1, 2. Аксагалдар Павелдеҥ неге ӱренер аргалу?

 АПОСТОЛ Павел ака-эјелерди акту јӱрегинеҥ сӱӱп, олорго кӧп болужып туратан (Ап. ижи 20:31). Оныҥ да учун ака-эјелер Павелге сӱреен тыҥ карузыган. Темдектезе, Эфестеги аксагалдар Павелди база качан да кӧрбӧйтӧнин билип ийеле, ыйлашкылай берген (Ап. ижи 20:37). Бӱгӱнги де кӱнде бистиҥ аксагалдар Павел ле чилеп ака-эјелерди акту јӱрегинеҥ сӱӱп, олорго болужарга, бойыныҥ ийде-кӱчин, ӧйин кысканбай јадылар (Флп. 2:16, 17). Је кезикте олорго бу ишти бӱдӱрерге јеҥил эмес болуп јат. Бу јӧрмӧл олорго сӱреен керектӱ болор.

² Бистиҥ иштеҥкей аксагалдарыс Павелдеҥ кӧп немеге ӱренер аргалу (1 Кор. 11:1). Павел бис ле ошкош толо кемдӱ эмес кижи болгон. Ол кезикте канай этсе чын болорын билбей, јастырып та туратан (Рим. 7:18—20). Ого до коркышту јаан кӱчтер ӧдӧргӧ келишкен. Је андый да болзо, ол сӱӱнчизин јылыйтпай, Иеговага оноҥ ло ары иштеген. Је эмди апостол Павелдиҥ теми аксагалдарга кӱчтерди ӧдӱп, оноҥ ло ары сӱӱнчилӱ иштеерге канайып болужарын кӧрӱп ийектер.

3. Бу јӧрмӧлдӧ нени шӱӱжерис ле неге ӱренип аларыс?

³ Аксагалдарда кезикте мындый кӱчтер болуп јат: 1) кӧп молјулардаҥ улам јарлаар ишке ӧй табарга кӱч болот, 2) кӱдӱчиниҥ ижин кезикте јакшы бӱдӱрерге келишпей јат, 3) бойыныҥ јастыраларына чын кӧрӱмдӱ болорго кӱч, 4) улустыҥ јастыраларына чын кӧрӱмдӱ болорго кӱч. Мындый кӱчтер Павелде де болгон. Оныҥ учун аксагалдар Павелдеҥ неге ӱренер аргалу деп кӧрӱп ийектер.

4. Аксагалдарга јарлаар ишке туружарга нениҥ учун кӱч болуп турган болор?

⁴ Недеҥ улам кӱч болот? Аксагалдар јуунныҥ улузына јарлаар иш јанынаҥ тем кӧргӱзет. Је олордо оноҥ до ӧскӧ молјулар бар. Темдектезе, иштеер кӱндерде болуп турган туштажуларды ӧткӱрет. Олор ондо Агару Бичикти јуунда ӱренерин, анайда ок туштажуныҥ программазыныҥ ӧскӧ дӧ пункттарын ӧткӱргилейт. Олор болушчы ишчилерди ӱредет, ака-эјелерге болужарын ундыбайдылар (1 Пётр 5:2). Кезик учуралдарда организацияныҥ тураларын тударында туружадылар. Је олордыҥ эҥ учурлу молјузы — јарлаар ишке туружары (Матф. 28:19, 20). Бу молју дезе кажы ла јарчыга берилген.

5. Јарлаар иш јанынаҥ Павел кандый тем кӧргӱскен?

⁵ Павелдиҥ теми. Павел нениҥ учун једимдӱ јарчы болгон? Бу сурактыҥ каруузы Павелдиҥ Филиппыдагыларга бичиген самаразынаҥ кӧрӱнет. Ол олорго «эҥ артыгын талдап» туругар деп бичиген (Флп. 1:10). Мындый јӧпти Павел јӱк ле ака-эјелерге айдып турган эмес, је бойы да бӱдӱрген. Јарлаар ишти баштапкы јерге тургузып турганы оныҥ бастыра јӱрӱминеҥ кӧрӱнип јат. Канча јылдардыҥ туркунына Павел улусты «ончо улус алдында ла айылдар сайын» јӱрӱп ӱреткен (Ап. ижи 20:20). Анайда ок ол јӱк ле бир кандый ӧйдӧ эмезе кӱнде эмес, је келишкен ле учуралда јарлап ийетен. Темдектезе, Афинада Тимофей ле Силаны сакып турала, Павел јамылу улустарга јарлаган. Кийнинде олордыҥ кезиктери христиандар болуп калган (Ап. ижи 17:16, 17, 34). Павел каруулда да отурарда, токтобой јарлаган (Ап. ижи 28:16—24; Флп. 1:13, 14).

6. Павел акаларды неге ӱреткен?

