1. Кудайдаҥ коркыыры дегени нени темдектейт? Кудайды сӱӱп турган улуска нениҥ учун мынайып коркыыр керек?

ХРИСТИАНДАР Кудайды сӱӱп јат, је бу ла ок ӧйдӧ оноҥ коркып јат. Кезик улус мыны оҥдобос болор. Је мында Кудайдаҥ ӧйинеҥ ӧткӱре коркыыры керегинде айдылбай јат. Кудайдаҥ коркып турган улус оны акту кӱӱнинеҥ тооп јат ла оноҥ айап јат. Олор теҥеридеги Адазын ачындырбаска кӱӱнзегилейт, нениҥ учун дезе оныла најылыгын јылыйтарга коркып јадылар (Сар. 111:10; Укаа 8:13).

2. Бу јӧрмӧлдӧ Сарын 86:11-ле колбулу кандый эки сурак шӱӱжерис?

² Сарын 86:11 кычырыгар *. Давидтиҥ сӧстӧринеҥ нениҥ учун Кудайдаҥ коркыыр керек деп оҥдоп турганы кӧрӱнет. Эмди, оныҥ мӱргӱӱли бисти неге ӱредип турганын сананып ийектер. Баштапкызында, биске нениҥ учун Кудайдыҥ адынаҥ коркыыр керек деп билип аларыс. Экинчизинде, јӱрӱмде Кудайдыҥ адын тооп турганысты канайып кӧргӱзеристи шӱӱп ийерис.

3. Моисейге Кудайдыҥ адынаҥ коркып јӱрерге кандый учурал болушкан болор?

³ Моисейде, Хорив кырда болордо, Иегова ого бойыныҥ магын кӧргӱзерде, кандый сезимдер болгонын сананып ийзеер.  «Понимание Писания» деген энциклопедияда мынайып бичилет: «Моисей коркышту коркынчылу кӧрӱлте кӧргӧн. Мындый кӧрӱлтени, Иисус Христос јерге келердеҥ озо, база кем де кӧрбӧгӧн». Моисей ангелдиҥ мынайып айткан сӧстӧрин уккан: «Иегова, Иегова, килеҥкей ле буурзак Кудай. Ол чугулданарга меҥдебей јат, сӱӱштӱ јалакайла, чындыкла толо. Муҥдар тоолу улуска сӱӱштӱ јалакайын эмди де кӧргӱзип јат, јасак јогын, јаман керекти ле кинчекти таштап салат» (Чыг. 33:17—23; 34:5—7). Моисей Иегованыҥ адын айдып турарда, бу учурал керегинде сананган болор. Кийнинде ол Кудайдыҥ Израиль албатызын «Иегова Кудайдыҥ мактулу ла коркышту адынаҥ коркып туругар» деп кӱӱнзеткен. Бис бого кайкабай јадыс (Јаҥ. т. 28:58).

4. Иегованаҥ айап турарга, биске оныҥ кандый кылык-јаҥдарын шӱӱп сананар керек?

⁴ Кудайдыҥ адын сананып тура, биске оныҥ кылык-јаҥдарын шӱӱп сананар керек. Темдектезе, оныҥ ийде-кӱчин, ойгорын, справедливый болгонын ла сӱӱжин. Кудайдыҥ бу да, ӧскӧ дӧ кылык-јаҥдарын шӱӱп сананып турзаас, Иегованаҥ айап баштайдыс (Сар. 77:11—15).

5, 6. а) Иегова деген аттыҥ учуры кандый? б) Чыгыш 3:13, 14-лӧ, Исаия 64:8-ле болзо, Иегова бойыныҥ кӱӱн-табын канайып бӱдӱрет?

⁵ Бис Кудайдыҥ адыныҥ учуры керегинде нени билерис? Кӧп ученыйлар Иегова деген аттыҥ учуры «Ол болорго берет» деп сананат. Бу дезе, Иегова амадузын бӱдӱрип салат дегенин эске алындырат. Ол мыны канайып эдет?

⁶ Баштапкызында, Иегова амадузын бӱдӱрерге кем болор керек, ол ло боло берет. (Чыгыш 3:13, 14 кычырыгар *.) Кудайдыҥ мындый аргазы керегинде шӱӱп сананарына јаантайын кӱӱнзедиледис. Экинчизинде, Иегова бойыныҥ толо кемдӱ эмес ишчилерине, оныҥ кӱӱн-табын бӱдӱрерге кем болор керек, ол ло болорго болужып јат. (Исаия 64:8  кычырыгар *.) Айдарда, Иеговага бойыныҥ кӱӱн-табын бӱдӱрерге кем де, не де чаптыгын јетирип болбос деп, јарт оҥдоп јадыс (Иса. 46:10, 11).

