Eŋɛnywiwema Luiki Tɔ 14:1-35
-
Yesu da dɔ̀ nɔ ŋsu ɖeka ci yí lé tɛntɛndɔ̀ le Sabatigbe (1-6)
-
Nɔ woyɔ eo va azanɖuxuɔ, sɔ eoɖeki hwe (7-11)
-
Nɔ èjikɔ aɖu azan ɔ, yɔ mɛ ciwo yí datɛnŋ aɖo tɔxu nɔ eo o (12-14)
-
Mɛ ciwo woyɔ nɔ azanɖuɖu yí woɖe kuku mɔ yewodasɛnŋ ava labalu (15-24)
-
Enu ciwo woasɔ sa vɔn gbɔxwe anyi Yesu nukplavi (25-33)
-
Eje ci yí bu vivivivi yitɔ (34, 35)
14 Gabumɛɔ, Yesu yi enu ɖugbe le Farizitɔwo ga ɖeka xwe mɛ le Sabatigbe yí wogluigluiɛ kpɔ truɖuɖuɖu.
2 Eyi ŋsu ɖeka ci yí lé tɛntɛndɔ̀* le ŋkɔ ni.
3 Eyi taɖo Yesu biɔ mɛ ciwo yí jeshi Ese lɔ ɖɛ nywiɖe koɖo Farizitɔwo se mɔ: “Ese na gbe mɔ wo le da dɔ̀ nɔ amɛ le Sabatigbea? Alo ese dena gbe o?”
4 Vɔ wobɔ nu kpli. Eyi etɔ alɔ̀ ŋsu lɔ yí da dɔ̀ ni yí nu ni mɔ yɛ le so yi.
5 Yi goduɔ, ébiɔ wo se mɔ: “Mi yí le mí mɛ nɔ eviɛ ŋsuvi alo yi nyibu je dotɔ mɛ le Sabatigbe ɖe, daɖi ti kakaɔ?”
6 Eyi wodetɛnŋ ɖo enyɔ lɔ ŋci ni o.
7 Ci ekpɔ mɛ ciwo woyɔ va ŋɖuxu lɔ yí woyi nɔkɔ texwe veviwoɔ, énu nɔ wo mɔ:
8 “Nɔ mɛɖe yɔ eo va alɔlelezanɖuxuɔ, ŋgbevayi nɔ texwe vevi o. Ðo étɛnŋ yɔ mɛɖe ci yí le veviɖe wu eo va nɔtɔxu lɔ hɛnnɛ.
9 Eyi mɛ ci yí yɔ míwo koɖo ve lɔwo avanu nɔ eo mɔ, ‘So atashi texwe lɔ ɖɛ nɔ mɛ cɛ.’ Eyi ŋkpɛn awa eo yí nàso ayi nɔ godu.
10 Vɔ nɔ woyɔ eoɔ, so yi nɔ godu yí nɔ mɛ ci yí yɔ eo lɔ vaɖoɔ, ánu nɔ eo mɔ, ‘Anyi xlɔ, vayi nɔ ŋkɔ.’ Eyi anyi bubu nɔ eo le ŋmɛ nɔ mɛkpɛtɛ ciwo pleŋ woyɔ.
11 Ðo mɛɖekpokpui ci yí agangan yiɖekiɔ, woaɖi kpɔtɔ yí mɛɖekpokpui ci yí asɔ yiɖeki hweɔ, woagingin.”
12 Yi goduɔ, énu nɔ mɛ ci yí yɔɛ va ŋɖuxu lɔ hɛnnɛ mɔ: “Nɔ èɖa nyidɔnmɛ alo fiɛfimɛ ŋɖuɖuɔ, ŋgbeyɔ ao xlɔwo, nɔviowo alo ao xomumɛtɔwo alo ao xwexatɔ ciwo yí nyi hotɔnɔwo o. Nɔ denyi ahan ɔ, wowo can tɛnŋ vayɔ eo yí anyi ao fɛncu èxɔxɔ ahan.
13 Vɔ nɔ èle azan ɖukɔɔ, yɔ wamɛnɔwo, mɛ ciwo yí xo kplɛ, mɛ ciwo shi afɔ dele o koɖo ŋkuvitɔnnɔwo;
14 eyi eji ajɔ eo, ɖo ŋɖe dele wowo shi yí woasɔ ɖo tɔxu nɔ eo o. Vɔ woacu yi fɛn nɔ eo hwenu woafɔn amɛjɔjɔɛwo so ku.”
15 Ci mɛ ciwo yí woyɔ va ŋɖuxu lɔ ɖeka se nyɔ cɛwoɔ, énu ni mɔ: “Mɛ ci yí aɖu nu* le Mawu Fyɔɖuxu lɔ mɛ akpɔ jijɔ.”
16 Yesu nu ni mɔ: “Ŋsu ɖeka jikɔ aɖu azan gangan ɖeka yí yɔ amɛ sugbɔ.
17 Ci azanɖuɖu ga lɔ xoɔ, éɖo yi dɔwavi ɖeka ɖaɖa nɔ ayi nu nɔ mɛ ciwo woyɔ lɔwo mɔ, ‘Míva, ɖo enushianu sɔgbe.’
18 Vɔ wo pleŋ tɔ kuku ɖeɖe mɔ yewodasɛnŋ ava o. Ŋkɔtɔ nu ni mɔ, ‘Ŋxwle nyigban ɖeka yí ŋɖo ayi glui kpɔ; ŋɖe kuku ŋdasɛnŋ ava o.’
