1. 1 Пётр 5:2-ле болзо, аксагалдарга кандый молју берилген?

 ИЕГОВА христиан аксагалдарга бойыныҥ баалу койлорын кичеейтен молју берген. Аксагалдар бу ижин сӱреен тыҥ баалап јат ла бастыра ийде-кӱчинеҥ јакшы кӱдӱчи болорго албаданат (Иер. 23:4; 1 Пётр 5:2 кычырыгар). Бистиҥ јуундарыста андый аксагалдар бар болгонына бис сӱреен јаан быйанду болодыс!

2. Аксагалдарда кандый кӱчтер болордоҥ айабас?

² Аксагалдарга молјуларын бӱдӱрерге кезикте кӱч болуп јат. Оныҥ учун олорго кӧп ийде-кӱч керек. Темдектезе, США-да јадып турган То́ни деп аксагал бойыныҥ кемин оҥдоп турарга ӱренип алган. Ол куучындайт: «COVID-19 башталарда, аксагалдардыҥ молјулары кӧптӧй берген. Мен јуунныҥ ла јарлаар иштиҥ туштажуларыла колбой кӧп молјулар алгам. Је канча ла кире кӧп иштензем де, иш астаардыҥ ордына, карын ончо ло кире кӧптӧп туратан. Мынаҥ улам мӱргӱбей де баргам, Агару Бичикти кычырбай да, таҥынаҥ ӱренбей де баргам». Косоводо аксагал болуп турган Или́р деп акада ӧскӧ кӱчтер болгон. Ого јуу-согуштыҥ ӧйинде јеткерлӱ јердеги ака-эјелерди кичеейтен молју берилген. Ол куучындайт: «Филиалдыҥ јакаруларын бӱдӱрерге коркымчылу болгон. Анайда ок бу јакарулар ойгор эмес деп билдирилген». Азияда миссионер болуп турган Тим деп акага јӱрӱмниҥ ӧдӱжинеҥ улам, ӧй чек ле јетпей туратан. «Мениҥ бар-јок ийде-кӱчим чыгып калатан» — деп, ол айдат. Андый кӱчтерди ӧдӧргӧ, аксагалдарга не болужар?

3. Јаргычы Гедеонныҥ теми ончобыска незиле тузалу?

³ Аксагалдар јаргычы Гедеонноҥ кӧп немеге ӱренер аргалу (Евр. 6:12; 11:32). Гедеон Кудайдыҥ албатызына коручы ла кӱдӱчи болгон (Јарг. 2:16; 1 Лет. 17:6). Эмдиги аксагалдар Гедеон ло чылап кӱч ӧйлӧрдӧ Кудайдыҥ албатызын корулайт (Ап. ижи 20:28; 2 Тим. 3:1). Гедеон  бойыныҥ кемин билер, јобош, турумкай ла сӧсуккур кижи болгон. Оныҥ теминеҥ бис ончобыс ӱренер аргалу. Бу кару акаларысты аксагал да, аксагал эмес те болзоос, баалап, олордыҥ ижине јӧмӧжип турактар (Евр. 13:17).

4. Гедеон бойыныҥ кемин билер кижи деп недеҥ кӧрӱнген?

⁴ Гедеон бойыныҥ кемин билер, јобош кижи болгон b. Бир катап ого ангел келип, Иегова оны Израиль албатыны мадиандардаҥ јайымдайтан кижи эдип талдап алган деп айткан. Је Гедеон ангелге айтты: «Мениҥ угым — Манассияныҥ угында эҥ ле ас, а мен адамныҥ билезинде эҥ кичинеги» (Јарг. 6:15). Гедеонныҥ сӧстӧрин кӧрзӧӧс, ол бойын мындый јаан учурлу молјуга келишпес деп сананган. Је Иегованыҥ кӧрӱми башка болгон. Учында Гедеон Иегованыҥ болужыла јакылтаны сӱреен јакшы бӱдӱрип салган.

5. Кандый учуралдарда аксагалдарга јобош болорго ло бойыныҥ кемин билерге јеҥил эмес болот?

