1. Susu nywi ɖewo ciwo yí dɔ woawa ʒinʒindoshimɛɔ?

 ÈLƆN Yehowa Mawu, mɛ ci yí na eo enunywiwo pleŋ koɖo ao gbe ŋtɔkpu can a? Èji mɔ yeadasɛ ni mɔ yeluin a? Emɔ nywi ɖeka ci ji àto awɛ yí nyi mɔ àsɔ eoɖeki ni keŋ avadasɛ yi to ʒinʒindoshimɛwawa ji. Nɔ èɖe afɔ cɛwoɔ, àvanyi ɖeka le Yehowa xomumɛtɔwo mɛ. Ecɛ adɔ yí Edao koɖo ao Xlɔ ádasɛ emɔ nɔ eo, ále bu nɔ eo, ɖo èvanyi yitɔ. (Eha. 73:24; Ezai 43:​1, 2) Gbesɔ kpe niɔ, nɔ èsɔ eoɖeki na Mawu yí wa ʒinʒindoshimɛɔ, àkpɔkpɔ emɔ mɔ yeavanɔ agbe tɛgbɛɛ.—1 Piɛ 3:21.

2. Nyi mìakpɔ le nyɔta cɛ mɛɔ?

² Ŋɖe xexeɛ emɔ nɔ eo yí àwa ʒinʒindoshimɛ egloa? Nɔ enyi ahan yɔ nɛɔ, de eoɖekɛ yɔ o. Agbetɔ miliɔn nɛniɖe trɔ wowo dɛn koɖo wowo susuwo keŋ je yí wa ʒinʒindoshimɛ doŋkɔ nɔ eo vɔ. Evyɛɔ, wovasɛnsɛn Yehowa le jijɔ mɛ koɖo ezolelanmɛ. Nyi àtɛnŋ akpla so mɛɖewo ciwo yí wa ʒinʒindoshimɛ le exwe sanŋdi ŋkɔtɔ mɛ gbɔɔ? Mìakpɔ cukaɖa ciwo wodo go koɖo enu ciwo mìatɛnŋ akpla so wowo kpɔwɛ lɔwo mɛ.

SAMARITƆWO WA ƷINƷINDOSHIMƐ

3. Taŋfuin trɔtrɔ ciwo yí Samaritɔ ɖewo ɖo awa gbɔxwe awa ʒinʒindoshimɛɔ?

³ Le Yesu hwenuɔ, Samaritɔwo le sɛnsɛn gbɛbɔbɔ ɖeka mɛ. Wole Shekɛm koɖo Samari ciwo yí nyi jugan ciwo yí le tagbe nɔ Ʒude. Gbɔxwe Samaritɔwo atɛnŋ wa ʒinʒindoshimɛɔ, woɖo alɔn do Mawu Nyɔ lɔ pleŋ ji keŋ agbeji mɔ yewoakpla enu sugbɔ doji. Samaritɔwo kando ji mɔ wema amatɔn ŋkɔtɔ ciwo yí nyi Gɔnmɛjeje Wema yi Ese Wema amɛvetɔ koɖo taŋfuin Ʒozue wema lɔ ɖekɛ yí so Mawu gbɔ. Vɔ sɔ koɖo egbe ci yí Mawu ɖo le 2 Ese Wema 18:​18, 19 mɛɔ,  Samaritɔwo kpɔkɔ emɔ mɔ Mɛsia lɔ ava. (Ʒan 4:25) Gbɔxwe woawa ʒinʒindoshimɛɔ, woɖo alɔn do ji mɔ Yesu yí nyi Mɛsia ci gbe woɖo lɔ. “[Samaritɔ] sugbɔ” valɔn do nyɔ cɛ ji. (Ʒan 4:39) Taŋfuin, ɖewo le wo mɛ ɖo agbeɖu manyimanyi sɛnŋsɛnŋ ci yí le gblamɛ nɔ Samaritɔwo koɖo Ʒuifuwo ji.—Luiki 9:​52-54.

