1, 2. 14 нисанда не болгон?

ГОЛГОФА. Б. э. 33 јылы, 14 нисан. Иисусты актуга ла бурулап, ӧчӧп каткырыжып, тӧҥӧшкӧ кадап салгылады. Ого кыймыктанарга да, тынарга да коркышту оору. Је андый да болзо, ол јаан учурлу сӧстӧр айдып јат.

² Матфей 17:5-те: «Оны угугар!» — деп айдылган. Оныҥ учун Иисустыҥ айткан сӧстӧрин «угуп» ийектер. Бис оныҥ сӧстӧринеҥ неге ӱренер аргалу?

3. «Ада! Олордыҥ јаманын таштап кой» — деп, Иисус кемдерди айткан болор?

³ Иисус нени айткан? Иисус божоор алдында Адазын: «Олордыҥ јаманын таштап кой» — деп сураган. Ол кемниҥ јаманын таштазын деп айткан болор? Каруузын Иисустыҥ ла сӧстӧринеҥ билип јадыс, ол: «Олор нени эдип тургандарын билбей јадылар» — деп айткан (Лука 23:33, 34). Ол оны кадаган Римниҥ черӱчилдерин, анайда ок оныҥ ӧлӱмин некеген улусты айткан болор (Ап. ижи 2:36—38). Бу улус Иисусты чыннаҥ ла кем болгонын јакшы билбеген. Кийнинде олордыҥ кезиктери Иисустыҥ ӱренчиктери де болуп  калган. Иисус олорго бир де ачынбады (1 Петр 2:23). Карын Адазына олор учун мӱргӱген.

4. Бис Иисустаҥ неге ӱренедис?

⁴ Бис неге ӱренедис? Биске Иисус ла чылап улустыҥ јаманын таштаар керек (Кол. 3:13). Темдектезе, тӧрӧӧндӧӧрис чындыкты оҥдобой јат. Оныҥ учун олор бис керегинде тӧгӱн неме айдып, бисти улус кӧзинче јамандап, бичиктеристи јыртып, ӧртӧп јат. Керек дезе, кезедип коркыдып та јат. Је биске олорго бир де ачынбас керек, нениҥ учун дезе јӱрегисте јаман сезимдер тазылдана берзе, бойыска ла јаман болор. Карын, Иегова олордыҥ јӱрегин ачсын деп мӱргӱп јадыс (Матф. 5:44, 45). Је кезикте улус биске ӧйинеҥ ӧткӱре јаман баштанып турза, олордыҥ јаманын таштаарга кӱч болот. Бу јанынаҥ биске бир эјениҥ сӧстӧри болужар. Ол айдат: «Мен улустыҥ јаманын таштаганымла олордыҥ јаман керектерин јарадып турганымды кӧргӱзип турган эмезим, је олорго јӱрегимде ачу тутпай турганымды кӧргӱзедим» (Сар. 37:8). Айдарда, улустыҥ јаманын таштап турзаас, бойыска ла амыр болор (Еф. 4:31, 32).

5. Иисус јанында столмодо кадаткан кижиге нени айткан, нениҥ учун?

⁵ Иисус нени айткан? Иисустыҥ јанына кадаткан эки кижи ого база бӱтпей тургулады (Матф. 27:44). Је оныҥ бирӱзи бойыныҥ кӧрӱмин солып, Иисус бир де јаман неме этпеген деп айткан (Лука 23:40, 41). Оныҥ учун Иисуска бӱдӱп, ого мынайып баштанды: «Каандыгыҥа келзеҥ, мени эске ал, Кайракан!» (Лука 23:42). Иисус дезе, бу кижиниҥ бӱткенин кӧрӱп: «Мен сеге бӱгӱн айдадым: мениле кожо Райда болорыҥ» — деп каруу берди (Лука 23:43, ЈТ). Ајардаар ба, Иисус мында «мен», «сеге», «мениле» деген сӧстӧрлӧ шак ла ол кижиге сӧзин берип јатканын кӧргӱзет? Мынайып, Иисус Адазыныҥ килеҥкейин билип, столмодо божоп јаткан кижиге келер ӧйгӧ сӱреен јакшы ижемји берген (Сар. 103:8).

6. Иисустыҥ эр кижиге айткан сӧстӧринеҥ бис неге ӱренедис?