⁵ Аксагалдар ӱзе ле јанынаҥ бойын тудунып билерге ле јобош болорго албаданат (Мих. 6:8; Ап. ижи 20:18, 19). Олор бойыныҥ једимин эмезе јайалталарын кӧпчитпей јат. Је бу ла ок ӧйдӧ бойыныҥ кандый ла јастыразы учун јинбейдилер. Андый да болзо, олорго бойын јобош тудунарга ла бойыныҥ кемин билерге кезикте келишпей јат. Темдектезе, аксагал кӧп молјулар алала, бӱдӱрип болбозын оҥдоп ийет. Ол эмезе аксагалды кем-кем мактап турар эмезе јамандап турардаҥ айабас. Мындый учуралдарда Гедеонныҥ теми канай болужар?

6. Аксагалдар Гедеонноҥ неге ӱренер аргалу? (Јурукты база кӧрӱгер.)

⁶ Болуш сурагар. Бойыныҥ кемин билер кижи бастыра немеге ийде-кӱчи јетпес деп оҥдоп јат. Гедеон андый ла кижи болгон. Оныҥ учун ол улустаҥ болуш сураарга уйалбаган (Јарг. 6:27, 35; 7:24). Ойгор аксагалдар база анайып ла эдет. Ӧрӧги айдылган Тони ака мындый сӧстӧр айткан: «Меге кандый бир јакылта берилзе, мен качан да јок деп айдып болбойтом. Не дезе мени јаштаҥ ала  ада-энем анай таскаткан. Оныҥ учун бойыныҥ кемин билери керегинде теманы бистиҥ билелик бажырышта тереҥжиде шӱӱжер деп санандым. Оноҥ ӱйимнеҥ де сурагам, меге бу кылык-јаҥды кӧргӱзерге канайып келижип туру деп. Анайда ок бистиҥ сайттаҥ „Обучайте других, доверяйте им и передавайте полномочия, подражая Иисусу“ деген видео кӧргӧм». Мыныҥ кийнинде Тони ака кезик јакылталарды ӧскӧ акаларга берип баштаган. Айалга канайып солынды? Тони айдат: «Эмди јуунныҥ да ижи турбай јат, Иеговала колбуларымды тыҥыдатан ӧй дӧ једип јат».

7. Аксагалдар јамандадып турза, Гедеонноҥ неге ӱренер аргалу? (Иаков 3:13).

⁷ Јамандадып турзагар, ачынбагар. Аксагалдарга, кемге-кемге јамандадып турза, јеҥил эмес болот. Мында ойто ло Гедеонныҥ теми болужар. Гедеон бойы да кезикте јастырып турганын билетен. Оныҥ учун ефремляндар оны јамандап турарда, Гедеон олорго ачынбай, јымжак каруу берген (Јарг. 8:1—3). Гедеон олордыҥ комыдалын угуп, олорды токунадып салган. Ойгор христиандар Гедеонноҥ тем алып, ака-эјелердиҥ комыдалын угуп, јымжак каруу берер аргалу. (Иаков 3:13 кычырыгар.) Анайып, јуунныҥ амыры бузылбас.

8. Аксагалдарды улус мактап турза, олорго бойын канайып тудунар керек? Тем куучындап беригер.