4. Sɔ koɖo Edɔwawawo 8:​5, 6, 14 ɖe, lé Samaritɔ ɖewo wa nu do eŋɛ ci Filipu dra nɔ wo nu doɔ?

⁴ Nyi yí kpedo Samaritɔwo nu yí wowa ʒinʒindoshimɛɔ? Hwenu eŋɛnywidratɔ Filipu “xo nuxu so Kristo nu,” nɔ woɔ, Samaritɔ ɖewo “lɔn Mawu Nyɔ lɔ.” (Hlɛn Edɔwawawo 8:​5, 6, 14.) Ci Filipu nyi Ʒuifu can ɔ, wodegbe mɔ yewodaɖo to yi o. Taŋfuin woɖo ŋwi kpukpui ɖewo le wema amatɔn ŋkɔtɔ ciwo yí le Bibla mɛ, ci yí nu mɔ Mawu detranɔ amɛ mɛ o. (2 Ese. 10:​17-19) Wo “ɖoto enyɔ ciwo yí Filipu nu nɔ wo ceɖeceɖe,” so Kristo nu yí wovakpɔ kpeɖoji ciwo yí dasɛ petii mɔ, Mawu yí le godu nɔ Filipu. Égbewa enujiŋ sugbɔ, edɔ̀dada nɔ amɛwo koɖo gbɔngbɔnvɔnwo nyanya ti le amɛwo mɛ can le mɛ.—Edɔ. 8:7.

5. Nyi àtɛnŋ akpla so Samaritɔwo gbɔɔ?

⁵ Samaritɔ cɛwo tɛnŋ gbe mɔ yewodaɖo to enu ci Filipu kplakɔ yewo o, ɖo ényi Ʒuifu alo wotɛnŋ gbe enukplakpla lɔwo, ɖo wodese enukplamu ŋtɔ́wo kpɔ o. Vɔ wodeɖe mɔ yí enu cɛwo xe emɔ nɔ wo o. Ci Samaritɔwo vakando ji mɔ enu ci Filipu kplakɔ yewo nyi nyɔnɔnwiɔ, wodegbesɔ ʒinʒindoshimɛwawa sɔ ɖokɔ esɔ esɔ o. Exolɔlɔ Bibla tɔ lɔ ɖe mɛ mɔ: “Ci Filipu va do eŋɛnyui lɔ nɔ wo [so] Mawu Fyɔɖuxu lɔ koɖo amɛ ci yí Yesu [Kristo] nyi nú yí woxɔ enyɔ lɔwo ji se ɔ, [ŋsuwo koɖo nyɔnuwo wa ʒinʒindoshimɛ mɛ.”] (Edɔ. 8:​12, Ezoɖuɖu Yoyu Wema) Èkando ji mɔ Mawu Nyɔ lɔ nyi nyɔnɔnwi, yí Yehowa Kunuɖetɔwo ɖukɔ manyimanyi ɖekpokpui ji keŋ jejeɛ agbla yí dadasɛ lɔnlɔn akun-akun nɔ wowonɔnɔwo ci yí dasɛ mɔ wonyi Kristotɔ adodwiwoa? (Ʒan 13:35) Ŋgbevɔn nɔ ʒinʒindoshimɛ wawa ke o, kando ji mɔ nɔ èwɛɔ, Yehowa acu shi nɔ eo.

