MÌWO domɛtɔ ɖeshiaɖe jinɔ mɔ amɛwo le kpɔ mì do amɛnywi ji. Vɔ egbɔnnɔnu mɔ woanyi amɛnywi le egbɛ ŋkekewo mɛ. Ðo amɛ sugbɔ nyi “enunywimalɔntɔwo.” (2 Tim. 3:​3, nwt) Wokplɔnɔ wowoŋtɔwo susuwo do kudo enywi koɖo evwin nu keŋ “yɔnɔ enunywi mɔ enuvwin yí yɔnɔ enuvwin mɔ enunywi.” (Ezai 5:​20, nwt) Agbe ci mìnɔ sa koɖo nuvɔnmɛ ci mìnyi na yí egbegbɔnnɔnu nɔ mì mɔ mìanyi amɛnywi. Eyi taɖo mìatɛnŋ ase le mìwoɖekiwo mɛ shigbe nɔvinyɔnu ɖeka ci yí sɛn Yehowa na nɔ exwe sugbɔ hannɛ. Énu mɔ: “Egbɔnnu nɔŋ sugbɔ mɔ maxɔɛ se mɔ natɛnŋ avanyi amɛnywi.”

Jijɔ nyɔ lɔ yí nyi mɔ enuywiwawa nɔnɔmɛ cɛ atɛnŋ asun mì pleŋ shi! Mawu gbɔngbɔn kɔkɔɛ kusɛnsɛn kpaxwe ɖe enyi. Gbɔngbɔn kɔkɔɛ lɔ ɖo ŋsɛn wu enu ciwo yí ana mìdanyi amɛnywiwo o, shigbe ŋsɛnkpɔdoamɛji vwin ci yí aso xexe lɔ mɛ, agbe ci mìnɔ vayi koɖo nuvɔnmɛ ci mìnyi nɛ. Na mìakpɔ enu ci enunywiwawa nyi koɖo lé mìatɛnŋ adasɛ yi do nywiɖe wu le agbemɛ.

Enunywiwawa yí nyi mɔ woanɔ agbe nywi, awa nunywi yí wodave xomɛ alo awa nubaɖa o. Amɛnywi jinɔ emɔ ci ji ato akpedo mɛbuwo nu yí awa nunywi nɔ wo hweɖekpokpuinu.

Taŋfuin àdo jeshi mɔ mɛɖewo lɔn faa wanɔ nywi nɔ wowo xlɔwo koɖo wowo xomumɛtɔwo, vɔ hunnɔtɔxu yí enunywiwawa lɔ ɖo asɛn a? Nyɔnɔnwi enyi mɔ mɛɖe detɛnŋ wanɔ enywi ɖeɖe shɔnŋ o, eyi taɖo Bibla nu mɔ “amɛ jɔjɔɛ ɖe dele nyigban lɔ ji ci yí wanɔ enunywi gashiagamɛ nuvɔn mawa gbeɖe o.” (Ŋun. 7:​20, nwt) Apostolo Pɔlu lɔn do ji mɔ: “Ɛɛ, ŋ nya mɔ enunywi ɖe de le lanmɛ nɔ ŋ o. Yi gɔnmɛ nyi mɔ enunywi ɖe de le anyi kleklinyinyi mɛ o.” (Rɔm. 7:18) Eyi taɖo eze petii mɔ mìɖo akpla nu so Yehowa ci yí nyi enunywiwawa Soxu gbɔ, nɔ mìji mɔ nɔnɔmɛ cɛ asun mì shi.

Yehowa Mawu ɖo sewo kudo enunywiwawa nu. Bibla nu so Yehowa nu mɔ: “Mawu, E nyɔ yí E wanɔ enu nywiwo. Kpla Ao sewo ŋ.” (Eha. 119:68) Na mìagbeje akpaxwe amɛve nɔ enunywiwawa Yehowa tɔ ciwo nu kpukpui cɛ xo nuxu so.

