Bibla dasɛ petii mɔ Yehowa atɛnŋ anu enu ci yí ajɔ le esɔmɛ daɖɛ. (Ezai 45:21) Dedrenɔ lé awɛ koɖo hwenu ci yí awɛ hlɛnhlɛnhlɛn o, alo dedrenɔ lé enya nu so enu lɔwo nu hlɛnhlɛnhlɛn nɔ mì o. Eyi taɖo mìdatɛnŋ anya enujikpekpe ci Yehowa ɖo yí anu enu ci yí ajɔ le esɔmɛ nu o. Vɔ mìmɔŋje ŋɖewo mɛ.

Ŋɖe wawa deglonɔ Yehowa o, sɔwu enu ciwo yiŋtɔ xa mɔ yedawa o. Ci ŋununyanya yitɔ deɖo sɛnxuɔ, atɛnŋ anu enuɖekpokpui ci edrɔdrɔ mɔ yeawa daɖɛ. (Rɔm. 11:33) Ci eɖunɔ yiɖeki ji nywiɖeɔ, átɛnŋ gbeɖui mɔ yedanya enu ci yí jikɔ ajɔ o.—Sɔ sɔ koɖo Ezai 42:14.

Yehowa wɛni yí yi dro vanɔmɛ. Lé ecɛ kpedo mì nu mìmɔŋje enujikpekpe ci eɖo yí anu enu ci yí ajɔ le esɔmɛ doɔ? Ezai 46:10 ɖe mɛ mɔ: “Le tɔtɔmɛ ɔ, Ŋ nu nɔ mí so enu ciwo yí a jɔ le vɔvɔnu. Sa xoxo ɔ, Ŋ nu enu ciwo yí de jɔ hɔɖo nɔ mí. Nɔ́ Ŋ to enu ɖe ɔ, enu lɔ jɔnɔ do ji. Ŋ wanɔ enu ciwo yí Ŋ dro yí a wa.’”

Enu ci yí taɖo Yehowa atɛnŋ anu enu ci yí ajɔ le esɔmɛ yí nyi mɔ, éɖo ŋsɛn yí awɛ yí enu ɖekpokpui avamɛ. Deʒan mɔ Yehowa anya enu ci yí jikɔ ajɔ le esɔmɛ doŋkɔ daɖɛ, keke ale shigbe mɔ enu ciwo yí jikɔ ajɔ lɔwo jɔ kpɔ vayi yí Yehowa yɛ nya lé vɔvɔnu lɔ ale do hannɛ o. Ewaɖeɔ, Yehowa atɛnŋ aɖui mɔ enu ɖe avajɔ le esɔmɛ le hwenu ɖe koŋ ji yí awɛ keke enu lɔ ajɔ nɔ hwenu lɔ vaɖo.—Hun. 9:​5, 6; Matie 24:36; Edɔ. 17:31.

Enu cɛ yí dɔ Bibla zan nyɔgbe “tui ɖɛ,” “tui,” koɖo “Na wɛ” yí sɔ dre nu ciwo Yehowa drɔdrɔ mɔ yeawa le esɔmɛ. (2 Efy. 19:25; Ezai 46:11) Woɖe nyɔgbe cɛwo so enuŋwlɛŋwlɛ ŋkɔtɔwo nyɔgbe ɖeka ci yí ca ka koɖo nyɔgbe ɖeka ci gɔnmɛ yí nyi “ezemɛtɔ” mɛ. (Ʒer. 18:4) Shigbe lé ezemɛtɔ ɖe atɛnŋ azan esu keŋ awa eze nyakpɔkpɔ ɖeka nɛɔ, ahanke Yehowa atɛnŋ atrɔ enu lɔwo do alɔkpa ɖe nɔ edro yitɔ anyi wawa.—Efe 1:11.

Yehowa donɔ bubu amɛɖekishinɔnɔblɔɖe ci ena mì nu. Denunɔ enu ci yí ajɔ do mɛɖekamɛɖeka ji le agbe mɛ daɖɛ o yí de eyi dɔnɔ yí amɛnywiwo awa ŋɖe ci yí ahɛn eku vɛ nɔ wo o. Étanɔshi amɛwo pleŋ nɔ woasɔ gbeta so enu ci woawa nu yí edodoɔ ŋsɛn wo mɔ wo le sɔ gbeta nywiwo le agbe mɛ.

Mìakpɔ kpɔwɛ amɛve. Kpɔwɛ ŋkɔtɔ kuso Ninivutɔwo nu. Yehowa nu daɖɛ mɔ yeagu wowo jugan lɔ, ɖo wowakɔ enudakpuwo le ju lɔ mɛ. Vɔ ci eju lɔ mɛ tɔwo trɔ ji mɛɔ, Yehowa “ɖɔli Yi susu yí Dé wa enu ciwo yí E to o. Mawu de dɔnto nɔ amɛwo o.” (Ʒonasi 3:​1-10) Ci Ninivutɔwo zan amɛɖekishinɔnɔblɔɖe wowotɔwo nywiɖe yí trɔ ji mɛ hwenu wose amɛkanxle ŋɛdu Yehowa tɔɔ, Yehowa trɔ yi susu yi degbewa enu ci eji mɔ yeawa koɖo wo o.

Kpɔwɛ amɛvetɔ kuso enyɔnuɖɛ ci yí xo nuxu so ahwafyɔ ci yí tɔ mɔ Sirusi nu, ci yí avatashi Ʒuifuwo nɔ woaso le hwashigbemɛ keŋ atrɔ vayi cu Yehowa gbedoxɔ lɔ. (Ezai 44:26–45:4) Pɛsi fyɔ Sirusi na yí enyɔnuɖɛ cɛ vamɛ. (Ezra 1:​1-4) Vɔ Sirusi desɛnnɔ Mawu adodwi lɔ o. Yehowa zan Sirusi yí ena yí enyɔnuɖɛ cɛ vamɛ. Édo bubu amɛɖekishinɔnɔblɔɖe yitɔ nu, étashi nɔ yiŋtɔ acan mɛ ci asɛn.—Elo. 21:1.

Denyi enu cɛwo ɖekɛ kpoŋ yí Yehowa kpɔnɔ yí anu enu ci yí ajɔ le esɔmɛ o. Nɔ mìanuiɔ, agbetɔ ɖekɛ deli yí amɔŋje lé Yehowa wanɔ yi nuwo do hlɛnhlɛnhlɛn mɛ o. (Ezai 55:​8, 9) Ele ahan gan, enu ciwo Yehowa na yí mìnya dɔ mìkando ji mɔ, enujɔjɔɛ yí ewanɔ tɛgbɛɛ, nɔ enukɔ enu ciwo yí ajɔ le esɔmɛ can.