҥ эки сурагына бир де алаҥзыбай каруу берип јат. Олордыҥ јанында тыҥ оморкоп турган јуук најылары ла тӧрӧӧндӧри турат. Јаҥы чӧҥӱрилген ака-эјелердиҥ чырайлары јаркындалып јат. Анайда ок слер айландыра турган улустыҥ колчабыжын угадыгар. Анайып кажы ла неделеде, орто тооло алза, канча муҥ улус сууга чӧҥӱрилип, Иегова Кудайыстыҥ керечилери болуп калат.

² Је слер керегинде нени айдарга јараар? Сууга чӧҥӱрилерге турган болзоор, слер калју телекейде јадып турган ӧскӧ улустаҥ аҥыланып јадыгар. Агару Бичикте андый улус «Иегованы бедиреп тургандар» деп айдылат (Сар. 14:1, 2). Слер канча да јашту болзогор, бу јӧрмӧл слерге белетелген. Је сууга чӧҥӱрилген де ака-эјелер Иеговага јажын-чакка иштеерге кӱӱнзеп јат. Оныҥ да учун бу јӧрмӧлдӧ Иеговага недеҥ улам иштеп турганыстыҥ јӱк ӱч шылтагы кӧрӱлер.

3. Иегованыҥ ишчилери чынды ла чындык болорын нениҥ учун сӱӱп турган? (Сарын 119:128, 163).

³ Иегова бойыныҥ ишчилерине: «Чынды сӱӱгер» — деген (Зах. 8:19). А Иисус дезе бойыныҥ ӱренчиктерин чындык јӱрерге албаданзын деп кӱӱнзеткен (Матф. 5:6). Айдарда, бистерге чындык јӱрерге ле Кудайдыҥ кӧзине ару артарга тыҥ кӱӱнзеер керек. А слер чынды ла чындык јӱрерин сӱӱйдигер бе? Сӱӱп турганаар деп, бис алаҥзыбай јадыс. Слер кандый ла јаманнаҥ ла тӧгӱннеҥ јескинип јадыгар. (Сарын 119:128, 163 кычырыгар.) Тӧгӱнди сӱӱп турган улус бу телекейдиҥ башкараачызына, Дьяволго, тӱҥейлежет (Иоанн 8:44; 12:31). Оныҥ амадуларыныҥ бирӱзи — Иегованы јамандаары ла оныҥ агару  адын уйатка тӱжӱрери. Дьявол бу тӧгӱнди Эдемде, тӱймеен кӧдӱрилген туштаҥ ала, јайып баштаган. Дьявол Кудайды јаҥыс бойын сананып турган тӧгӱнчи башкараачы деп, анайда ок ол улустаҥ чынды јажырып турган деп јабарлаган (Баш. 3:1, 4, 5). Оныҥ бу тӧгӱни эмдиге ле јетире улустыҥ санаазын ла јӱрегин корондоп јат. Улус чынды сӱӱрдиҥ ордына, тӧгӱнди сӱӱп турза, Сатана олорды јӱзӱн-базын јаман керектерге ийде салат (Рим. 1:25—31).

4. Иегова бойын «чынныҥ Кудайы» деп канайып кӧргӱскен? (Јурукты база кӧрӱгер.)

⁴ Иегова — «чынныҥ Кудайы», ол бойыныҥ ишчилеринеҥ чынды јажырбай јат (Сар. 31:5). Анайып, олорды Сатананыҥ тӧгӱнинеҥ корулап јат. Анайда ок Иегова ишчилерин тӧгӱндебей јӱрерге ле јаман керектер этпеске ӱредет. Оныҥ да учун олор бойын тооп јат ла олордыҥ јӱректеринде амыр болот (Укаа 13:5, 6). Мынайып слер де керегинде айдарга јараар. Агару Бичикти ӱренип турала, слер Сатананыҥ тӧгӱнин айлап баштаганаар, кӧксигерде амыр тапканаар, анайда ок Иегованыҥ јасактары ла принциптери бастыра улуска да, слерге бойыгарга да тузалу деп билип алганаар (Сар. 77:13). Мынаҥ улам Кудайдыҥ чындык нормалары аайынча јӱрерге кӱӱнзей бергенеер (Матф. 6:33). Бого коштой улус Сатананыҥ тӧгӱнине бӱтпезин деп, олордыҥ кӧзин ачарга ла чынды корулаарга кӱӱнзей бергенеер. Мыны канай эдерге јараар деп кӧрӱп ийектер.

