Anhã, ɔzʋ̃mɩnlɛ munwala ɩ́dɩ ɔkʋ̃. Bayɩbʋlʋ yɩ ma yɛnwʋ ɔzʋ̃mɩnlɛ azʋlɔtʋ mɔɔ ɩázɔ Nyamɩnlɩ anyɩ nɩ. Sa yɛkʋla yɛkyɛ ɔzʋ̃mɩnlɛ azʋlɔtʋ eyi nu anwɩ̃.

Mɔɔ ili bɔmʋnlɩ: Bɛzabɛ mɔɔ bɔsʋ̃mɩ awʋzʋmɩ

 Bayɩbʋlʋ yɩ kã awohwi anyamɩnlɩ mɔɔ bɔsʋ̃mɩ bɛ nɩ nwʋ odwokɔ kɛɛ “dɩyɛ mbʋanlɩ,” yɛɛ “nninyeni mɔɔ mfasʋ bela íni zʋ.” (Gyɛlɩmaya 10:3-5; 16:19, 20) Gyehova a Nyamɩnlɩ valɩ ahyɛdɩ manlɩ ɔwɔkɩ Yizilayamaa nɩ kɛɛ: “Áma bɔsʋ̃mɩ anyamɩnlɩ mvʋlɔ bela bɛkɩnla mʋ nwʋ.” (Ɛkɩsadɔsʋ 20:3, 23; 23:24) Mmɩlɩ mɔ Yizilayamaa zʋ̃mɩnlɩ anyamɩnlɩ mvʋlɔ nɩ, “Gyehova valɩ bɔ nwʋ ɛya ɛzɩzɩbɛ ɛzɩzɩbɛ.”​—Nɔmɛsɩ 25:3; Lɛvitikɔsʋ 20:2; Ndɛnɩwuwalɛmaa 2:13, 14.

 Ɔzɔ la sʋ̃ yɛ nnɛ Nyamɩnlɩ yɩ anyɩ iáleli nwʋmɔ kɛɛ abiye kɔzʋ̃mɩ nninyeni mɔɔ mmenii fʋlɔ bɛ anyamɩnlɩ sʋ̃maa nɩ a. (1 Kɔlɛntɩmaa 8:5, 6; Galatiyiamaa 4:8) Ɩva ahyɛdɩ ɩma bɛzabɛ mɔɔ bɛpɛ kɛɛ bɔsʋ̃mɩ yɩ nɩ kɛɛ áma bɛ nɩɩ bɛzabɛ mɔɔ bɛfa bɔ nwʋ bowula awohwi ɔzʋ̃mɩnlɛ nu nɩ bɔ. Ɩhanlɩ kɛɛ: “Mʋnlʋmmɔ béyiaki bɛ, na mʋnlʋmmɔ bɔhwɩ̃ bɔ nwʋ wɔ bɔ nwʋ.” (2 Kɔlɛntɩmaa 6:14-17) Sɛ ɔzʋ̃mɩnlɛ munwala dɩ ɔkʋ̃, na sɛ yɩ munwala ma yɛnwʋ Nyamɩnlɩ a, mɛyɩ nɩ mɩnla ti mɔɔ Nyamɩnlɩ valɩ ahyɛdɩ eyi manlɩ a?

Mɔɔ ɩtɔ ɔzʋlɔ anwɩ̃: Bɛzabɛ mɔɔ bɔsʋ̃mɩ nɔhʋanlɛ Nyamɩnlɩ wɔ ɔhʋanɩ mɔɔ ɩázɔ yɩ anyɩ nɩ zʋ

 Ɔwɔkɩ mmɩlɩ nu nɩ, nɩ ɩyɛ a Yizilayamaa nɩ fa awohwi ɔzʋ̃mɩnlɛ nu nninyeni azʋlɔtʋ be fʋlavʋla ɔzʋ̃mɩnlɛ mɔɔ nɩ bɛfa bɛma Nyamɩnlɩ nɩ nu, naasʋ̃ Gyehova iáde ɔzʋ̃mɩnlɛ mɔɔ ɩdɩ ɔzɔ nɩ itiã nu. (Ɛkɩsadɔsʋ 32:8; Ditilonɔmi 12:2-4) Gyisɛsɩ dɩndɛlɩ diyialɩ nyamɩnlɩ ɔzʋ̃mɩnlɛ nu mbanimbani mɔɔ nɩ bɔwɔ yɩ mmɩlɩ zʋ nɩ, iluwa ɔhʋanɩ mɔɔ nɩ boduwa zʋlɔ bɔsʋ̃mɩ Nyamɩnlɩ nɩ ti; wɔ enii anyɩ zʋ nɩ, nɩ ɩdɩ kɛɛ mɔɔ bɔsʋ̃mɩ Nyamɩnlɩ ma ebiye ɩlɛ́balɩ kyɩ. Naasʋ̃ Gyisɛsɩ hanlɩ bɔ nwʋ odwokɔ kɛɛ “bobu bɛ anyɩ bokua ehilehilelɛ mɔɔ ihyinyia baaba wɔ mmɛla nɩ nu nɩ, mɔɔ ɩdɩ kɛɛ pɛlɩpɛlɩlilɛ, nwɔkɛnwʋnlɛ nɩɩ nɔhʋanlɛlilɛ nɩ zʋ.”​—Matiyu 23:23.

