Сара * бойы керегинде мынайып куучындайт: «Уйалчаҥ болгонымнаҥ улам омок, билееркек улустыҥ ортозында бойымды эби-јок сезедим. Је јобош ло јымжак улусла меге јакшы болот. Андый улуска бойымныҥ сезимдеримди, кӱчтеримди куучындаарга уйалбай јадым. Мениҥ эҥ јуук најыларымныҥ ончозы јымжак ла јобош».

Сараныҥ сӧстӧринеҥ улус јобош улуска тартылат деп кӧрӱнет. Иегова да јобош улусты сӱӱп јат. Оныҥ Сӧзи бисти: «Јобош... болорын кийимди чилеп кийип алыгар» — деп айдат (Кол. 3:12). Је јобош болоры ол не дегени? Бу кылык-јаҥды Иисус канайып кӧргӱскен? Јобош болоры биске ырысту болорго канайып болужат?

Јобош кижиниҥ јӱреги амыр. Андый кижи улуска јымжак ла јалакай баштанат. Јӱрӱмниҥ кӱчтерин дезе, чыдажып ӧдӧт.

Јобош болоры кижиниҥ ичиндеги ийде-кӱчин кӧргӱзет. «Јобош болоры» деп кӧчӱрилип турган грек сӧс, јобожыдып салган эмдик ат керегинде айдылган тушта тузаланылган. Эмдик ат јобожыдылган кийнинде андый ла ийде-кӱчтӱ артат, је ол ийде-кӱчин тударга ӱредилип калат. Анайып ла ок, јобош болоры, биске кылыгысты тудунып, улусла амыр-энчӱ јӱрерге болужат.

Бис бойысты јобош эмезис деп сананып турган болорыс. Бӱгӱнги телекейде билееркек ле чыдажып билбес улус кӧп, оныҥ учун биске јобош болорго кӱч болуп јат (Рим. 7:19). Јобош болорго јеҥил эмес те болзо, је Иегованыҥ агару тыныныҥ болужыла бис јобош болорго ӱренип аларыс (Гал. 5:22, 23). Јобош болорго нениҥ учун ӱренер керек?

Јобош кижиге улус тартылып јат. Јӧрмӧлдиҥ бажында айдылган Сарага ла чылап, биске јобош улусла куучындажарга јарап јат. Эҥ ле јобош ло јалакай кижи Иисус болгон (2 Кор. 10:1). Керек дезе Иисусты јакшы билбес те балдар ого тартылып туратан (Марк 10:13—16).

Јобош болзоос, биске бойыска да, јаныстагы улуска да јакшы болот. Јобош кижи ӱзе ле немени јӱрекке јуук алынбай јат ла ӧйинеҥ ӧткӱре чугулданбай јат (Укаа 16:32). Анайып, бис улуска, анчада ла сӱӱген улузыска чугулданбазаас, бойысты да јинбезис, јаныстагы улуска да бисле кожо болорго јакшы болор.

Иисус кӧп керектерлӱ ле јаан молјуларлу да болгон болзо, ол ончо улуска јобош баштанган. Ол ӧйдӧ, кӧп улуска јеҥил эмес болгон. Мынаҥ улам олор токунал керексиген. Олорго Иисустыҥ: «Меге келигер... ...Мен јобош ло улуркабас јӱректӱ» — деп айткан сӧстӧри болушкан болор (Матф. 11:28, 29).

Иисустыҥ теми бистерге јобош болорго канайып болужат? Агару Бичикти ӱренер ӧйдӧ Иисустыҥ улуска канайып баштанганын ла кӱч айалгаларда канайып тудунганын билип аладыс. Оноҥ кандый бир айалгада јобожыс ченелип турза, бис Иисустаҥ тем аларга албаданадыс (1 Петр 2:21). Эмди, Иисус недеҥ улам јобош болгон деп билип алактар.