⁶ Бис неге ӱренедис? Иисустыҥ кылык-јаҥы Адазыныҥ кылык-јаҥына тӱҥей (Евр. 1:3). Бис кинчектеристи, јастыраларысты акту јӱрегистеҥ алынып, Иисустыҥ толынты тайылгазына бӱдӱп турзаас, Иегова бистиҥ јаманысты таштап салат (1 Иоанн 1:7). Је слер кезикте Иегова мениҥ кинчегимди таштабас деп сананып турган болороор. Андый болзо, бу шӱӱлтени сананып кӧрӱгер: јаман керектери учун ӧлтӱртип јаткан, је Иисуска јаҥы ла бӱде берген кижиниҥ кинчегин Иисус таштап, келер ӧйгӧ ижемји берип турган болордо, Иегова бойыныҥ чындык ишчилериниҥ кинчегин канайып таштабайтан эди (Сар. 51:1; 1 Иоанн 2:1, 2).

7. Иоанн 19:26, 27-ле болзо, Иисус Мария ла Иоаннга нени айткан, нениҥ учун?

⁷ Иисус нени айткан? (Иоанн 19:26, 27 кычырыгар.) Иисус божоор алдында энези керегинде сананып јат. Нениҥ учун дезе бу ӧйдӧ Марияныҥ ӧбӧӧни, Иосиф, божоп калган болор.  Иисустыҥ кожо чыккандары Марияны јӱк акча-манат ла курсак-тамак јанынаҥ кичеер аргалу болгон. Је кӧгӱс јанынаҥ оны кем кичеер эди? Оныҥ учун Иисус јуук најызын, Иоаннды, Марияга кӧгӱс јанынаҥ болушсын деп айдып јат (Матф. 12:46—50). Иисус энезине баштанып: «Сениҥ уулыҥ бу» — дейле, оноҥ Иоаннга баштанып: «Сениҥ энеҥ бу» — деп айдат. Оноҥ ло бери Иоанн Марияны бойыныҥ энезин чилеп кичееп јӱрген. Анайып Иисус, оны јаштаҥ ала божоордыҥ божогончо бир де артыргыспай, эркеледип чыдадып салган энезине сӱӱжин кӧргӱскен.

8. Иисустыҥ Марияга ла Иоаннга айткан сӧзинеҥ бис неге ӱренедис?

 ⁸ Бис неге ӱренедис? Кезикте јуундагы ака-эјелер биске тӧрӧӧндӧристеҥ јуук болот. Тӧрӧӧндӧрис биске удурлажардаҥ, бисти таштап ийердеҥ айабас. Је Иегова ла оныҥ организациязы, бис ле Кудайга чындык артатан болзоос, бисти качан да артыргыспас деп, Иисус сӧзин берет. Агару Бичикте айдылганыла, андый улус «ага-карындажын, эмезе эје-сыйнын, эмезе адазын, эмезе энезин, эмезе бала-барказын... јӱс катап артыктай алар» (Марк 10:29, 30). Кӧгӱс бирлик билеге кирип турганысты сананзаас, кандый јакшы дезеер? Бис ончобыс бир ле Кудайга бӱдедис, бир ле Кудайды сӱӱйдис, анайда ок бой-бойыбысты сӱӱп јадыс (Кол. 3:14; 1 Петр 2:17).

9. Иисустыҥ Матфей 27:46-да бичилген сӧстӧри нени темдектеп турган болор?

⁹ Иисус нени айткан? Ол тыны ӱзӱлер алдында: «Кудайым, Кудайым! Мени не таштадыҥ?» — деп кыйгырып ийди (Матф. 27:46). Иисус нениҥ учун мындый сӧстӧр айткан? Бис билбезис. Је Иисустыҥ бу сӧстӧриле Сарын 22:1-деги судур бӱткен *. Анайда ок бу учуралдаҥ Иегова оны корулабаганы кӧрӱнет (Иов 1:10). Нениҥ учун дезе Иисуска учына јетире чындык артар керек болгон. Адазы оны нениҥ учун ӧштӱлердиҥ колына бергенин ол билер болгон. Бого ло коштой, Иисустыҥ сӧстӧринеҥ ол кандый да кинчек этпегени кӧрӱнет.

10. Иисустыҥ «мени не таштадыҥ?» деп айткан сӧстӧринеҥ бис неге ӱренедис?

