1. Иегова бойын нениҥ учун эне кижиге тӱҥдештирет?

«ӰЙ КИЖИ эмискен балазына карузыбай, оны ундып салар ба?» — мындый сӧстӧрди Иегова судурчы Исаияныҥ ӧйинде айткан. «Эне кижи ундып салардаҥ айабас, је мен сени ундыбазым» — деп, Иегова бойыныҥ албатызына айдат (Иса. 49:15). Агару Бичикте Иегова бойын эне кижиге тӱҥдештирген учуралдар кӧп эмес. Је бу учуралда Иегова шак ла мындый тӱҥдештирӱни тузаланат. Иегова эне ле баланыҥ колбулары керегинде тӱҥдештирӱни тузаланып, бойыныҥ ишчилерин тыҥ сӱӱп турганын кӧргӱзерге сананган. Кӧп саба энелер Жасмин * деген эјениҥ сӧстӧриле јӧпсинер болор. Ол мынайып айткан: «Бала чыдаткан эне кижиде балазына аҥылу сезимдер болот. Андый сезимдер кижиниҥ бастыра јӱрӱмине артып калат».

2. Иегова балдарыныҥ бирӱзи оноҥ тууралап калза, нени сезет?

² Иегова балдарыныҥ бирӱзи ле јарлабай, јуунныҥ туштажуларына јӱрбей барза, санааркап јат. Кажы ла јыл муҥдар тоолу улус мынайып Иегованаҥ тууралап калат *. Мыны кӧрӧргӧ Иеговага коркышту ачу.

3. Иегова нени кӱӱнзеп јат?

³ Јууннаҥ ырап калган кӧп ака-эјелер јуунга ойто  једип келет, бис бого тыҥ сӱӱнип јадыс! Иегова оноҥ тууралап калган улустыҥ ончозы јуунга ойто једип келзин деп кӱӱнзеп јат, бис те анайып ла кӱӱнзейдис (1 Петр 2:25). Је бис олорго канайып болужар аргалу? Бу сурактыҥ каруузын билердеҥ озо, нениҥ учун кезик јарчылар јуунныҥ туштажуларына јӱрбей, јарлабай барат деп билип алактар.

4. Телекейдеги иш кезик христиандарга кандый салтарын јетирет?

⁴ Кезик христиандар телекейдеги ижин баштапкы јерге тургузып баштайт. Тӱштӱк-Кӱнчыгыш Азияда јадып турган Хань деп ака мынайып куучындайт: «Мениҥ бастыра ӧйим ле ийде-кӱчим ишке барар болгон, је мында мен бойым бурулу. Акчам јеткил болзо, меге Иеговага иштеерге јеҥил болор деп санангам, оныҥ учун кӧп иштеп баштагам. Мен кӧп јуундар божодып туратам, учында јуунла чек куучындашпай баргам. Телекейдеги бастыра неме улусты Кудайдаҥ ырадып саларга эдилген ошкош».

5. Бир эједе кандый кӱчтер болгон?

⁵ Кезик ака-эјелер уур-кӱчтердеҥ улам ал-санаага тӱжет. Улубританияда јадып турган Энн деп эједе беш бала. Ол мынайып куучындайт: «Уулдарымныҥ бирӱзи јаштаҥ ала јаан ооруларлу. База бир уулымда психический расстройство башталган. Кыстарымныҥ бирӱзин дезе, јууннаҥ чыгарып салган. Оныҥ учун мен јуунга да, јарлаар ишке де јӱрбей баргам». Бис Энн ле оныҥ билезин, анайда ок кӱчтерге табартып турган ӧскӧ дӧ ака-эјелерди килеп јадыс.

6. Христиан кижи Колоссыдагыларга 3:13-теги принципти тузаланбаза, Иегованыҥ албатызынаҥ канайып ырап калардаҥ айабас?

