Матфейдиҥ сӱӱнчилӱ јары 21:1-46
21 Иисус ла ӱренчиктери Иерусалимге јууктап келеделе, Маслиналарлу кырдагы Виффа́гия деп јердиҥ јанына токтодылар. Оноҥ Иисус эки ӱренчигин ийип,
2 айтты: «Алдыгарда турган јуртка барыгар. Једип ле барзаар, анда буулап койгон кулун эштекти ле оныҥ энезин кӧрӱп ийереер. Олорды чечеле, меге экелигер.
3 Улус слердеҥ неме сураза, слер: „Олор Кайраканга керек“ — деп айтсагар, слерге бу ла ӧйдӧ берип ийгилеер».
4 Анайып, судурчыныҥ мынайда айтканы бӱтти:
5 «Сионныҥ кызына айдыгар: „Сениҥ кааныҥ сеге келип јат. Ол јобош бойы кулун эштекке отурган“».
6 Ӱренчиктер барып, Иисустыҥ айтканын ӱзе бӱдӱрип салды.
7 Ӱренчиктер кулун эштекти ле оныҥ энезин јединип экелеле, олордыҥ ӱстине кийимин салып ийерде, Иисус кулун эштекке отурып алды.
8 Кӧп улус јолго кийимдерин јайып турды, кезиктери дезе пальма агаштыҥ јалбырактарын кезип, јайып турды.
9 Иисустаҥ озо ло кийнинеҥ барып јаткан кӧп улус кыйгырыжып турдылар: «Јайнап турус, Давидтиҥ Уулын аргада! Иегованыҥ адынаҥ келип јатканы алкышту! Давидтиҥ Уулын аргада деп, сени, кӧк теҥериде јӱргенди, јайнап јадыс!»
10 Ол Иерусалимге кирип келерде, бӱдӱн каланыҥ улузы тӱймеп: «Бу кем?» — деп, суражып турдылар.
11 Је Иисусла кожо болгондор мынайда айдыжып турдылар: «Бу Галилей јериндеги Назарет каланыҥ судурчызы — Иисус!»
12 Иисус дезе ӧргӧӧгӧ кирип келеле, анда садыжып турган улустыҥ ончозын чыгара сӱрди. Ол акча толып тургандардыҥ столдорын ла кӱӱлелер садып тургандардыҥ такталарын аҥтарып,
13 олорго айтты: «Мынайда бичилген: „Мениҥ турам мӱргӱӱлдиҥ туразы деп адалар“, је слер оны тонокчылдардыҥ туразы эдип алдыгар!»
14 Ӧргӧӧдӧ Иисуска сокор ло аксак улус базып келерде, олорды јазып ийди.
15 Абыстардыҥ јаандары ла јасактыҥ ӱредӱчилери Иисустыҥ эткен кайкалдарын ла уулчактардыҥ: «Јайнап турус, Давидтиҥ Уулын аргада!» — деп кыйгырышканын кӧрӧлӧ, атыйланып чыктылар.
16 Олор: «Балдардыҥ нени айдыжып турганын угуп туруҥ ба?» — деп сураарда, Иисус: «Эйе, — деп каруу јандырала, — „Сен кичинек балдарды сени мактаарга кӱӱнзеткеҥ“ — дегенин качан да кычырбаган бедеер?» — деп айтты.
17 Оноҥ ол каланаҥ чыгала, Вифа́нияга барып, анда коно берди.
18 Таҥла калага кайра барып јадала, Иисус аштай берди.
19 Ол јолдыҥ јанында турган инжирдиҥ агажын кӧрӧлӧ, базып келерде, анда јалбырактардаҥ ӧскӧ не де болбоды. Ол тушта Иисус: «Сенде качан да тӱжӱм болбозын» — деп айдып ла ийерде, инжир кургай берди.
20 Ӱренчиктер мыны кӧрӧлӧ: «Бу инжир канай чӱрче ле кургап калды?» — деп кайкаштылар.
21 Иисус олорго айтты: «Чынын айдадым слерге: бир де алаҥзыбай бӱдӱп турзаар, јӱк ле инжирле нени эткенимди эмес, је керек дезе бу кырга да: „Кӧдӱрилип талайга таштал“ — деп айтсагар, анайып ла болуп калар.
22 Мӱргӱген тужыгарда нени де бӱдӱп суразагар, алараар».
23 Иисус ӧргӧӧгӧ кирип келеле, ӱредип баштаарда, абыстардыҥ јаандары ла албатыныҥ аксагалдары базып келеле, сурадылар: «Мыны сен кандый јаҥла эдип тургаҥ? Оны сеге кем берген?»
