Apotruwo Dɔwawawo 17:1-34
17 Ecɛyɛɔ, woto Anfipoli koɖo Apolonia yí va Tɛsaloniki, fini Ʒuifuwo nukplaxu ɖeka le.
2 Eyi shigbe lé Pɔlu wɛni nɛɔ, éyi Ʒuifuwo nukplaxu lɔ yí zan Enuŋwlɛŋwlɛ lɔwo yí sɔ dre enu mɛ nɔ wo na nɔ sabati amɛtɔn.
3 Édredreɛ enu mɛ nɔ wo yí yɔkɔ enyɔwo so Enuŋwlɛŋwlɛ lɔwo mɛ yí sɔ dasɛ mɔ yɛle veviɖe mɔ Kristo lɔ akpe fun yí woafuin so amɛkukuwo mɛ. Énunuɔ mɔ: “Yesu yí nyi Kristo lɔ, mɛ ci nu ŋxoxoɔ nuxu so nɔ mí.”
4 Ecɛ na yí mɛɖewo vatrɔ xɔsetɔwo le wo mɛ yí vabɔdo Pɔlu koɖo Silasi nu. Grɛkitɔ sugbɔ ciwo yí sɛnnɔ Mawu koɖo nyɔnu ŋkuvileji sugbɔ can vagɔn nɔ wo.
5 Vɔ ci Ʒuifuwo glo koɖo ŋɔkuɔ, wovayi bɔ ŋsu xomɛvetɔ, edɔɖemawɛtɔ ɖekawo ciwo yí nɔnɔ fini amɛwo va bɔnɔ do le jugbaja yí na yí eʒin tɔn le jugan lɔ mɛ. Wovayi ɖo Ʒazɔn xwe mɛ koɖo akpasɛnsɛn keŋ alé Pɔlu koɖo Silasi yí asɔ wo jo nɔ ŋsu lɔwo.
6 Ci wodekpɔ woɔ, wodɔn Ʒazɔn koɖo nɔvi ɖewo yi nɔ jumɛgawo yí dokɔ axwa mɔ: “Ŋsu cɛwo ciwo yí na yí eʒin tɔnkɔ le afishiafi vaɖo elɛ hɛnnɛ
7 yí Ʒazɔn xɔ wo do yi xwe mɛ. Ŋsu cɛwo pleŋ wakɔ nu yí sɔ dakɔ le Seza sewo ji yí nukɔ mɔ efyɔ bu li ci yí nyi Yesu.”
8 Ci amɛahwa lɔ koɖo jumɛgawo se nyɔ cɛwoɔ, jika so wo.
9 Eyi ci jumɛgawo kan eho yí xɔ le Ʒazɔn koɖo mɛkpɛtɛwo shi ɖegbɔɔ, wotashi wo yí woyi.
10 Le ezan lɔ mɛ kakaɔ, nɔvi lɔwo ɖo Pɔlu koɖo Silasi ɖaɖa Bere. Ci wovayi ɖoɔ, woyi Ʒuifuwo nukplaxu.
11 Mɛ cɛwo hun ji mɛ sɔwu mɛ ciwo yí le Tɛsaloniki, ɖo ci woxɔ nyɔ lɔɔ, woxɔɛ koɖo eji faa yí wa ɖaŋ gbejenɔ Enuŋwlɛŋwlɛ lɔwo mɛ kpɔ nywiɖe gbeɖeka duu keŋ akpɔ mɔ enyɔ lɔwo nyi nyɔnɔnwi ma.
12 Eyi taɖo, amɛ sugbɔ le wo mɛ vatrɔ xɔsetɔwo. Nyɔnu Grɛkitɔ sugbɔ ciwo amɛwo bunɔ koɖo ŋsu ɖewo can vatrɔ xɔsetɔwo.
13 Vɔ ci Ʒuifu ciwo yí le Tɛsaloniki se mɔ Pɔlu dradra Mawu nyɔ lɔ le Bere hɛnnɛɔ, wova keŋ ado adan lanmɛ nɔ amɛwo yí ana yí eʒin atɔn.
14 Eyi zeɖekaɔ, nɔvi lɔwo na yí Pɔlu kpe axu tu, vɔ Silasi koɖo Timɔte wowo ci enɔ.
15 Vɔ mɛ ciwo yí vayi ɖo Pɔlu kplɔɛ hɛn yi keke Atɛni. Eyi ci wojikɔ asoɔ, Pɔlu nu nɔ wo mɔ wo le do ŋɛ nɔ Silasi koɖo Timɔte mɔ wo le xotɔ ye kaba.
16 Hwenu Pɔlu le te kpɔ wo le Atɛni ɔ, édo dɔmɛzi sugbɔ ci ekpɔ mɔ vojuwo ɖɔ eju lɔ mɛ.
17 Eyi taɖo etɔ enu mɛ dredre nɔ Ʒuifuwo koɖo mɛbu ciwo yí sɛnnɔ Mawu le Ʒuifuwo nukplaxu. Eyi gbeɖeka duu le afi mɛɔ, édrenɔ nu mɛ nɔ mɛ ciwo yí le enɔ.