6. Nyi àtɛnŋ akpla so Ruben kpɔwɛ lɔ mɛɔ?

⁶ Ruben ci yí so Allemagne, shin le Kunuɖetɔwo xomu mɛ. Vɔ ci enyi ɖajɛviɔ, évabiɔbiɔ yiɖeki se mɔ Yehowa li teŋ ma. Lé ewɛ yí ɖu enuxoxokpɔ yitɔ lɔ jiɔ? Ci ekpɔɛ do jeshi mɔ yedenya enu keke ɖeɔ, ésɔ gbeta mɔ yeawa ŋɖe so nu. Énu mɔ: “Ci ŋvatɔ enukplakpla nyɛɖekɛɔ, ŋvakpɔɛ mɔ ŋɖo aɖu enuxoxokpɔ ŋtɔ́ ji. Ŋkpla nyɔta ciwo yí xo nuxu so jɔ enuwo jɔ wowoŋtɔwo nu zenɛniɖe.” Éhlɛn wema ci yí nyi Y a-t-il un Créateur qui se soucie de vous ? Wema ŋtɔ́ kpedo Ruben nu sugbɔ yí edo ŋsɛn yi xɔse. Évabu tamɛ kpɔ yiŋtɔ yí vanu mɔ: ‘Oo! Yehowa li nyao. Gbesɔ kpe niɔ, hwenu Ruben yi xexeɛ keŋkeŋ dɔwaxu gangantɔ lɔɔ, mìwo nɔviwo habɔbɔ lɔ jeŋ ni sugbɔ yí evatɔ lɔnlɔn ɖoɖo nɔ wo doji. Ci Ruben trɔ vayi Allemagne ɔ, éwa ʒinʒindoshimɛ hwenu eɖo exwe 17. Nɔ èxokɔ nu kpɔ so enu ciwo èkplakɔ nuɔ, ɖu wo ji to enugɔnmɛjijikpɔ le mìwo Bibla nukplawemawo mɛ. Àtɛnŋ asɔ “enujejeshi adodwi” lɔ sɔ ɖu enuxoxokpɔwo ji. (Efe. 4:​13, 14, nwt) Yí ci èsekɔ nyɔtakankanwo so lɔnlɔn koɖo gbenɔju ci yí le Yehowa mɛwo mɛ le akpaxwe buwo nɔ xexe lɔ yí gbekpɔkɔ kpeɖoji lɔwo le eoŋtɔ hamɛɔ, ecɛ adɔ yí lɔnlɔn ci èɖo nɔ nɔviwo habɔbɔ lɔ agbevasɛnŋ doji.

SƆLU CI YÍ SO TARSISI WA ƷINƷINDOSHIMƐ

7. Susu ciwo Sɔlu ɖo atrɔɔ?

⁷ Mìakpɔ Sɔlu ci yí so Tarsisi kpɔwɛ. Ékpla Ʒuifuwo se nywiɖe yí nyi amɛvevi  ɖeka le Ʒuifuwo mɛ. (Gal. 1:​13, 14; Fili. 3:5) Hwenu yí Ʒuifu sugbɔ kpɔkpɔ Kristotɔwo mɔ wonyi xɔsegbetɔwoɔ, Sɔlu ci yumɛ nɔ wo veviɖe. Éwa afɛn yí bui mɔ Mawu dro wakɔ yele. (Edɔ. 8:3; 9:​1, 2; 26:​9-11) Gbɔxwe axɔ Yesu ji se yí awa ʒinʒindoshimɛ yí anyi Kristotɔɔ, Sɔlu ŋtɔ ɖo ale gbesɔsɔ nɔ woavaci yumɛ ni.

8. (a) Nyi yí kpedo Sɔlu nu yí ewa ʒinʒindoshimɛɔ? (b) Sɔ koɖo Edɔwawawo 22:​12-16 ɖe, lé Ananiasi kpedo Sɔlu nu doɔ? (Kpɔ foto lɔ hɛnnɛ.)

⁸ Nyi yí kpedo Sɔlu nu yí ewa ʒinʒindoshimɛɔ? Ci Yesu le jeŋkwi mɛ yí xo nuxu ɖaɖa Sɔluɔ, klɛnklɛn lɔ na yí ŋkuvi tɔn ni. (Edɔ. 9:​3-9) Na nɔ ŋkeke amɛtɔn ɔ, énɔ shive yí kankandoji li mɔ, ébu tamɛ kpɔ so ŋci yí jɔ do ji sabaɖe yɛ nu. Le nyɔnɔnwi mɛɔ, Sɔlu vakando ji mɔ Yesu yí nyi Mɛsia lɔ yí yi dokplɔtɔwo yí wakɔ sɛnsɛn adodwi lɔ. Sɔlu ɖo aseseɛ gbazavi sugbɔ nɔ ébu tamɛ kpɔ so hwecinu yí ena yí wo wu Etiɛni nu! (Edɔ. 22:20) Le ŋkeke amɛtɔn lɔwo vɔvɔnuɔ, nukplavi ɖeka ci yí tɔ mɔ Ananiasi sɔ xomɛvu yí te gogo Sɔlu yí na yí ŋkuvi lɔ hun ni, yí do ŋsɛn yi mɔ le wa ʒinʒindoshimɛ zeɖeka kaka. (Hlɛn Edɔwawawo 22:​12-16.) Sɔlu sɔ yiɖeki hwe yí xɔ kpekpedonu keŋ yí vatɔ agbe yoyu mɔ lɔ ji zɔnzɔn.—Edɔ. 9:​17, 18.

