Eŋɛnywiwema Luiki Tɔ 9:1-62
-
Yesu nu lé woawa kunuɖeɖedɔ lɔ do nɔ Amɛ Wive lɔwo (1-6)
-
Nuxu ciwo amɛwo xoxoɔ so Yesu nu na Erodi caka sugbɔ (7-9)
-
Yesu na ŋɖuɖu agbetɔ 5 000 (10-17)
-
Piɛ mɔ Yesu yí nyi Kristo lɔ (18-20)
-
Yesu nu yi ku nyɔ ɖɛ (21, 22)
-
Enu ci enukplavi adodwi ɖo awa (23-27)
-
Nɔnɔmɛtrɔtrɔ Yesu tɔ (28-36)
-
Yesu da dɔ̀ nɔ ŋsuvihwɛ ɖeka ci mɛ gbɔngbɔnvɔn le (37-43a)
-
Yesu gbenu yi ku nyɔ ɖɛ (43b-45)
-
Enukplavi lɔwo dɔn nyɔ so mɛ ci yí nyi gangantɔ le wo mɛ nu (46-48)
-
Mɛɖekpokpui ci yí detrɔkpe mìɔ, éle koɖo mì (49, 50)
-
Wogbe Yesu le Samari kɔxwi ɖeka mɛ (51-56)
-
Lé woawɛ akplɔ Yesu do (57-62)
9 Yesu yɔ Amɛ Wive lɔwo bɔ yí na ŋsɛn koɖo acɛ wo nɔ woanyanɔ gbɔngbɔnvɔnwo pleŋ ti le amɛwo mɛ yí adanɔ edɔ̀ nɔ amɛwo.
2 Édɔ wo ɖaɖa nɔ woadra Mawu Fyɔɖuxu lɔ yí ada dɔ̀ nɔ amɛwo.
3 Eyi enu nɔ wo mɔ: “Míŋgbesɔ ŋɖe nɔ emɔzɔnzɔn lɔ o. Míŋgbehɛn ekpo, ŋɖuɖugodu, kpɔnnɔ alo eho* o yí míŋgbehɛn awu amɛve* hɛnnɛ o.
4 Vɔ nɔ mɛɖe xɔ mí do yi xwe mɛɔ, mínɔ hunnɔ keke ana nɔ hwenu míaso.
5 Fiɖekpokpui ci míayi yí wodexɔ míɔ, míaxuxu afɔkɔ míwotɔwo nɔ mítotoɔ le eju lɔ mɛ keŋ nɔ anyi kunuɖeɖe nɔ wo.”
6 Eyi woso yí dan to eju lɔ pleŋ mɛ yí yi kɔxwi kɔxwiwo mɛ yí nunuɔ eŋɛnywi lɔ. Wodada dɔ̀ nɔ amɛwo le fishiafi.
7 Erodi* ci yí nyi Galile jujikpɔtɔ* se enu ciwo pleŋ yí jɔjɔ. Eyi ecaka le yiɖeki mɛ sugbɔ, ɖo mɛɖewo nunuɔ mɔ Ʒan yí fɔn so ku.
8 Vɔ mɛbuwo nunuɔ mɔ Eli yí trɔgbɔ yí mɛbuwo gbenunuɔ mɔ enyɔnuɖɛtɔ ciwo yí li sa ɖeka yí fɔn so ku.
9 Erodi nu mɔ: “Ŋso ta nɔ Ʒan yɛŋ? Vɔ mi yí nyi mɛ cɛ ci nu ŋseseɛ nyɔ cɛwo soɔ?” Eyi taɖo eji veviɖe mɔ yeakpɔɛ.
10 Ci apotru lɔwo trɔgbɔɔ, wonu ŋciwo pleŋ wowa nɔ Yesu. Eyi Yesu kplɔ wo yí wowoɖekɛwo yi eju ci woyɔnɔ mɔ Bɛtsaida mɛ.
11 Vɔ amɛahwa lɔ nya yí kplɔɛ do. Éwa ɖaŋ xɔ wo yí tɔ nuxu xoxo nɔ wo so Mawu Fyɔɖuxu lɔ nu yí gbeda dɔ̀ nɔ mɛ ciwo yí ble.
12 Ci fiɛfi ɖoɔ, Amɛ Wive lɔwo va Yesu gbɔ yí nu ni mɔ: “Tashi amɛahwa lɔ nɔ woayi boji koɖo kɔxwi ciwo yí trɔdo mì mɛ keŋ ayi ji dɔnxu koɖo ŋɖuɖu. Ðo fini mìle desɔ axwe gbɔ o.”