⁸ Макты Иеговага јетиригер. Улус Гедеонды мадиандарды јеҥип алганы учун мактаарда, ол бастыра макты Иеговага јетирген (Јарг. 8:22, 23). Аксагалдар мынаҥ неге ӱренер аргалу? Слерге нени-нени эдерге јакшы келижип турган болзо, бастыра макты Иеговага јетиригер (1 Кор. 4:6, 7). Темдектезе, улус аксагалды јакшы ӱредӱчи деп мактап турза, ол: «Бис ончобыс Кудайыҥ Сӧзинеҥ ӱренедис, ончобысты Иегованыҥ организациязы ӱредет» — деп айдар аргалу. Аксагалга кезикте: «Мен бойыма ӧйинеҥ ӧткӱре ајару этпей тургам ба?» — деп сананып турар керек. Ти́моти деп аксагалдыҥ темин кӧрӱп ийектер. Оны аксагал эдип кӧстӧп ийерде, ого куучын-эрмек айдарга сӱреен тыҥ јарап туратан. Ака айдат: «Мен сӱреен јилбилӱ кире сӧстӧр лӧ темдер белетеп алатам. Оноҥ ака-эјелер мени коркыш мактаар болгон. Је анайып мен Иеговага ла Агару Бичикке эмес, бойыма ајару эдип тургам деп оҥдоп ийгем». Оныҥ учун ол куучын-эрмек айдар марын солып баштаган (Укаа 27:21). Ака оноҥ ары куучындайт: «Эмди ака-эјелер мени эмес, је куучын-эрмегим олорго кандый бир кӱчтерин, ченелтелерин ӧдӧргӧ канайып болушканын, ол эмезе Иеговала колбуларын тыҥыдарга болушканын куучындаза, мен сӱреен тыҥ сӱӱнип јадым!».

9. Гедеонго нениҥ учун сӧсуккур ла јалтанбас болор керек болгон? (Кадарындагы јурукты кӧрӱгер.)

⁹ Гедеонды Израильде јаргычы болзын деп кӧстӧп саларда, ого сӧсуккур ла јалтанбас болор керек болгон. Ого адазыныҥ Ваалга бажырып турган тагылын јоголтсын деп, јалтанчылу јакылта берилген (Јарг. 6:25, 26). Оныҥ кийнинде черӱзин астатсын деп, эки катап јакылта алган (Јарг. 7:2—7). Анайда ок ого тӱн ортозында ӧштӱге табару эдер керек болгон (Јарг. 7:9—11).

10. Сӧсуккур болорго аксагалдарга кандый учуралдарда јеҥил эмес болордоҥ айабас?

¹⁰ Аксагалдар сӧсуккур болор учурлу (Иак. 3:17). Сӧсуккур аксагал Кудайдыҥ Сӧзине багынарга ла Иегованыҥ организациязыныҥ башкартуларын бӱдӱрерге  белен болот. Мынайып олор улуска сӱреен јакшы тем кӧргӱзет. Је кезикте олорго до сӧсуккур болорго јеҥил эмес. Темдектезе, аксагал јакарулардыҥ башкызын бӱдӱрип болбой јатканча, база да ӧскӧлӧри келет. Ол эмезе башкартулар саҥ-башка, ойгор эмес деп билдирип турган болор. А кезик јакарулардаҥ улам аксагалды тӱрмеге де отургызып салардаҥ айабас. Мындый учуралдарда аксагалдар Гедеонноҥ кандый тем алар учурлу?

11. Сӧсуккур болорго, Гедеонныҥ теми аксагалдарга канайып болужар?

¹¹ Јакаруларды лаптап угуп, бӱдӱригер. Кудай Гедеонго адазыныҥ тагылын канайып јоголтотонын, јаҥы тагылды кайда тудатанын ла тайылгага кандый тынду экелетенин айдып берген. Гедеон бу башкартуларды ӱзе бӱдӱрип салган. Бӱгӱнги кӱнде аксагалдарга организация јакаруларды самаралар, јарлар, оноҥ до ӧскӧ эп-аргалар ажыра берет. Анайып, бис кӧгӱс коруда артадыс. Бис Иегованыҥ јакаруларын бӱдӱрип турган аксагалдарысты сӱреен баалап јадыс. Бу ончо неменеҥ бӱдӱн јуун туза алат (Сар. 119:112).

12. Иегованыҥ организациязы јаҥы башкартулар берзе, аксагалдар Еврейлерге 13:17-ни канайып тузаланар аргалу?

