Јуруктагы кызычакты кӧрӱп туруҥ ба?~ Бу Иеффа́й деп кижиниҥ кызы. Ол кыстыҥ ады-јолы керегинде Агару Бичикте айдылбай јат, је ол бойыныҥ адазын ла Иегова Кудайды сӱӱндирген деп бис билерис. Ол кыс ла оныҥ адазыла, Иеффайла, таныжып ийек.

Иеффай јакшы кижи болгон. Ол Иегова керегинде бойыныҥ кызына кӧп куучындап турар болгон. Анайда ок, ол кӱчтӱ эр кижи, черӱниҥ ченемелдӱ башчызы болгон. Оныҥ учун, израиль албаты оны ӧштӱлерге удура јуу-согушта олордыҥ черӱзин баштап апарзын деп, кӱӱнзей бергендер.

Иеффай Кудайдыҥ албатызы јеҥип алзын деп, Оноҥ болуш сураган. Ол айылына јеҥӱлӱ јанып келзе, оныҥ айылынаҥ баштапкы чыгып келген кижини Иеговага  берип ийерим деп сӧзин берген. Ол кижи бастыра јӱрӱмине агару чадырда иштеер учурлу болгон. Ол ӧйлӧрдӧ Агару чадыр улустыҥ Кудайга бажыратан јери болгон. Билер болзоҥ јеҥӱни Иеффай алган! Ол айылына једип келерде, ого удура озо ло баштап кем чыкты?~

Оныҥ кызы! Ол оныҥ сок јаҥыс балазы болгон, эмди ол јаанап, адазын артыргызып јӱре берер учурлу болгон. Иеффайга коркушту кӱч болгон. Је ол Кудайга сӧзин берген деп, ундыба. Бу ла ӧйдӧ: «Ада, сен Иеговага сӧзиҥди берген болзоҥ, оны сен бӱдӱрер учурлу» — деп, оныҥ кызы айтты.

Иеффайдыҥ кызына база кӱч болгон. Нениҥ учун дезе агару чадырда иштеп тура, оныҥ кижиге барып, бала-баркалу болор аргазы јок болгон. Је ол адазыныҥ берген сӧзин бӱдӱрерге ле Иегованы сӱӱндирерге тыҥ кӱӱнзеген. Бу ого билелӱ болорынаҥ јаан учурлу болгон. Оныҥ учун ол бойыныҥ тӧрӧл айылын артыргызып, бастыра јӱрӱмине агару чадырдыҥ јанында јӱрген.

Сен канайып сананып туруҥ, ол Иегованы ла бойыныҥ адазын сӱӱндирген бе?~ Андый эмей! Сен Иеффайдыҥ кызы чылап Иегованы угуп ла сӱӱп турзаҥ, Кудайды ла ада-энеҥди база сӱӱндирериҥ.