1. Mɩnla ti mɔɔ ɩsɛ kɛɛ yenuma a?

 ASƲ̃ ɔdɔ Gyehova, Nyamɩnlɩ mɔɔ ɩvalɩ nninyeni baaba munwala nɩɩ nnwʋanlɩ po ɩmanlɩ wʋ nɩ a? Ɛpɛ kɛɛ ekile kɛɛ ɔdɔ yɩ a? Ɔhʋanɩ mɔɔ ɩdɩ baaba mɔɔ okoluwa zʋlɔ kɛyɛ zɔ yɛ lɛ kɛɛ, ekeyila wʋ nwʋ zʋ kɛma Gyehova na wʋanluma. Eyi kɛma ɛkɛɣa kɛhɩnla Gyehova yɩ abusunwa yɩ nwʋ. Iluwa eyi ti, wʋ Zɩ nɩɩ wʋ ɔhɔnwʋ Gyehova kehile wʋ ɔhʋanɩ na ɩawʋwa wʋ iluwakɛɛ ɛkɛɣa kɛyɛ yɩ dɩyɛ. (Ndw. 73:24; Ayɩ. 43:​1, 2) Akʋ̃ sʋ̃, sɛ eyila wʋ nwʋ zʋ na onuma a, ɩkɛma ekenyia nnwʋanlɩ mɔɔ íni awielɩyɛ nwʋ anyɩnlɩlazʋ.—1 Pit. 3:21.

2. Mɩnla yɛ yekozunzu nwʋmɔ wɔ dɩyɛzumanlɛ eyi nu a?

² Asʋ̃ debe ma ɔtwɩnhwɩ̃ɩ̃ wʋ agyia azɩ kɛɛ okonluma a? Sɛ zɔ a, nwʋ yɩ kɛɛ kɛ wʋzawʋ nkʋ̃ la yɛ ɔwɔ bʋwabɩlɛ eyi nu a. Mmenii sʋ̃maa wɔ kɛnɩ mɔɔ bɔnlʋmmɔ sʋ̃ ansaana bɛkɛvata bɛkɛma onlumanlɛ nɩ, bɛyɛlɩ nzɩnzanlɩyɛ sʋ̃maa wɔ bɛ nyɛlɩyɛ nɩɩ bo nzunzunlɩyɛ nu. Kakɩ yɩ bɛlɛ anyɩnlɩlelɛ nɩɩ ɛhyɩmɛ bɔsʋ̃mɩɩ Gyehova. Mɩnla yɛ ɔkɔhʋla kozuma wɔ mmenii be mɔɔ bonlumanlɩ wɔ asʋ̃mavʋlɔ yɩ bɛ mmɩlɩ zʋ nɩ kɛ a? Bɛmá yehila ndwokɔzɩzɩbɛ azʋlɔtʋ mɔɔ beyiyialɩ nɩɩ mɔɔ yɛkɔhʋla kozuma wɔ be ndianwʋ yɩ nu.

SAMALIYIAMAA NƖ NLUMANLƖ

3. Mɩnla nzɩnzanlɩyɛ yɛ nɩ ɩsɛ kɛɛ Samaliyiamaa nɩ yɛ na ama bɛavata bɛama onlumanlɛ a?

³ Wɔ Gyisɛsɩ yɩ mmɩlɩ zʋ nɩ, nɩ Samaliyiamaa nɩ wɔ ɔzʋ̃mɩnlɛ  okuwu be nu. Nɩ bo nu sʋ̃maa da Dwudiyia tisʋlɔ ɔfʋã nu. Ansaana Samaliyiamaa nɩ kɛvata kɛma onlumanlɛ nɩ, nɩ ɩsɛ kɛɛ benyia Nyamɩnlɩ Odwokɔ yɩ nwʋ nnimidi mɔɔ idi munli. Nɩ Samaliyiamaa nɩ de di kɛɛ Gyɛnɛsɩsɩ kɔbʋmɩ Ditilonɔmi, yɛɛ ebiye a Dwohyuwa buuku yi la yɛ ɩzʋ̃ Nyamɩnlɩ kɛ a. Naasʋ̃ nɩ Samaliyiamaa yɩ bekilaa Mɛzaya nɩ ɔhʋanɩ kɛmɔ nɩ Nyamɩnlɩ wɔ nwʋmɔ anʋhʋba wɔ Ditilonɔmi 18:​18, 19 nɩ. (Dwɔ. 4:25) Meti sɛ nɩ bɛkɛvata bɛkɛma onlumanlɛ a, nɩ ɩsɛ kɛɛ bede bedi kɛɛ Gyisɛsɩ yɛ lɛ Mɛzaya mɔɔ bɔwɔlɩ yɩ nwʋ anʋhʋba nɩ. Ɔzɔ pɛpɛɛpɛ yɛ “Samaliyiamaa sʋ̃maa” yɛlɩ a. (Dwɔ. 4:39) Nɩ ɩsɛ kɛɛ bo nu be sʋ̃ bɔ mmɔdɩnɩ di mmenii nu nyiyimi mɔɔ nɩ ɩkɔlɩɩ zʋlɔ wɔ Samaliyiamaa nɩɩ Dwuumaa bɛ avinli mɔɔ ile be ti nɩ zʋ.—Lk. 9:​52-54.

