Сеге кем-кем јажырып неме айткан ба?~ * Эйе болзо, сеге јажытту немени ачкан эмтир. Агару Бичикте сӱреен јаан учурлу јажыт айдылат, ол «агару јажыт» деп адалып јат. Ол агару, нениҥ учун дезе ол Кудайдаҥ болот. Оны улус билбес болгон, керек дезе ол керегинде ангелдер де кӧптӧдӧ билерге кӱӱнзегендер. Бу не керегинде јажыт деп билерге сеге јилбилӱ эмес пе?~

Озо-озо ӧйлӧрдӧ Кудай баштапкы эр ле ӱй кижини јайаган. Олорды Ада́м ла Е́ва деп адаган. Кудай олорго Эдем сад деп адалган сӱреен јараш јадар јер сыйлаган. Адам ла Ева Кудайдыҥ сӧзин уккан болгон болзо, олор ло олордыҥ балдары бистиҥ јерди бӱдӱнге ол садтый рай эдер аргалу болор эди. Олор Райда чактыҥ чакка јадар эди. Је Адам ла Ева нени эткени сениҥ санааҥга кирет пе?~

Олор Кудайдыҥ сӧзин укпаган, оныҥ учун бис бӱгӱн райда јатпай јадыс. Је Кудай јерди бӱдӱнге сӱреен јараш сад эдер, ондо кажы ла кижи ырысту болуп, ӱргӱлјиге јӱрер деп айткан. Кудай мыны канайып эдер? Улус мыны узак ӧйлӧргӧ билбеген. Бу јажыт болуп арткан.

Качан Иису́с Христо́с јерге келерде, Ол бу јажыт керегинде кӧптӧдӧ ӱреткен болгон. Бу јажыт Кудайдыҥ Каандыгы керегинде деп, Ол айткан. (14-чи урокто Кудайдыҥ Каандыгы ол не деп, бис билип аларыс.) Иисус бу Каандык келзин деп, мӱргӱӱрге ӱреткен. Јӱк ле бу Каандык јерди јараш рай эдип салар аргалу.

Сен бу јажытты билип алганыҥа сӱӱнедиҥ бе?~ Райда јӱк ле Иегованыҥ сӧзин угуп тургандар јадар деп, ундыба. Агару Бичикте Иегованыҥ сӧзин уккан эр ле ӱй улус керегинде кӧп куучындар бар. Сен олор керегинде билерге кӱӱнзейдиҥ бе?~ Олордыҥ кезиги кемдер болгон, бис канайып олордоҥ тем аларыс деп, кӧрӱп ийек.