¹² Солынарга белен болугар. Иегова Гедеонго черӱзин 99 процентке астатсын деп айтканын сананып ийектер (Јарг. 7:8). Гедеон мынайда сананган болор: «Чын ла мынча кире астадар керек пе? А ӧштӱлерди бис канайда јеҥетенис?!» Је андый да болзо, ол Кудайдыҥ айтканын бӱдӱрип салды. Бӱгӱнги кӱнде аксагалдар Иегованыҥ организациязыныҥ башкартулары аайынча та нени де солыыр керек болзо, эмезе ӧскӧ этире эдер керек болзо, Гедеонноҥ тем алат. (Еврейлерге 13:17 кычырыгар.) Темдектезе, 2014 јылда Башкару јӧп Каандыктыҥ Тураларын ла Курултайлардыҥ Тураларын акча-манатла јеткилдеери јанынаҥ јаан солынта эткен. Ол ло ӧйдӧҥ ала јуундардаҥ Каандыктыҥ Туралары учун тӧлӱзин тӧлӧдӧри токтодылып калган (2 Кор. 8:12—14). Оныҥ ордына бастыра јердиҥ ӱстиндеги јуундар акчазын бир фондтӧӧн јууп баштаган. Мындый солынтанаҥ улам, чек акчага јединбей турган јуундарга да Каандыктыҥ Туралары тудулган. Бу солынтаны уккан Хосе́ деп бир ака мынайда сананган: «Анай бис бир де Каандыктыҥ Туразын тудуп болбозыс. Бистиҥ јерде андый неме иштебес». Андый да болзо, Хосеге Иегованыҥ организациязыныҥ башкартузына багынарга не болушкан? Ол айдат: «Меге Иеговага иженер керек деп, Укаа сӧстӧр 3:5, 6-дагы сӧстӧр санаама кирген. Оноҥ бери сӱреен кӧп эдилген ишти кӧрзӧм, кайкап јадым. Эмди бис алдындагызына кӧрӧ канча катапка кӧп Каандыктыҥ Тураларын тудадыс. Анайда ок сый этире берген акча-манадыс акчага јединбей  турган ака-эјелерге болуш болот. Нениҥ учун дезе бастыра јердиҥ ӱстиндеги јуундардаҥ јуулган акча-манат кажызына ла једер эдип, оноҥ јакшы тузаланылат».

13. а) Гедеон неде бӱдӱмјилӱ болгон? б) Аксагалдар Гедеонноҥ кандый тем алар аргалу? (Јурукты база кӧрӱгер.)

¹³ Иегованыҥ табын јалтанбай бӱдӱригер. Гедеонго јакылта коркымчылу ла јеткерлӱ деп билдирген де болзо, ол Иегованыҥ сӧзин укты (Јарг. 9:17). Иегова ого болужарым деп сӧзин берген. Оныҥ учун Гедеон Кудайдыҥ албатызын корулап аларым деп бир де алаҥзыбаган. Бӱгӱнги кӱнде бистиҥ агару ижис кезик ороондордо токтодуда. Андагы аксагалдар Гедеонноҥ тем алат. Олор шыладарынаҥ да, ижин јылыйтарынаҥ да, эмезе соктыртарынаҥ да коркыбай, јуунныҥ туштажуларын ла јарлаар иштиҥ туштажуларын јалтанбай ӧткӱргилеп, бойлоры да эрчимдӱ турушкылайт c. Улу тӱбектиҥ ӧйинде бу акаларга берилген башкартуларды тузаланарга јалтанбас болор керек. Бу башкартулар Магог јериниҥ Гогынаҥ канайып аргаданатаны ла мӧндӱр ошкош јетирӱни канайып јарлаары керегинде болордоҥ айабас (Иез. 38:18; Ачыл. 16:21).

14. Гедеонныҥ турумкай болгоны канайып ченелди?

¹⁴ Гедеон јаргычыныҥ ижин бӱдӱрерге тыҥ албаданган. Ол тӱниле мадиандарла јуулашкан. Је олор качарда, Гедеон олорды Изреель деп ӧзӧктӧҥ ала Иордан суунныҥ јаказына јетире истешкен. Иордан суунныҥ јаказында койу јыралар ӧскӧн болор (Јарг. 7:22). Ол Иордан суунныҥ јаказына келеле, токтоп калды ба? Јок! Гедеон 300 јуучылыла кожо арып та калган болзо, Иордан суунныҥ ол јанына кечип, ӧштӱни оноҥ ары истежип барды. Учы-учында олорды јаба једеле, одо согуп салган (Јарг. 8:4—12).