⁶ Колоссыдагыларга 3:13, ЈК 2003 кычырыгар. Кезикте јуунда кандый бир јарчыны ака-эјелер ачындырып салат. Апостол Павелдиҥ айтканыла болзо, христиан кижи кемге-кемге комудалду болордоҥ айабас. Темдектезе биске де кем-кем несправедливо баштанган болор. Мындый ӧйдӧ ајарыҥкай болбозоос, катулана береле, Иегованыҥ албатызынаҥ ырап та калардаҥ айабазыс. Тӱштӱк Америкада јадып турган Пабло деп аканыҥ учуралын кӧрӱп ийектер. Оны актуга ла бурулап, јуундагы каруулу молјуларын айрып салган. Пабло бу учуралды эске алып, мынайып куучындайт: «Ол тушта мен коркышту тыҥ ачынала, јууннаҥ араайынаҥ ырап калгам».

7. Кижи бойын јинип турза, не болордоҥ айабас?

⁷ Алдында Кудайдыҥ јасагын бускан кижи јинип, бойын Кудайдыҥ сӱӱжине турбас кижи деп сананардаҥ айабас. Андый христиан кинчегин алынза да, ого Кудайдыҥ албатызында јер јок деп сананар болор. Мындый санаа Франсиско акада болгон. Ол айдат: «Меге, балыр кылык эткеним учун, порицание берген. Баштап тарый мен јуундап туратам, је оноҥ кунуга береле, Иегованыҥ ишчилериниҥ ортозында мендий јаман кижи канай болотон деп сананатам. Меге коркышту уйатту болгон, Иегова мениҥ јаманымды таштабаган деп санаалу јӱргем. Анайып јуунла чек куучындашпай баргам». Слер мындый айалгада болуп калган ака-эјелер керегинде нени сананадаар? Олорды килейдигер бе? Је эҥ керектӱзи — Иегова олор керегинде нени сананат?

8. Иегова иштебей барган ишчизин ундып салат па? Јартап беригер.

⁸ Кудайга канча да кире ӧйгӧ иштебей барган ла оныҥ албатызыла куучындашпай барган улусты Иегова ундыбай јат. Ол олордыҥ эткен ижин де ундыбай јат (Евр. 6:10).  Судурчы Исаия, Иегова бойыныҥ ишчилерин канайып сӱӱп ле кичееп турганын кӧргӱзерге, мындый јараш сӧстӧр бичиген: «Ол бойыныҥ койлорын кӱдӱчи чилеп кабырып јӱрер. Ол кураандарын бойы јууп, олорды тӧжине алып јӱрер» (Иса. 40:11). Је Улу Кӱдӱчи койлорыныҥ бир-бирӱзи ӱӱринеҥ туура јӱре берзе, нени сезет? Оныҥ сезимдерин Иисус ӱренчиктерине мынайып јартаган: «Слер не деп сананып јадыгар? Кажы бир кижиде јӱс кой болзын, бирӱзи аза берген болзын. Ол тогузон тогузын кырда таштап ийип, асканын бедиреп барар эмес беди? Таап алгажын, чынын айдадым слерге: аспаган тогузон тогус койынаҥ ого артык сӱӱнер» (Матф. 18:12, 13).

9. Библиялык ӧйлӧрдӧ јакшы кӱдӱчилер бойыныҥ койлорын канайып кичееген? (Кадарындагы јурукты кӧрӱгер.)

⁹ Иегованы кӱдӱчиге тӱҥдештиргени јакшы келижип јат. Нениҥ учун дезе, библиялык ӧйлӧрдӧ јакшы кӱдӱчи бойыныҥ койлорын јакшы кичееп јӱретен. Темдектезе, Давид бойыныҥ ӱӱрин корулаарга, карагулала да, айула да тартышкан (1 Сам. 17:34, 35). Јакшы кӱдӱчи јӱс койыныҥ бирӱзи ле јылыйа берзе, оны капшай ла јоктоп баштайт (Иоанн 10:3, 14). Ол 99 койын чедендейле эмезе ӧскӧ кӱдӱчиге артыргызала, бойы дезе, јылыйып калган койын бедиреп барар эди. Иисус бу темди бисти јаан учурлу мындый чындыкка ӱредерге тузаланган. «Теҥеридеги Адагар андый ок: бу кичӱлердиҥ бирӱзи де ӧлбӧзин деп јат» (Матф. 18:14).