7. Биске теҥеридеги Адабыска быйанысты тыҥыдарга не болужар?

⁷ Бис Кудайыстыҥ эткен керектерин ле оныҥ болужыла эткен бойыстыҥ керектеристи шӱӱп сананып турзаас, теҥеридеги Адабыска быйаныс тыҥыыр. Темдектезе, Иегованыҥ кайкамчылу јайаандарын шӱӱп сананып турзаас, оныҥ сӱрекей јаан ижин кайкап кӧрӧдис (Сар. 8:3, 4). Је качан бис Иегованыҥ болужыла оныҥ табын бӱдӱрип ийгенисти сананып турзаас, оны акту јӱрегистеҥ тооп баштайдыс. Кудайдыҥ адынаҥ бис чыннаҥ ла айап јадыс! Кудайдыҥ ады тереҥ учурлу, нениҥ учун дезе бу ат бистиҥ Адабыстыҥ ончо кылык-јаҥдарын, алдында нени эткенин ле келер ӧйдӧ нени эдерин кӧргӱзет (Сар. 89:7, 8).

8. Јаҥды такыганы 32:2, 3 Кудайдыҥ адыла колбой, бисти неге кӱӱнзедет?

⁸ Иегова Израиль албатыны Ханаан јерге кийдирердеҥ озо, Моисейди бир кожоҥго ӱредип салган (Јаҥ. т. 31:19). Моисей дезе, бу кожоҥго бастыра албатыны ӱреткен. Бу кожоҥныҥ сӧстӧри Јаҥды такыганы деп бичиктиҥ 32-чи бажалыгында бичилген. (Јаҥды такыганы 32:2, 3 кычырыгар *.) 2-чи ле 3-чи ӱлгерлерде айдылганыла, Иегова бойыныҥ адын јажырылзын эмезе улус бу атты ӧйинеҥ ӧткӱре байлап, оны адабазын деп кӱӱнзебей јат. Кудай бу атты ончо улус билзин деп кӱӱнзейт! Моисей израильтяндарга бу кожоҥ ажыра Иегова ла оныҥ улу ады керегинде чындыкты ачып берерде, олор тыҥ сӱӱнген. Моисейдиҥ сӧстӧри олорго ӧзӱмдерди сугарарга тыбырап јааган јааштый болгон: бу сӧстӧр олордыҥ кӱӱнин кӧдӱрип, олорго ийде-кӱч берген. Је бистиҥ сӧстӧрис јарлаар иште туштаган улуска ла Агару Бичикти ӱренип турган улуска ийде-кӱч берет пе деп билерге, нени эдер керек?

9. Бис Кудайдыҥ адын агарулаарында канайып туружар аргалу?

⁹ Бис айылдар сайын ла кӧп улусту јерлерде јарлап турзаас, улуска Кудайдыҥ адын Иегова деп, чике Агару Бичиктеҥ кӧргӱзер аргалу. Анайда ок бис олорго јараш јуруктарлу бичиктер берип, јилбилӱ видеороликтер кӧргӱзип, бистиҥ сайттагы тузалу материалла таныштырар аргалу. Бу ончо неме Иегованы макка чыгарат. Бисте школдо, иште, амыраар ӧйдӧ сӱреен јакшы Кудайыс керегинде ле оныҥ кылык-јаҥдары керегинде куучындайтан арга боло берердеҥ айабас. Анайып кижи, Иегова улуска ла јерге нени амадап турганын угуп ийзе, Кудай бисти кандый тыҥ сӱӱп турганын баштапкы ла катап оҥдоп ийер болор. Бис сӱӱштӱ Адабыс керегинде чындыкты куучындап турзаас, оныҥ адын агарулаарында туружадыс. Анайда ок улус Кудай керегинде тӧгӱн ӱредӱлерге бӱдӱп турганын кӧргӱзедис ле олорго эҥ артык тузалу кӧгӱс курсак берип јадыс (Иса. 65:13, 14).

10. Ӱренип турган кижиге Кудайдыҥ јӱк ле чындык нормаларын куучындаганы, нениҥ учун ас болот?

¹⁰ Агару Бичикти ӱренип турган кижи Кудайдыҥ адын билип алала, оны тузаланзын деп кӱӱнзейдис. Је анайда ок ол Иеговала јууктада таныжып алзын деп амадайдыс. Кижиге Кудай нени јарадып, нени јаратпай турганын ла куучындап берзеес, бу амадубыска једерис пе? Ӱренип турган кижи Кудайдыҥ јасактарын билип, олорло јакшызынардаҥ да айабас. Је бу кижи, бу јасактарды сӱӱжинеҥ  улам бӱдӱрип турган ба? Еваныҥ темин эске алып ийектер. Ол Кудайдыҥ јасагын билген де болзо, је бу јасакты берген Кудайды ол чыннаҥ сӱӱбеген. Анайып ла Адам керегинде айдарга јараар (Баш. 3:1—6). Айдарда, ӱренип турган кижиге Кудайдыҥ јӱк ле чындык нормаларын куучындаганы ас болор.