13 Vɔ énu nɔ wo mɔ: “Míwoŋtɔwo mína ŋɖuɖu wo nɔ woaɖu.” Eyi womɔ: “Ŋɖe le mì shi sɔ zeto kpɔnnɔ amatɔn koɖo kpavi amɛve nu ba. Taŋfuin anyi mìwoŋtɔwo yí ayi xwle ŋɖuɖu nɔ mɛ cɛwo pleŋ.”
14 Ŋsu ciwo yí le nɔ ayi kotokun amatɔn han. Vɔ énu nɔ yi nukplaviwo mɔ: “Mínu nɔ mɛ lɔwo nɔ woabɔ do kahowo-kahowo han yí anɔ nyinɔnɔ.”
15 Eyi wowɛ shigbe lé enui nɛ yí na wo pleŋ nɔ nyinɔnɔ.
16 Yi goduɔ, ésɔ kpɔnnɔ amatɔn koɖo kpavi amɛve lɔwo yí kɔ ta yi ji yí do gbe ɖaɖa.* Éŋɛ wo mɛ yí tɔ wo sɔsɔ nɔ yi nukplaviwo yí yi nukplaviwo sɔ wo jo nɔ mɛ lɔwo.
17 Eyi wo pleŋ ɖu nu yí xodu ɖɔ. Wolɔ kankan ciwo yí kpɔtɔ yí woɖɔ kishi 12.
18 Yi godu hwenu edodoɔ gbe ɖaɖa yiɖekɛɔ, yi nukplaviwo va gbɔ yí ebiɔ wo se mɔ: “Mi amɛahwa lɔ nunɔ mɔ nyɛŋnyiɔ?”
19 Woɖo ŋci mɔ: “Ʒan Amɛʒindoshimɛtɔ, mɛbuwo nunuɔ mɔ Eli yí mɛbuwo gbenunuɔ mɔ enyɔnuɖɛtɔ ciwo yí ni sa ɖeka yí fɔn so ku.”
20 Yi goduɔ, ébiɔ wo se mɔ: “Vɔ míwo ɖe, mi yí míwo nunɔ mɔ nyɛŋnyiɔ?” Piɛ ɖo ŋci mɔ: “Kristo Mawu tɔ.”
21 Eyi edo se nɔ wo veviɖe mɔ woŋgbenu mɛɖe ase o.
22 Énu hɛnnɛ mɔ: “Agbetɔvi lɔ ɖo akpe fun sugbɔ yí jumɛgawo, avɔnsatɔwo gawo koɖo esekplamɛtɔwo agbi yí awui. Vɔ le ŋkeke amɛtɔntɔ lɔ gbeɔ, woafuin do agbe.”
23 Yi goduɔ, énu nɔ wo pleŋ mɔ: “Nɔ mɛɖe ji mɔ yeakplɔ ŋdoɔ, le gbe yiɖeki yí asɔnɔ efuntrenamɛci* yitɔ ŋkeŋke yí akplɔ ŋdo matrɔmatrɔ.
24 Mɛɖekpokpui ci yí ji mɔ yeahwlɛn ye gbe* gan ɔ, ásɔ bu. Vɔ mɛɖekpokpui ci yí bu yi gbe* do enyɛ ŋciɔ, ágbevanɔ agbe ke.
25 Le nyɔnɔnwi mɛɔ, nɔ mɛɖe je agbla yí ɖo ŋciwo pleŋ yí le xexeɛ mɛ, gan yí wa nu koɖo yiɖeki alo sɔ agbe yitɔ bu ɖe, nyɔna ci yí le mɛ niɔ?
26 Mɛɖekpokpui ci nyɛ koɖo anyi nyɔwo awa ŋkpɛn nɔɔ, mɛ lɔ nu can awa ŋkpɛn nɔ Agbetɔvi lɔ hɛnnɛ hwenu ava le yi ŋsɛn, Edalɔ ŋsɛn koɖo dɔla kɔkɔɛwo ŋsɛn mɛ.
27 Vɔ nyɔnɔnwi yí ŋnukɔ nɔ mí mɔ, mɛɖewo le mí mɛ yɛ yí wodaku keke ana nɔ hwenu woakpɔ Mawu Fyɔɖuxu lɔ o.”
28 Le nyɔnɔnwi mɛ ci enu nyɔ cɛwo yí ewa ŋkeke amɛnyi han ɔ, éyi eto ɖeka ji keŋ ado gbe ɖaɖa yí kplɔ Piɛ, Ʒan koɖo Ʒaki.