18 Vɔ xexeɛmɛnunyatɔ ɖewo ciwo yí nyi Epikuitɔwo koɖo Stoikitɔwo tɔ enyɔ dɔndɔn koɖi. Mɛɖewo nunuɔ mɔ: “Nyi nuxujatɔ ŋtɔ́ jikɔ anu mɔ?” Mɛbuwo nunuɔ mɔ: “Ele shigbe mɔ eju buwo mawuwo nu exoxoɔ nuxu so hannɛ.” Wonukɔ enyɔ cɛwo, ɖo Pɔlu dradra eŋɛnywi ci yí kuso Yesu koɖo fɔnfɔnsoku lɔ nu.
19 Eyi taɖo wokplɔɛ yi Areopaʒi yí nu ni mɔ: “Àtɛnŋ adre enukplakpla yoyu ci nu èxokɔ nuxu so lɔ mɛ nɔ mìa?
20 Ðo enyɔ ciwo mìdese kpɔ yí ènukɔ yí mìji mɔ mìamɔŋje ŋcɛwo mɛ teŋ.”
21 Le nyɔnɔnwi mɛɔ, Atɛnitɔwo pleŋ koɖo mɛdru ciwo yí le nɔ* dezannɔ wowo vovo gamɛwo sɔ wanɔ nubu ɖe sɔwu mɔ woanunuɔ enyɔ yoyuwo alo aɖo to aseseɛ wo o.
22 Eyi Pɔlu so je te le dodomɛ nɔ Areopaʒi lɔ yí nu mɔ:
“Atɛnitɔwo, ŋkpɔ mɔ le enuwo pleŋ mɛɔ, mívɔnnɔ nɔ mawuwo sugbɔ sɔwu mɛkpɛtɛwo.
23 Le kpɔwɛ mɛ, ci ŋle esa ɖyikɔ yí wa ɖaŋ glo ŋciwo mísɛnnɔ kpɔ nywiɖeɔ, ŋkpɔ avɔnsakpe ɖeka ci nu woŋwlɛ do mɔ, ‘Mawu ci wodejeshi ɖɛ tɔ.’ Eyi taɖo enu ci mísɛnkɔ gan yí mídejeshi ɖɛɔ, yi nyɔ yí ŋnukɔ nɔ mí.
24 Mawu ci yí wa xexe lɔ koɖo enu ciwo pleŋ yí le mɛ, eyɛ ci yí nyi jeŋkwi koɖo nyigban Xwetɔ denɔnɔ gbedoxɔ ciwo wosɔ alɔ̀ wa mɛ o.
25 Ŋɖe dewudi keke anyi agbetɔ lɔ̀wo yí awɛ ni o, ɖo eyi nanɔ gbɔngbɔn, agbe koɖo enushianu agbetɔwo pleŋ.
26 Eyi na hɛnnɛ yí jukɔnwo pleŋ mɛ tɔwo to so agbetɔ kuɖeka mɛ keŋ nɔ woanɔ nyigban lɔ pleŋ ji. Éɖo hwenuwo ɖɛ yí gbeɖo lixowo nɔ agbetɔwo nɔxuwo,
27 nɔ woaji Mawu kpɔ veviɖe yí akpɔɛ nyao. Ðo le nyɔnɔnwi mɛɔ, dejinjin le mìwo ɖekaɖeka gbɔ o.
28 Eyi na yí mìli yí hwanhwan yí kpɔtɔ le agbe shigbe lé míwo hakpakpaŋwlɛtɔ ɖewo nui ŋtɔkpu nɛ mɔ, ‘Ðo eviɛwo yí mìwo can nyi hɛnnɛ.’
29 “Eyi taɖo ci mìnyi Mawu viwoɔ, mìdeɖo abui mɔ Mawu le shigbe shika, egacuho alo ekpe nɛ o; dele shigbe ŋɖe ci agbetɔwo ɖe susu yí wa ɖaŋ wa hɛnnɛ o.
30 Nyɔnɔnwi enyi mɔ Mawu ŋwla ŋkuvi do hwenu ciwo yí agbetɔwo wa nu le manyamanya mɛ ji sa; vɔ ecɛyɛɔ, énukɔ nɔ mɛshiamɛ le fiɖekpokpui mɔ woɖo atrɔ ji mɛ.
31 Ðo éɖo azan ɖeka ɖɛ yí aɖo kojo jɔjɔɛ nɔ nyigban ji tɔwo pleŋ to ŋsu ɖeka ci ecan ji. Éfɔn ŋsu cɛ le amɛkukuwo mɛ yí sɔ na kankandoji agbetɔwo pleŋ.”
32 Vɔ ci wose fɔnfɔnsoku nyɔ lɔɔ, mɛɖewo tɔ kuikui yí mɛbuwo nunuɔ mɔ: “Mìagbeɖo to eo gabumɛ so nyɔ cɛ nu.”
33 Eyi taɖo Pɔlu so le wo gbɔ.
34 Vɔ mɛɖewo kplɔɛ do yí vatrɔ xɔsetɔwo. Wowo ɖewo yí nyi Denisi ci yí nyi kojoɖotɔ le Areopaʒi kojoɖoxu lɔ koɖo nyɔnu ɖeka ci yí tɔ mɔ Damarisi sɔ kpe nɔ mɛbuwo.
Gɔnmɛnuŋwlɛnŋwlɛn
^ Alo “ciwo yí ɖyi sa va eju lɔ mɛ.”