11. Ӱренип турган улуска, Кудайдыҥ јӱк ле јасактарын эмес, је оныҥ бойын да сӱӱрге, канайып болужып берер?

¹¹ Иегованыҥ ончо јасактары биске тузалу болот (Сар. 119:97, 111, 112). Је мыны ӱренип турган улус кезикте аайлабай јат. Олорго, Иегова бу јасактарды сӱӱжинеҥ улам берген деп, кӧрӱп ийер керек. Оныҥ учун ӱредӱниҥ ӧйинде олорго мындый сурактар берзе, јакшы болор: «Сен канайып сананадыҥ, нениҥ учун Кудай мыны этсин деп јат, а мыны этпезин деп јат? Бу некелте Иегова керегинде нени айдат?» Бис ӱренип турган улуска Иегова керегинде сананып турарга ла оныҥ улу адын сӱӱрге болужып берзеес, олордыҥ јӱректерин томултарыс. Анайып, ӱренип турган улус Кудайдыҥ јӱк ле јасактарын эмес, је оныҥ бойын да сӱӱр (Сар. 119:68). Ол тушта Кудайга олордыҥ бӱткени тыҥыыр. А бӱткени тыҥ болзо, олор коркышту кӱч те ченелтелерди ӧдӱп чыгар (1 Кор. 3:12—15).

12. Давидтиҥ јӱреги канайып экилене берген? Бу неге экелди?

¹² Сарын 86:11-диҥ тӧс шӱӱлтези — «бастыра јӱрегимле сениҥ адыҥнаҥ айап јӱрерге болуш». Бу сӧстӧрди Давид каан бичиген. Ол, кижиниҥ јӱреги тӱрген экилене берер аргалу деп, јакшы билер болгон. Бир катап ол јунунып јаткан Вирсавияны кӧрӱп ийген. Вирсавия дезе, билелӱ ӱй кижи болгон. Бу ӧйдӧ, Давид Кудайдаҥ бастыра јӱрегиле коркыган ба? Эмезе оныҥ јӱреги экиленип калган болгон бо? Давид Иегованыҥ: «Јуугыҥныҥ ӱйин кӱӱнзебе» — деп јасагын јакшы билер болгон (Чыг. 20:17). Је андый да болзо, ол Вирсавияны оноҥ ло ары кӧрӱп турган. Мынаҥ улам оныҥ јӱреги экилене берген: јӱрегиниҥ бир јарымы Вирсавияны кӱӱнзеген, экинчи јарымы Иеговага сӧсуккур болорго кӱӱнзеген. Давид Иегованы узак јылдарга сӱӱп, оныҥ адынаҥ айап турган да болордо, Кудайдыҥ јасагын бузып салган. Мынайып ол, Кудайдыҥ адын уйатка тӱжӱрип, буру јок улуска, ол тоодо бойыныҥ да билезине, ас эмес каршу јетирген (2 Сам. 11:1—5, 14—17; 12:7—12).

13. Давидтиҥ јӱреги экиленбей барган деп, бис кайдаҥ билерис?

¹³ Иегова Давидке уур кинчегин кӧргӱзип берген. Мынаҥ улам Давид Кудайла колбуларын орныктырып алган (2 Сам. 12:13; Сар. 51:2—4, 17). Оныҥ јӱрегиниҥ экиленгени коркышту јаан тӱбекке экелгенин ол ундыбай јӱрген. Сарын 86:11-деги сӧстӧрди  мынайып айдарга јараар: «Меге экиленбеген јӱрек бер». Иегова Давидке экиленбеген јӱректӱ болорго болушкан ба? Эйе, нениҥ учун дезе Агару Бичикте, Давидтиҥ јӱреги «бӱткӱлинче Иегова Кудайыла болгон» деп айдылат (1 Каан. 11:4; 15:3).

14. Биске бойыска кандый сурак берер керек? Нениҥ учун?

¹⁴ Давидтиҥ теми бистиҥ јӱк кӱӱнисти кӧдӱрип турган эмес, је шӱӱп сананарга да кӱӱнзедет. Оныҥ эткен кинчеги Кудайдыҥ ишчилерине јаан ӱредӱ болот. Бис анайып ла ок јастырарга кӱӱнзебейдис. Иеговага алдынаҥ бери де иштеген болзоос, эмезе јаҥы да иштеп баштаган болзоос, бойыстаҥ мынайып сураар керек: «Сатана мениҥ јӱрегимди экилендирип болбозын деп албаданадым ба?»

