Wema ci Woŋwlɛ aɖa Rɔmatɔwo 12:1-21
12 Eyi taɖo nɔviwo, ci Mawu ku ŋshishi nɔ míɔ, ŋɖekɔ kuku nɔ mí mɔ míwo le sɔ míwo lankpuwo jo nɔ woanyi vɔnsa ci yí le agbe yí le kɔkɔɛɖe yí gbejɔnɔ ji nɔ Mawu. Mízan míwo susu pleŋ* le sɛnsɛndɔ kɔkɔɛ ci míwakɔ ni mɛ.
2 Mími mɛ ciwo yí le xexe cɛ* mɛ tɔ han wawa. Vɔ mítrɔ lé míbunɔ tamɛ kpɔ do keŋ nɔ míawa ɖaŋ ajeshi Mawu dro ci yí nyɔ yí sɔgbe yí afɛn ɖekɛ dele nu o.
3 Ŋto xomɛvu gangan ci Mawu wa nɔŋ ji yí nukɔ nɔ mɛɖekamɛɖeka le mí mɛ mɔ ŋgbekpɔnɔ yiɖeki sɔwu lé ele do o, vɔ mɛɖekamɛɖeka le ɖonɔ susu nywi sɔgbe koɖo xɔse ci Mawu ni.
4 Lankpu ŋcinuwo sugbɔ, gan ŋcinu lɔwo pleŋ dewanɔ edɔ ɖekɛ ŋmɛ o.
5 Nɛnɛke ci mìsugbɔ can ɔ, mìnyi lankpu kuɖeka koɖo Kristo. Vɔ mìwo ɖekaɖeka nyi lankpu lɔ ŋcinu ciwo yí ca koɖo nɔnɔ.
6 Mì pleŋ xɔ enunana vovovowo sɔgbe koɖo xomɛvu gangan ci Mawu wa nɔ mì. Eyi taɖo, nɔ enyi enyɔnunuɖɛ nunana yí mìxɔɔ, mìanu nyɔ ɖɛ sɔgbe koɖo xɔse ci mìɖo;
7 alo nɔ enyi enunana ci mìxɔ yí nyi mɔ mìakpedo amɛwo nuɔ, mìakpedo amɛwo nu, alo nɔ enyi enunana ci mɛɖe xɔ yí nyi mɔ ákpla nu amɛwoɔ, le wa ɖaŋ ale bu do enukplakpla amɛ dɔ lɔ;
8 alo mɛ ci yí donɔ ŋsɛn amɛ le kpɔtɔ adodoɔ ŋsɛn amɛwo. Mɛ ci yí nanɔ nu amɛ le kpɔtɔ awɛni koɖo xomɛ; mɛ ci yí danasɛ emɔ nɔ amɛ le kpɔtɔ awɛni koɖo vevidodonu yí mɛ ci yí kunɔ ŋshishi nɔ amɛ le kpɔtɔ awɛni koɖo jijɔ.
9 Míŋgbelɔn nɔ lɔnlɔn ci míɖo nɔ amɛwo anyi ayemɛtɔ o. Mígbe nuvɔn* yí ale bu do enunywi awakɔ.
10 Mílɔn míwonɔnɔwo nyɔnɔnwimɛtɔ shigbe nɔjinɔwo nɛ. Mídoŋkɔ adonɔ bubu amɛ nu.
11 Míwanɔ dɔ sɛnsinɖe,* míŋgbenyi ɖyiɖɔnɔwo o.* Gbɔngbɔn kɔkɔɛ le na yí kpakpa asɔnɔ mí. Míwanɔ dɔ nɔ Yehowa* shigbe hwashiwo nɛ.
12 Emɔkpɔkpɔ míwotɔ le dɔ yí eji ajɔnɔ mí. Mído ji le efunkpekpe mɛ. Mídonɔ gbe ɖaɖa mamimami.
13 Mímanɔ míwo nuwo koɖo amɛkɔkɔɛwo sɔgbe koɖo eʒan wowotɔwo. Míxɔnɔ amɛwo mɛdru.
14 Míkpɔtɔ abiɔkɔ shicu nɔ mɛ ciwo yí cikɔ yumɛ nɔ mí. Míbiɔ shicu nɔ wo yí míŋgbebiɔnɔ evɔn nɔ wo o.
15 Míkpɔ jijɔ koɖo mɛ ciwo yí kpɔkɔ jijɔ; mífan avin koɖo mɛ ciwo yí le avin fankɔ.
16 Míwanɔ nu do mɛbuwo nu shigbe lé míwɛni nɔ míwoŋtɔwo nɛ. Míŋgbesɔ míwo susuwo ɖonɔ enu ganganwo ji o, vɔ mísɔ míwo susuwo ɖonɔ enu hwɛhwɛwo ji. Míŋgbebukɔ mɔ yewo yí nya ŋɖɛ vɛ o.
17 Míŋgbesɔ evɔn ɖo evɔn tɔxu nɔ mɛɖe o. Mítekpɔ awanɔ ŋciwo amɛwo pleŋ kpɔnɔ mɔ wonyɔ.*
18 Míje agbla awa enu ci ji míkpe yí anɔ fafa mɛ koɖo amɛwo pleŋ.
19 Anyi xlɔ veviwo, míwoŋtɔwo míŋgbeɖe hlɔn o, vɔ mítashi dɔmɛzi lɔ nɔ Mawu; ɖo woŋwlɛ ɖɛ mɔ: “‘Enyɛ yí aɖe hlɔn; enyɛ yí acu fɛn lɔ,’ Yehowa* yí nui.”
20 Vɔ “nɔ shive ci ao ketɔnɔɔ, nà ŋɖuɖu yi nɔ aɖu; nɔ shikɔ ciɔ, nà eshi yi nɔ anu. Nɔ èwɛkɔ ahan ɔ, anyi èlɔkɔ zokan kɔ do eta ni.”*
21 Ŋgbelɔn nɔ evɔn aɖu eo ji o, vɔ kpɔtɔ asɔ enywiwawa ɖukɔ evɔn ji.
Gɔnmɛnuŋwlɛnŋwlɛn
^ Alo “tamɛbubu nujikpekpe.”
^ Kpɔ Enyɔgbe Veviwo mɛ Ðeɖe.
^ Alo “Nuvɔn le nyi enunyɔŋ nɔ mí.”
^ Alo “Míbi do edɔ nu, mídonɔ vevi edɔ.”
^ Alo “míŋgbewanɔ kulɛnkulɛn le edɔ gbɔ o.”
^ Kpɔ Enumɛɖeɖewo A5.
^ Alo “ŋciwo yí nyɔ le ŋmɛ nɔ amɛwo pleŋ.”
^ Kpɔ Enumɛɖeɖewo A5.
^ Edasɛ mɔ, àna mɛ lɔ afa yí atrɔ adɛn yitɔ.