9. Nyiwo yí àtɛnŋ akpla so Sɔlu gbɔɔ?

⁹ Enu sugbɔ li mìakpla so Sɔlu gbɔ. Átɛnŋ aɖe emɔ yí egoyiyi alo vɔnvɔn nɔ agbetɔ axe emɔ ni awa ʒinʒindoshimɛ sa aglo. Vɔ deɖe emɔ yí enu cɛ jɔ do ji o. Ci Sɔlu se nyɔnɔnwi so Kristo nuɔ, ésɔ yiɖeki hwe yí wa trɔtrɔwo. (Edɔ. 26:​14, 19) Sɔlu le gbesɔsɔ yí anyi Kristotɔ ci enya mɔ woavaci yumɛ nɔ ye can. (Edɔ. 9:​15, 16; 20:​22, 23) Ci ewa ʒinʒindoshimɛ ɖegbɔɔ, ékpɔtɔ kankando Yehowa ji yí ekpedo nu yí edo ji le cukaɖa vovovowo mɛ. (2 Kor. 4:​7-10) Nɔ èwa ʒinʒindoshimɛ yí vanyi ɖeka le Yehowa Kunuɖetɔwo mɛɔ, ao xɔse àtɛnŋ aɖo tetekpɔ mɛ alo àdogo cukaɖawo, vɔ àkpɔ kpekpedonu. Àtɛnŋ akandoji mɔ Mawu koɖo Kristo akpedo eo nu nakpɔtɔ ado ji le egbejinɔnɔ mɛ.—Fili. 4:13.

10. Nyɔna ci àtɛnŋ akpɔ le Anna kpɔwɛ lɔ mɛɔ?

 ¹⁰ Anna shin le Kurd xomu ɖeka mɛ le Wezexu nɔ Europe. Ci Anna nɔlɔ wa ʒinʒindoshimɛ goduɔ, edalɔ nagbe yi yí etɔ Bibla kplakpla hwenu éɖo exwe 9. Vɔ xomumɛtɔwo pleŋ nɔnɔ ju le Anna xomu mɛ. Ci Anna xomu lɔ se mɔ yɛtɔ Bibla kplakplaɔ, xomu lɔ fɔngu do ji. Yi xomumɛtɔwo kpɔɛ mɔ ŋkpɛn anyi nɔ xomu lɔ nɔ mɛɖe tashi sɛnsɛn ci mɛ yí yi tɔgbuiwo le keŋ yí vayi ci sɛnsɛn bu mɛ. Hwenu Anna ɖo exwe 12 ɔ, ébiɔ gbe dalɔ mɔ yeawa ʒinʒindoshimɛ. Edalɔ ji mɔ yeanya nɔ yiŋtɔ yí sɔ gbeta mɔ yeawa ʒinʒindoshimɛ alo mɛɖe yí ʒinʒin ɛ ji ma. Éɖo ŋci mɔ, “ŋlɔn Yehowa.” Edalɔ ɖe emɔ ni mɔ le wa ʒinʒindoshimɛ. Le yi goduɔ, Anna xomu lɔ devawanɔ nu do nu nywiɖe o, wogbalini yí gbekuini gbɛmɛgbɛmɛ. Yi xomumɛtɔ ɖeka nu ni mɔ: “Agbe lɔ anyɔ nɔ eo nɔ enɔkɔ agbe dɔndɔn yí yɔkɔ siga sɔwu Yehowa Kunuɖetɔ ci ènyi.” Lé Anna ɖu cukaɖa ŋtɔ́ ji doɔ? Énu mɔ, “Yehowa do ŋsɛnŋ yí danyɛ koɖo nɔnyɛ kpedo ŋnu sugbɔ.” Anna ŋwlɛnɔ hwenu vevi ciwo mɛ Yehowa kpedo nu le koŋ le yi gbe mɛ daɖɛ. Évahlɛnnɔ wo kpɔ hweɖewonu keŋ nɔ ŋgbeŋlɔbe lé Yehowa kpedo nu vayi o. Nɔ èvɔnvɔn nɔ yumɛciciɔ, ɖo ŋwi mɔ Yehowa akpedo eo can nu hɛnnɛ.—Ebre. 13:6.