4. Kɛmɔ Egyima 8:​5, 6, 14 kã nɩ, mɩnla yɛ Samaliyiamaa yɩ be yɛlɩ wɔ Fɩlɩpɩ yi odwokɔbahanlɛ yɩ nwʋ a?

⁴ Mɩnla yɛ ɩwʋwalɩ Samaliyiamaa nɩ ma bonlumanlɩ a? Mmɩlɩ mɔ odwokɔbahanlɛvʋlɔ Fɩlɩpɩ hanlɩ “Kɩlayɩsɩ yɩ nwʋ Odwokɔba nɩ wɔ kɛnɩ” nɩ, Samaliyiamaa yɩ be ‘zɔlɩ Nyamɩnlɩ odwokɔ nɩ nu.’ (Kɩnga Egyima 8:​5, 6, 14.) Nɩ Fɩlɩpɩ dɩ Dwuunii naasʋ̃ bɛápʋ yi odwokɔ yɩ. Ebiye a, bɛhakɛlɩ kɛɛ Ɛhɛlɛlɛdwokɔ yɩ kã kɛɛ Nyamɩnlɩ iáhila mmenii anyunu. (Dit. 10:​17-19) “Bɛyɛlɩ dinyii bediyeli” mɔɔ ɩhanlɩ ɩvalɩlɩ Kɩlayɩsɩ nwʋ nɩ, na benyianlɩ dasɩlɛ petee mɔɔ ikile kɛɛ Nyamɩnlɩ yɛ ɩzʋ̃manlɩ Fɩlɩpɩ a. Fɩlɩpɩ yɛlɩ nnwʋánlɩdɩyɛ sʋ̃maa, ɩzalɩ mmenii adimakɛlɛ na iduli azunzuma avinli.—Egy. 8:7.

5. Mɩnla yɛ ɔkɔhʋla kozuma wɔ Samaliyiamaa yɩ kɛ a?

⁵ Ankɩ ɔzɔ Samaliyiamaa nɩ kɔhʋla kɛhã kɛɛ, iluwakɛɛ bɛ nɩɩ Dwuumaa bɛáhã anzɛnyɩɩ bɛlɛ́tɩlɩ Fɩlɩpɩ yi odwokɔ yɩ kyɩ̃ ti, belétiye yi. Naasʋ̃ bɛáyɛ zɔ. Samaliyiamaa nɩ bɛátwɩnhwɩ̃ bɛ agyia azɩ kɛɛ bokonluma mmɩlɩ mɔ bɛɣa beleli belili kɛɛ mɔɔ Fɩlɩpɩ hilehileli bɛ yɩ dɩ nɔhʋanlɛ nɩ. Bayɩbʋlʋ yɩ kilehile numɔ kɛɛ: “Mɔ Fɩlɩpɩ ɩhanlɩ Odwokɔba nɩ mɔɔ ɩfalɩ Nyamɩnlɩ Bulombunlililɛ nɩ nɩɩ Gyisɛsɩ Kɩlayɩsɩ yi dima nɩ nɩ, beleli yɩ belili na bɛmanlɩ Fɩlɩpɩ inlumanlɩ bo munwatĩĩ; mmenyia nɩɩ mmaalɛ.” (Egy. 8:12) Asʋ̃ ede di kɛɛ Nyamɩnlɩ Odwokɔ yɩ yɛ lɛ nɔhʋanlɛ yɩ a? Na ede di kɛɛ Gyehova Dasɩvʋlɔmaa bɔbɔ mmɔdɩnɩ bɛda ɔlɔlɛ kanyɩɩ mɔɔ ɩdɩ nɔhʋanlɛ Kilisinyiamaa bɔ ndwɩyɛlɛ nɩ ali a? (Dwɔ. 13:35) Sɛ zɔ a, nyia akɛnɣazɩzɩbɛ na si pɔkɔ kɛɛ okonluma, na Gyehova keyila wʋ.

