Eŋɛnywiwema Luiki Tɔ 7:1-50
7 Ci enu enyɔ ciwo yí le shi nɔ amɛwo ɖegbɔɔ, éyi Kapɛrnawumu.
2 Sɔjawo ga ɖeka le nɔ yí yi dɔwavi ci elɔn sugbɔ ble veviɖe yí le kudunu.
3 Ci ese woxokɔ nuxu so Yesu nuɔ, éɖo Ʒuifu mɛgan ɖewo ɖaɖɛ nɔ woaɖe kuku ni mɔ yɛ le va da dɔ̀ nɔ ye dɔwavi lɔ.
4 Wova Yesu gbɔ yí do klo ni veviɖe mɔ: “Míɖe kuku nɔ eo, va kpedo nu, ɖo amɛnywi enyi.
5 Élɔn mìwo ju. Eyi cu mìwo nukplaxu lɔ hɛnnɛ.”
6 Eyi taɖo Yesu yi koɖo wo. Ci egogokɔ axwe lɔɔ, sɔjawo ga lɔ dɔ yi xlɔwo ɖaɖa nɔ woanu ni mɔ: “Axwetɔ, ŋgbedo aya nɔ eoɖeki o, ɖo ŋdeje yí nàva anyi xomɛ o.
7 Eyi na taɖo ŋdeva eo gbɔ nyɛŋtɔ o, ɖo ŋkpɔ mɔ ŋdeje o. Vɔ ɖè gbe kpoŋ yí ana edɔ̀ ami nɔ anyi dɔwavi.
8 Ðo nyɛ can amɛ yí kpa nɔŋ yí nyɛ can ŋkpa nɔ sɔja buwo hɛnnɛ. Eyi nɔ ŋnu nɔ eɖe mɔ, ‘So yi!’ éyinɔ, nɔ ŋnu nɔ ebu mɔ, ‘Va!’ évanɔ; eyi nɔ ŋnu nɔ anyi dɔwavi mɔ, ‘Wa ŋcɛ!’ éwɛni.”
9 Ci Yesu se nyɔ cɛwoɔ, ékpacɛ yí etrɔ kpɔ amɛahwa ci yí kplɔɛ do yí mɔ: “Manu nɔ mí mɔ, ŋdekpɔ mɛɖe yí eɖo xɔse gangan cɛ han le Izraɛli ŋtɔkpu o.”
10 Ci mɛ ciwo yí sɔjawo ga lɔ dɔ ɖaɖa trɔ yi axomɛɔ, wokpɔ edɔwavi lɔ yí edɔ̀ mi ni.
11 Sabaɖe le yi goduɔ, éyi Naɛn ju mɛ yí yi nukplaviwo koɖo amɛahwa gangan ɖeka kplɔɛ do.
12 Ci egogokɔ eju lɔ gbo nuɔ, ékpɔ wokɔ ŋsu ɖeka ci yí ku vayikɔ. Evi ŋsuvi kuɖeka kpaŋ* yí enyi nɔ nɔlɔ. Kposhu yí nyɔnu lɔ nyi hɛnnɛ. Amɛahwa gangan ɖeka so ejuɔ mɛ yí kplɔ nyɔnu lɔ do.
13 Ci Axwetɔ lɔ kpɔ nyɔnu lɔɔ, yi nu wa ŋshishi ni yí enu ni mɔ: “Mi avin fanfan.”
14 Eyi egbosɔ wo yí tɔ alɔ̀ eba ci ji wosɔ amɛkuku lɔ do yí mɛ ciwo yí kɔkɔ ecɔ lɔ nɔ te yí enu mɔ: “Ŋsuvihwɛ, ŋnukɔ nɔ eo mɔ so je te!”
15 Eyi amɛkuku lɔ fɔn yí so je te yí tɔ nuxu xoxo yí Yesu kplɔɛ sɔ jo nɔ nɔlɔ.
16 Eyi vɔnvɔn lé wo pleŋ yí wotɔ Mawu kanfukanfu yí nunuɔ mɔ: “Enyɔnuɖɛtɔ gangan ɖeka va mì mɛ.” Wogbenunuɔ mɔ, “Mawu sɔ ɖe le ji nɔ yi mɛwo.”
17 Enu ŋtɔ́ ci Yesu wa gban kpedo Ʒude lɔ pleŋ koɖo eju ciwo pleŋ yí trɔdi.
18 Vɔ Ʒan nukplaviwo va nu nyɔ cɛwo pleŋ nɔ Ʒan.
19 Eyi taɖo Ʒan yɔ yi nukplavi amɛve yí dɔ wo ɖaɖa Axwetɔ lɔ mɔ wo le biɔɛ se mɔ: “Eo yí nyi Mɛ ci yí ɖo avaa, alo mìakpɔ mɔ nɔ mɛbu?”