¹⁰ Бис неге ӱренедис? Баштапкызында, Иегова бисти бастыра кӱчтердеҥ корулап алар деп сакыбас керек. Кӱчтер Иисуста да болгон, оныҥ учун бисте де болор. Керек болзо, чындык учун јӱрӱмисти де берерге келижердеҥ айабас (Матф. 16:24, 25). Је кӱчис јетпегедий кӱчтерди Иегова тӱҥей ле болдыртпас деп ундыбай турар керек (1 Кор. 10:13). Экинчизинде, биске Иисуска ла чылап актуга ла буруладарга белен болор керек (1 Петр 2:19, 20). Улус бисти јаман неме эдип турганыс учун эмес, је бу телекейдеҥ эмес болгоныс учун ла чындыкты куучындап турганыс учун јаман кӧрӧт (Иоанн 17:14; 1 Петр 4:15, 16). Иисус нениҥ учун кыйналып ӧлӧрин билер болгон. Је Иегованыҥ кезик ишчилери кӱчтердиҥ ӧйинде Иегова меге болушпай турган деп сананар болор (Авв. 1:3). Иегова андый ака-эјелердиҥ бӱдери уйадап калган деп айтпай јат. Карын андый ака-эјелерге чыдамкай, јалакай баштанып, олорды токунадып јат (2 Кор. 1:3, 4).

11. Иисус нениҥ учун «суузап турум» деп айткан?

¹¹ Иисус нени айткан? (Иоанн 19:28 кычырыгар.) Иисус нениҥ учун «суузап турум» деген? Бу сӧстӧрлӧ Сарын 22:15-те: «Кӱчим чыгып, сӧӧк чылап какшап калган, тилим таҥдайыма јапшынып калган» — деген судур сӧстӧр бӱткен. Анайда ок Иисус тӧҥӧшкӧ кададып кыйналган тужында, коркышту тыҥ суузаган болор. Оныҥ учун ого болуш керек болгон.

12. Иисустыҥ «суузап турум» деген сӧстӧринеҥ бис неге ӱренедис?

 ¹² Бис неге ӱренедис? Иисус бойыныҥ сезимдерин айдарга ла улустаҥ болуш сураарга бир де эбијоксынбаган. Биске де андый болор керек. Бис кӧп сабада улустаҥ болуш сурабай, бойыстыҥ ла алдыста јӱредис. Је Агару Бичикле болзо, болушты эбијоксынбай ла сураар керек. Темдектезе, јажыс јаанап калган эмезе су-кадыгыс уйадап калган болзо, ака-эјелерди бисти магазиндӧӧн эмезе больницадӧӧн тартып ийзин деп сураарга јараар. Ол эмезе бис кунугып турзаас, аксагалдарла эмезе кӧгӱзи тереҥ ака-эјелерле куучындажарга јараар (Укаа 12:25). Бу биске јаан болуш болуп кӱӱнисти кӧдӱрер. Ундыбагар: ака-эјелер бисти сӱӱп јат, олор биске болужар кӱӱндӱ (Укаа 17:17). Је олор бистиҥ санаасты кычырып болбой јат. Оныҥ учун бисте кандый сезимдер болуп турганын, неде болуш керек болуп турганын эбијоксынбай ла олорго айдар керек.

13. Иисус божоордыҥ божогончо Кудайга чындык артканыла нени кӧргӱскен?

¹³ Иисус нени айткан? Иисус 14 нисанда, тӱштиҥ ӱч саады кирезинде, «бӱтти!» деп айткан (Иоанн 19:30). Иисус чек ле божоордыҥ алдында, Адазыныҥ берген ижин ӱзе бӱдӱрип салганын оҥдоп јат. Ол кандый ишти бӱдӱрип салган? Баштапкызында, Иисус Сатананы тӧгӱнчи деп кӧргӱскен. Айдарда, толо кеминде кижи, Сатана ого кандый да будактар тургузып турза, тӱҥей ле Кудайга чындык артар аргалу. Экинчизинде, Иисустыҥ толынты тайылгазы ажыра улус Кудайга чындык артып, ӱргӱлји јӱрӱм јӱрер аргалу. Ӱчинчизинде, јӱк ле Иегова башкарар јаҥду деп кӧргӱзип, оныҥ адын тӧгӱннеҥ арутаган.