5. Чынды ла чындык јӱрерин талдап аларга слер нени эдер аргалу?

⁵ Слер мынайып айдар аргалу: «Мен Сатананыҥ тӧгӱнин јайладып, чындыкка јӧмӧжип јадым. Иегова мениҥ Башчым болзын деп кӱӱнзейдим, јӱк ого не јарап турганын эдерим». Мындый талдашты канайып эдер? Озо Иеговага учурланар керек. Ӧскӧртӧ айтса, аҥылу мӱргӱӱлде Иегова Кудайга јажын-чакка «иштеерим» деп сӧзин берери. Је оноҥ сууга чӧҥӱрилер керек. Слерди сууга чӧҥӱрилерге кӱӱнзедетен эҥ ле тыҥ неме — чынды ла чындык јӱрерин сӱӱри.

6. Сарын 45:4-тӧ Иисусты сӱӱйтен кандый шылтактар бар?

⁶ Слер Иисус Христосты нениҥ учун сӱӱйдигер? Кезик шылтактарды Сарын 45:4-тӧҥ (кычырыгар) таап аларга јараар. Иисус «чынды, јобош болорын, чындык јӱрерин» сӱӱп јат. Слер де мыны сӱӱп турган болзоор, Иисус Христосты да сӱӱп  јадыгар. Иисус чындыкты бир де јалтанбай канай корулаганын сананып кӧрӱгер (Иоанн 18:37). Анайда ок ол бисти јобош болорго ӱредет. Је ол мыны канайып эдет?

7. Слерге Иисустыҥ јобожынаҥ нези јарайт?

⁷ Иисус бисти јобош болорына бойыныҥ темиле ӱредет. Темдектезе ол бастыра макты бойына эмес, је Адазына јетирип јат (Марк 10:17, 18; Иоанн 5:19). Бу слерди неге кӱӱнзедет? Кудайдыҥ Уулын сӱӱрге ле оноҥ тем аларга кӱӱнзедет. Нениҥ учун Иисус јобош? Нениҥ учун дезе оныҥ Адазы — Иегова јобош Кудай (Сар. 18:35; Евр. 1:3). А Иисус Адазын сӱӱп јат ла ого јек јогынаҥ тӱҥейлежип јат. Мыны билгенеер слерди Иисусты сӱӱрге кӱӱнзетпейт пе?

8. Бис нениҥ учун Иисус Кааныбысты сӱӱп јадыс?

⁸ Бис Иисус Кааныбысты сӱӱп јадыс. Нениҥ учун дезе ондо бир де јик јок. Оны Иегова бойы ӱреткен ле ого башкаратан јаҥ берген (Иса. 50:4, 5). Анайда ок Иисустыҥ бойын килебес сӱӱжин сананып ийзеер де (Иоанн 13:1). Бистиҥ Кааныбысты, Кудайдыҥ Уулын, канайып сӱӱбейтен! Оныҥ айтканыла, оны сӱӱп турган улус ого сӱӱжин керектериле, ӧскӧртӧ айтса јакылталарын бӱдӱрип турганыла, кӧргӱзет. Иисус андый улусты најыларым деп айдат (Иоанн 14:15; 15:14, 15). Бу биске сӱреен јаан кӱндӱ болот!

9. Христиандардыҥ чӧҥӱрилгени ле Христостыҥ чӧҥӱрилгени незиле тӱҥей?

