Eŋɛnywiwema Matie Tɔ 8:1-34
8 Ci eɖyi le eto lɔ ji ɖegbɔɔ, amɛwo sugbɔ gbigbigbi yí kplɔɛ do.
2 Eyi kponɔ ɖeka va gbɔ yí bubɔ ni* yí nu ni mɔ: “Axwetɔ, ŋnya mɔ nɔ èlɔn ɔ, àwɛ yí namɛ́ dru.”
3 Eyi Yesu do alɔ̀ ɖaɖa yí tɔ alɔ̀ yi, yí nu mɔ: “Ŋlɔn! Gbaza le mɛ́ nɔ eo.” Eyi kpodɔ̀ lɔ mi ni zeɖeka le afɔdumɛ.
4 Yi goduɔ, Yesu nu ni mɔ: “Ŋgbenu nɔ mɛɖe o. Vɔ so yi dasɛ eoɖeki nɔ avɔnsatɔ yí ana ŋciwo Moizi mɔ wo le na, keŋ nɔ avɔnsatɔwo anya mɔ edɔ̀ mi nɔ eo.”
5 Ci Yesu vaɖo Kapɛrnawumu ɔ, sɔjawo ga ɖeka va gbɔ yí do klo ni.
6 Énu ni mɔ: “Axwetɔ, anyi dɔwavi kplibɔ yí le nyimlɔxwe le axomɛ yí sekɔ gbazavi sugbɔ.”
7 Yesu nu ni mɔ: “Nɔ ŋɖo nɔɔ, nayɔ dɔ̀ ni.”
8 Sɔjawo ga lɔ ɖo ŋci ni mɔ: “Axwetɔ, ŋdeje yí nàva anyi xomɛ o, vɔ ɖè gbe kpoŋ yí edɔ̀ ami nɔ anyi dɔwavi.
9 Ðo nyɛ can, amɛ yí kpa nɔŋ yí nyɛ can ŋkpa nɔ sɔja buwo hɛnnɛ. Eyi nɔ ŋnu nɔ eɖe mɔ, ‘So yi!’ éyinɔ, nɔ ŋnu nɔ ebu mɔ, ‘Va!’ évanɔ; eyi nɔ ŋnu nɔ anyi dɔwavi mɔ, ‘Wa ŋcɛ!’ éwɛni.”
10 Ci Yesu se nyɔ cɛwoɔ, ékpacɛ yí enu nɔ mɛ ciwo yí kplɔɛ do mɔ: “Nyɔnɔnwi ŋnukɔ nɔ mí mɔ, ŋdekpɔ mɛɖe yí eɖo xɔse gangan cɛ han le Izraɛli o.
11 Vɔ ŋnukɔ nɔ mí mɔ, amɛ sugbɔ aso wezexu koɖo weɖoxɔxu yí anɔ kplɔn nu koɖo Abrahamu, Izaki koɖo Ʒakɔbu le jeŋkwi mɛ Fyɔɖuxu lɔ mɛ;
12 gan woasɔ Fyɔɖuxu lɔ viwo dɔŋkpe ɖaɖa vinvin mɛ le xexenu. Enɔ yí woafan vin yí aɖu aɖukli le nɛ.”
13 Yesu nu nɔ sɔjawo ga lɔ mɔ: “So yi. Enu ci èbiɔ koɖo xɔse le vamɛ nɔ eo.” Eyi edɔ̀ lɔ mi nɔ dɔwavi lɔ le gaxoxo ŋtɔ́ ji pɛpɛpɛ.
14 Yesu vayi Piɛ xwe mɛ yí kpɔ ashiɛnɔ le nyimlɔxu yí vuvɔfu wɛkɔ.
15 Eyi Yesu tɔ alɔ̀ alɔ̀ ni yí vuvɔfu lɔ mi ni; eyi eso yí xɔɛ mɛdru.
16 Vɔ fiɛfimɛɔ, amɛwo kplɔ amɛ sugbɔ ciwo gbɔngbɔnvɔnwo dokɔ aya nɔ va gbɔ; eyi eɖenɔ gbe nɔ gbɔngbɔnvɔn lɔwo yí wotonɔ. Éda dɔ̀ nɔ dɔ̀nɔwo pleŋ,
17 keŋ nɔ nyɔ ci wonu ɖɛ to enyɔnuɖɛtɔ Ezai ji avamɛ mɔ: “Yiŋtɔ sɔ vevisese mìwotɔwo yí dro mìwo dɔ̀lelewo.”