10. Иезекииль 34:11—16-ла болзо, Иегова јылыйып калган койлорына нени эдерге сӧзин берет?

¹⁰ Иегова бистерди ончобысты, ӱӱрдеҥ тууралап калгандарды да сӱӱп јат. Кудай судурчы Иезекииль ажыра бойыныҥ јылыйып калган койлорын бедиреер ле олорго кӧгӱс су-кадыгын орныктырарга болужар деп, сӧзин берген. Оныҥ айтканыла болзо, ол Израильдеги кӱдӱчилер чилеп, јылыйган койды таап аларга, бастыра ийде-кӱчинеҥ бедиреер эди. (Иезекииль 34:11—16 кычырыгар  *.) Озо баштап кӱдӱчи кӧп ӧйин ле ийде-кӱчин берип койды бедиреп јат. Табып алган кийнинеҥ койды ӱӱрге апарып салат. Оноҥ кой тыҥ арып калган эмезе шыркалу болзо, кӱдӱчи оны кичееп туратан. Темдектезе, шыркаларын таҥып туратан, јардына алып јӱретен ле азырап туратан. Аксагалдарга, Кудайдыҥ ӱӱриниҥ кӱдӱчилерине, јууннаҥ тууралап калган улуска анайып ла болужар керек (1 Петр 5:2, 3). Олор андый ака-эјелерди бедиреп јат, јуунга кайра келерге болужып јат ла керектӱ кӧгӱс болушты акту сӱӱжинеҥ јетирип јат *.

11. Јакшы кӱдӱчи нени оҥдоп туратан?

¹¹ Јакшы кӱдӱчи, кой јылыйып калардаҥ айабас деп, билип јат. Оныҥ учун кезикте кой јылыйып калза, кӱдӱчи ого калјуурбай јат. Эмди Иегова кандый бир ӧйгӧ оноҥ тууралап калган ишчилерине канайып болушканын кӧрӱп ийектер. Бу бисти неге ӱредет?

12. Иона Кудайдыҥ сӧзин укпай кача берерде, Иегова нени эткен?

¹² Судурчы Иона Иегованыҥ сӧзин укпай, Ниневияга кача берген. Је Иегова оноҥ чӧкӧбӧгӧн, карын јакшы кӱдӱчи болуп, Ионаны аргадап алган ла јакылтазын бӱдӱрерге ийде-кӱч берген (Иона 2:7; 3:1, 2). Кийнинде, Кудай кажы ла кижиниҥ јӱрӱмин сӱрекей тыҥ баалап турган деп, Ионага кӧргӱзерге, тыква тузаланган (Иона 4:10, 11). Бис мынаҥ неге ӱренедис? Аксагалдар јууннаҥ ырап калган христианнаҥ чӧкӧбӧй  јат, карын ол нениҥ учун тууралап калганын оҥдоп аларга албаданат. Андый кижи Иеговага кайра јанып келзе, аксагалдар оноҥ ло ары ого акту сӱӱжинеҥ ајару эдип турат.

13. Иегова 73-чи Сарынды бичиген сарнаачыныҥ сӧстӧрин угала, нени эткен? Бис мынаҥ неге ӱренедис?

¹³ 73-чи Сарынныҥ чӱмдеечизине, калју улус јакшы јӱрет деп билдирип турарда, ол тыҥ кунуга берген. Мынаҥ улам ол, Иеговага иштейтен бе, иштебейтен бе деп сананып баштаган (Сар. 73:12, 13, 16). Бу ӧйдӧ Иегова нени этти? Ол Сарнаачыны јаргылабаган. Анайда ок бу сарнаачыныҥ сӧстӧрин Агару Бичикке бичидип салган. Учы-учында ол, Кудайла најылашканынаҥ артык неме јок деп оҥдоп ийген (Сар. 73:23, 24, 26, 28). Бис мынаҥ кандый ӱредӱ аладыс? Кем-кем Иеговага иштейтен бе, иштебейтен бе деп сананып баштаза, аксагалдар бу кижини јаргылаардыҥ ордына, ол нениҥ учун анайып сананып турган деп, оҥдоп аларга албаданар. Јӱк ле мыныҥ кийнинде, аксагалдар ого кӧгӱс јанынаҥ болужарга, Агару Бичиктиҥ ӱлгерлерин оныла шӱӱжип ийер аргалу.