20 Ci enukplavi lɔwo va Yesu gbɔɔ, wonu ni mɔ: “Ʒan amɛʒindoshimɛtɔ lɔ dɔ mì ɖaɖa eo gbɔ mɔ mìwo le biɔ se mɔ, ‘Eo yí nyi Mɛ ci yí ɖo avaa, alo mìakpɔ emɔ nɔ mɛbu?’”
21 Le gaxoxo ŋtɔ́ mɛɔ, éda dɔ̀ nɔ amɛ sugbɔ, mɛ ciwo yí lé edɔ̀ vwinwo koɖo mɛ ciwo yí gbɔngbɔnvɔnwo dokɔ aya nɔ yí gbehun ŋkuvi nɔ ŋkuvitɔnnɔ sugbɔ.
22 Yesu ɖo ŋci nɔ wo mɔ: “Míyi ayi nu ŋciwo míkpɔ koɖo ŋciwo míse nɔ Ʒan: Ðɛyɛɔ, ŋkuvitɔnnɔwo kpɔkɔ nu, atakunɔwo zɔnkɔ zɔnlin, edɔ̀ mi nɔ kponɔwo yí tokunɔwo le tonu sekɔ, wofɔnkɔ amɛkukuwo yí nunuɔ eŋɛnywi lɔ nɔ wamɛnɔwo.
23 Mɛ ci ŋdenyi afɔklɛnnu nɔ kpɔnɔ jijɔ.”
24 Ci mɛ ciwo yí Ʒan dɔ ɖaɖa ɖedoɔ, Yesu tɔ nuxu xoxo so Ʒan nu nɔ amɛahwa lɔ mɔ: “Nyi kpɔgbe míyi le zogbejiɔ? Klogbu ci yí jihɔn dodoɔ we nɔ yɔa?
25 Cucucu ɖe, nyi kpɔgbe míyiɔ? Ŋsu ci yí do awu nywiwo* yɔa? Vɔ mɛ ciwo yí donɔ cigannuwo yí gbele agbe ɖukɔɔ, efyɔwo xomɛwo yí wonɔnɔ.
26 Ecɛyɛ ɖe, nyi míyi kpɔɔ? Enyɔnuɖɛtɔa? Ɛɛ, ŋnukɔ nɔ mí mɔ Ʒan gangan wu enyɔnuɖɛtɔ xoxoxo.
27 Yi nyɔ wonu ɖɛ mɔ: ‘Kpɔ ɖa! Ŋdɔdɔ anyi ŋɛdotɔ ɖaɖa ŋkɔ nɔ eo,* áje ŋkɔ nɔ eo yí adra emɔ ji do ɖɛ nɔ eo.’
28 Ŋnukɔ nɔ mí mɔ, le agbetɔ ciwo pleŋ nyɔnuwo ji mɛɔ, ɖekɛ desɔ koɖo Ʒan o, vɔ mɛ ci yí nyi amɛ hwɛhwɛtɔ le Mawu Fyɔɖuxu lɔ mɛ gangan wui.”
29 (Ci jukɔn lɔ pleŋ koɖo tagajɔtɔwo se nyɔ cɛɔ, wokpɔ mɔ Mawu le jɔjɔɛɖe, ɖo wolɔn yí Ʒan ʒin wo do shi mɛ.
30 Vɔ Farizitɔwo koɖo mɛ ciwo yí jeshi Ese lɔ ɖɛ nywiɖe gbe Mawu nukplamu,* ɖo wodelɔn yí Ʒan ʒin wo do shi mɛ o.)
31 Yesu gbenu mɔ: “Mi yí nasɔ mɛ ciwo yí li gbɛ sɔ koɖoɔ, mi woɖyiɔ?
32 Wole shigbe ɖevi ciwo yí le nyinɔnɔ le afi mɛ yí yɔyɔ wowonɔnɔwo yí nunuɔ mɔ: ‘Mìxu kpɛn nɔ mí, vɔ mídeɖu we o; mìji enuwamuha, gan mídefan avin o.’
33 Nɛnɛke ci Ʒan amɛʒindoshimɛtɔ lɔ vaɔ, deɖunɔ nu o kpɔ denunɔ vɛn o, vɔ mínu mɔ: ‘Gbɔngbɔnvɔn le mɛ.’
34 Ci Agbetɔvi lɔ vaɔ, éɖunɔ nu yí nunɔ vɛn, vɔ mínu mɔ: ‘Kpɔ ɖa! Ŋsu cɛ nyi sukanuɖutɔ yí nunɔ vɛn sugbɔ yí gbenyi tagajɔtɔwo koɖo nuvɔnwatɔwo xlɔ!’
