Wema ci Woŋwlɛ aɖa Rɔmatɔwo 3:1-31
3 Ecɛyɛ ɖe, nɔ wonyi Ʒuifu alo woso vo ɖe, nyɔna ci yí le mɛɔ?
2 Nyɔna sugbɔ le mɛ. Ŋkɔŋkɔtɔɔ, Ʒuifuwo yí wosɔ Mawu nyɔ kɔkɔɛ lɔwo jo nɔ.
3 Ecɛyɛ fini enyɔ lɔ leɔ? Nɔ mɛɖewo deɖo xɔse le wo mɛ ɖe, xɔsemaɖo wowotɔ adɔ yí Mawu ami egbeji nɔnɔa?
4 Ecɛ ajɔ gbeɖe go! Nyɔnɔnwitotɔ yí Mawu nyi tɛgbɛɛ nɔ mɛshiamɛ nyi ŋsukantɔ can, shigbe lé woŋwli daɖɛ nɛ mɔ: “Ao nyɔwo adasɛ mɔ ènyi amɛjɔjɔɛ yí nàɖu ji hwenu woaɖo kojo nɔ eo.”
5 Vɔ nɔ enumajɔmajɔwawa mìwotɔ na yí enujɔjɔɛwawa Mawu tɔ ze petii ɖe, enyɔ ci mìagbenu yɛɔ? Nɔ Mawu dasɛ dɔmɛzi yitɔ ɖe, mìamɔ yɛwa afɛn a? (Ŋxokɔ nuxu shigbe lé agbetɔ xonɔ nuxu nɛ.)
6 Gbeɖe! Nɔ denyi ahan ɖe, lé Mawu awɛ aɖo kojo nɔ xexe lɔɔ?
7 Vɔ nɔ ŋsukankan anyitɔ na yí nyɔnɔnwi Mawu tɔ ze petii yí na kanfukanfu yi ɖe, nyi yí taɖo wogbeɖoɖoɔ kojo nɔŋ mɔ ŋnyi nuvɔnwatɔɔ?
8 Eyi nyi yí taɖo mìdanu mɔ, “Mìawa enudɔndɔnwo keŋ nɔ enunywiwo ato so mɛ shigbe lé mɛɖewo kan ŋsu do nu nɔ mì mɔ mìwo nui nɛɔ”? Kojo ci woaɖo nɔ mɛ cɛwo sɔgbe.
9 Mìwotɔ nyɔ wu wowotɔ yɔa? Oo, ahan yɔ nɛ go. Ðo mìkpɔɛ vayi sa mɔ Ʒuifuwo koɖo Grɛkitɔwo can, wo pleŋ yí wa nuvɔn
10 shigbe lé woŋwli ɖɛ nɛ mɔ: “Amɛjɔjɔɛ ɖekɛ deli o, kuɖeka kpetii deli o.
11 Mɛɖe deli yí wa ɖaŋ senɔ nu gɔnmɛ o; mɛɖekɛ deli yí jijiɛ Mawu o.
12 Agbetɔwo pleŋ bu emɔ, wo pleŋ trɔ enugbali, mɛɖekɛ dele wo mɛ yí wa xomɛvu o, kuɖeka kpetii deli o.”
13 “Hlokui wowotɔ le shigbe yɔdu ci yí le nuvo nɛ; wosɔ aɖe wowotɔwo blenɔ amɛ.” “Edan ɖyi yí le nu mɛ nɔ wo.”
14 “Kpɛnsɛn koɖo enyɔvetewo ɖɔ aglan mɛ nɔ wo.”
15 “Afɔ ɖanɔ nɔ wo nɔ ehun kɔkɔ ɖɛ.”
16 “Enu ci wonya wawa ɖɛ pleŋ yí nyi mɔ woadahɛn nu yí ado aya nɔ amɛ,
17 wodejeshi fafa mɔ ɖɛ o.”