Yehowa, ènyɔ. Enunywiwawa nyi akpaxwe vevi ɖeka le amɛnyinyi Yehowa tɔ mɛ. Do jeshi enu ci yí jɔ hwenu Yehowa nu nɔ Moizi mɔ: “Nana enunywiwawa anyitɔ pleŋ ato ŋmɛ nɔ eo.” Hwecinu yí ŋcikɔkɔɛ Yehowa tɔ ci mɛ enunywiwawa can le, vayikɔɔ, Moizi se enyɔ cɛwo: “[Yehowa, Yehowa] yí nyi Xomɛvu koɖo Ŋshishikuku Mawu. Tɔhonɔ de ɖeblɛ yí donɔ dɔmɛzi o. Lɔnlɔn gangan yí ɖɔ Tɔhonɔ lanmɛ. Wo tɛnŋ a kando Tɔhonɔ ji. Tɔhonɔ dasɛ Yi xomɛvu nɔ hɛnnu kotokun nɛni ɖe. Tɔhonɔ sɔ enu vɔn ciwo yí amɛwo wanɔ sɔke wo. Vɔ, Tɔhonɔ de ŋlɔnɔbe etodɔndɔn nɔ amɛ ciwo ku kojo o.” (Hun. 33:​19, nwt; 34:​6, 7) Ecɛ dasɛ gbajɛɛ mɔ Yehowa nyɔ le enushianu mɛ. Yesu yí nyi agbetɔ nywi ci mɛɖe desɔ koɖo le nyigban lɔ ji kpɔ o, gan énu mɔ: “Amɛ ɖekpokpwi de nyɔ sɔ zeto Mawu ɖekɛ kpaŋ nu o.”​—Luiki 18:19.

 Yehowa wanɔ enunywiwo. Enunywiwawa ze le enu ciwo pleŋ Yehowa wa mɛ. “[Yehowa] nyɔ nɔ amɛ ɖeka ɖeka. Tɔhonɔ dasɛ Yi ŋshishikuku nɔ enushianu ci yí E wa.” (Eha. 145:9) Yehowa detranɔ amɛ mɛ o, éwanɔ enunywi nɔ amɛshiamɛ, éna agbe koɖo enu ciwo pleŋ mìʒan gbɔxwe anɔ agbe mì. (Edɔ. 14:17) Égbedasɛ mɔ yenyi amɛnywi ci esɔ enu kenɔ mì. Ehakpatɔ ɖeka ŋwlɛn mɔ: “Oo Yehowa, ènyɔ, èlɔnnɔ sɔsɔke.” (Eha. 86:​5, nwt) Mìatɛnŋ akando ji mɔ “Mawu nanɔ enu nywi ɖekpokpwi amɛ ciwo yí kplɔɛ ni do yí nanɔ bubu Yi.”​—Eha. 84:11.

Yehowa wa mì do yi nɔnɔmɛ nu, eyi taɖo mìatɛnŋ anyi amɛnywi yí awa nunywi shigbe yɛ hannɛ. (Gɔnm. 1:27) Vɔ enunywiwawa datɛnŋ ava le yiɖeki shi o. Yehowa nu nɔ mì mɔ, mìɖo ‘akpla enunywiwo wawa.’ (Ezai 1:17) Vɔ lé mìatɛnŋ akpla enunywiwawa doɔ? Kpɔ emɔ amɛtɔn ciwo ji mìatɛnŋ ato awɛ.

Ŋkɔtɔ, mìatɛnŋ ado gbe ɖaɖa yí abiɔ gbɔngbɔn kɔkɔɛ, ci yí atɛnŋ akpedo Kristotɔwo nu yí nunywiwawa ŋtɔŋtɔ asun wo shi. (Gal. 5:22) Ɛɛ, Mawu gbɔngbɔn lɔ atɛnŋ akpedo mì nu yí mìalɔn enunywi yí agbe enuvwin. (Rɔm. 12:9) Eyi taɖo Bibla nu mɔ Yehowa ado “ŋsɛn lanmɛ nɔ [mì], le enu nywi ɖeshaɖe ci yí [mì] wanɔ yí nunɔ mɛ.”​—2 Tɛs. 2:​16, 17.

Amɛvetɔ, mìɖo ahlɛnnɔ Mawu Nyɔ ci yí so gbɔngbɔnmɛ. Nɔ mìwɛ ahan ɔ, Yehowa akpla ‘enu ciwo yí nyi enunywiwo’ pleŋ mì nɔ mìale gbesɔsɔ “nɔ edɔ nywi pleŋ wawa.” (Elo. 2:9; 2 Tim. 3:17) Nɔ mìhlɛnnɔ Bibla yí gbebunɔ tamɛ kpɔ so nuɔ, mìwo ji aɖɔ koɖo enunywi ciwo yí kudo Mawu koɖo yi dro nu. Mìwo ji le shigbe dɔkunuwo ɖoxu nɛ. Nɔ mìhlɛnnɔ Bibla yí bunɔ tamɛ kpɔ so nuɔ, mìsɔ enunywiwo donɔ mɛ yí woavakpedo mì nu hwecinu mìaʒanwo.​—Luiki 6:45; Efe. 5:9.