15. Балыр санааларга кӱӱнзеткедий кандый бир неме кӧрӱне берзе, Кудайдаҥ айап турганыс бисти канайып корулайт?

¹⁵ Слер интернеттеҥ эмезе телевизордоҥ, балыр санааларга экелгедий немелер кӧрӱп ийзегер, нени эдедигер? Слердиҥ кӧрӱп ийген неме порнография эмес болбой деп сананар болороор. Је Сатана бу айалганы слердиҥ јӱрегерди экилендирерге тузаланып турган болор, деп сананып ийзеер (2 Кор. 2:11). Кӧрӱп ийген андый јурукты эмезе видеоны јаан тоормош јаратан кичинек темир клинге тӱҥдештирерге јараар. Озо баштап клинниҥ учкур јанын тоормошко кийдире кадап ийеле, тоормош јарылбаганча оны кийдире согуп јат. Анайып ла балыр санааларга кӱӱнзеткедий јуруктар эмезе видеолор христиан кижиге бу клин ошкош боло бербес пе? Озо баштап каршу јок деп билдирген неме, јӱрегисти экилендирип ийеле, Иеговага удура кинчек эдерине экелердеҥ айабас. Оныҥ учун јӱрегерге јаман неме кийдирбегер! Иегованыҥ адынаҥ бастыра јӱрегердеҥ айап туругар!

16. Ченелтелер тушта бойыска кандый сурактар берер керек?

¹⁶ Сатана бисти јастырып ийзин деп ӧскӧ дӧ  тузактар тузаланат. Бу тузактарга бистиҥ кӧрӱмис кандый болордоҥ айабас? Биске капшай ла тузактардыҥ каршузы јаан эмес деп санаа келер болор. Темдектезе мындый санаа: «Бу учун мени јууннаҥ чыгарбас не. Айса ӱзе кем јок». Је андый санаа чек јастыра! Оныҥ ордына бойоорго мындый сурактар беригер: «Бу ченелте ажыра Сатана мениҥ јӱрегимди экилендирерге турган болор бо? Јастыра санааларга јайылганым Иегованыҥ адын уйатка тӱжӱрбес пе? Мынаҥ улам мен Иеговага јууктап каларым ба эмезе оноҥ ырап каларым ба?» Бу сурактарды шӱӱп сананыгар. Мындый сурактарга бойоорды бойоор тӧгӱндебей каруу берерге, Иегованаҥ ойгор сурагар (Иак. 1:5). Бу слерге кору болуп, ченелтени ӧдӧргӧ болужар. Мынайып бис Иисус чылап: «Менеҥ кеде тайыл, сатана!» — деп, айткандый болорыс (Матф. 4:10).

17. Нениҥ учун экиленген јӱрек јакшыга экелбей јат? Тем куучындап беригер.

¹⁷ Экиленген јӱрек јакшыга экелбей јат. Темдектезе, бирлик эмес спортивный команданы алза. Олордыҥ кезиги бастыра мак јӱк олорго болзын деп сананып јат. А кезиги ойынныҥ ээжилерин бузып јат. База ӧскӧлӧри тренерин чек тообой јат. Андый команда јеҥип болбос. Је бирлик командага јеҥип аларга јеҥил болот. Слер јӱрегерди «бирлик команда» ошкош болзын деп турган болзогор, слердиҥ санаалараар, кӱӱнеер ле сезимдереер Иеговага иштееринде бирлик болор учурлу. Сатана слердиҥ јӱрегерди экилендирип саларга тыҥ албаданат деп ундыбагар. Ол слердиҥ санаалараар, кӱӱнеер ле сезимдереер Иегованыҥ нормаларына келишпей турзын деп кӱӱнзейт. Је слерге Иеговага бастыра јӱрегердеҥ иштеер керек (Матф. 22:36—38). Айдарда, Сатана слердиҥ јӱрегерди качан да экилендирип болбозын!

18. Михей 4:5-теги сӧстӧр бисти неге кӱӱнзедет?

¹⁸ Давид чилеп Иеговага мынайып мӱргӱгер: «Бастыра јӱрегимле сениҥ адыҥнаҥ айап јӱрерге болуш». Мындый мӱргӱӱлигер аайынча јӱрерге албаданыгар. Слер јаан да сурактарда, оок-теек те сурактарда Иегованыҥ адын акту јӱрегердеҥ тооп турганаар деп, кӱнӱҥ сайын кӧргӱзип туругар. Анайып бис Иегованыҥ Керечилери болуп, оныҥ адын макка кӧдӱрерис (Укаа 27:11). Бис судурчы Михей чилеп мынайып айдарыс: «Бис Иегова Кудайыстыҥ адыла јажын-чакка јӱрерис» (Мих. 4:5).