⁶ Павел ӧйди бир де калас ӧткӱрбейтен. Ол баштапкы миссионер јорыгында Маркты кожо алган. Экинчи јорыгында — Тимофейди (Ап. ижи 12:25; 16:1—4). Павел бу карындаштарла јарлап јӱреле, олорды јаҥы јуундар тӧзӧӧргӧ ӱреткен, анайда ок кӱдӱчиниҥ ижин канайып эдерине ле улусты ӱредетен темигӱлерди канайып тыҥыдарына ӱреткен (1 Кор. 4:17).

7. Эфестегилерге 6:14, 15-теги Павелдиҥ сӧстӧрин аксагалдар канайып бӱдӱрер аргалу?

⁷ Кандый ӱредӱ? Аксагалдар Павелдеҥ неге ӱренер аргалу? Олор јӱк ле айылдар сайын јарлап турган эмес, је јарлайтан кандый ла учуралды тузаланат. Темдектезе, магазинде эмезе ижинде јарлап јат. (Эфестегилерге 6:14, 15 кычырыгар.) Каандыктыҥ Туразын тудуп турган  аксагалдар айылдаштарга эмезе поставщиктерге јарлайт. Анайда ок јарлайтан иштиҥ ӧйинде олор ака-эјелерди, ол тоодо болушчы ишчилерди ӱредет.

8. Кезикте аксагалдарга нени эдерге белен болор керек?

⁸ Аксагалдар бойыныҥ јууныныҥ эмезе аймагыныҥ ижин бӱдӱрип тура, јарлаар ишке ӧй артыргызып турар учурлу. Мынаҥ улам олорго кезик молјуларды албаска да келижер. Нениҥ учун дезе аксагал јарлаар ишке де туружып болбой барар, билелик бажырышты да ӧткӱрбей барар, анайда ок балдарыла да кожо јарлабай барар. А бу молјулар баштапкы јерде болор учурлу. Оныҥ учун молјуныҥ ӱстине база молју алардаҥ озо мӱргӱп, шӱӱп сананар керек. Айдарда, кару акалар, эҥ озо бӱдӱретен молјулараарды сананып, ӱстине берилип јаткан молјуны албазагар, санааркабагар, Иегова слерди оҥдоп јат.

9. Аксагалдарга кӧп ижинеҥ улам кандый молјузын бӱдӱрерге кӱч болот?

⁹ Недеҥ улам кӱч болот? Иегованыҥ ишчилеринде кӱчтер ас эмес болот. Анчада ла бу калганчы кӱндерде бистиҥ кажыбыска ла болуш, токунаду, јылу сӧстӧр керектӱ. А кезигиске дезе кӧгӱс тӱзедӱ керек (1 Фес. 5:14). Аксагалдар Кудайдыҥ албатызын бастыра кӱчтердеҥ корулап болбозо до, је канча кире аргазы бар тӱҥей ле болужып јат. Нениҥ учун дезе Иегова олорды оныҥ койлорын кичеезин, корулазын деп кӧстӧгӧн. Айдарда, аксагалдардыҥ ижи кӧп тӧ болзо, је бу молјуны бӱдӱрерге олор нени эдер аргалу?

10. 1 Фессалоникадагыларга 2:7-ле болзо, Павел ака-эјелерге канайып болушкан?

¹⁰ Павелдиҥ теми. Павел ака-эјелерди мактаарга албаданып туратан. Оныҥ јазап, талдап алган сӧстӧри ака-эјелердиҥ кӱӱнин кӧдӱрген. Аксагалдар база анайып ла ака-эјелерге јалакай, јымжак баштанарга албаданат. (1 Фессалоникадагыларга 2:7 кычырыгар.) Павел олорго бойыныҥ сӱӱжин, је эҥ озо Иегованыҥ сӱӱжин кӧргӱзип туратан (2 Кор. 2:4; Эф. 2:4, 5). Ол ака-эјелерле најылажып, олорло ӧй ӧткӱретен. Олорго алаҥзыбай бӱдер болгон. Бу дезе Павел бойыныҥ јастыраларын ла санааркаштарын ака-эјелерге куучындап турганынаҥ кӧрӱнет (2 Кор. 7:5; 1 Тим. 1:15). Је бу ла ок ӧйдӧ Павел бойыныҥ кӱчтерин ака-эјелерге ӧйинеҥ ӧткӱре кӧп куучындабаган. Нениҥ учун дезе ол ака-эјелерге озо ло баштап болужарга кӱӱнзеген.

11. Павел нениҥ учун кезикте ака-эјелердиҥ јастыраларын тӱзедип туратан?