14. Ильяга нениҥ учун болуш керек болгон? Иегова ого канайып болушкан?

¹⁴ Судурчы Илья аргаданарга, Иезавель деп каан абакайдаҥ качкан (1 Каан. 19:1—3). Илья Иеговада оноҥ ӧскӧ судурчылар артпаган деп сананган. Анайда ок бойыныҥ ижинеҥ кандый да туза јок деп кӧргӧн. Ол тыҥ кунугып калганынаҥ улам, бойына ӧлӱм де сураган (1 Каан. 19:4, 10). Је Иегова Ильяны јаргылабаган, карын оны јаҥыскан эмес деп бӱдӱмјилеген. Анайда ок мынаҥ да ары иш кӧп деп айдып, болужарым деп сӧзин берген.  Иегова бойыныҥ судурчызыныҥ санааркаштарын јазап угала, ого јаҥы јакарулар берген (1 Каан. 19:11—16, 18). Бис мынаҥ кандый ӱредӱ аладыс? Биске ончобыска, анчада ла аксагалдарга, Иегованыҥ койлорына јалакай болор керек. Ака эмезе эје бойыныҥ сезимдерин куучындап јатса, је сӧстӧринеҥ ачынганы эмезе Кудайдыҥ килеҥкейине бӱтпей турганы да кӧрӱнип турза, аксагалдар оны тӱҥей ле лаптап угат. Уккан кийнинде, Иегова оны сӱӱп турган деп бӱдӱмјилеерге албаданат.

15. Иоанн 6:39-та бичилгениле, Иисус Адазыныҥ койлорына канайып болушкан?

¹⁵ Биске Иегованыҥ јылыйып калган койлорына кандый кӧрӱмдӱ болор керек? Кудай бистеҥ нени сакыйт? Иисустыҥ темин кӧрӱп ийектер. Иисус, Иегова кажы ла койын баалап турган деп, билер болгон. Оныҥ учун «Израильдиҥ азып јӱрген койлорына» Иеговага кайра јанып келзин деп болужарга, кандый ла аргалар тузаланган (Матф. 15:24; Лука 19:9, 10). Анайда ок Иисус «јакшы кӱдӱчи» чилеп, Иегованыҥ койлорыныҥ бирӱзи де јылыйбазын деп, бастыра кӱчин салган. (Иоанн 6:39 кычырыгар; 10:11.)

16, 17. Аксагалдар Иеговага јанып келерге турган улуска болужатан молјузына кандый кӧрӱмдӱ? (« Олордо кандый сезимдер болот?» деген рамканы кӧрӱгер.)

¹⁶ Апостол Павел Эфесстеги јуунныҥ аксагалдарын Иисустаҥ тем алзын деп кӱӱнзедерге, мындый сӧстӧр айткан: «Арга-чыдал јок улусты јӧмӧӧр керек, Иисус Кайраканныҥ Бойыныҥ „Алып турганы эмес, берип турганы оноҥ артык кежиктӱ“ деген сӧзин ундыбас керек» (Ап. ижи 20:17, 35). Оныҥ учун аксагалдарга Иегованыҥ албатызын кичеейтен аҥылу молју салылган. Испанияда јадып турган Сальвадор деген аксагал мындый сӧстӧр айдат: «Иегова јылыйган койлорын сӱӱп турган деп сананып турзам, мен де олорго бастыра ийде-кӱчимнеҥ болужарга кӱӱнзейдим. Иегова мени олорго болушсын деп кӱӱнзеп јат».

¹⁷ Бу јӧрмӧлдӧ айдылган ака-эјелер болуш алганынаҥ улам Иеговага кайра јанып келген. Је Кудайдаҥ ырап калган улустыҥ тоозы эмди де кӧп. Олор Иеговага кайра јанарга кӱӱнзеп јат. Андый улуска канайып болужатаны келер јӧрмӧлдӧ кӧрӱлер.