29 Ci Yesu dodoɔ gbe ɖaɖaɔ, lé ŋmɛ le do ni trɔ yí yi ŋmɛ dada zo yí vaɣe pepepe.
30 Eyi ŋsu amɛve ɖekawo le seŋ kankɔ koɖi; Moizi koɖo Eli yɔ.
31 Wova le ŋsɛn mɛ yí tɔ nuxu xoxo so jeŋkwi mɛ yiyi Yesu tɔ ci yí avamɛ le Ʒerusalɛmu nu.
32 Alɔn wugan Piɛ koɖo enukplavi amɛve kpɛtɛwo, vɔ ci alɔn lɔ hɔn nɔ woɔ, wokpɔ klɛnklɛn Yesu tɔ koɖo ŋsu amɛve ciwo yí le te koɖi.
33 Ci ŋsu amɛve cɛwo sosoɔ le Yesu gbɔɔ, Piɛ nu ni mɔ: “Enukplamɛtɔ, enyɔ mɔ mìle lɛ. Nà mìacu zava amɛtɔn, ɖeka anyi aotɔ, ɖeka anyi Moizi tɔ yí ɖeka anyi Eli tɔ.” Yiŋtɔ denya enyɔ ci nukɔ ele o.
34 Vɔ ci ele enyɔ cɛwo nukɔɔ, azɔ ɖeka bla yí cɔn wo ji. Ci azɔ lɔ do vinvin do wo jiɔ, wovɔn.
35 Yi goduɔ, egbe ɖeka ɖyi so azɔ lɔ mɛ yí mɔ: “Mɛ cɛ yí nyi anyi Vi ci ŋcan. Míɖo to yi.”
36 Ci egbe lɔ ɖyiɔ, Yesu ɖekɛ yí kpɔtɔ. Vɔ wobɔ nu do enyɔ lɔ yí wodenu enu ciwo wokpɔ nɔ mɛɖe le ŋkeke ŋtɔ́wo mɛ o.
37 Yi ŋkegbu ci woɖyi so eto lɔ jiɔ, amɛahwa gangan ɖeka do go yi.
38 Eyi ŋsu ɖeka do axwa le amɛahwa lɔ mɛ mɔ: “Enukplamɛtɔ, ŋɖe kuku nɔ eo, va kpɔ vinyɛ ŋsuvi nɔŋ, ɖo evi kuɖeka enyi nɔŋ.
39 Gbɔngbɔn ɖeka vanɔ ji yí edonɔ axwa zeɖeka, éhunhuinni kpikpikpi yí fucukɔ tonɔ le aglan mɛ ni yí nɔ édo vevisese ni ɖegbɔɔ, defanɔ gbɔxwe etonɔ le mɛ o.
40 Ŋɖe kuku nɔ ao nukplaviwo mɔ wo le nya gbɔngbɔnvɔn lɔ ti le mɛ, vɔ wodekpe ji o.”
41 Yesu nu do nu mɔ: “Egbɛvi amɛdɔndɔn maɖoxɔsewo, keke na nɔ hwenu yí nanɔ mí gbɔ asɔ sɛn yí ado ji asɔ nɔ koɖo míɔ? Kplɔ vio ŋsuvi lɔ vɛ nɔŋ.”
42 Ci ɖevi lɔ gogokɔ Yesu ɔ, gbɔngbɔnvɔn lɔ sɔ xu nyigban yí hunhuin sɛnsinɖe kpikpikpi. Vɔ Yesu wa adan do gbɔngbɔn makɔmakɔ lɔ yí da dɔ̀ nɔ ŋsuvihwɛ lɔ yí kplɔɛ sɔ jo nɔ dalɔ.
43 Ci wokpɔ Mawu ŋsɛn gangan lɔɔ, ékpaca wo pleŋ.
Ci enu ciwo Yesu wakɔ kpacakɔ amɛshiamɛɔ, énu nɔ yi nukplaviwo mɔ:
44 “Míɖo to nywiɖe, míŋgbeŋlɔbe enyɔ cɛwo o, ɖo wojikɔ asa Agbetɔvi lɔ yí asɔ do alɔ̀ mɛ nɔ amɛwo.”
45 Vɔ wodemɔŋje nyɔ ci enukɔ mɛ o. Le nyɔnɔnwi mɛɔ, sɔ wosɔ enyɔ lɔ wla do wo nɔ woŋgbese mɛ o. Wovɔnvɔn yí wodebiɔ enyɔ ɖe yi se so yi nyɔ lɔ nu o.