6. Mɩnla ɔhʋanɩ zʋ yɛ Ruben yi ndianwʋ yɩ kɔhʋla kɔwʋwa wʋ a?

⁶ Ruben zʋ̃ Germany, na inyinli wɔ abusunwa be mɔɔ bɛdɩ Dasɩvʋlɔmaa nu. Naasʋ̃ yɩ nnwuakula nu nɩ, nɩ yɩ adwɩnɩ iázi yi pi kɛɛ Gyehova wɔ kɛ. Mɩnla yɛ ɩwʋwalɩ yɩ a? Ɩnwʋnlɩ kɛɛ íni nnimidi sʋ̃maa, meti izili pɔkɔ kɛɛ ikozuma dɩyɛ sʋ̃maa. Ɩhanlɩ kɛɛ: “Wɔ mɩzamɩ mɩ dɩyɛzumanlɛ nu nɩ, mɩbɩbɛlɩ dasɩlɛ azʋlɔtʋ mɔɔ ikile kɛɛ Gyehova wɔ kɛnɩ ankasa. Nɩ ɩsɛ kɛɛ musuma ɛlanɩlanɩlɛ nwʋ dɩyɛ mbɔmɩ sʋ̃maa.” Ɩɣɩnganlɩ Is There a Creator Who Cares About You? buuku yi. Ɔzɔ buuku nɩ nyianlɩ Ruben zʋ tumi baaba. Ɩhã ihileli yɩ nwʋ kɛɛ: ‘Eii! Ntʋlɔnkʋdɩ Gyehova dɩ abiye mɔɔ ɩwɔ kɛnɩ ankasa.’ Na mmɩlɩ mɔ Ruben hɔ gyelalɩ oyuwadɩ munwala egyimayɛlɛdɩka ti nɩ, inyianlɩ ɔlɔlɛ kezile ɩmanlɩ ye oyuwadɩ munwala mmeliyemayɛlɛ okuwu mɔɔ ɔkʋ̃yɛlɛ wɔ numɔ nɩ. Izia ɩhɔlɩ Germany nɩ inlumanlɩ, mmɩlɩ mɔ nɩ ili alʋbɔ 17. Sɛ wʋ adwɩnɩ yɛ wʋ anwɩ̃ anwɩ̃ wɔ Nyamɩnlɩ, Bayɩbʋlʋ yɩ, nɩɩ nninyeni mvʋlɔ nwʋ a, yɛ nwʋmɔ ɛbɩbɛlɛnu. Sɛ enyia nɔhʋanlɛ nnimidi nɩ a, ɩkɔwʋwa ma ekeli adwɩnɩ anwɩ̃ anwɩ̃ bela zʋ. (Ɛfɩ. 4:​13, 14) Na sɛ ɛtɩ ozumanlɛnwʋnlɛ azʋlɔtʋ mɔɔ ɩfalɩ ɔlɔlɛ nɩɩ ɔkʋ̃yɛlɛ mɔɔ ɩwɔ Gyehova yi mmenii mɔɔ bɔwɔ nnɩka mvʋlɔ bɛ avinli nɩ nwʋ odwokɔ, na ɔnwʋ ɔlɔlɛ nɩɩ ɔkʋ̃yɛlɛ mɔɔ ɩwɔ wʋzawʋ wʋ asafʋ nu a, ɩkɛma ɔlɔlɛ mɔɔ ɔwɔ ma ye oyuwadɩ munwala mmeliyemayɛlɛ okuwu nɩ kɛyɛ kezi.