18 Ci Yesu kpɔ mɔ amɛwo sugbɔ gbiŋ yí trɔdo yeɔ, énu nɔ yi nukplaviwo mɔ yewoayi ago xlɔtɔ ji nɔ axu lɔ.
19 Eyi esekplamɛtɔ ɖeka va gbɔ yí nu ni mɔ: “Enukplamɛtɔ, nakplɔ eo do ayi fiɖekpokpui ci àyi.”
20 Vɔ Yesu nu ni mɔ: “Wataklɛwo ɖo doduwo yí xeviwo ɖo atɔwo, vɔ Agbetɔvi lɔ deɖo fini asɔ yi ta da do o.”
21 Yi goduɔ, yi nukplavi bu nu ni mɔ: “Axwetɔ, nà gbeŋ mayi ɖyi danyɛ keŋ gbɔxwe.”
22 Yesu nu ni mɔ: “Kplɔ ŋdo yí atashi amɛkukuwo nɔ woaɖyi wowo mɛkukuwo.”
23 Eyi Yesu ɖo tɔjihun mɛ yí yi nukplaviwo ɖo mɛ kplɔɛ do.
24 Jihɔn gangan ɖeka tɔ xoxo le axu lɔ ji yí axublablawo gbangban kɔ do tɔjihun lɔ mɛ; vɔ Yesu yɛle alɔn dɔnkɔ.
25 Eyi yi nukplaviwo va fuin yí nu ni mɔ: “Axwetɔ, xɔ nɔ mì, mìjiji aku!”
26 Vɔ Yesu nu nɔ wo mɔ: “Nyi yí taɖo mívɔnvɔn ahan ɔ? Míwo xɔse hwe sugbɔ.” Eyi eso je te yí wa adan do jihɔn koɖo axu lɔ yí eɖa ɖo tototo.
27 Enu lɔ kpaca yi nukplaviwo yí womɔ: “Mi yí nyi mɛ cɛ yɛ teŋ mɔ? Keke jihɔn koɖo axuwo can sekɔ tonu ni.”
28 Ci evaɖo ago xlɔtɔ lɔ ji le Gadare kan mɛɔ, ŋsu amɛve ciwo mɛ gbɔngbɔnvɔnwo le zɔn so yɔduwo* gblamɛ yí va do go yi. Ŋsu lɔwo nɔnɔ adan ji sugbɔ keke mɛɖekɛ degbe dɔn yí tonɔ emɔ lɔ o.
29 Wodo axwa yí mɔ: “Mawu Vi, enyɔ ci yí le gblamɛ nɔ mìwo koɖo eoɔ? Èva lɛ yí ado aya nɔ mì gbɔxwe nɔ ega lɔ axoa?”
30 Eha sugbɔ ɖekawo le nu ɖukɔ le azɔge nɔ wo.
31 Eyi gbɔngbɔnvɔn lɔwo tɔ kuku ɖeɖe ni mɔ: “Nɔ ènya mì tiɔ, sɔ mì ɖaɖa eha lɔwo mɛ.”
32 Yesu nu nɔ wo mɔ: “Míso yi!” Eyi woto yí vayi ɖo eha lɔwo mɛ. Zeɖekaɔ, eha lɔwo pleŋ lɔ ju so eto lɔ tamɛ hwlihwlihwli yí je axu lɔ mɛ yí nu shi yí ku.
33 Vɔ mɛ ciwo yí kpɔnɔ eha lɔwo ji shi yi eju lɔ mɛ yí vayi nu enyɔ lɔwo pleŋ. Wonu ŋsu ciwo mɛ gbɔngbɔnvɔn lɔwo le nyɔ hɛnnɛ.
34 Eyi taɖo juɔ mɛ tɔwo pleŋ bɔ mɔ yewoakpɔ Yesu; eyi ci wokpɔɛɔ, woɖe kuku ni mɔ yɛ le so le yewo ju mɛ.