⁹ Иисустыҥ јакылталарыныҥ бирӱзиле болзо, оныҥ ӱренчиктери чӧҥӱрилер учурлу (Матф. 28:19, 20). Иисус бойы да сууга чӧҥӱрилген. Је оныҥ чӧҥӱрилгенинде ле ӱренчиктериниҥ чӧҥӱрилгенинде бир эмеш башказы бар. ( «Иисустыҥ ла оныҥ ӱренчиктериниҥ сууга чӧҥӱрилгенинде нези башка?» деген рамканы кӧрӱгер.) Андый да болзо, тӱҥей де неме бар. Иисус чӧҥӱрилген кийнинде Адазыныҥ табын бӱдӱрерге белен болгон (Евр. 10:7). Мынайып ла Иисустыҥ ӱренчиктери де сууга чӧҥӱрилгениле Кудайдыҥ табын јажын-чакка бӱдӱрерге јӱрӱмин учурлаганын кӧргӱзедилер. Олор чӧҥӱрилгенинеҥ ала бойыныҥ эмес, је Кудайдыҥ табыла јӱрет. Мынайып, бойыныҥ Кайраканынаҥ тем аладылар.

10. Иисусты слер нениҥ учун сӱӱп јадаар? Бу сӱӱш слерди неге кӱӱнзедет?

¹⁰ Слер Иисусты — Кудайдыҥ бойы јайаган Уулы ла бисле башкарзын деп тургузып салган Кааны деп бӱдӱп јадаар. Оныҥ јобожын ла Адазына јик јок тӱҥейлежип турганын билип алдаар. Анайда ок Иисус јерде болордо аштап калган улусты азыраган, ал-санаага тӱшкен улусты токунаткан, керек дезе оору улусты јаскан деп билип алганаар (Матф. 14:14—21). Бого коштой ол бӱгӱнги кӱнде јуунды башкарып турган деп кӧрӧдӧӧр (Матф. 23:10). Је келер ӧйдӧ Иисус Кудайдыҥ Каандыгыныҥ Кааны болуп, оноҥ кӧп алкыштар сыйлаар деп алаҥзыбай јадыгар. Слер Иисуска сӱӱжигерди канай кӧргӱзер аргалу? Иисустаҥ тем алганаарла кӧргӱзереер (Иоанн 14:21). Је мыны эдерге Иеговага јӱрӱмеерди учурлап, сууга чӧҥӱрилер керек.

11. Сууга чӧҥӱрилериниҥ эҥ јаан шылтагы кандый? Јартап беригер.

¹¹ Сууга чӧҥӱрилер шылтактардыҥ эҥ јааны кандый? Иисустыҥ айтканыла болзо, Кудайдыҥ јакылталарыныҥ эҥ јааны мындый — «Иегова Кудайыҥды, бастыра јӱрегиҥле, бастыра бойыҥла, бастыра санааҥла, бастыра кӱчиҥле сӱӱп јӱр» (Марк 12:30, ЈТ). Слер Кудайды мынайып сӱӱйдигер бе?

12. Слер нениҥ учун Иегованы сӱӱп турганаар? (Јурукты база кӧрӱгер.)

¹² Иегованы сӱӱйтен шылтактарды тоолоп  то болбозыс. Темдектезе, Иегова «Јӱрӱмниҥ башталганы» ла «ончо јакшы, јеткил сыйларды» (ЈТ) ол берип турган деп оҥдоп алганаар (Сар. 36:9; Иак. 1:17). Слерде бар-јогы — ӱзе кысканбас, сӱӱштӱ Кудайдаҥ берилген.

13. Толынтыны нениҥ учун Кудайдыҥ баалу сыйы деп айдарга јараар?

