Wema ci Woŋwlɛ aɖa Rɔmatɔwo 13:1-14
13 Mɛshiamɛ* le bu egawo, ɖo nɔ Mawu dena gbeɔ, acɛkpakpa ɖe dali o; Mawu yí lɔn yí ega ciwo yí li yɛ le wowo texwe vovovo lɔwo.
2 Eyi taɖo mɛɖekpokpui ci yí fɔn gu do egawo jiɔ, toto Mawu tɔ ji yí efɔn gu do; woaɖo kojo nɔ mɛ ciwo yí wakɔ ahan.
3 Mɛ ci yí wakɔ nunywi devɔnnɔ nɔ egawo o, vɔ mɛ ci yí wakɔ enudɔndɔn yí vɔnnɔ nɔ wo. Nɔ dèji mɔ yeavɔnnɔ nɔ egawoɔ, kpɔtɔ awakɔ enunywi yí egawo akanfu eo.
4 Ðo Mawu dɔwatɔwo yí wonyi nɔ ao nyɔna. Vɔ nɔ èwakɔ enudɔndɔn ɔ, vɔn nɔ wo, ɖo denyi gbali yí wohɛnnɔ ewi o. Mawu dɔwatɔ ciwo yí sɔ dɔmɛzi dɔnnɔ to nɔ mɛ ci yí wakɔ enudɔndɔn yí wonyi.
5 Eyi taɖo ele veviɖe mɔ míabunɔ wo, denyi ci woavado dɔmɛzi ɖekɛ yɔ o, vɔ nɔ míakpɔtɔ aɖo ayexa mɛmi hɛnnɛ.
6 Ecɛ yí dɔ mínanɔ tagawo hɛnnɛ; ɖo ejudɔ yí wowakɔ yí sɔ le edɔ wakɔ nɔ Mawu yí wowanɔ edɔ cɛ truɖuɖu.
7 Mísɔ enu ci yí nyi mɛɖekamɛɖeka tɔ sɔ jo ni; mícu taga fɛn ɖekpokpui ci míɖu nɔ mɛ ci míɖo acui nɔ; mívɔn nɔ mɛ ci woɖo avɔn nɔ yí abu mɛ ci woɖo abu.
8 Míŋgbeɖu ŋɖekpokpui fɛn do mɛɖe sɔ zeto lɔnlɔn fɛn ci míɖu do míwonɔnɔwo nu o; ɖo mɛɖekpokpui ci yí lɔnnɔ yi kpenaɔ, éwa do ese lɔ ji.
9 Ðo ese lɔ mɛ nyɔ ciwo yí nyi, “Ŋgbewa hashi o, ŋgbewu amɛ o, ŋgbefi fi o, mɛbu nu ŋgbeci ŋmɛ nɔ eo o,” sɔ kpe nɔ kpɛtɛwo pleŋ xoca yí nu nyɔ kuɖeka mɔ: “Èɖo alɔn ao kpena shigbe eoŋtɔ nɛ.”
10 Lɔnlɔn dewanɔ evɔn do amɛkpena o. Eyi taɖo lɔnlɔn yí nyi wawa do ese lɔ ji.
11 Míɖo awa ŋcɛ, ɖo mínya hwenu ci mɛ mìle. Ega ci mɛ míafɔn so alɔn mɛ xo vayi vɔ, ɖo hwlɛngan mìwotɔ gogo evyɛ sɔwu hwenu mìtrɔ xɔsetɔwo.
12 Ezan do yɛɔ, éjinjin, eŋ tɔ keke. Eyi taɖo mìatashi vinvin mɛ dɔwo keŋ ado klɛnklɛn hwawanuwo.
13 Mìanɔnɔ agbe nywiɖe shigbe mɛ ciwo yí le kede mɛ nɛ. Mìdayinɔ agɔɖuxu* ciwo wowanɔ enudɔndɔnwo le o, mìdanunɔ aha mu o, mìdawa hashi alo ashin ŋta keŋ ale enudɔndɔn wakɔ* o, nɛnɛke mìdawa vu alo ahwanŋ amɛ o.
14 Vɔ míwa Axwetɔ Yesu Kristo tɔ han* yí míŋgbewanɔ toto mɔ, yewoawanɔ enu ciwo yí dronɔ gbaza lɔ o.
Gɔnmɛnuŋwlɛnŋwlɛn
^ Alo “Ese ɖekpokpui.”
^ Alo “jijɔkpɔxu.”
^ Alo “ŋkpɛnnuwawa gannaganna.” Grɛki nyɔgbe asɛlgei. Kpɔ Enyɔgbe Veviwo mɛ Ðeɖe.
^ Yi gɔnmɛɖeɖe tiin: “mísɔ Axwetɔ Yesu Kristo sɔ do.”