Amɛtɔntɔ, mìate kpɔ awa enu ci ji mìakpe yí ‘akplɔ enunywiwawa do.’ (3 Ʒan 11) Kpɔwɛ nywi ciwo mìatɛnŋ asran le Bibla mɛ. Vɔ Yehowa koɖo Yesu yí nyi kpɔwɛ nywitɔwo. Gan mìatɛnŋ agbesran mɛ ciwo wojeshi ɖɛ mɔ wonyi enunywiwatɔwo le Bibla mɛ. Amɛ amɛve ciwo atɛnŋ ava susu mɛ nɔ mì yí nyi Tabita koɖo Barnaba. (Edɔ. 9:36; 11:​22-24) Àkpɔ nyɔna so kpɔwɛ nywi wowo tɔ mɛ, nɔ ègbeje enu ci woŋwlɛn kudo wo nu mɛ. Le ao nukplakpla mɛɔ, te kpɔ ado jeshi enu ci wowa yí sɔ kpedo mɛbuwo nu. Bu tamɛ kpɔ so enu ciwo àtɛnŋ awa yí asɔ kpedo ao xomumɛtɔwo alo hamɛ lɔ mɛ tɔwo nu. Gbedo jeshi nyɔna ciwo yí Tabita  koɖo Barnaba kpɔ le enunywiwawa nɔ amɛwo mɛ. Eo can àtɛnŋ akpɔ nyɔnawo le enunywiwawa mɛ.

Mìatɛnŋ agbebu tamɛ kpɔ so mɛ ciwo yí le enunywi wakɔ le egbɛmɛ kpɔwɛwo nu. Le kpɔwɛ mɛ, bu tamɛ so hamɛmɛshinshin edɔsɛnsinwatɔ ciwo yí ‘lɔnnɔ enunywiwawa’ nu kpɔ. Gbeɖo ŋwi nɔvinyɔnu egbejinɔtɔ ciwo yí ‘kplanɔ enunywi amɛwo’ to nuxuxoxo koɖo enuwana wowo tɔ mɛ. (Titu 1:8; 2:3) Nɔvinyɔnu ci yí tɔ mɔ Roslyn nu mɔ: “Anyi xlɔ te kpɔ yí kpenɔdo amɛwo nu yí gbedonɔ ŋsɛn lanmɛ nɔ wo le hamɛ lɔ mɛ. Ébunɔ tamɛ kpɔ so nɔnɔmɛ ci mɛ wole nu yí nanɔ nu kleŋ ɖe wo alo wanɔ ŋɖe yí sɔ kpenɔdo wo nu. Le nyɔnɔnwi mɛɔ, ŋkpɔ mɔ amɛnywi enyi.”

Yehowa do ŋsɛn lanmɛ nɔ yi sɛntɔwo mɔ wo le “ji enu ci yí nyi enu nywi.” (Amosu 5:14) Nɔ mìwɛ ahan ɔ, akpedo mì nu yí mìalɔn enu ci Yehowa nu mɔ yɛnyi enunywi yí agbeji veviɖe mɔ mìawɛ.

Enunywiwawa denyi mɔ mìawa enu ganganwo nɔ amɛwo yí asɔ dɔn amɛwo susu va mìwoɖeki ji o. Mìasɔ kpɔwɛ ɖeka: Gbɔxwe aci ɖe ashin ɔ, mìdewunɔ shi ni sugbɔ zeɖeka o, vɔ mìnanɔ shi kankinkankin yi na nɔ hwenu jinjinɖe. Ahanke nɔ mìwanɔ enu kankinkankin nɔ amɛwoɔ, adasɛ mɔ mìnyi amɛnywi.