46 Yi goduɔ, wowoɖeɖewo vadɔndɔn nyɔ so mɛ ci yí nyi gangantɔ le wo mɛ nu.
47 Ci Yesu nya ŋci wodrɔdrɔ kpɔ le wowo jiwo mɛɔ, ékplɔ ɖevihwɛ ɖeka va yiɖeki gbɔ
48 yí nu nɔ wo mɔ: “Mɛɖekpokpui ci yí xɔ ɖevi cɛ hanwo ɖeka do anyi ŋkɔ ŋciɔ, éxɔ nyɛ can hɛnnɛ yí mɛɖekpokpui ci yí xɔŋ ɔ, éxɔ Mɛ ci yí dɔŋ ɖaɖa hɛnnɛ. Ðo mɛ ci yí sɔ yiɖeki wanɔ amɛ hwɛhwɛtɔ le mí pleŋ mɛɔ, eyi nyi amɛ gangantɔ.”
49 Eyi Ʒan nu mɔ: “Enukplamɛtɔ, mìkpɔ mɛɖeka zan ao ŋkɔ yí sɔ nyanya gbɔngbɔnvɔnwo yí mìgbe ni, ɖo dekplɔnɔ mì do o.”
50 Vɔ Yesu nu ni mɔ: “Míŋgbegbe ni o, ɖo mɛɖekpokpui ci yí detrɔ kpe míɔ, éle mí ji.”
51 Ci hwenu Yesu ayi jeŋkwi mɛ gogokɔɔ,* éɖui koŋ mɔ yeayi Ʒerusalɛmu.
52 Eyi taɖo edɔ amɛwo ɖaɖa Samari kɔxwi ɖeka mɛ nɔ woayi dra enuwo do ɖɛ gbɔxwe ava.
53 Vɔ kɔxwi lɔ mɛ tɔwo dexɔɛ o, ɖo éɖui koŋ mɔ yeayi Ʒerusalɛmu.*
54 Ci Ʒaki koɖo Ʒan kpɔ ŋcɛɔ, wobiɔɛ se mɔ: “Axwetɔ, èji mɔ mìayɔ ezo so jeŋkwi mɛ nɔ ava fiɔn woa?”
55 Vɔ Yesu trɔ kpɔ wo yí gbe nyɔ nɔ wo.
56 Eyi woyi kɔxwi bu mɛ.
57 Ci woyikɔ le emɔ lɔ jiɔ, mɛɖeka nu ni mɔ: “Nakplɔ eo do ayi fiɖekpokpui ci àyi.”
58 Vɔ Yesu nu ni mɔ: “Wataklɛwo ɖo doduwo yí xeviwo ɖo atɔwo, vɔ Agbetɔvi lɔ deɖo fini asɔ yi ta da do o.”
59 Yi goduɔ, énu nɔ mɛbu mɔ: “Kplɔ ŋdo.” Vɔ ŋsu lɔ nu ni mɔ: “Axwetɔ, nà gbeŋ mayi ɖyi danyɛ keŋ gbɔxwe.”
60 Vɔ Yesu nu ni mɔ: “Tashi amɛkukuwo nɔ woaɖyi wowo mɛkukuwo; vɔ eoɔ, yi adra Mawu Fyɔɖuxu lɔ.”
61 Eyi mɛbu nu ni mɔ: “Axwetɔ, nayi koɖo eo, vɔ nà gbeŋ mayi klan anyi mɛwo keŋ gbɔxwe.”
62 Yesu nu ni mɔ: “Mɛ ci yí lé agbledenu do alɔ̀ mɛ gan yí gbekpɔkɔ ŋciwo yí le godu deje nɔ Mawu Fyɔɖuxu lɔ o.”
Gɔnmɛnuŋwlɛnŋwlɛn
^ Yi gɔnmɛɖeɖe tiin: “egacuho.”
^ Alo “awu bu.”
^ Yi gɔnmɛɖeɖe tiin: “Tetraki.” Ahan woyɔnɔ efyɔ ci yí kpɔnɔ eju ɖe ji nɔ Rɔma Cɛkpatɔ lɔ nɛ.
^ Eyi nyi, Erodi Antipasi. Kpɔ Enyɔgbe Veviwo mɛ Ðeɖe.
^ Alo “éyra do wo ji.”
^ Kpɔ Enyɔgbe Veviwo mɛ Ðeɖe.
^ Alo “ese.”
^ Alo “ese.”
^ Yi g̱ɔnmɛɖeɖe tiin: “vaɖo vɛ pleŋ.”
^ Yi gɔnmɛɖeɖe tiin: “Ʒerusalɛmu yiyi le ŋmɛ ni.”