¹¹ Павелге кезикте ака-эјелердиҥ јастыраларын тӱзедерге келишкен. Је ол јӧпти качан да изӱ-тарый бербейтен. Карын ака-эјелерге ле јакшы болзын деп,  олорды кинчектеҥ корулаарга албаданган. Оныҥ учун кижини ачындырбаска ла јӧпти алынарга јеҥил болзын деп, нени, канай айдарын јазап сананып алатан. Бир катап Павел Коринфтеги ака-эјелерге кату јӧп береле, санааркай берген. Мынаҥ улам ол Титти Коринфтӧӧн ийип јат. Је кӧрӧр болзо, ака-эјелер ачынбай, јӧпти алынган эмтир (2 Кор. 7:6, 7). Павел мыны угала, токунай берген.

12. Аксагалдар ака-эјелердиҥ бӱдӱмјизин канайып тыҥыдат?

¹² Кандый ӱредӱ. Аксагалдар Павелдиҥ теминеҥ неге ӱренер аргалу? Олорго ака-эјелерле најылажып, куучындажып турар керек. Мынайып эдерге, ого јуунныҥ туштажуларына улустаҥ озо келзе јакшы болор. Ака-эјелердиҥ кӱӱнин кӧдӱрерге, кӧп сабада, кӧп лӧ ӧй керек јок, тоолу ла минут једет (Рим. 1:12; Эф. 5:16). Аксагалдар Павелдиҥ теминеҥ база неге ӱренер аргалу? Олор Агару Бичиктиҥ болужыла ака-эјелердиҥ бӱдӱмјизин тыҥыдат, олорды Кудайдыҥ сӱӱжинде бӱдӱмјилейт. Бойыныҥ да сӱӱжин кӧргӱзерге уйалбай јат. Ака-эјелерле кӧп куучындажып, олорды мактап турарга албаданат. Је кемди-кемди тӱзедер керек болзо, ака бойыныҥ јӧбин Агару Бичикке тӧзӧлӧнип берет. Кижиниҥ јастыразын чике де айдар керек болзо, аканыҥ сӧстӧри јымжак ла јалакай болор учурлу. Мениҥ јӧбимди ака эмезе эје канай алынар деп, аксагалга сананып турар керек (Гал. 6:1).

13. Кезик аксагалдар бойыныҥ толо кемдӱ эмезине кандый кӧрӱмдӱ болот?

¹³ Недеҥ улам кӱч болот? Аксагалдар бистер ле ошкош толо кеминде улус эмес, оныҥ учун јастырып ийет (Рим. 3:23). Олорго кезикте бойыныҥ јастыраларына чын кӧрӱм јетпей јат. Мынаҥ улам олордыҥ кезиги кичинек ле јастырып ийзе, тыҥ санааркап, бойын јинип јат. А кезиги дезе, бойыныҥ јастыразын бир де керекке албай јадылар.

14. Филиппыдагыларга 4:13-ле болзо, Павел јобош болгонынаҥ улам бойыныҥ јастыраларына кандый кӧрӱмдӱ болгон?

¹⁴ Павелдиҥ теми. Павел Иегованыҥ болужы јогынаҥ бойыныҥ јастыраларын тӱзедип болбозын јакшы оҥдоп туратан. Христиан болордоҥ озо Павел калју, казыр кижи болгон. Ол христиандарды коркышту тыҥ истешкен (1 Тим. 1:12—16). Је кийнинде бойыныҥ јастыразын оҥдоп, чек ӧскӧ кижи болуп калган. Иегова ого јобош, јалакай, улусты оҥдоп, сӱӱп турар кӱдӱчи болорго болушкан. Је кезикте Павел бойыныҥ јастыраларын сананып, кӧзиниҥ јажын  тудуп болбойтон. Андый да болзо, Иегова оныҥ јастыраларын таштап салар деп бӱткен (Рим. 7:21—25). Оныҥ учун Иисустыҥ теминеҥ јуук тудунып, тӱзединерге албаданган ла јобош болуп, Иегованаҥ болуш сураган (1 Кор. 9:27; Филиппыдагыларга 4:13 кычырыгар).

15. Аксагалдар бойыныҥ јастыраларына кандый кӧрӱмдӱ болор учурлу?

¹⁵ Кандый ӱредӱ. Аксагал болуп кӧстӧлгӧн ака толо кемине једип калган болбой јат. Оныҥ да учун Иегова аксагалдарды јастыразын алынып турзын ла Христостоҥ тем алзын деп кӱӱнзейт (Эф. 4:23, 24). Анайда ок аксагалдар бойыныҥ јастыраларын кӧрӱп турарга ла тӱзединип турарга, Агару Бичикти тереҥ шиҥдеер учурлу. Ол тушта Иегова олорго молјузын бӱдӱрерге ле сӱӱнчилӱ болорго болужар (Иак. 1:25).

16. Аксагалдар улустыҥ јӱк ле јастыраларын кӧрӱп турза, не болордоҥ айабас?