Bibla biɔ so mì shi mɔ mìwo le le “gbesɔsɔ” yí awa enunywi gashiagamɛ. (2 Tim. 2:21; Titu 3:1) Nɔ mìlenɔ ŋkuvi do enu ci yí jɔjɔ do mɛbuwo jiɔ, ana mìakpɔ emɔ ciwo ji mìato yí “a kpedo wo nu.” (Rɔm. 15:2) Mìatɛnŋ ama mìwo nu ɖe koɖo wo. (Elo. 3:27) Mìagbetɛnŋ ayɔ mɛɖe nɔ ava ɖu nu alo akpɔ jijɔ koɖo mì. Nɔ mìse mɔ mɛɖe bleɔ, mìatɛnŋ ayi ji kpɔ, aŋwlɛn nu ɖaɖɛ alo ayɔɛ le telefonu ji. Ɛɛ, mìatɛnŋ akpɔ emɔ sugbɔ ciwo ji mìato yí anu “enyɔ ciwo yí a kpedo amɛwo nu yí wo a trɔsun amɛ shinshinwo . . . yí a do alɔ̀ amɛ ciwo yí ɖoɖoɔ eto [mì].”​—Efe. 4:29.

Shigbe Yehowa hannɛɔ, mìjinɔ mɔ mìawa enywi nɔ amɛshiamɛ. Eyi taɖo, mìdatra amɛ mɛ o. Emɔ nywitɔ ɖeka ci ji mìato yí nyi mɔ mìadra Fyɔɖuxu ŋɛnywi lɔ nɔ amɛshiamɛ. Shigbe lé Yesu biɔ so mì shi nɛɔ, mìji mɔ mìawa enunywi nɔ mɛ ciwo yí xakɔ mì hɛnnɛ. (Luiki 6:27) Enunywiwawa nɔ mɛbuwo denyi nuvwin gbeɖe o, ɖo “ese ɖe de li yí gbe enu hunnɔwo o.” (Gal. 5:​22, 23) Nɔ mìwanɔ enunywi nɔ mɛ ciwo yí wakɔ enuvwin do mì nu alo mɛ ciwo yí na mìkpekɔ fun ɔ, mìatɛnŋ adɔn wo va nyɔnɔnwi lɔ mɛ yí ahɛn kanfukanfu vɛ nɔ Mawu.​—1 Piɛ 3:​16, 17.

“Wo a cufɛn nɔ amɛ nywiwo . . . nɔ enu nywi ciwo yí wo wa.” (Elo. 14:14) Nyɔna ciwo mìatɛnŋ akpɔɔ? Nɔ mìwa enunywi nɔ mɛbuwoɔ, taŋfuin wowo can atɛnŋ awa enunywi nɔ mì. (Elo. 14:22) Nɔ wodewɛ ahan can ɔ, mìakpɔtɔ awanɔ nunywi nɔ wo. Ðo atɛnŋ ana woatrɔ adɛn.​—Rɔm. 12:20.

Nɔ mìmi enuvwinwawa keŋ tɔ enunywiwawaɔ, ehɛnnɔ nyɔna vɛ nɔ mìwoŋtɔwo. Nɔvi sugbɔ do jeshi cɛ. Mìasɔ Nancy nutɔxukpɔkpɔ. Énu mɔ: “Ci ŋshinkɔɔ, ŋdesɔnɔ ɖe le mɛ nɔ amɛ o, ŋnɔnɔ agbegblegble yí ŋdebunɔ amɛ o. Vɔ ci ŋvakpla Mawu sewo kudo enywi nu yí tɔ wawa do wo jiɔ, ŋvatɔ jijɔ kpɔkpɔ. Ecɛyɛɔ, bubu le ŋnu.”

Susu vevitɔ ci yí taɖo mìana enunywiwawa asun mì shi yí nyi mɔ nɔ mìwɛɔ, ana Yehowa akpɔ jijɔ. Nɔ amɛwo dekpɔkpɔ enu ci mìwakɔ can ɔ, Yehowa yɛ kpɔkpɔɛ. Ényanɔ enunywi ciwo mìwanɔ koɖo susu nywi ciwo pleŋ yí le mì shi. (Efe. 6:​7, 8) Lé eyranɔ mì doɔ? “[Yehowa] kpɔ jijɔ do amɛ nywi nu.” (Elo. 12:2) Eyi taɖo mína nɔ mìakpɔtɔ awanɔ enunywi. Yehowa ɖo gbe mɔ yeana “kanfukanfu, bubu, koɖo fafa enunywiwatɔwo pleŋ.”​—Rɔm. 2:10.