Apotruwo Dɔwawawo 20:1-38
20 Ci hunnyahunnya lɔ ɖo teɔ, Pɔlu dɔ yí woyɔ enukplavi lɔwo vɛ yí ci edo ŋsɛn wo yí klan wo ɖegbɔɔ, ésɔ emɔ kpe Maseduani.
2 Ci edan to kɔxwi ciwo yí le nɔtɔxuwo mɛ yí nu ŋsɛndoamunyɔ sugbɔ nɔ mɛ ciwo yí le nɔtɔxuwoɔ, évayi Grɛki.
3 Éwa wleci amɛtɔn le nɔ. Vɔ ci Ʒuifuwo bla gbeju do nu hwenu ejikɔ aɖo tɔjihun ayi Siri ɔ, évaɖui mɔ yeatrɔ to Maseduani.
4 Mɛ ciwo yí kplɔɛ do yí nyi: Sopatrosi ci yí nyi Pirusi vi yí so Bere, Aristaki koɖo Sekundusi ciwo yí so Tɛsaloniki, Gayo ci yí so Dɛrbe, Timɔte sɔ kpe nɔ Tishiku koɖo Trofimu ciwo yí so Azi kan mɛ.
5 Ŋsu cɛwo ɖedo doŋkɔ nɔ mì yí vayi le te kpɔ mì le Troasi.
6 Vɔ mìwo ɖo tɔjihun so Filipi le Kpɔnnɔ Majimaji xweɖuɖu zan lɔwo godu. Eyi le ŋkeke amatɔn goduɔ, mìvaɖo Troasi yí nɔ enɔ na nɔ ŋkeke amadrɛ.
7 Le ŋkeke ŋkɔtɔ ji nɔ kwɛshila lɔ, hwenu mìbɔ doju yí aɖu nuɔ, Pɔlu tɔ nuxu xoxo nɔ mɛ ciwo yí le nɔ, ɖo éɖui mɔ yeaso yi ŋkegbu. Eyi ele nuxu lɔ xokɔ keke vaɖo zandomɛ.
8 Eyi taɖo wotɔ kaɖigban sugbɔ do shanŋ xɔ ci mɛ mìbɔ do mɛ.
9 Ðayɛvi ɖeka ci yí tɔ mɔ Etishi nɔ nyinɔnɔ do flɛsɛ tu. Édɔn alɔn keke eyi ku ni hwenu Pɔlu le nuxu lɔ xokɔ. Ému alɔn yí juin so shanŋ xɔ amɛtɔntɔ lɔ ji yí wovayi kɔɛ kuku.
10 Vɔ Pɔlu ɖyi va nyigban yí vlu do ji yí kpla ashi kɔ ni yí nu mɔ: “Mími eʒin nana, ɖo éle agbe.”*
11 Pɔlu gbetrɔ yi shanŋ xɔ lɔ ji yí ŋɛ kpɔnnɔ mɛ yí tɔ enu ɖuɖu. Ékpɔtɔ kankɔ seŋ koɖo amɛ lɔwo keke eŋ ke yí eso yí ɖedo.
12 Wokplɔ ɖajɛvi lɔ ɖedo yí eji jɔ wo sugbɔ mɔ éle agbe.
13 Mìɖo tɔjihun mɛ yí vayi ɖo Asosi doŋkɔ, fini mìakɔ Pɔlu le; ɖo enyɔ ci enu nɔ mì nɛ. Éji mɔ yeasɔ afɔ ava do go mì le nɔ.
14 Eyi ci edo go mì le Asosi ɔ, éɖo tɔjihun lɔ mɛ yí mìyi Mitilɛnu.
15 Yi ŋkegbuɔ, mìɖo tɔjihun so nɔ yí vaɖo Kio. Vɔ le ŋkeke ci yí kplɔɛ do jiɔ, mìva Samɔsu. Ci eŋ bu gbekeɔ, mìvaɖo Miletu.
16 Pɔlu ɖui mɔ yeaze to Efezi nu yí ayi, ɖo deji mɔ yeagu gamɛ le Azi kan lɔ mɛ o. Éle hwlɛndo ji kpɔ mɔ yeatɛnŋ ayi ɖo Ʒerusalɛmu le Pantekoti xweɖuɖu lɔ ji ma.
17 Vɔ édɔ amɛ so Miletu mɔ wo le yi Efezi ayɔ hamɛmɛshinshinwo vɛ.
18 Ci hamɛmɛshinshin lɔwo va gbɔɔ, énu nɔ wo mɔ: “So gbecigbe ŋva Azi kan lɔ mɛɔ, míwoŋtɔwo mínya lé ŋnɔ mí mɛ do nywiɖe.
19 Míkpɔ lé ŋsɔ nyɛɖeki hwe keŋkeŋ do yí wa dɔ nɔ Axwetɔ lɔ shigbe hwashi hannɛ koɖo ɖashi ciwo ŋkɔ, sɔ kpe nɔ tetekpɔ ciwo mɛ ŋto le gbeju ciwo Ʒuifuwo bla do ŋnu mɛ.
20 Ŋdemi enyɔ ciwo mɛ nyɔna le nunu nɔ mí o, ŋdemi enu* kplakpla mí hɛnnɛ le jugbaja koɖo so axomɛ yi axomɛ o.