 SƆƆLƲ MƆƆ ƖZƲ̃ TASƐSƖ NƖ NLUMANLƖ

7. Mɩnla ɔhʋanɩ zʋ yɛ nɩ ɩsɛ kɛɛ Sɔɔlʋ sɩnza yɩ adwɩnɩ a?

⁷ Bɛmá yehila Sɔɔlʋ mɔɔ ɩzʋ̃ Tasɛsɩ yi ndianwʋ yɩ. Nɩ bɛdɩdɩ yɩ bʋwɔ wɔ Dwuuda ɔzʋ̃mɩnlɛ nu na ileli dima wɔ Dwuumaa yɩ bo nu. (Gal. 1:​13, 14; Fɩl. 3:5) Mmɩlɩ mɔ nɩ Dwuumaa yɩ bu Kilisinyiamaa yɩ kɛɛ ɔvʋakɩlɛmaa nɩ, Sɔɔlʋ valɩ ɛya dwodwuli diyialɩ bɛ. Nɩ yɩ adwɩnɩ yɛ yɩ kɛɛ ɩyɛɛ mɔɔ Nyamɩnlɩ ɩpɛ yɩ. (Egy. 8:3; 9:​1, 2; 26:​9-11) Meti nɩ sɛ Sɔɔlʋ nyia Gyisɛsɩ nu dedi na inuma a, nɩ ɩsɛ kɛɛ isiyeziye yɩ adwɩnɩ kɛɛ bokodwodwu bekediyia yɩzayɩ sʋ̃.

8. (a) Mɩnla yɛ ɩwʋwalɩ Sɔɔlʋ ma inlumanlɩ a? (b) Kɛmɔ Egyima 22:​12-16 kile nɩ, mɩnla ɔhʋanɩ zʋ yɛ Ananayasɩ wʋwalɩ Sɔɔlʋ a? (Kila mfonyini yi sʋ̃.)

⁸ Mɩnla yɛ ɩwʋwalɩ Sɔɔlʋ ma inlumanlɩ a? Mmɩlɩ mɔ Niibenyia Gyisɛsɩ mɔɔ bɛhyɛ yɩ animinyiamɩ nɩ yɩlɩ yɩ nwʋ ali hileli Sɔɔlʋ nɩ, yɩ anyɩ zunli. (Egy. 9:​3-9) Ɩhyɩlɩ kɔmɩ aɣile asã, na pɩlazunɛ bela íni nwʋmɔ kɛɛ ɩdwɩnɩndwɩnɩnlɩ odwokɔ mɔɔ ɩdʋlɩ yɩ nɩ nwʋ. Nyɛ, Sɔɔlʋ leli lili kɛɛ Gyisɛsɩ yɛ lɛ Mɛzaya nɩ na yɩ mɛdalilɛmaa yɛ bɛdɩ nɔhʋanlɛ ɔzʋ̃mɩnlɛ nu maa a. Ɩkɛyɛ kɛɛ Sɔɔlʋ lili ɛyɛkɛ baaba kɛɛ ɩwʋwalɩ ma bohunli Stivini! (Egy. 22:20) Wɔ aɣile asã yɩ mɛda nɩ, tʋwavʋlɔ be mɔɔ bɔfʋlɔ yɩ Ananayasɩ ɣalɩ Sɔɔlʋ yɩ pɛ, na iwukoli yɩ anyɩ, na ɩhyɛlɩ yɩ ɛzɩzɩbɛ kɛɛ áma ɩtwɩnhwɩ̃ yɩ agyia azɩ kɛɛ ikonluma. (Kɩnga Egyima 22:​12-16.) Sɔɔlʋ zʋ̃ kãnwʋazɩ nu diyeli yi na inlumanlɩ.—Egy. 9:​17, 18.

9. Mɩnla yɛ ɔkɔhʋla kozuma wɔ Sɔɔlʋ kɛnɩ a?

⁹ Sa yɛkʋla yesuma nninyeni be wɔ Sɔɔlʋ kɛnɩ. Ankɩ sa ɩkʋla ɩma ahantanɩ anzɛnyɩɩ enii nwʋ bɔlɔ si yi ɔhʋanɩ kɛɛ ikonluma. Naasʋ̃ ɩáma ɩba yɩ zɔ. Sɔɔlʋ zʋ̃ kãnwʋazɩ nu zɩnzanlɩ yɩ ɛbɩlawɔlɛ na ɩɣa ɩyɛlɩ Gyisɛsɩ yɩ tʋwavʋlɔ. (Egy. 26:​14, 19) Nɩ Sɔɔlʋ pɛ kɛɛ ɩyɛ Kilisinyianii ɩávalɩ nwʋmɔ kɛɛ nɩ izi kɛɛ ɩkɛma bokodwodwu kediyia yɩ nɩ. (Egy. 9:​15, 16; 20:​22, 23) Wɔ yi onlumanlɛ mɛda nɩ, ɩhɔlɩ zʋlɔ ɩvalɩ yɩ nwʋ idianlɩ Gyehova zʋ ma ɩwʋwalɩ yɩ ma igyinanlɩ ndwokɔzɩzɩbɛ azʋlɔtʋ munwa. (2 Kɔl. 4:​7-10) Sɛ onuma ba yɛ Gyehova Dasɩvʋlɔ a, ɩkɛma ekeyiyia wʋ dedi nwʋ odwohilalɛ  anzɛnyɩɩ ndwokɔzɩzɩbɛ azʋlɔtʋ. Naasʋ̃ nyia anwʋlazʋ kɛɛ Nyamɩnlɩ nɩɩ Gyisɛsɩ kɔwʋwa wʋ eɣile bela na wʋahɔ zʋ wʋali nɔhʋanlɛ.—Fɩl. 4:13.