Иисус «улуркабас јӱректӱ» болгон. Ол бойы керегинде: «Мен јобош ло улуркабас јӱректӱ» — деп, айткан (Матф. 11:29). Агару Бичикте јобош ло јымжак болоры кожо айдылат, нениҥ учун дезе бу сӧстӧр јуук колбулу (Еф. 4:1—3).

Јобош болзоос, бис бийиркенбезис ле улустыҥ сӧстӧрин јӱрегиске ӧткӱре јуук алынбазыс. Иисусты улус курсакка ачап ла аракызак кижи деп, актуга ла бурулап турарда, ол бойын канайып тудунган? Иисус олордыҥ тӧгӱнин кӧргӱзерге, олорло тартышпаган нениҥ учун дезе ол бир де јаман неме этпеген. Оныҥ айтканыла болзо, «кижиниҥ ойгоры керектеринеҥ кӧрӱнет» (Матф. 11:19, ЈТ).

Кем-кем билбей калала, угы-тӧзис эмезе эр ле ӱй улус керегинде ачынчылу нени-нени айдып ийзе, ачынбаска, јобош болор керек. ЮАР-да јадып турган Питер деп аксагал мынайып айткан: «Меге кемниҥ-кемниҥ айткан сӧстӧри јарабай турза, бойымнаҥ: „Бу айалгада Иисус нени эдер эди?“ — деп сурайдым. Анайып, мен јӱк бойымды сананбаска ӱренип алдым».

Иисус улусты толо кемдӱ эмес деп ундыбаган. Иисустыҥ ӱренчиктери јакшы керектер эдерге кӱӱнзеген. Је толо кемдӱ эмес болгонынаҥ улам олор кезикте јастырып туратан. Темдектезе, Иисус божоор алдында Петрдаҥ, Иаковтоҥ ло Иоаннаҥ болуш сураарда, олор болужып болбогон. Иисус олорды оҥдоп, мынайып айткан: «Тын сергек, эт-канда дезе, чине јок» (Матф. 26:40, 41). Иисуска, апостолдорыныҥ толо кемдӱ эмезин ундыбаганы, ачынбаска болушкан.

Мэнди эје улустыҥ јаманын ла кӧрӧр кижи болгон, је эмди ол Иисустаҥ тем алып, јобош болорго бастыра ийде-кӱчинеҥ албаданып јат. Ол айдат: «Бис ончобыс толо кемдӱ эмезис деп ундыбай јадым, анайып улуска Иегованыҥ кӧрӱмиле кӧрӱп, олордыҥ јакшызын кӧрӧргӧ албаданадым». Толо кемдӱ эмес улусты килеп јӱрген Иисустыҥ теми биске де јобош болорго болужар.

Иисус Кудайга иженген. Иисус бойы да улуска јаман кӧрдӱрип јӱрген: улус оныҥ сӧстӧрин ӧскӧртип, Иисусты эш немеге бодобой, учы-тӱбинде ӧлтӱрип салгандар. Је андый да болзо, Иисус јобош арткан, нениҥ учун дезе ол бойыныҥ јӱрӱмин «Чындык Јаргычыга бӱдӱмјилеген» (1 Петр 2:23). Иисус теҥеридеги Адазы ого кӱчтерди ӧдӧргӧ болужар ла бойыныҥ ӧйинде јаманды јоголтор деп билер болгон.

Бис јаман кӧрдӱрип турзаас, бойысты тудунып болбой калала, айалганы оноҥ кӱч эдип салардаҥ айабазыс. Оныҥ да учун Агару Бичик биске: «Кижиниҥ чугулы Кудайдыҥ чындыгын јайабай јат» — деп, эске алындырат (Иак. 1:20). Бис ачынар да јолду болзоос, је толо кемдӱ эмес болгоныстаҥ улам јастыра неме эдип ийеле, кийнинде санааркаар болорыс.