KƆRNƐYI WA ƷINƷINDOSHIMƐ

11. Nyi yí atɛnŋ axe emɔ nɔ Kɔrnɛyi sa yí awa ʒinʒindoshimɛ agloɔ?

¹¹ Bibla gbexo nuxu so Kɔrnɛyi kpɔwɛ nu. Ényi “ahwaga,” ecɛ dasɛ mɔ, ékpa nɔ sɔja 100 le Rɔma hwakpa mɛ. (Edɔ. 10:1) Ci ele texwe ŋtɔ́ɔ, ényi amɛvevi le yi ju mɛ koɖo le sɔjawo mɛ hwenɔnu. “É zannɔ yi ho sugbɔ nɔ wamɛnɔwo.” (Edɔ. 10:2) Yehowa dɔ apotru Piɛ ɖaɖɛ nɔ adra eŋɛnywi lɔ ni. Texwe ci Kɔrnɛyi le dɔ yi esɔ ʒinʒindoshimɛwawa ɖoɖoɔ esɔ esɔa?

12. Nyi yí kpedo Kɔrnɛyi nu yí ewa ʒinʒindoshimɛɔ?

¹² Nyi yí kpedo Kɔrnɛyi nu yí ewa ʒinʒindoshimɛɔ? Mìhlɛn le Bibla mɛ mɔ: “[Amɛ ciwo pleŋ] yí le yi xwemɛ sɛnnɔ Mawu.” Yí Kɔrnɛyi fannɔ kwi nɔ Mawu tɛgbɛɛ. (Edɔ. 10:2) Ci Piɛ nu eŋɛnywi lɔ nɔ Kɔrnɛyiɔ, yi koɖo yi xomu xɔ Kristo ji se yí wowa ʒinʒindoshimɛ le afɔdumɛ. (Edɔ. 10:​47, 48) Kankandoji li mɔ Kɔrnɛyi le gbesɔsɔ awa trɔtrɔ ciwo yí ʒan yí awa ʒinʒindoshimɛ keŋ nɔ yi koɖo yi xomu asɛn Yehowa.—Ʒoz. 24:15; Edɔ. 10:​24, 33.

13. Nyiwo àtɛnŋ akpla so Kɔrnɛyi gbɔɔ?

¹³ Shigbe Sɔlu nɛɔ, Kɔrnɛyi tɛnŋ ɖe emɔ yí texwe ci ele axe emɔ ni awa ʒinʒindoshimɛ atrɔ Kristotɔ sa aglo. Vɔ deɖe emɔ yí enyi ahan ni o. Ci èxɔ nyɔnɔnwi lɔ ɖe, eʒan mɔ àwa trɔtrɔ ganganwo le ao gbe mɛ gbɔxwe awa ʒinʒindoshimɛa? Nɔ enyi ahan yɔ nɛɔ, Yehowa anyi ao Kpedonutɔ. Ácushi do gbeta ci èsɔ mɔ yeanɔ agbe asɔ koɖo Bibla gɔnmɛɖosewo ji.

