Bibla nu so Yesu nu mɔ ‘wowui le ŋcilan mɛ vɔ wofuin so ku do gbɔngbɔn mɛ.’—1 Piɛ 3:18; Edɔwawawo 13:34; 1 Korɛntitɔwo 15:45; 2 Korɛntitɔwo 5:16.

 Enyɔ ciwo Yesu ŋtɔ nu doŋkɔ dasɛ mɔ wodafuin do ŋcilan koɖo ehun mɛ o. Énu mɔ: “ŋɖuɖu ci nana do ta nɔ xexe lɔ nɔ akpɔ agbe yí nyi anyi lankpu” shigbe tafɛn vɔnsa nɛ nɔ agbetɔwo. (Ʒan 6:51; Matie 20:28) Nɔ éfɔn so ku yí trɔ yí sɔ yi ŋcilan xoxui lɔɔ, anyi tafɛn vɔnsa lɔ nyi enu gbali. Kpɔ datɛnŋ anyi ahan o, ɖo Bibla nu mɔ yɛsɔ yi ŋcilan koɖo yi hun savɔn “zeɖeka kpaŋ nɔ hwenuwo keŋkeŋ.”—Ebretɔwo 9:11, 12.

Nɔ Yesu fɔn le gbɔngbɔn mɛ ɖe, lé yi nukplaviwo wɛ yí kpɔɛɔ?

•  Gbɔngbɔn mɛ nuwawawo atɛnŋ asɔ agbetɔ ŋcilan dru. Le kpɔwɛ mɛ, mawudɔlawo wa cɛ hanci vayi yí ɖu nu yí gbenu aha koɖo agbetɔwo. (Gɔnmɛjeje 18:1-8; 19:1-3) Ele ahan gan, nɔ woaso le nyigban jiɔ, wotanɔshi agbetɔ ŋcilan yí kpɔtɔ nyinɔ gbɔngbɔn mɛ nuwawawo.—Kojoɖotɔwo 13:15-21.

•  Le Yesu fɔnfɔnsoku goduɔ, yɛ can sɔ agbetɔ ŋcilan nanɔ hwenu kleŋ ɖe shigbe lé mawudɔlawo wɛ do vayi nɛ. Ci Yesu nyi gbɔngbɔn mɛ nuwawaɔ, éɖo enujikpekpe yí ato do amɛwo ji le avomɛ yí agbebu do wo kreɖeɖe. (Luiki 24:31; Ʒan 20:19, 26) Ŋcilan vovovowo yí Yesu zan le nɔnɔmɛ lɔwo mɛ. Eyi dɔ yí enyi enyɔ ciwo Yesu nu koɖo enu ciwo ewa ɖekɛwo yí yi xlɔ veviwo sɔ jenɔshi yi.—Luiki 24:30, 31, 35; Ʒan 20:14-16; 21:6, 7.

•  Hwenu Yesu ze do apotru Toma jiɔ, ésɔ ŋcilan ci nu abikpa le dasɛ ni. Éwɛ ahan keŋ asɔ do ŋsɛn Toma xɔse ɖo Toma xoxoɔ nu kpɔ mɔ Yesu fɔn so ku nyao ma.—Ʒan 20:24-29.