Asʋ̃ Nyamɩnlɩ Yɩ Bulombunlililɛ Yɩ Wɔ Wʋ Ahʋnlɩnɩ Nu a?
Mɔɔ Bayɩbʋlʋ yɩ kã
Anhã, Nyamɩnlɩ yɩ Bulombunlililɛ yɩ ɩ́dɩ debe mɔɔ ɩwɔ Kilisinyiamaa bɛ ahʋnlɩnɩ nu. a Bayɩbʋlʋ yɩ kile dɩka pɔkyɩɩ mɔɔ ɩwɔ na ɩfʋlɔ yɩ kɛɛ “sʋlɔ bulombunlililɛ.” (Matiyu 4:17, King James Version) Kila kezimɔ Bayɩbʋlʋ yɩ da yɩ ali kɛɛ ɩdɩ aɣanɩ ankasa mɔɔ ɩwɔ sʋlɔ na idi tumi wɔ sʋlɔ.
Nyamɩnlɩ yɩ Bulombunlililɛ yɩ lɛ awulombunli, mmenii mɔɔ ikeli bɔ zʋ, mmɛla nɩɩ tumi mɔɔ ɩkɛma Nyamɩnlɩ yɩ apɛdɩ kɛyɛlɩ kɛ wɔ sʋlɔ nɩɩ azɩlɛ yɩ zʋ.—Matiyu 6:10; Yikile 5:10.
Nyamɩnlɩ yɩ aɣanɩ anzɛnyɩɩ yɩ Bulombunlililɛ yɩ nɩ keli tumi wɔ “mmenii, amanlɩ, nɩɩ mmenii mɔɔ bɛkã ndɛnɩ azʋlɔtʋ munwala” bɔ zʋ wɔ azɩlɛ yɩ zʋ munwala. (Danɩyɛlɩ 7:13, 14) Aɣanɩ eyi yɩ tumi nɩ ɩ́zʋ̃ yɩ manlɩmaa bɛ kɛ, mfomi ɩzʋ̃ Nyamɩnlɩ yɩzayɩ yɩ kɛnɩ.—Ndwomi 2:4-6; Ayɩzaya 9:7.
Gyisɛsɩ hanlɩ hileli yɩ adʋwavʋlɔ nɔhʋanlɛmaa yɩ kɛɛ, sa bɛkɩnla yɩ nwʋ wɔ yɩ sʋlɔ Bulombunlililɛ yɩ nu na ‘bɛawʋwa awulongua zʋ.’—Luuku 22:28, 30.
Bulombunlililɛ yɩ lɛ adamvʋlɔ mɔɔ ɩkɛzɩkɛ bɛ.—Ndwomi 2:1, 2, 8, 9; 110:1, 2; 1 Kɔlɛntɩmaa 15:25, 26.
Bayɩbʋlʋ yɩ iáhilehile kɛɛ sʋlɔ Bulombunlililɛ yɩ wɔ ahʋnlɩnɩ nu mɔɔ ikile kɛɛ idi tumi wɔ abiye yɩ ahʋnlɩnɩ nu. Mfomi ikile kɛɛ, “Bulombunlililɛ nɩ nwʋ odwokɔ” anzɛnyɩɩ “Bulombunlililɛ yɩ nwʋ odwokɔba” nɩ kʋla kã yɛ ahʋnlɩnɩ na ɔzɔ yɛ ɩsɛ kɛɛ ɩyɛ a.—Matiyu 13:19; 24:14.
Sɛ bɛkã kɛɛ “Nyamɩnlɩ yɩ bulombunlililɛ nɩ wɔ bo nu” a, ikile mɩnla a?
Iluwa kezimɔ Bayɩbʋlʋ yɩ tʋhilelɛ azʋlɔtʋ be kilehile odwokɔ mɔɔ ɩwɔ Luuku 17:21 nu nɩ ti, ɩma mmenii sʋ̃maa bɛánwʋ dɩka mɔɔ Nyamɩnlɩ yi Bulombunlililɛ nɩ wɔ ankasa. Kɛ ndianwʋ nɩ, King James Version yɩ kã kɛɛ “Nyamɩnlɩ yɩ bulombunlililɛ nɩ wɔ bo nu.” Mɔɔ ɩkɛyɛ na yɛadɩ nkyɩkyɛmi eyi tʋ bʋwɔ nɩ, ɩsɛ kɛɛ yekila mɔɔ nɩ bɛkãã nwʋmɔ odwokɔ nɩ.
