Биле тӧзӧп јаткандар бой-бойына чындык болор деген сӧзине турар деп, Иегова иженип јат. Баштапкы эр ле ӱй кижини билениҥ колбуларыла бириктирип, Иегова айткан: «Эр кижи... ӱйиле јуртап, оныла бир эт-кан боло берет». Кийнинде Иисус Христос бу сӧстӧрди такып айдып, ӧскӧ сӧстӧр кожуп айткан: «Анайдарда, Кудайдыҥ бириктиргенин кижи айрыбазын» (Башталганы 2:24; Матфей 19:3—6). Иегова ла Иисустыҥ кӧрӱмиле болзо, бу јӧптӧжӱ эш-нӧкӧрлӧрдиҥ бир-бирӱзи божобогончо улалар учурлу болгон (1 Коринфтегилерге 7:39). Биле — агару јӧптӧжӱ болгон кийнинде, капшай ла  айрылыжар деп сананбас керек. Иегова библиялык тӧзӧлгӧ јок айрылышты чек јаратпай јат (Малахия 2:15, 16).

Айрылыжарга библиялык кандый тӧзӧлгӧ бар? Иегова балыр ла чайдам кылынарын кӧрӧр кӱӱни јок (Башталганы 39:9; 2 Самуил 11:26, 27; Сарын 51:4). Кудайдыҥ кӧзинде балыр кылык коркышту јаман керек, оныҥ учун Ол мынаҥ улам айрылыжарын јарадып салган. (Балыр кылык ол не ле ого не кирип турганы 9-чы бажалыктыҥ 7-чи абзацында јарталат.) Анайда ок буру јок эш-нӧкӧрине айрылыжатан ба, јок по деп арга берип салган (Матфей 19:9). Оныҥ учун буру јок эш-нӧкӧри айрылыжар деп шӱӱп алза, ол Иегованыҥ кӧзине јастыра неме этпей јат. Је бу ла ок ӧйдӧ христиан јуундарда кем де, кемди де айрылыжарына кӱӱнзетпей јат. Кезик айалгаларда, анчада ла кинчек эткен кижи акту јӱрегинеҥ јастыразын алынып турза, буру јок эш-нӧкӧри айрылышпай, кожо артар аргалу. Је кемде айрылыжатан библиялык тӧзӧлгӧ бар болзо, бу суракты бойы кӧрӧр учурлу ла учы-тӱбинде болотон кӱчтерге белен болор керек (Галаттарга 6:5).

Аҥылу учуралдарда кезик христиандар бойыныҥ эш-нӧкӧри чайдам кылык этпеген де болзо, башка јадарга эмезе айрылыжарга јӧп чыгаргылайт. Агару Бичикте айдылганыла, бу учуралда христиан кижи јаҥы биле тӧзӧбӧс учурлу эмезе бойыныҥ эш-нӧкӧриле эптежер учурлу (1 Коринфтегилерге 7:11). Оныҥ учун андый кижи јаҥы биле тӧзӧӧргӧ, бойына ӧскӧ эш-нӧкӧр бедиребей јат (Матфей 5:32). Та кем де башка јадарына эмезе айрылыжарына тӧзӧлгӧ бар деп бодоп турган (библиялык тӧзӧлгӧ јок то болзо) кезик аҥылу айалгаларды шӱӱжип ийеектер.

Ӧнӧтийин билезин кичеебей турганы. Ӧбӧӧни иштейтен аргазы бар да болзо, је билезин кичеебей турза, биле эҥ керектӱ немези јок артып, јоксыраардаҥ айабас. Агару Бичикте айдылат: «Бойыныҥ... айылдагы улузын кичеебей турган кижи дезе бӱдӱп јӱреринеҥ јана тӱжӱп, бӱтпес кижидеҥ јаман болгоны ол» (1 Тимофейге 5:8). Ӧбӧӧни солынарга кӱӱнзебей турган болзо, ӱйине бойыныҥ ла балдарыныҥ јадын-јӱрӱмин кичеерге башка јадар ба эмезе айрылыжар ба (библиялык тӧзӧлгӧ јок то болзо) деп, јӧп чыгарар керек. Ӱйи  христиан ӧбӧӧнин билезин јеткилдееринеҥ мойножып турган деп бурулап турза, аксагалдарга айалганы јазап шиҥдеп кӧрӧр керек. Билезин кичееринеҥ мойноп турза, јууннаҥ да чыгардырарынаҥ айабас.

Биледеги базыныш. Ӧбӧӧни эмезе ӱйи базынып, эш-нӧкӧриниҥ су-кадыгына эмезе јӱрӱмине каршузын јетиргедий керектер эдип турардаҥ айабас. Базынып турган эш-нӧкӧри — христиан кижи болзо, аксагалдар мынайып бурулаганын шиҥдеп кӧрӧр учурлу. Тыҥ чугулданары ла базынары јууннаҥ чыгардыратан шылтак болордоҥ айабас (Галаттарга 5:19—21).

Ич-кӧгӱзине каршу јетиргедий болзо. Ӧбӧӧни эмезе ӱйи эш-нӧкӧрине Кудайга бажырарга јаантайын буудак эдип, керек дезе оны Кудайдыҥ јакылталарын бузып ийзин деп, албадап турардаҥ айабас. Мындый учуралда, ич-кӧгӱзи кӱч айалгада эш-нӧкӧри јӱк ле айрылыжып калза эмезе башка јадар документти јазадып алза, «Кудайга улустаҥ артык багар» деген јакылтаны бӱдӱрер деп, шӱӱп алардаҥ айабас (библиялык тӧзӧлгӧ јок то болзо) (Апостолдордыҥ ижи 5:29).

Ӧрӧги бичилген учуралдарда, буру јок аканы эмезе эјени эш-нӧкӧринеҥ јӱре берзин эмезе артып калзын деп кем де јӧп бербес учурлу. Аксагалдар ла ич-кӧгӱзи тыҥ најылары болужып, Агару Бичикке тӧзӧлӧнгӧн јӧптӧр берер аргалу да болзо, олор ӧбӧӧниниҥ ле ӱйиниҥ ортодо не болуп турганын учына јетире билер аргазы јок. Мыны јаҥыс ла Иегова билер. Ӧбӧӧнинеҥ башка јадарга болуп, христиан ӱй кижи билениҥ кӱчтерин кӧпчидип турза, мынайып Кудайды ла билени тообой турганын кӧргӱзер эмей. Анайып ла ӧбӧӧни керегинде айдарга јараар. Улус башка јадарыныҥ ла айрылыжарыныҥ чын шылтактарын канайып та јажырып турза, је Иегованаҥ нени де јажырып болбос. Чындап та, «Оныҥ кӧзи алдында ончозы јылаҥаш ла ачык. Оныҥ алдына каруу берерис» (Еврейлерге 4:13). Је биледе оноҥ ары артары јеткерлӱ болзо, башка јадар эмезе айрылыжар деп шӱӱлтеге келген христиан кижини кем де бурулабас учурлу. Учы-учында, «ончобыс Кудайдыҥ јаргызы алдына турарыбыс» (Римдегилерге 14:10—12, ЈК 2003).