15. Аксагалдыҥ турумкай болгоны канайып ченелердеҥ айабас?

¹⁵ Аксагал бойыныҥ билезиндеги ле  јуундагы молјуларын бӱдӱрип тура, тыҥ чучураар болор. Мынаҥ улам оныҥ нени де эдер кӱӱни келбей барардаҥ айабас. Мындый айалгада ого Гедеонныҥ теми канайып болужар?

16, 17. а) Гедеонго јакылтазын бӱдӱрип саларга кем болушкан? б) Аксагалдарга неде алаҥзыбас керек? (Исайя 40:28—31). (Јурукты база кӧрӱгер.)

¹⁶ Иегова ийде-кӱч берер деп бир де алаҥзыбагар. Гедеон Иегова ого ийде-кӱч берер деп бир де алаҥзыбаган. Иегова ого чын ла ийде-кӱч берген (Јарг. 6:14, 34). Качан Гедеон ло оныҥ јуучылдары мадиандардыҥ каанын сӱрӱжип барадарда, олор тӧӧлӧрлӱ качкан, а Гедеон ло оныҥ јуучылдары јойу сӱрӱшкендер (Јарг. 8:12, 21). Оноҥ Кудайдыҥ болужыла Гедеон ло оныҥ јуучылдары мадиандарды јаба једеле, одо согуп салды. Бӱгӱнги кӱнде аксагалдар Кудай олорго бойыныҥ ӧйинде ийде-кӱч берер деп, база бир де алаҥзыбай јат. Нениҥ учун дезе Иегова «качан да арыбас ла чылабас» Кудай. (Исайя 40:28—31 кычырыгар.)

¹⁷ Мэтью деп аксагал больницаларла колбожотон комитетте иштеп турган. Ого бу молјузын бӱдӱрерге не болужат? Ол куучындайт: «Филиппыдагыларга 4:13-теги сӧстӧр иштеп турган деп бӱдӱмјиленип алдым. Тыҥ арып калзам эмезе чучурап калзам, мен Иеговага мӱргӱп јадым. Ака-эјелердиҥ кӱӱнин кӧдӱрерге сагыжым ла чыдалым јетпей турза, Иегова Кудайымнаҥ јайнап суранадым. Ол тушта ол меге бастыра молјуларымды бӱдӱрип саларга агару тынын кӧптӧдӧ бергенин сезетем». Гедеонныҥ темиле болзо, бистиҥ аксагалдар Иегованыҥ койлорын кичеерге, мынайып ла јеҥил эмес айалгаларда иштегилейт. Олорго бастыра молјуларын бӱдӱрерге, бойыныҥ санаазы да, чыдалы да јетпес деп оҥдоп турар керек. Је Иегова олорго молјуларын бӱдӱрерге, сураган јайнуузына каруу берип, болужар деп, аксагалдар бир де алаҥзыбас аргалу (Сар. 116:1; Флп. 2:13).

18. Аксагалдарга Гедеонныҥ теми незиле тузалу?

¹⁸ Бу јӧрмӧлдӧ кӧргӧнисле бӱгӱнги аксагалдарга Гедеонныҥ теми сӱреен тузалу. Олорго канча кире молјулар алатанын эмезе улус олорды мактап турза, эмезе јамандап турза канайдатанын оҥдоп турарга, бойыныҥ кемин билери ле јобош болоры болужар. Аксагалдар сӧсуккур ла јалтанбас болор учурлу, анчада ла бу телекейдиҥ учы јууктап келген ӧйдӧ. Олорго бастыра ижин Иегованыҥ болужыла эдип, чыга берер деп бӱдер керек (Флп. 2:29). Айдарда, бистиҥ иштеҥкей аксагалдарысты баалап турактар!