19 Eyi mɛbu nu mɔ, ‘Ŋxwle xwenyi eve-eve donu amatɔn yí ŋjikɔ asɔ wo wa dɔ kpɔ. Ŋɖe kuku nasɛnŋ ava go.’
20 Mɛbu can nu mɔ, ‘Yinɛ ŋɖe nyɔnu yɛ nɛ, eyi taɖo ŋdasɛnŋ ava o.’
21 Eyi dɔwavi lɔ gbɔ yí va nu nyɔ lɔwo nɔ yi xwetɔ. Axwetɔ lɔ do dɔmɛzi yí nu nɔ dɔwavi lɔ mɔ, ‘Ðe blɛ ayi emɔganwo koɖo emɔcuicuiwo ji le eju lɔ mɛ yí akplɔ wamɛnɔwo, mɛ ciwo yí xo kplɛ, ŋkuvitɔnnɔwo koɖo mɛ ciwo shi afɔ dele va lɛ.’
22 Le hwenu ɖe goduɔ, edɔwavi lɔ va nu ni mɔ, ‘Axwetɔ, ŋwa ŋci èmɔ nyɛ le wa, vɔ texwe gbekpɔtɔ li.’
23 Eyi axwetɔ lɔ nu nɔ dɔwavi lɔ mɔ, ‘Yi emɔ buwo ji le eju lɔ godu yí ayɔ amɛwo vɛ keŋ nɔ anyi xwe mɛ aɖɔ.
24 Ðo manu nɔ eo, mɛ ciwo ŋyɔ yí wogbe lɔwo ɖekɛ datɔ nu anyi ŋɖuɖu lɔ o.’”
25 Ecɛyɛ amɛahwa gangan ɖeka le emɔ lɔ ji koɖo Yesu, eyi etrɔ yí nu nɔ wo mɔ:
26 “Nɔ mɛɖe ji mɔ yeakplɔ ŋdoɔ, éɖo alɔnŋ sɔwu edalɔ koɖo nɔlɔ, ashiɛ koɖo eviɛwo, nɔviɛ ŋsuwo koɖo nɔviɛ nyɔnuwo, ɛɛ, keke je yiŋtɔ gbe* ji hɛnnɛ. Nɔ denyi ahan ɔ, datɛnŋ anyi anyi nukplavi o.
27 Mɛɖekpokpui ci yí desɔ efuntrenamɛci* yitɔ yí kplɔ ŋdoɔ, datɛnŋ anyi anyi nukplavi o.
28 Le kpɔwɛ mɛ, mi yí le mí mɛ yí nɔ éjikɔ acu xɔɔ,* danɔ nyinɔnɔ keŋ adrɔɛ kpɔ akpɔ mɔ eho ci yí le ye shi asun yeaɖegbɔ ni maɔ?
29 Nɔ denyi ahan ɔ, ádo exɔ lɔ gu, vɔ dasun ji aɖegbɔ ni o. Eyi mɛ ciwo pleŋ akpɔɛ atɔ kuikui
30 yí anu mɔ: ‘Ŋsu cɛ tɔ xɔ cucu vɔ desun ji yí ɖegbɔ ni o.’
31 Alo nɔ efyɔ ɖe wa ahwawavi 10 000 ɖɛ yí jikɔ ayi wa ahwa koɖo efyɔ bu ci yí wa ahwawavi 20 000 ɖɛ ɖe, danɔ nyinɔnɔ keŋ ali kpɔ koɖo yi mɛwo yí akpɔ mɔ yeatɛnŋ aɖu ahwa lɔ ji ma ba?
32 Nɔ ékpɔ mɔ yɛdakpa yeɔ, ádɔ amɛwo ɖaɖa efyɔ ɖetɔ lɔ hwenu ekpɔtɔ le jinjintɔxu yí abiɔ fafa.
33 Ahanke nɔ mɛɖe le mí mɛ yí detashi yi nuwo pleŋ ɖɛɔ, datɛnŋ anyi anyi nukplavi o.
34 “Le nyɔnɔnwi mɛɔ, enunywi yí eje nyi. Vɔ nɔ eje bu vivivivi yitɔ ɖe, lé woawɛ ni yí agbetrɔ ejeɔ?
35 Degbenyɔ yí woasɔ kɔ do nyigban alo asɔ baka koɖo nukplɔ o. Vɔ woasɔ kɔŋgbe. Mɛ ci eto li nɔ le si.”
Gɔnmɛnuŋwlɛnŋwlɛn
^ Alo “éji,” ɖo eshi wugan le lanmɛ ni.
^ Yi gɔnmɛɖeɖe tiin: “aɖu kpɔnnɔ.”
^ Alo “yiŋtɔ se.”
^ Kpɔ Enyɔgbe Veviwo mɛ Ðeɖe.
^ Alo “exɔ yiji.”