¹³ Иегованыҥ баалу сыйларыныҥ бирӱзи — толынты. Нениҥ учун мынайып айдарга јараар? Иегова Уулыла кожо теҥериде сӱреен јуук најылар болуп калганын сананып ийигер. Иисус айткан: «Ада Мени сӱӱп јат» (ЈК 2003), «Адамды сӱӱп турга[м]» (Иоанн 10:17; 14:31). Олордыҥ најылашканы канча миллиард јылдардыҥ туркунына там тыҥыган (Укаа 8:22, 23, 30). Је эмди дезе Иегованыҥ Уулыныҥ шыралап, ӧлӱп јатканын кӧрӧргӧ кандый ачу болгонын сананып кӧрӱгер. Иегова бастыра улусты, ол тоодо слерди де, сӱӱгени учун ончо улусты ӱргӱлјиге јӱрзин деп, бойыныҥ сӱӱген Уулын берген (Иоанн 3:16; Гал. 2:20). Бу дезе Иегованы сӱӱйтен эҥ јаан шылтак.

14. Кандый амадуны эҥ јакшы деп айдарга јараар?

¹⁴ Иеговала јууктада таныжып алараарда, оны сӱӱп баштаганаар. Је слер ого эмди де, јажын-чакка да оноҥ јуук болорго кӱӱнзейдеер эмей. Мыны слер эдип ийер аргалу! Иегова бисти оны сӱӱндирзин деп кӱӱнзедет (Укаа 23:15, 16). Бис оны сӧстӧрлӧ дӧ, керектерле де сӱӱндирер  аргалу (1 Иоанн 5:3). Анайып, јӱрӱмеердеҥ Иегованы чыннаҥ ла сӱӱп турганаар кӧрӱнер. Кудайды сӱӱндирери — эҥ ле јакшы амаду!

15. Слер Иеговага сӱӱжигерди канайып кӧргӱзер аргалу?

¹⁵ Иеговага сӱӱжигерди слер канай кӧргӱзер аргалу? Баштапкызында, Иеговага аҥылу мӱргӱӱлле баштанып, ого бастыра јӱрӱмигерди учурлараар деп сӧзигерди берип јадыгар (Сар. 40:8). Экинчизинде, сууга чӧҥӱриледигер. Анайып, Кудайга берген сӧзигерди улуска кӧргӱзип јадыгар. Слерде мынаҥ ары кӧп сӱӱнчи экелип турган јаҥы јӱрӱм башталат. Эмди слер бойоорго эмес, Иеговага јӱредигер (Рим. 14:8; 1 Пётр 4:1, 2). Мындый алтамды эдерге коркымчылу деп билдирердеҥ айабас. Је бу јӱрӱмигерде эҥ јаан учурлу алтам болот. Сууга чӧҥӱрилери эҥ јакшы јӱрӱмниҥ эжигин ачат. Нениҥ учун мынайда айдарга јараар?

16. Сарын 41:12-ле болзо, Иегова ого јӱрӱмин учурлаган улуска кандый кайрал берер?

¹⁶ Иегованыҥ кысканбазына кем де тӱҥейлежип болбос. Слер Иеговага канча ла кире кӧп берзеер, ол слерге оноҥ кӧп берер (Марк 10:29, 30). Ол слерге тӱгенип јаткан бӱгӱнги де телекейде сӱреен ырысту ла јакшы јӱрӱм сыйлаар. Је сууга чӧҥӱрилери — ӱргӱлји јӱрӱмниҥ јаҥы ла башталып јатканы болот. Бу јолдыҥ учы-кыйузы јок. Слер Иегова Адагарга јажын-чакка иштеер аргалу болороор. Оныла кожо канча ла кире узак јӱрзеер, ончо ло кире бой-бойоорды тыҥ сӱӱреер. Слер Иегова ла чылап јажын-чакка јӱререер. (Сарын 41:12 кычырыгар.)

17. Бисте Иеговага сый эдетен арга бар ба? Јартап беригер.