¹⁶ Недеҥ улам кӱч болот? Аксагалдар ака-эјелерле канча ла кире јуук таныжып келзе, ончо ло кире олордыҥ уйан јандарын кӧрӱп баштайт. Оноҥ улам аксагал тудунып болбой калала, аканы эмезе эјени тӱзедип, арбанып ийердеҥ эмезе јамандап ийердеҥ айабас. Мындый кылык-јаҥ эш немеге јарабас, нениҥ учун дезе Павелдиҥ айтканыла, ол Сатана аксагалдарды андый болзын деп кӱӱнзейт (2 Кор. 2:10, 11).

17. Павел ака-эјелерге кандый кӧрӱмдӱ болуп туратан?

¹⁷ Павелдиҥ теми. Павел ака-эјелердиҥ јакшы јанын кӧрӧргӧ албаданатан. Је кезикте олор јастырып турза, Павелге де ачу болуп туратан. Андый да болзо, Павел ака-эјелерди сӱӱген, олорды јакшы керектери учун баалаган. Оныҥ учун олордыҥ јастыраларына јаан ајару этпеске албаданатан. Олордоҥ бир де чӧкӧбӧй, кижи јаман эмес, керек јаман деп оҥдоп туратан. Олор оны ӧнӧтийин этпеген, олорго јӱк ле бир кичинек болужып ийер керек деп кӧрӧтӧн.

18. Павелдиҥ Эводия ла Синтихияга болушканынаҥ слер неге ӱренедеер? (Филиппыдагыларга 4:1—3).

¹⁸ Павел Эводия ла Синтихияга канайып болушканын кӧрӱп ийектер. (Филиппыдагыларга 4:1—3 кычырыгар.) Эводия ла Синтихияныҥ ортозында оҥдошпостор боло берген, оноҥ улам олордыҥ колбулары сооп калган. Павел мыны билип ийеле, эјелерди капшай ла арбанбаган, олорды тӱзедер арга јок эмтир деп сананбаган, карын оныҥ ордына јараш кылык-јаҥдарын кӧргӧн. Олор экӱлези Кудайга кӧп иштеп турган чындык эјелер болгон. Оныҥ учун Иегова олорды сӱӱп турган деп Павел билген. Эјелерге мындый чын кӧрӱмдӱ болгоны Павелге канай болушкан? Баштапкызында,  ол Эводия ла Синтихияны јаражып алзын деп кӱӱнзеткен. Экинчизинде, Павел ол јуунныҥ ака-эјелериле јуук колбуларлу артып, бойыныҥ сӱӱнчизин јылыйтпаган.

19. а) Аксагалдарга ака-эјелердиҥ јараш кылык-јаҥына кӧрӱп турарга не болужар? б) Јуруктагы Каандыктыҥ Туразын јуунадып јаткан аксагалдаҥ слер неге ӱренедеер?

¹⁹ Кандый ӱредӱ. Аксагалдар, ака-эјелердиҥ јараш кылык-јаҥдарына ајару эдип туругар. Бис ончобыс толо кемдӱ эмес те болзоос, бистиҥ кажыбыста ла јакшы јандарыс бар (Флп. 2:3). Је кезикте аксагалдарга ака-эјелерди тӱзедерге келижет. Мындый учуралда олор Павел ле чилеп, ака-эјелердиҥ јастыраларына эмес, карын Иеговага сӱӱжин, олордыҥ кӧп иштеп турганын ла кандый бир ишти јакшы эдип турганын кӧрӱп јат. Аксагалдар мынайып эдип турза, јуунда амыр болор, ака-эјелер де бой-бойына кару болор.

20. Аксагалдар Павелдиҥ темин кайдаҥ шиҥдеп кӧрӧр аргалу?

²⁰ Аксагалдар, Павелдиҥ темин тереҥжиде кӧрӱп алыгар. Мында слерге «Индекс публикаций Сторожевой башни» (Павел > Пример для старейшин) деп материал болужар. Бу материалды шиҥдеп јадала, бойыгардаҥ сурагар: «Меге Павелдиҥ теми аксагалдыҥ молјузын бӱдӱрерге ле сӱӱнчилӱ артарга канайып болужар?»

21. Аксагалдар неде алаҥзыбас аргалу?

²¹ Аксагалдар, Иегова слерди качан да јастырбас деп сакыбай јат, је ого чындык болор деп сакыйт (1 Кор. 4:2). Иегова Павелдиҥ эткен ижин, сӱӱжин сӱреен баалаган. Ол слердиҥ де ижигерди баалап јат. Кудай слердиҥ «эдип јӱргенигерди ле сӱӱжигерди... агаруларга болушканыгарды, эмди де болужа[раарды]» качан да ундыбас (Евр. 6:10).