21 Vɔ ŋɖe kunu kitokito nɔ Ʒuifuwo koɖo Grɛkitɔwo nɔ woatrɔ ji mɛ keŋ ava Mawu gbɔ yí aɖo xɔse do mìwo Xwetɔ Yesu nu.
22 Ecɛyɛɔ, gbɔngbɔn kɔkɔɛ lɔ kplɔŋ yikɔ* Ʒerusalɛmu, ci ŋdenya ŋci yí ajɔ do ŋji le nɔtɔxu can.
23 Ŋci ŋnya yí nyi mɔ nɔ ŋso le eju ɖe mɛ yí yikɔ ebu mɛɔ, gbɔngbɔn kɔkɔɛ lɔ nunɔ nɔŋ zenɛniɖe mɔ gakpamɛnɔnɔ koɖo efunkpekpewo le ete kpɔ nyɛ.
24 Vɔ anyi gbe* dele veviɖe nɔŋ ahan tɔ o. Enu kuɖeka ci yí xaŋ yí nyi mɔ, maɖegbɔ nɔ anyi julɔlɔ koɖo sɛnsɛndɔ ci ŋxɔ so Axwetɔ Yesu gbɔ: Eyi nyi mɔ maɖe kunu kitokito yí adra eŋɛnywi ci yí kuso ŋshishikuku Mawu tɔ nu.
25 “Ecɛyɛɔ, ŋnya mɔ míwo ciwo ŋdra Fyɔɖuxu lɔ nɔ ɖe dagbevakpɔ anyi ŋmɛ ke o.
26 Eyi taɖo ŋyɔ mí gbɛ keŋ anu le ŋmɛ nɔ mí mɔ, mɛɖe hun dele ekɔ nɔŋ o.
27 Ðo ŋnu Mawu nyɔwo pleŋ* nɔ mí, ŋdewla eɖe do mí o.
28 Míkpɔ míwoɖekiwo koɖo lɛngbɔha lɔ pleŋ ji. Lɛngbɔha cɛ mɛ yí gbɔngbɔn kɔkɔɛ lɔ sɔ mí le nɔ míakpɔnɔ ji yí ale bu nɔ Mawu hamɛ ci esɔ Eviɛ ŋtɔ hun sɔ xwle.
29 Ŋnya mɔ nɔ ŋso ɖegbɔɔ, ehla nyinashuwo avaɖo mí mɛ yí wodawa nu do lɛngbɔha lɔ nu koɖo lɔnlɔn o.
30 Eyi le míwoŋtɔwo mɛɔ, mɛɖewo aso yí atɔ enyɔ trofitrofiwo nunu keŋ asɔ dɔn enukplavi lɔwo nɔ woakplɔ wo do.
31 “Eyi taɖo mínɔ zanŋte yí aɖo ŋwi mɔ, na nɔ exwe amɛtɔn, ezan koɖo kedeɔ, ŋdemi enu kplakpla míwo ɖekaɖeka koɖo ɖashiwo gbeɖe o.
32 Ecɛyɛɔ, ŋsɔ mí dokɔ alɔ̀ mɛ nɔ Mawu koɖo xomɛvu nyɔ yitɔ ci yí atɛnŋ ado ŋsɛn mí yí ana cinɔ ci woana amɛkɔkɔɛwo pleŋ mí.
33 Egacuho mɛɖe tɔ alo shika alo mɛɖe nudodo deci ŋmɛ nɔŋ o.
34 Míwoŋtɔwo mínya mɔ, anyi lɔ̀ cɛwo yí ŋsɔ wa dɔ yí sɔ kpɔ nyɛŋtɔ sɔ kpe nɔ mɛ ciwo yí le koɖoŋ ʒanwo gbɔ.
35 Le enuwo pleŋ mɛɔ, ŋdasɛ nɔ mí mɔ míwo le wa dɔ sɛnsinɖe ahan hɛnnɛ. Míɖo akpedo mɛ ciwo yí gbɔjɔ nu yí Axwetɔ Yesu nyɔwo ɖo akpɔtɔ anɔ susu mɛ nɔ mí ci yiŋtɔ nu mɔ: ‘Jijɔkpɔkpɔ le enunana mɛ sɔwu enuxɔxɔ.’”
36 Eyi ci enu enyɔ cɛwo ɖegbɔɔ, yɛ koɖo nɔvi lɔwo pleŋ je klo ji yí edo gbe ɖaɖa.
37 Wo pleŋ fan avin sugbɔ yí kpla ashi kɔ nɔ Pɔlu yí ki shi ni koɖo lɔnlɔn,
38 ɖo ci enu nɔ wo mɔ wodagbevakpɔ ŋmɛ nɔ ye keɔ, eyi wa ɖeka nɔ wo koŋ. Eyi wozɔn koɖi yí vayi ɖui do keke tɔjihun lɔ gbɔ.
Gɔnmɛnuŋwlɛnŋwlɛn
^ Alo “gbɔngbɔn yitɔ le mɛ.”
^ Alo “enu ciwo yí anyɔ nɔ mí.”
^ Alo “dɔnŋ yikɔ.”
^ Alo “anyi se.”
^ Alo “Mawu drowo pleŋ.”
