«ОЛОРДЫҤ јалакайы меге кӱнниҥ чогы јылыткандый болгон» — деп, Лайза * эје куучындаган. Мындый ла сезимдер Анна эједе болгон. Оны озо баштап Агару Бичиктиҥ ӱредӱлери эмес, је ака-эјелердиҥ јалакайы кайкаткан. Андый да болзо, бу эјелерге эмди Агару Бичикти кычырарга, кычырганын шӱӱп сананарга тыҥ јарап јат.

Бис айландыра улуска јалакай болорго кӱӱнзейдис. Оныҥ учун бу јӧрмӧлдӧ, айткан сӧстӧристе, эткен керектеристе канайып јалакай болорын кӧрӧрис. Анайда ок бистер кемге јалакай болор учурлу деген суракты шӱӱжерис.

Билелӱ ӱй кижи керегинде Укаа сӧстӧр 31:26-да айдылат: «Тилинде јалакай болорыныҥ јасагы». Бу ӱй кижи нени айдып турганында ла канайып айдып турганында бу јасактаҥ тудунат. Адалар да бу јасактаҥ тудунар учурлу. Кажы ла ада-эне билер: балдарын јаантайын арбанып, соок ло кату баштанып турза, балдарына каршу јетирердеҥ айабас деп. Анайда ок олордо јуук колбу да болбос. Је ада-энелер балдарына јалакай ла јымжак баштанып турза, балдарына јарап јат, оноҥ олордыҥ сӧзин угарга да јеҥил болот.

Бисте балдар бар да болзо, эмезе јок то болзо, кажыбыска ла куучыныс јалакай болзын деп албаданар керек. Је бого канайып ӱренип алар? Бу сурактыҥ каруузы Укаа сӧстӧр 31:26-да айдылат: «Оозында оныҥ ойгор». Оныҥ учун нени айдарын, канай айдарын јазап шӱӱп сананып турар керек. Темдектезе, бойыска мындый сурак берерге јараар: «Мениҥ айткан сӧзим кижини токунадып салар ба, эмезе там ары ачындырып салар ба?» (Укаа 15:1). Айдарда, немени айдардаҥ озо, јазап сананар керек.

База бир укаа сӧстӧ мынайып айдылат: «Кем де сананбай айткан сӧстӧриле кылыш чылап, шыркалап јат» (Укаа 12:18). Бис бу ӱлгердеги сӧстӧрди ундыбай турзаас, нени айдарын, канай айдарын озодоҥ шӱӱп сананып турарыс. Јалакай болорыныҥ јасагын бӱдӱрип турзаас, кижини ачындырып ийгедий кату сӧстӧр айтпазыс (Эф. 4:31, 32). Карын бистиҥ сӧстӧрис јылу, јымжак болуп, улустыҥ кӱӱн-санаазын кӧдӱрер. Бу јанынаҥ темди биске Иегова бойы кӧргӱскен. Илья судурчызы кӱч айалгада болордо, Иегова ого ангелин ийген. Ангел коркып калган Ильяга јалакай баштанып, оны јылу сӧстӧриле токынадып салган (1 Каан. 19:12). Је кижиниҥ јалакайы јаҥыс ла оныҥ сӧстӧринеҥ эмес, је эдип турган керектеринеҥ де кӧрӱнет.

Бис Иегованаҥ тем алып турзаас, јалакайысты јаҥыс ла сӧстӧрисле эмес, је керектерисле де кӧргӱзерис (Эф. 4:32; 5:1, 2). Лайза эске алат: «Биске кенетийин кӧчӧргӧ келижерде, јууннаҥ эки эш-нӧкӧр иштеҥ суранып алала, биске келип, јӧӧжӧбисти јуунадарга болушкан. Мен ол тушта Агару Бичикти ӱренгелек  те болгом!» Бу ака-эјелердиҥ јакшы керектери Лайзаны Агару Бичикти ӱренерге кӱӱнзеткен.

Анна Иегованыҥ Керечилериниҥ болужына база быйанду. Ол мынайда куучындайт: «Бу калју телекейде улуска да бӱдерге коркышту. Оныҥ учун мен олордоҥ эмеш чочып туратам. Бу олор менеҥ нени кӧргӱлеп алган? Је Агару Бичикле ӱредӱ ӧткӱрген эјениҥ јалакайын, акту кӱӱнинеҥ болужып турганын кӧрӧлӧ, ого бӱдӱп баштагам. Је бир канча ӧйдиҥ бажында Агару Бичикти оноҥ јакшы ӱренерге кӱӱнзегем».

