Мария a ла Джон деп эш-нӧкӧрлӧрдиҥ јадып турган ороонын дӧӧн Филиппинынаҥ кӧп улус акча иштеерге келгилейт. Ол улустыҥ кӧбизи чындыкты јилбиркеп угат. COVID-19 деп пандемияныҥ ӧйинде Мария кӧп ӱредӱлер баштаган. Ӱренип турган улустыҥ кезиги ӧскӧ ороондордо јадат. Мария мыны канайып эткен?

Кудайдыҥ Сӧзин баалап турган улус кӧргӧн-укканын капшай ла тӧрӧӧндӧрине ле најыларына куучындап јат. Оныҥ учун Мария Агару Бичик ӱренип турган улустарынаҥ: «Слердиҥ таныштараардаҥ кем-кем Агару Бичик ӱренерге кӱӱнзеп турган ба?» — деп сурап угар болгон. Андый кижи табыла берзе, Мария: «Мени ол кижиле таныштырып салзаар» — деп сурайтан. Мындый теп-тегин сурактаҥ јилбилӱ кандый учуралдар болгонын кӧрӱп ийектер.

Мария Жасми́н деп ӱй кижиле Агару Бичик ӱренген болгон. Жасминниҥ тӧрт ӱрее-јелелери база Агару Бичик ӱренерге кӱӱнзеген, оныҥ учун ол олорды Марияла таныштырган. Олордыҥ бирӱзине, Кристинага, ӱренерге коркышту тыҥ јараган, оныҥ учун ол Марияны неделениҥ ичинде эки катап ӱренерге сураган. Мария Кристинанаҥ оныҥ таныштарынаҥ кем-кем Агару Бичик ӱренерге кӱӱнзеп турган ба деп сураган. Ол: «Эйе» — деген. Оноҥ тоолу неделенеҥ Кристина бойыныҥ баштап тӧрт, оноҥ база тоолу ӱреелериле Марияны таныштырган. Бу улустыҥ кезиктери Марияга олордыҥ таныштарыныҥ ортозында ӱренерге турган улус база бар деп куучындаган.

Кристина Филиппиныда јадып турган тӧрӧӧндӧрин база Агару Бичик ӱрензин деп кӱӱнзеген. Оныҥ учун Адриа́на деп кызына куучындаган. Адриана озо баштап: «Иегованыҥ Керечилери — ол секта, олор Иисуска бӱтпей турган, јӱк ле Эски Кереести кычыргылап турган» — деп сананган. Је баштапкы ла ӱредӱниҥ кийнинеҥ оныҥ санаазы чек солынып јат. Ӱредӱниҥ ӧйинде ол јаҥы неме билип ле алза, Агару Бичик оны айдып турган болордо, айса ол чын ла андый деп айдар болгон.

Бир эмеш ӧйдӧҥ Адриана Марияны эки ӱреезиле кожо иштеп турган бир кижиле таныштырган. Олор база Агару Бичик ӱренип баштаган. Кӧрӧр болзо, ӱредӱлердиҥ ӧйинде Адриананыҥ јанында бир кижи болуп турган эмтир. Мария бу керегинде билбеген. Бу кижи Адриананыҥ адазыныҥ сыйынызы, кӧзи кӧрбӧй турган Анжела деп кижи болгон. Бир катап Анжела Марияла кожо бойы Агару Бичик ӱренерге турган деп, Адрианага айткан. Бир ле айга бу кижи Агару Бичиктиҥ кӧп ӱлгерлерин ӱренип алган ла неделениҥ ичинде тӧрт катап ӱренерге  суранган! Анайда ок Анжела Адриананыҥ болужыла видеосвязь ажыра јуундарга јӱрӱп баштаган.

Ӱредӱлердиҥ ӧйинде Кристинаныҥ ӧбӧӧни, Джошуа, база јанында болуп туратан. Мария бу керегинде билип ийеле, Джошуаны ӱредӱлерге база кожулзын деп сураган. Ол айткан: «Је мен јӱк ле слерди угайын, јаҥыс менеҥ нени де сурабагар. Сурап ла баштазаар, туура јӱре берерим». Је ӱредӱ башталган да јок, Джошуа Марияны сурактарыла кӧмӱп салган, оныҥ сурактары Кристинаныйынаҥ да кӧп болгон, оныҥ учун ол база Агару Бичик ӱренип баштаган.

Тегин сурактыҥ болужыла Мария кӧп ӱредӱлер баштаган. Бир эмеш ӧйдӧҥ ол кезиктерин ӧскӧ Керечилерге берип ийген. Бастыра тоозын алза, Мария тӧрт башка ороондо јадып турган 28 кижиле ӱредӱ баштаган.

Агару Бичикти ӱренип баштаган баштапкы ӱй кижи, Жасмин, 2021 јылдыҥ кандык айында сууга чӧҥӱрилген, Кристина — 2022 јылдыҥ кӱӱк айында. Оноҥ Кристина Филиппины дӧӧн тӧрӧӧндӧрине јанып барган. А Анжела Кристинаныҥ кийнинеҥ тоолу ай ӧдӧрдӧ сууга чӧҥӱрилген, эмди ол текши пионер болот. Кристинаныҥ эки ӱреези база сууга чӧҥӱрилген. А ӧбӧӧни, Джошуа, кызы Адриана, анайда ок ӧскӧ дӧ улустар Агару Бичикти оноҥ ло ары ӱренип, Иеговала колбуларын тыҥыдып јадылар.

Баштапкы чакта сӱӱнчилӱ јар тӧрӧӧндӧрдиҥ ле најылардыҥ ортозында коркышту тӱрген јайылган (Иоанн 1:41, 42а; Ап. ижи 10:24, 27, 48; 16:25–33). Оныҥ учун Агару Бичикти ӱренип турган кижинеҥ эмезе чындыкла јилбиркеп турган ӧскӧ улустаҥ: «Слер Агару Бичик ӱренерге турган кижи билереер бе?» — деп не сурап ийбес. Мындый теп-тегин сурактыҥ болужыла кӧп ӱредӱлер баштаарга јараар. Слерди канча кире ӱредӱ сакып јатканын сананып ийзеер де!