14. Nyɔna ci àtɛnŋ akpɔ so Tsuyoshi kpɔwɛ lɔ mɛɔ?

¹⁴ Tsuyoshi, ci yí so Japon, ɖo awa trɔtrɔ ɖeka le yi dɔ mɛ gbɔxwe aje awa ʒinʒindoshimɛ. Ényi sukluga kpedonutɔ le suklu ci yí le Ikenobo yí wokplanɔ amɛ lé woato flawawo do. Blaŋblaŋ ɔ, nɔ sukluga lɔ datɛnŋ ayi ecɔ kɔnu ɖe tɔxuɔ, Tsuyoshi nɔnɔ dumɛ ni le Buddha kɔnuwo wawa hwenu. Vɔ, ci Tsuyoshi vakpla nyɔnɔnwi kuso amɛkukuwo nuɔ, énya mɔ yedatɛnŋ awa ʒinʒindoshimɛ nɔ yekpɔtɔ le kɔnu ŋtɔ́wo wakɔ o. Yiŋtɔ vasɔ gbeta mɔ yedagbenɔ Buddha kɔnu lɔwo tɔxu o. (2 Kor. 6:​15, 16) Tsuyoshi vaxo nuxu nɔ yi dɔmɛga lɔ so nyɔ lɔ nu. Nyi yí to so mɛɔ? Tsuyoshi sun ji yí kpɔtɔ wakɔ yi dɔ lɔ, vɔ degbe yinɔ akɔnu lɔwo tɔxu o. Ci étɔ Bibla kplakpla ewa xweɖeka han ɔ, éwa ʒinʒindoshimɛ. a Nɔ eʒan mɔ  àwa trɔtrɔ ɖewo le ao dɔ mɛ keŋ nɔ ao nu akpe nɔ Mawuɔ, kando ji mɔ ána enu ci yí ʒan eo koɖo ao xomu.—Eha. 127:2; Mt. 6:33.

KORƐNTITƆWO WA ƷINƷINDOSHIMƐ

15. Nyiwo yí atɛnŋ ana yí Korɛntitɔwo awa ʒinʒindoshimɛ sa yí agloɔ?

¹⁵ Wojeshi Korɛnti sasa tɔ mɔ gbɛmɛnuwo jiji yí bianɔ ŋkuvi nɔ wo. Amɛ sugbɔ ci yí le nɔ wanɔ nu ci yí dekpenɔ nɔ Mawu o. Eze petii mɔ, agbɔnnu sugbɔ nɔ mɛɖe ci yí xɔ eŋɛnywi lɔ le eju ŋtɔ́ mɛ mɔ anɔ agbe nywi. Ele ahan gan, hwenu yí apotru Pɔlu va jugan ŋtɔ́ mɛ yí dra eŋɛnywi ci yí kuso Kristo nuɔ, “amɛ sugbɔ buwo can ɖonɔ to Pɔlu le Korɛnti jumɛ. Wowo can wo kando ji, yí wo do wo eshimɛ.” (Edɔ 18:​7-11) Eyi ci Axwetɔ Yesu Kristo dasɛ yiɖeki nɔ Pɔlu le ŋtegan ɖeka mɛɔ, énu ni mɔ: “Anyi mɛwo sugbɔ le eju cɛ mɛ.” Eyi taɖo Pɔlu kpɔtɔ yí ɖeɖeɛ kunu le nɔ keke na nɔ exwe ɖeka koɖo efan.

16. Nyi yí kpedo Korɛntitɔwo nu yí woɖu ŋciwo yí na agbɔnnu nɔ wo sa mɔ woawa ʒinʒindoshimɛ jiɔ? (2 Korɛntitɔwo 10:​4, 5)

¹⁶ Nyi yí kpedo Korɛntitɔwo nu yí wowa ʒinʒindoshimɛɔ? (Hlɛn 2 Korɛntitɔwo 10:​4, 5.) Mawu Nyɔ lɔ koɖo yi gbɔngbɔn kɔkɔɛ sɛnŋ lɔ kpedo wo nu wowa trɔtrɔ ganganwo le wowo gbe mɛ. (Ebre. 4:12) Korɛntitɔ ŋtɔ́wo ciwo yí xɔ eŋɛnywi ci yí kuso Kristo nu ji se, sun ji yí tashi adɛn koɖo enuwana dɔndɔnwo shigbe ahanumu, efififi, ŋsu adɔn koɖo ŋsu alo nyɔnu adɔn koɖo nyɔnu nɛ ji.—1 Kor. 6:​9-11. b

17. Nyi àtɛnŋ akpla so Korɛntitɔwo gbɔɔ?

¹⁷ Do jeshi mɔ ci Korɛntitɔ ɖewo ɖo adɛn dɔndɔn ciwo yí doke do wo mɛ can ɔ, wodekpɔɛ mɔ yɛagbɔnnu nɔ yewo sugbɔ keke yewoatrɔ Kristotɔ aglo o. Woje agbla sɛnsinɖe keŋ yí nɔ emɔ hwɛhwɛ ci yí kplɔ amɛ yi agbe mavɔ mɛ ji. (Mt. 7:​13, 14) Egbɔngbɔnnu nɔ eo mɔ àɖu enuwana alo adɛndɔndɔn ɖe ji keŋ gbɔxwe awa ʒinʒindoshimɛa? Ŋgbemi agblajeje gbeɖe o! Ðekuku nɔ Yehowa nɔ ana eo yi gbɔngbɔn kɔkɔwɛ keŋ akpedo eo nu naɖu enudɔndɔnwawa ji.