¹⁷ Бастыра јер-телекейдиҥ Јайаачызында, Иеговада, ӱзе неме бар. Јӱрӱмисте бар бастыра јакшы немени биске Иегова сыйлаган. Кижи сананза, бис ого кандый сый эдетенис? Је сууга чӧҥӱрилген кийнинде бисте андый арга ачыла берет. Бистиҥ Иеговага беретен сыйыс — ого акту јӱрегистеҥ иштеери болот (Иов 1:8; 41:11; Укаа 27:11). Бис јӱрӱмисти Иегованаҥ ӧскӧ кемге сыйлайтан эдис? Айдарда, сууга чӧҥӱрилетен  эҥ ле јакшы шылтак — Иегованы сӱӱри.

18. Слер бойоорго кандый сурактар берер аргалу?

¹⁸ Эмди мындый суракка кандый каруу берер эдеер: «Сен сууга чӧҥӱрилериҥ бе?» Кем де слер учун айдып болбос. Каруу берерге јеҥил болзын деп, мынай сананып ийигер: «Сууга чӧҥӱрилерге мени не буудактап турган?» (ЈТ) (Ап. ижи 8:36). Сууга чӧҥӱрилерге болужатан ӱч шылтакты эске алып ийигер. Баштапкызында, слер чынды ла чындык јӱрерин сӱӱйдигер. Оныҥ учун бойоордоҥ сурагар: «Кем де тӧгӱндебейтен, кем де јаман этпейтен ӧйди кӧрӧргӧ мен кӱӱнзейдим бе?» Экинчизинде: слер Иисус Христосты сӱӱйдигер. Бойоордоҥ сурагар: «Кудайдыҥ Уулы Христос мениҥ Кааным болзын деп кӱӱнзейдим бе? Оныҥ темиле јӱрерге кӱӱнзейдим бе?» Ӱчинчизи, эҥ ле јаан шылтагы: слер Иегованы сӱӱйдигер. Бойоордоҥ сурагар: «Иегованыҥ јӱрегин сӱӱндирерге кӱӱнзейдим бе?» Бу сурактардыҥ кажызына ла «эйе» деп айткан болзоор, сууга чӧҥӱрилерин удадатан шылтак бар эмтир бе? (Ап. ижи 16:33).

19. Сууга чӧҥӱрилерин нениҥ учун удатпас керек? Тем куучындап беригер (Иоанн 4:34).

¹⁹ Сууга чӧҥӱрилерге тидинбей турган болзоор, Иисустыҥ сӧстӧрин сананып ийигер. (Иоанн 4:34 кычырыгар.) Ол Адазыныҥ табын бӱдӱрерин курсакла тӱҥдештирген. Нениҥ учун дезе курсак биске јаантайын тузалу болот. Иегова бистеҥ каршулу неме этсин деп качан да сурабай турганын Иисус билер болгон. А Иегова слерди сууга чӧҥӱрилзин деп сурап турган ба? Эйе, нениҥ учун дезе бу оныҥ табы (Ап. ижи 2:38). Айдарда, сууга чӧҥӱрилери биске качан да каршу экелбес. Карын јаантайын туза экелер. Эҥ ле јакшы курсак азып турган кижиниҥ курсагынаҥ слер мойножор бедигер? Анайып ла ок сууга чӧҥӱрилери берип турган сӱӱнчинеҥ не мойножор?

20. Келер јӧрмӧлдӧ нени кӧрӧрис?

²⁰ Кезик улус сууга чӧҥӱрилерин нениҥ учун удадып турган? Та кем де айдар болор: «Мен белен эмезим» — деп. Эйе, чын ла, Иеговага јӱрӱмисти учурлап сууга чӧҥӱрилери ол эҥ јаан учурлу алтам. Мындый алтамды јазап сананбай јадып этпес керек. Анайда ок сууга чӧҥӱрилерге кӧп ӧй лӧ ийде-кӱч керек болот. Је слер чыннаҥ ла сууга чӧҥӱрилерге турган болзоор, мындый алтамды эдерге слерге не болужар? Бу сурактыҥ каруузы келер јӧрмӧлдӧ кӧрӱлер.