35 Vɔ enujɔjɔɛ ciwo mɛɖe wakɔ yí wokpɔnɔ yí nyanɔ mɔ yɛnya ŋɖɛ.”
36 Farizitɔ ɖeka nunuɔ ni gbɛmɛgbɛmɛ mɔ yɛ le va ɖu nu koɖo ye. Eyi taɖo eyi Farizitɔ lɔ xwe mɛ yí nɔ kplɔn nu.
37 Nyɔnu ɖeka ci wojeshi ɖɛ le ju lɔ mɛ mɔ yɛnyi nuvɔnwatɔ se mɔ yɛɖuɖuɔ nu* le Farizitɔ lɔ xwe mɛ, eyi ehɛn amihwɛnte do egu* ɖeka mɛ yí va.
38 Éva nɔ godu nɔ Yesu le yi fɔwo gbɔ yí le avin fankɔ. Ékɔ ɖashiwo do yi fɔwo ji yí sɔ yi ɖawo cucukɔ wo. Ékikiɛ shi nɔ yi fɔwo hɛnnɛ yí sɔ amihwɛnte lɔ kɔkɔ do wo ji.
39 Ci Farizitɔ ci yí yɔ Yesu va yi xomɛ kpɔɛ ahan ɔ, énunuɔ le yiɖeki mɛ mɔ: “Nɔ enyɔnuɖɛtɔ yí ŋsu cɛ nyi nyaoɔ, ánya mɛ ci ŋmɛ nyɔnu ci yí tɔtɔ alɔ̀ yi lɔ nyi, ánya mɔ nuvɔnwatɔ enyi.”
40 Vɔ Yesu nu ni mɔ: “Simɔ, ŋɖo nyɔ ɖeka anu nɔ eo.” Eyi emɔ: “Enukplamɛtɔ nui fɛɛ!”
41 “Ŋsu amɛve ɖekawo do ho le mɛɖeka shi; mɛɖeka do denari* 500 yí xlɔtɔ do denari 50.
42 Ci ŋɖe dele wo shi woasɔ cu efɛn lɔɔ, ésɔ efɛn lɔ ke wo koɖo ve faa. Le wo koɖo ve lɔ mɛ ɖe, mi yí aluin sɔwuɔ?”
43 Simɔ ɖo ŋci mɔ: “Ŋkpɔ mɔ mɛ ci yí ɖu efɛn sugbɔ di yɔ.” Énu ni mɔ: “Èwa ɖaŋ kpɔɛ.”
44 Eyi etrɔ ɖaɖa nyɔnu lɔ gbɔ yí nu nɔ Simɔ mɔ: “Èkpɔ nyɔnu cɛa? Ci ŋva ao xomɛɔ, dèna shiŋ nɔ maklɔ anyi fɔwo o. Vɔ nyɔnu cɛ kɔ ɖashiwo do anyi fɔwo ji yí sɔ yi ɖawo cucu wo.
45 Kpɔ dèki shi nɔŋ o, vɔ so hwenu ŋva ao xomɛɔ, nyɔnu cɛ demi eshi kiki nɔ anyi fɔwo o.
46 Dèkɔ ami do ta nɔŋ o, vɔ nyɔnu cɛ kɔ amihwɛnte do anyi fɔwo ji.
47 Eyi taɖo ŋnukɔ nɔ eo mɔ, ci yi nuvɔnwo sugbɔ* can ɔ, wosɔ wo sɔ ki. Ðo élɔn amɛ haan. Vɔ mɛ ci wosɔ enu kankin keɔ, hwɛɖeka elɔnnɔ amɛ.”
48 Yi goduɔ, énu nɔ nyɔnu lɔ mɔ: “Wosɔ ao nuvɔnwo ke eo.”
49 Eyi mɛ ciwo yí le kplɔn nu koɖi tɔ nunu le wowoɖeɖewo mɛ mɔ: “Mi ŋsu cɛ nyi keke yí sɔ nuvɔnwo kekeɛ amɛɔ?”
50 Vɔ énu nɔ nyɔnu lɔ mɔ: “Ao xɔse hwlɛn eo gan; yi le fafa mɛ.”
Gɔnmɛnuŋwlɛnŋwlɛn
^ Yi gɔnmɛɖeɖe tiin: “Evi akogo.”
^ Alo “ehoganwuwo.”
^ Yi gɔnmɛɖeɖe tiin: “ɖaɖa ŋmɛ nɔ eo.”
^ Alo “mɔdasɛnamɛ.”
^ Alo “nɔ kplɔn nu.”
^ Yi gɔnmɛɖeɖe tiin: “alabastru gu.” Le gɔnmɛjejeɔ, egu hwɛhwɛ ɖeka enyi yí wosɔ ekpe ci wokpɔnɔ le fini yí gogo Albâtre ju le Eʒipti sɔ wɛni.
^ Kpɔ Enumɛɖeɖewo B14.
^ Alo “gangan.”