 Nnɛ sʋ̃, ɔzʋ̃mɩnlɛ mɔɔ igyĩ nɔhʋanlɛ zʋ nɩ yɛ ɩma mmenii nwʋ Nyamɩnlɩ a. Yɛkɔnwʋ ɔzɔ nɔhʋanlɛ odwokɔ eyi wɔ Bayɩbʋlʋ yɩ nu. (Dwɔɔnʋ 4:24; 17:17; 2 Timoti 3:16, 17) Ɔzʋ̃mɩnlɛ azʋlɔtʋ mɔɔ be ehilehilelɛ ígyĩ Bayɩbʋlʋ yɩ zʋ nɩ, ɩáma mmenii kʋla bike Nyamɩnlɩ. Ehilehilelɛ azʋlɔtʋ be wɔ kɛnɩ mɔɔ mmenii sunzu kɛɛ igyĩ Bayɩbʋlʋ yɩ zʋ. Ɔnwʋmɔ ndianwʋ yɛ lɛ, Nyamɩnlɩ asã-ɔkʋ̃, ɛkɛla mɔɔ iáwu kyɩ̃, yɛɛ mmenii mɔɔ bɛkɛyɛ bɛ ayɛkwa daabaa wɔ sɩnɩ nu nɩ. Naasʋ̃ ɔzɔ ehilehilelɛ yɩ munwala dɩ bɛzabɛ mɔɔ bɔsʋ̃mɩ awohwi anyamɩnlɩ nɩ be dedi. Ɔzʋ̃mɩnlɛ azʋlɔtʋ mɔɔ bɛhyɛ ehilehilelɛ eyimmɔ nwʋ ɛzɩzɩbɛ nɩ dɩ “mbʋanlɩ,” anzɛnyɩɩ mfasʋ bela íni zʋ iluwakɛɛ bɛfa ɔzʋ̃mɩnlɛ nu amamu besiye mɔɔ Nyamɩnlɩ pɛ kɛɛ yɛyɛ nɩ yɩ agyia nu.​—Maakɩ 7:7, 8.

 Nyamɩnlɩ kyi nnabɩlaba ɔzʋ̃mɩnlɛ bela. (Tayɩtɔsɩ 1:16) Kɛ ɔzʋ̃mɩnlɛ nu amamu anzɛnyɩɩ nninyeni be mɔɔ abiye yɛ nɩ yɛ ɩma ibike Nyamɩnlɩ a, mfomi ɛbɩlawɔlɛ baaba mɔɔ ɩkɔwɔ nɩ. Kɛ ndianwʋ nɩ, Bayɩbʋlʋ yɩ kã kɛɛ: “Sɛ abiye ɩdwɩnɩ kɛɛ ɩsʋ̃mɩ Nyamɩnlɩ na ɩáɣɩda yi munwa zʋ a, yɩ Nyamɩnlɩ zʋ̃mɩnlɛ nɩ ɩdɩ mbʋanlɩ na ɩdahɩlɩ dahɩlɩ yɩzayɩ yɩ nwʋ. Nyamɩnlɩzʋ̃mɩnlɛ baaba mɔɔ evinli bela íni nwʋmɔ wɔ Nyamɩnlɩ Ɛzɩlɛ nɩ yɩ anyunu nɩ, mɛyɩ yɛ lɛ kɛɛ ɔkɔwʋwa aɣinsamaa nɩɩ ahunavʋlɔ wɔ bɛ ɛvɛlɩyɛ nu, na wʋayɩ wʋ nwʋ wɔ oyuwadɩ nninyeni tanɩ tanɩ nɩ mmɔ nwʋ.” (Gyemisi 1:26, 27) King James Version fa odwokɔpɔkɔ “ɔzʋ̃mɩnlɛ mɔɔ nwʋmɔ tɩ” di egyima ma ɔzʋ̃mɩnlɛ mɔɔ evinli anzɛnyɩɩ nnabɩlaba bela íni nwʋ.