Германияда јадып турган Кэти «бойыҥ учун тартышпазаҥ, сеге кем де болушпас» деген принципле јӱрген. Је ол Иеговага иженерге ӱренип аларда, айалга чек солына берген. Ол мынайып куучындайт: «Эмди мен бойым учун кажы ла айалгада тартышпай јадым, нениҥ учун дезе бастыра неме Иегованыҥ колында. Бу дезе меге кылыгымды тударга болужат». Слер де улуска јаман кӧрдӱрип турзагар, Иисустаҥ тем алып, Кудайга иженип туругар, бу дезе слерге јобош болорго болужар.

Иисустыҥ јартаганыла, јӱк ле јобош улус чыннаҥ ла ырысту болор аргалу. «Јобоштор  кежиктӱ [ырысту]» — деп, Иисус айткан (Матф. 5:5). Эмди, јобош болгоныс биске канайып болужып турганын шӱӱжип ийектер.

Јобош болоры эш-нӧкӧрлӧргӧ оҥдошпосторды ӧдӧргӧ болужат. Австралияда јадып турган Роберт ака айдат: «Ӱйиме ачына береле, кӧп ачу сӧстӧр айтканым санаамга кирет, је чынынча оны ачындырарга кӱӱнзебегем. Је айткан сӧсти кайра бурылтып болбозыҥ. Мениҥ сӧстӧримнеҥ ӱйимге ачу болгон деп оҥдоп ийеримде, меге коркышту јаман болгон».

Агару Бичикте мындый сӧстӧр бар: «Бис ончобыс кӧп јастырып јадыбыс» (Иак. 3:2). Оныҥ учун эш-нӧкӧрлӧр бой-бойына сананбай јадып, ачу сӧстӧр айдардаҥ айабас. Мындый айалгада јобош болоры чугулданбаска ла тилисти тартарга болужар (Укаа 17:27).

Роберт акага эмеш јобош болорго ло бойын тудунарга ӱренип аларга тыҥ албаданарга келишкен. Бу кандый туза экелди? Ол мынайып куучындайт: «Эмди, оҥдошпостор боло берзе, мен ӱйимди лаптап угарга, оныла јымжак куучындажарга ла ого ачынбаска тыҥ албаданып јадым. Мынаҥ улам бистиҥ колбуларыс канча киреге јакшы болуп калган».

Јобош болоры улусла эптӱ-јӧптӱ јӱрерге болужат. Ачынчак улуста најылар да ас. Јобош улуска дезе улусла эптӱ-јӧптӱ јӱрерге јеҥил, нениҥ учун дезе олор амырга јӱткӱйт (Еф. 4:2, 3). Ӧрӧги айдылган Кэти эје айдат: «Јобош болзоос, бастыра улусла, керек дезе куучындажарга кӱч те болуп турган улусла, куучындажарга бир эмеш јеҥил болот».

Јобош болоры јӱрекке амыр берет. Агару Бичикле болзо, јобош ло амыр болоры «ӧрӧртинеҥ келип турган ойгорлыкла» колбулу (Иак. 3:13, 17). Јобош кижиниҥ јӱреги амыр (Укаа 14:30). Јобош болорго ӱренип турган Мартин ака айдат: «Јобош болорго эмеш ӱренип алала, ӱзе ле неме мениҥ кӱӱнимле болзын деп албаданбай јадым. Мынаҥ улам јӱрегимде амыр ла сӱӱнчи сезедим».

Биске јобош болуп ӱренип аларга, тыҥ албаданарга келижер болор. Бир ака мынайып куучындаган: «Ачыгынча айтсам, кезик айалгаларда мениҥ ичи-буурым эмди де кайнай берет». Је бисти јобош болорго ӱредип турган Иегова Кудай биске мындый сезимдерле тартыжарга кыйалта јогынаҥ болужар (Иса. 41:10; 1 Тим. 6:11). Ол бисти тӱзедип, ийде-кӱчтӱ эдип салар (1 Петр 5:10). Анайып, бис Иисустаҥ тем алып, апостол Павел ле чилеп, ончо улуска јобош ло јалакай баштанарга ӱренип аларыс (2 Кор. 10:1).