18. Nyɔna ci àtɛnŋ akpɔ so Monika kpɔwɛ lɔ mɛɔ?

¹⁸ Monika ci yí so Georgie je agbla veviɖe keŋ ami nuxu makɔmakɔwo xoxo koɖo ayeɖedaɖɛ dɔndɔnwo yí awa ŋkɔyiyi keŋ awa ʒinʒindoshimɛ. Énu mɔ: “Hwenu ŋle cugbejɛvi mɛɔ, gbedodoɖa donɔ ŋsɛnŋ.  Yehowa nya mɔ ŋji mɔ nawa nunywi yí ekpenɔdo ŋnu gashiagamɛ yí danasɛ emɔ nɔŋ.” Monika wa ʒinʒindoshimɛ hwenu eɖo exwe 16. Enuwana dɔndɔn ɖewo li yí eʒan mɔ èɖo atashi gbɔxwe atɛnŋ asɛn Yehowa nywiɖea? Kpɔtɔ abiɔbiɔɛ nɔ ana ŋsɛn eo nɔ nawa trɔtrɔwo. Yehowa sɔ xomɛvu yí nanɔ yi gbɔngbɔn kɔkwɛ amɛ.—Ʒan 3:34.

AO XƆSE ATƐNŊ AKƆ ETOWO SWI

19. Nyi yí atɛnŋ akpedo eo nu naɖu cukaɖa ciwo yí le shigbe etowo nɛ jiɔ? (Kpɔ foto lɔ hɛnnɛ.)

¹⁹ Kando ji mɔ Yehowa lɔn eo yí ji mɔ eo anyi ɖeka le ye xomu lɔ mɛ. Nyɔnɔnwi yí nyɔ cɛ nyi, nɔ ŋɖekpokpui xekɔ emɔ nɔ eo yí awa ʒinʒindoshimɛ aglo can. Yesu nu nɔ yi nukplavi gbɛbɔbɔ ɖeka le exwe sanŋdi ŋkɔtɔ mɛ mɔ: “Nɔ míɖo xɔse yí egangan shigbe mutadiku nɛɔ, míanu nɔ eto cɛ mɔ, ‘So ayi je hunɖaa;’ eyi aso ayi. Yí ŋɖekpokpui daglo mí o.” (Mt. 17:​20, nwt) Exwe kleŋ ɖewo kpoŋ yí mɛ ciwo yí seseɛ nyɔ cɛwo wa koɖo Yesu, eyi taɖo wowo xɔse ɖo akpɔtɔ asɛnsɛnŋ. Vɔ Yesu na kankandoji wo mɔ nɔ wokpɔtɔ yí ɖoɖoɔ xɔseɔ, Yehowa akpedo wo nu yí woaɖe cukaɖa ciwo yí le shigbe etowo nɛ swi. Yí Yehowa akpedo eɔ can nu nawɛ ahan!

20. Lé kpɔwɛ Kristotɔ exwe sanŋdi ŋkɔtɔ mɛ tɔwo tɔ koɖo egbɛ tɔwo do ŋsɛn eo doɔ?

²⁰ Nɔ èdo jeshi mɔ ŋɖewo xekɔ emɔ nɔ ye yí yeawa ʒinʒindoshimɛ egloɔ, ɖe afɔ ciwo aɖewo kaba yí aɖe wo swi. Kristotɔ ciwo yí ni le exwe sanŋdi ŋkɔtɔ mɛ koɖo egbɛ tɔwo kpɔwɛwo le fa akɔn nɔ eo yí agbedo ŋsɛn eo. Wowo kpɔwɛwo le do ŋsɛn eo yí ana nasɔ eoɖeki jo nɔ Yehowa yí awa ʒinʒindoshimɛ. Eyi nyi gbeta nywitɔ ci àtɛnŋ asɔ!