Ајардаар ба, Анна ла Лайзаны ака-эјелердиҥ болужы сӱреен кайкаткан деп? Шак ла анаҥ улам олор Агару Бичикти чала-была эмес, је јазап ӱренерге кӱӱнзей берген. Андый јалакай ака-эјелерди кӧрӱп, олор Иеговага ла оныҥ ишчилерине бӱдӱп баштагандар.

Кезик улус бойлоры ла јалакай ла јаантайын кӱлӱмзиренип јӱрет. Кылык-јаҥы јакшы, улусты тоор эдип, улуска  јакшы баштанар эдип таскадып койгон улусты кӧрӧргӧ дӧ јакшы. Је Иеговадый јалакай болорго база да ӧскӧ неме керек. (Апостолдордыҥ ижи 28:2 тӱҥдештиригер.)

Чыннаҥ ла јалакай кылык-јаҥду болоры — агару тынныҥ тӱжӱмине кирип јат (Гал. 5:22, 23). Мындый кылык-јаҥду болорго, бистиҥ санааларыс та, эдип турган керектерис те, агару тынныҥ башкартузыла болзын деп ӱренер керек. Андый кылык-јаҥга ӱренип алзаас, Иегованаҥ ла Иисустаҥ тем алып турган болорыс. Нениҥ учун дезе бис Иегова Кудайысты сӱӱп јадыс, анайда ок Иисус чылап улуска акту јӱрегистеҥ болужарга кӱӱнзейдис. Анайып, јуугыска болужатан кӱӱнис оноҥ тыҥ болор.

Биске эмезе најыларыска болушкан улуска јалакай болорго бир де кӱч неме јок (2 Сам. 2:6). Андый улуска быйанысты да айдып јадыс. Болужып та јадыс (Кол. 3:15). Је биске качан да јакшы неме этпеген кижиге канайып јалакай болотон деп санаа келип турган болзо, нени эдерис?

Мындый айалгада Иегова Кудайдаҥ тем алар керек. Ол кемди де ылгабай јакшыны ӱзе улуска эдет. Грек Бичимелдерде Иегованыҥ «иштеп болбос јалакайы» деген сӧстӧр кӧп катап туштап јат.

Иегова јалакайын канайып кӧргӱзет? Ол миллиардтар тоолу улусты сананып, олорго јӱрӱмге керектӱ немени ончозын берет (Матф. 5:45). Оныҥ сӱӱжи бис оны билгелегисте де кӧрӱнген (Эф. 2:4, 5, 8). Темдектезе, Кудай бастыра улус учун баалу сыйды бойы јайаган кару Уулын берген. Бу сыйды Кудай, апостол Павелдиҥ айтканыла, «улу иштеп албас јалакайынаҥ улам берген» (Эф. 1:7). Анайда ок бис кинчектӱ бойыс теҥеридеги Адабысты јаантайын ачындырып та турган болзоос, ол бисти тӱҥей ле тӱзедип, ӱредип јат. Онын јакарулары ла сӧстӧри «тыбырап тӱшкен јааштый» болот (Јаҥ. т. 32:2). Бис Кудайдыҥ ондый јалакайын иштеп болор бедис? Кудайдыҥ мындый јалакайы эмес болгон болзо, бисте келер ӧйгӧ ижемји де болбос эди. (1 Пётр 1:13 тӱҥдештиригер.)

Бис Иегованыҥ јалакайын кӧрзӧӧс, јӱрегис томулып, улуска јалакай баштанарга кӱӱнзейдис. Оныҥ учун Иегова чылап бастыразына јалакай болорго албаданадыс. Бис улуска јаантайын ла јалакай болзоос, олорго биске баштанарга, бисле кожо болорго бир де кӱч болбос (1 Фес. 5:15). Мыны дезе соок кӱнде отко јылынганына тӱҥейлеерге јараар. Анайып бис јууктарыска, јуундагы ака-эјелерге, кожо иштеп турган улуска, кожо ӱренип турган балдарга, анайда ок айылдаштарыска јӧмӧлтӧ болорыс.

Сананып ийзеер де, слер кемге јалакай сӧстӧр айдып, јакшы керектереерле болужып ийер аргалу. Темдектезе, тӧрӧӧн кижиге ол эмезе ака-эјелерге айыл-јуртын арутап, ол эмезе огородто кандый бир иш бар, анайда ок магазиннеҥ та нени де экелип берер, ол эмезе јарлаар иште кандый бир кижиге болуш керек болзо, слер болужып болороор бо?

Иеговага тӱҥейлежип, айткан сӧстӧристе ле эткен керектеристе «јалакай болорыныҥ јасагын» бӱдӱректер.