Ревекка — Иегованы сӱӱген ӱй кижи болгон. Оныҥ ӧбӧӧниниҥ ады Исаа́к. Ол Иегованы база сӱӱген. Ревекка Исаакла канайып танышкан? Ол Иегованы сӱӱндирерге кӱӱнзегенин канайып кӧргӱскен? Ревекка керегинде кӧптӧдӧ билип алак.

Исаактыҥ ада-энези Авраа́м ла Са́рра болгон. Олор ончо билезиле Ханаа́н јеринде јаткан. Ондогы улус Иеговага бажырбайтан. Је Авраам уулын Иеговага бӱдӱп турган ӱй кижи алзын деп кӱӱнзеген. Оныҥ учун ол бойыныҥ јалчызын, Елиезерди, Исаакка ӱй кижи таап берзин деп, Харра́н деген калага аткарган. Ол калада Авраамныҥ тӧрӧӧн-тугаандары јаткандар.

Елиезер Авраамныҥ ӧскӧ јалчыларыла кожо јолго атанган. Бу јол-јорык узакка улалган. Олор бойыла кожо азык ла сыйлар коштогон он тӧӧ алганча барды. Је Елиезер Исаакка кандый кысты ӱйи болзын деп, талдап аларын кайдаҥ билер аргалу болгон? Елиезер ле оныҥ јолдошторы Харранга једип келеле, кутуктыҥ јанына токтодылар. Бого удабас ла улус суу аларга келгилеер деп, Елиезер билер болгон. Бу ӧйдӧ ол Иеговага: «Суу суразам, меге ле мениҥ тӧӧлӧриме суу берген кыс сениҥ талдаганыҥ ол болгой» — деп, мӱргӱген.

Је бат, јиит Ревекка куттукка базып келди. Агару Бичикте, ол сӱреен јараш болгон деп айдылат. Качан Елиезер оноҥ  суу сураарда: «Бербей аа! Мен сеге де, сениҥ тӧӧлӧриҥе де суу берерим» — деп, айтты. Тӧӧлӧр канча кире суу ичет не деп сананып ийзеҥ! Оныҥ учун Ревекка суу алып кутукка канча катап јӱгӱрген болор. Ол канайып албаданып иштенип турганын јуруктаҥ кӧрӱп туруҥ ба?~ Иегова оныҥ мӱргӱӱлине кайкамчылу каруу бергенине Елиезер тыҥ кайкаган.

Елиезер Ревеккага кӧп сӱреен јараш сыйлар берген. Ол Елиезерди ле Авраамныҥ јалчыларын адазыныҥ айылына кычырды. Авраам оны нениҥ учун бери ийгенин ле оныҥ мӱргӱӱлине Иегова канайып каруу бергенин Елиезер куучындап берди. Ревекканыҥ тӧрӧӧндӧри оны Исаакка эш-нӧкӧри болзын деп берерге сӱӱнип јӧпсиндилер.

Ревекка Исаактыҥ эш-нӧкӧри болорго кӱӱнзеген бе, сен канайып сананып туруҥ?~ Елиезерди Иегова ийген деп Ревекка билген. Мыныҥ учун, Ревекканы тӧрӧӧндӧри Ханаан јерине барып, Исаактыҥ ӱйи болуп барарга кӱӱнзейдиҥ бе деп сураарда, ол: «Эйе, барарым» — деди. Ол тургуза ла ӧйдӧ Елиезерле кожо јолго атанды. Ол Ханаанга једип келеле, Исаакка ӱйи болуп калды.

Ревекка Иегованыҥ кӱӱнзегенин бӱдӱрди, оныҥ учун Ол ого алкыжын јетирди. Керек дезе, Иисус Христос оныҥ угынаҥ туулган! Сен Ревекканаҥ тем алып Иегованы сӱӱндирзеҥ, Ол сеге де алкыжын берер.