14. Биске кӱнӱҥ ле кандый санаалу јӱрер керек? Јартап беригер.

¹⁴ Бис неге ӱренедис? Биске Иеговага чындык болгонысты кӧргӱзерге кажы ла кӱн албаданар керек. Галаад сургалдыҥ ӱредӱчизи болгон Максвелл Френд ака телекейлик курултайда мындый сӧстӧр айткан: «Бӱгӱн ле айдатан, эдетен немени эртенге артыргыспас керек. Кайдаҥ билереер, эртенги кӱн болор та јок? Оныҥ учун кажы ла кӱнди Иеговага чындыгарды кӧргӱзетен калганчы арга деп кӧрӱп туругар». Айдарда, аканыҥ айтканыла јӱрӱп турзаас, бис ӧлӱмнеҥ де коркыбай: «Мен Иеговага чындык арттым, Сатананы тӧгӱнчи деп кӧргӱстим, оныҥ адын агаруладым, анайда ок јӱк ле Иегова башкарар јаҥду деп бастыра јӱрӱмимле кӧргӱзип салдым» — деп айдар аргалу болорыс.

15. Лука 23:46-ла болзо, Иисус неде бир де алаҥзыбаган?

¹⁵ Иисус нени айткан? (Лука 23:46 кычырыгар.) Иисус оныҥ јӱрӱми Иегованаҥ камаанду деп билген. Оныҥ учун Иегова оны тиргизип алар деп бир де алаҥзыбай: «Ада! Сениҥ колыҥа тынымды берип јадым!» — деп айткан.

16. 15 јашту Джошуаныҥ теминеҥ бис неге ӱренедис?

¹⁶ Бис неге ӱренедис? Иегованыҥ колына јӱрӱмисти берерге коркыбас керек. Је коркыбаска ого бастыра јӱрегистеҥ  бӱдер керек (Укаа 3:5). 15 јаштуда јазылбас оорунаҥ улам божоп калган Джошуа карындаштыҥ темин кӧрӱп ийектер. Ол Иегованыҥ нормаларына келишпей турган медицинский процедуралар эдерге јӧпсинбеген. Божоор алдында Джошуа энезине мынайып айткан: «Мен Иегованыҥ колында. Коркыбагар эне, мени Иегова тиргизип алар деп, бир де алаҥзыбай јадым. Иегова мениҥ јӱрегимди кӧрӱп јат. Мен оны тыҥ сӱӱп тургам деп ол билер» *. Бу карындаштыҥ сӧстӧриле колбой, биске мындый эки суракты сананып кӧрӧр керек: «Мен нени талдаарым: јӱрӱмимди аргадаарым ба эмезе Иеговага чындык артарым ба? Мен Иеговага јӱрӱмимди берип ийзем, ол мени тиргизип алар деп, бир де алаҥзыбайдым ба?»

17, 18. Иисустыҥ калганчы сӧстӧринеҥ бис неге ӱренедис? (« Иисустыҥ калганчы сӧстӧри бисти неге ӱредет?» деген рамканы кӧрӱгер.)

¹⁷ Иисустыҥ божоор алдында айткан калганчы сӧстӧринеҥ кӧп јакшы шӱӱлтелер билип алдыс. Оныҥ сӧстӧри бисти улустыҥ јаманын таштаарга ӱредет, анайда ок Иегова бистиҥ јаманысты таштап турган деп бӱдерге болужат. Бого ло коштой бу сӧстӧр биске јаантайын болужарга белен јаан кӧгӱс биле бар деп эске алындырат. Анайда ок бу сӧстӧрдӧҥ Иегова биске кандый ла кӱчтерди ӧдӧргӧ болужарга белен деп кӧрӱнет. Иисустыҥ сӧстӧри бисти мындый санаалу јӱрерге кӱӱнзедет: «Бӱгӱн Иеговага чындыгымды кӧргӱзетен калганчы кӱн. Мениҥ јӱрӱмим Иегованыҥ колында».

¹⁸ Бис Иисустыҥ сӧстӧринеҥ кӧп немеге ӱренип алдыс. Олорды ундыбагар, јӱрӱмигерде тузаланып јӱригер. Анайып, Иегова бисти Иисуска сӧсуккур деп кӧрӱп турар (Матф. 17:5).