24 Иисус олорго айтты: «Мен слердеҥ база сураарга турум. Каруузын айдып берзегер, мен де слерге мыны кандый јаҥла эдип турганымды айдып берерим.
25 Иоаннга улусты сууга чӧҥӱретен јаҥды кем берген: Кудай ба эмезе улус па?» Олор бой-бойы ортодо куучындажып турдылар: «„Кудай“ — деп айтсаас, ол бистеҥ: „Андый болзо, ого не бӱтпенигер?“ — деп сураар.
26 Је „улус“ — деп айдарга коркып јадыс, нениҥ учун дезе албаты Иоаннды судурчы деп бодоп јат».
27 Оныҥ учун олор Иисуска: «Билбезис» — дедилер. Иисус олорго: «Андый болзо, мен де слерге мыны кандый јаҥла эдип турганымды айтпазым» — деди.
28 «Слер канайып сананып туругар: бир кижиде эки уул болгон. Ол баштапкы уулына базып келеле: „Уулым, бӱгӱн виноградыма барып, иштенип ийзеҥ“ — деп сураган.
29 Онызы: „Јок, барбазым“ — дейле, оноҥ ойто санаа алынып, барган.
30 Оноҥ адазы экинчи уулына базып келеле, база анайып ла сураган. Онызы: „Је, барайын“ — дейле, барбаган.
31 Бу эки уулдыҥ кажызы адазыныҥ кӱӱнин бӱдӱрген?» Олор: «Баштапкызы» — деп айттылар. Иисус олорго айтты: «Чынын айдадым слерге: калан* јууп турган улус ла кей-кебизин* ӱй улус Кудайдыҥ Башкарузына слердеҥ озо кирер.
32 Нениҥ учун дезе Иоанн келип, слерге чын јолды кӧргӱзип берерде, ого бӱтпегенеер. Је калан јууп турган улус ла кей-кебизин ӱй улус бӱде берген. Слер кӧстӧрӧӧрлӧ кӧргӧн дӧ болзогор, кинчегерди алынбаганаар да, ого бӱтпегенеер де.
33 База бир укаа сӧс угыгар. Бир кижиде јер бар болгон. Ол анда виноград отургызып, оны чедендейле, анда виноград сыгатан јер ле виноград каруулдайтан шибее тудуп салган. Оноҥ ол бу јерди кичеезин деп, виноград ӧскӱреечилерге берип ийеле, бойы ӧскӧ ороонго атана берди.
34 Оноҥ тӱжӱм јууйтан ӧй једе берерде, ол бойыныҥ ӱлӱзин аларга, виноград ӧскӱреечилерге кулдарын ийген.
35 Је олор оныҥ кулдарын тудуп алала, бирӱзин — согуп, экинчизин — ӧлтӱрип, ӱчинчизин дезе ташла шыбалап салгандар.
36 Ол тушта виноградтыҥ ээзи олорго оноҥ кӧп кулдарын ийди. Је виноград ӧскӱреечилер олорго до анайып ла баштанды.
37 Учында ол: „Уулымды олор тоор болор“ — дейле, уулын ийди.
38 Уулын кӧрӱп ийеле, виноград ӧскӱреечилер бой-бойына айдышты: „Бу энчи алатан уул. Оны ӧлтӱрип, энчизин бойыска алактар“.
39 Олор оны тудуп алала, виноград отургыскан јердеҥ чыгара сӱӱртеп, ӧлтӱрип салгандар.
40 Айдарда, виноградтыҥ ээзи келзе, ол улусты канайдып салар?»
41 Олор Иисуска айттылар: «Ол бу јаман улусты ӧлтӱрип, јерди ӧскӧ виноград ӧскӱреечилерге кичеезин деп, берип салар. Олор дезе виноградтыҥ тӱжӱмин ӧйинде берип турар».
42 Иисус олорго айтты: «Бичимелде айдылганын качан да кычырбаганаар ба: „Ишчилердиҥ јектеп салган тажы эҥ керектӱ таш болуп калган. Мыны Иегова анайып эткен. Бис мыны кӧрӧлӧ, сӱреен кайкап јадыс“?
43 Оныҥ учун айдадым слерге: Кудайдыҥ Башкарузы слердеҥ алылар, тӱжӱм берип турган албатыга берилер.
44 Бу ташка јыгылган кижи чачыла берер. Кемниҥ ӱстине таш тӱжер, оны балбарып койор».
45 Абыстардыҥ јаандары ла фарисейлер Иисустыҥ укаа сӧстӧрин угала, олор керегинде айдып турганын оҥдоп ийгендер.
46 Олор оны тудуп аларга сананала, коркый бердилер. Нениҥ учун дезе улус оны судурчы деп бодогон.