18 “Vɔnvɔn nɔ Mawu dele ŋmɛ nɔ wo ɖeeɖe o.”
19 Ecɛyɛɔ, mìnya mɔ enyɔ ciwo pleŋ yí Ese lɔ nuɔ, mɛ ciwo yí le Ese lɔ gɔnmɛ yí enu wo nɔ keŋ nɔ eɖa aɖo nɔ mɛshiamɛ yí xexe lɔ keŋkeŋ anyi enu ci Mawu adɔn to nɔ.
20 Eyi taɖo Mawu datɛnŋ ayɔ mɛɖekɛ* mɔ amɛjɔjɔɛ nɔ ci enyikɔ ese lɔ o, ɖo ese lɔ vana yí mìnya enu ci teŋ yí nuvɔn nyi.
21 Vɔ ecɛyɛɔ, eze gbajɛɛ mɔ denyi wawa do ese lɔ ji yí adɔ amɛ anyi amɛjɔjɔɛ le ŋmɛ nɔ Mawu o, Ese lɔ koɖo Enyɔnuɖɛtɔwo can nu ahan.
22 Ɛɛ, xɔseɖoɖo do Yesu Kristo nu yí adɔ woanyi amɛjɔjɔɛ le ŋmɛ nɔ Mawu, ahan enyi nɔ mɛ ciwo pleŋ yí ɖo xɔse nɛ. Amɛmɛtratra dele mɛ o.
23 Ðo wo pleŋ yí wa nuvɔn yí hwe te do kanfukanfu Mawu tɔ.
24 Enu enyi Mawu na wo gbali yí wa xomɛvu gangan nɔ wo ci ekpɔ do tafɛn ci Kristo Yesu cu nu yí yɔ wo mɔ amɛjɔjɔɛwo.
25 Mawu sɔ na yí enyi evuɖaɖa* vɔnsa, keŋ nɔ agbetɔwo aɖo xɔse do yí hun lɔ nu. Éwa cɛ keŋ asɔ dasɛ enujɔjɔɛwawa yiŋtɔ tɔ, ɖo Mawu xɔ jigbɔnɖɛ yí sɔ nuvɔn ciwo yí wowa vayi sɔ kenɔ wo.
26 Éwa cɛ keŋ asɔ dasɛ enujɔjɔɛwawa yiŋtɔ tɔ nɔ mì kakacɛ nɔ enyɔ ajɔ ni hwenu ayɔkɔ mɛ ci yí ɖo xɔse do Yesu nu mɔ amɛjɔjɔɛ.
27 Ecɛyɛ ɖe, susu ɖe li ci yí taɖo mìayi goa? Oo, eɖe li go. Ci mìwakɔ do ese lɔ ji taɖo mìɖo ayi goa? Oo, ci mìwakɔ do xɔse se lɔ ji taɖo mìayi go.
28 Ðo mìnya mɔ xɔse ci mɛɖe ɖo yí ana woayɔɛ mɔ amɛjɔjɔɛ, denyi ci ewakɔ do ese lɔ ji taɖo yɔ o.
29 Alo Ʒuifuwo ɖekɛ enyi Mawu nɔa? Denyi Mawu nɔ jukɔn bu mɛ tɔwo can ba? Ɛɛ, ényi Mawu nɔ jukɔn bu mɛ tɔwo hɛnnɛ.
30 Ci enyi Mawu kuɖeka yí liɔ, ákpɔ do mɛ ciwo yí so vo xɔse nu yí ayɔ wo mɔ amɛjɔjɔɛwo yí agbekpɔ do mɛ ciwo yí deso vo xɔse nu yí ayɔ wo mɔ amɛjɔjɔɛwo hɛnnɛ.
31 Ci enyi ahan ɖe, mìsɔ mìwo xɔse ɖeɖeɛ ese lɔ swi yɔa? Oo, ahan yɔ nɛ go! Ewaɖeɔ, mìwawa do ji yɔ.