Nɩ Gyisɛsɩ ɩtɩndɛɛ ikile Falasiimaa nɩ. Mmenii eyimmɔ dɩ Nyamɩnlɩ ɔzʋ̃mɩnlɛ nu mbanimbani mɔɔ bodwodwuli bediyialɩ Gyisɛsɩ na bɛyɩlɩ yɩ bɛmanlɩ kɛɛ bohũ yi nɩ. (Matiyu 12:14; Luuku 17:20) Asʋ̃ ntɩyasɩ wɔ numɔ kɛɛ yɛkɔdwɩnɩ kɛɛ nɩ Bulombunlililɛ yɩ dɩ debe mɔɔ ɩwɔ bɛ ahʋnlɩnɩ mɔɔ nɩ ɩyɛ sɩ yɩ nu a? Gyisɛsɩ hanlɩ hileli bɛ kɛɛ: “Bo nu dɩ nnahɩlɩbɛyɛlɛ nɩɩ amumuyɛ nkʋ̃.”—Matiyu 23:27, 28.
Bayɩbʋlʋ tʋhilelɛ azʋlɔtʋ sʋ̃ kilehile odwokɔ mɔɔ Gyisɛsɩ hanlɩ wɔ Luuku 17:21 yi nu ma numɔ da kɛnɩ petee kɛɛ: “Nyamɩnlɩ yɩ bulombunlililɛ nɩ wɔ bɔ nwʋ ɛkɩhyɩ.” (Contemporary English Version) “Nyamɩnlɩ yɩ bulombunlililɛ nɩ wɔ bɛ avinli.” (New World Translation, azɩkɛnɩ odwokɔ) Nɩ sʋlɔ Bulombunlililɛ nɩ wɔ Falasiimaa nɩ ‘bɔ nwʋ kɛ’ anzɛnyɩɩ “bɛ avinli” iluwakɛɛ nɩ Gyisɛsɩ mɔɔ Nyamɩnlɩ ɩyɩ yɩ kɛɛ ili Bulombunlililɛ yɩ zʋ tumi nɩ gyĩ bɛ anyunu.—Luuku 1:32, 33.
a Ɔzʋ̃mɩnlɛ azʋlɔtʋ kilehile kɛɛ Nyamɩnlɩ yɩ Bulombunlililɛ wɔ enii anzɛnyɩɩ abiye yɩ ahʋnlɩnɩ nu. Kɛ ndianwʋ nɩ, Southern Baptist Convention mɔɔ ɩwɔ United States nɩ hanlɩ kɛɛ, Nyamɩnlɩ yɩ Bulombunlililɛ yɛ lɛ “Nyamɩnlɩ yɩ tumililɛ mɔɔ ɩwɔ abiye yɩ ahʋnlɩnɩ nɩɩ yɩ ɛbɩlawɔlɛ nu nɩ.” Ɔzɔ la yɛ Pope Benedict XVI hɛlɛlɩ wɔ yi buuku mɔɔ bɔfʋlɔ yɩ Jesus of Nazareth yi nu kɛɛ “abiye zʋ̃ yɩ ahʋnlɩnɩ nu tiye Nyamɩnlɩ a, yɛ yɩ Bulombunlililɛ yɩ ba yɩ nu a.”
You May Also Like
ESSENTIAL BIBLE TEACHINGS
Nyamɩnlɩ Bulombunlililɛ Nɩ, Mɛyɩ Yɛ Lɛ Mɩnla?
Gyisɛsɩ ihilehileli Nyamɩnlɩ yɩ Bulombunlilɛ nɩ nwʋ ndwokɔ ɩdɛlalɩ dɩyɛ bela. Alʋbɔ sʋ̃maa yɛ dɩ yɛ yɩ adʋwavʋlɔ bɔwɔ ɔzɔ Bulombunlililɛ nɩ nwʋ mpayɩ kɛɛ ɩɣɩla a.
BAYƖBƲLƲ EHILEHILELƐ
Twé yɛ Bayɩbʋlʋ Dɩyɛzumanlɛ eyi kila
Sa yɛkʋla yɛ nɩɩ wʋ suma Bayɩbʋlʋ yɩ wɔ dɩka bela mɔɔ ɛpɛ.