10. Mɩnla ɔhʋanɩ zʋ yɛ Anna yi ozumanlɛnwʋnlɛ yɩ kɔhʋla kɔwʋwa wʋ a?

¹⁰ Anna nyinli wɔ Europe avindelɩyɛ ɔfʋã nu. Wɔ yɩ maamɩ yi onlumanlɛ mɛda nɩ, Anna yɩ papa manlɩ ɔhʋanɩ ma yɩzayɩ sʋ̃ izumanlɩ Bayɩbʋlʋ yɩ mmɩlɩ mɔ nɩ ili alʋbɔ 9. Naasʋ̃ mmɩlɩ mɔ Anna yi mmusunwamaa nwʋnlɩ kɛɛ ɩ nɩɩ Gyehova Dasɩvʋlɔmaa bosumaa Bayɩbʋlʋ yɩ nɩ, bodwodwuli bediyialɩ yɩ. Nɩ yi mmusunwa yɩ nwʋ yɩ kɛɛ sɛ abiye twɩ̃ yɩ nwʋ wɔ bɛ nlabenyiammɔ bɔ ɔzʋ̃mɩnlɛ nwʋ a, nɩ igua abusunwa yɩ anyunu azɩ. Mmɩlɩ mɔ Anna lili alʋbɔ 12 nɩ, ɩhã ihileli yɩ papa kɛɛ ɩpɛ kɛɛ inuma. Nɩ yɩ papa pɛ kɛɛ ɩnwʋ kɛɛ ɩdɩ yɩzayɩ yɩ pɔkɔzilɛ anzɛnyɩɩ abiye yɛ ɩhyɛɛ yɩ a. Anna hanlɩ kɛɛ, “Mʋdɔ Gyehova.” Yɩ papa leli dianlɩ numɔ kɛɛ sa ɩkʋla inuma. Wɔ yi onlumanlɛ mɛda nɩ, yi mmusunwamaa hɔlɩ zʋlɔ yɛlɩ yɩ atɩɩtɩɩ. Yi busunwanii ɔkʋ̃ hã hileli yi kɛɛ, “Sɛ ɔwɔlɩ ɛbɩla tanɩ anzɛnyɩɩ ɔnlʋnlɩ nnuno tanɩ po a, ankɩ ɩdɩ baaba ɩtɛla kɛɛ ɛkɛɣa kɛyɛ Gyehova Dasɩvʋlɔ.” Mɩnla yɛ ɩwʋwalɩ Anna a? Ɩhanlɩ kɛɛ, “Gyehova wʋwalɩ mɩ ma minyianlɩ anwʋzɩzɩbɛ, na mɩ maamɩ nɩɩ mɩ papa sʋ̃ wʋwalɩ mɩ baaba.” Anna kɛlɛ mmɩlɩ pɔkyɩɩ mɔɔ ɩnwʋnlɩ kɛɛ Gyehova ɩbʋwaa yɩ wɔ yɩ ɛbɩlawɔlɛ nu nɩ itiã kɛnɩ. Ɩwɔ numɔ la a nɩ ɩhɔ ihila numɔ na ama yɩ ɛɣɛɛlɛ iávili kezimɔ Gyehova wʋwalɩ yɩ nɩ. Sɛ wu kunlu tuli odwodwudiyialɛ nwʋ a, kakɛ kɛɛ Gyehova kɔwʋwa wʋzawʋ sʋ̃.—Hib. 13:6.

KƆNƐLƖYƆSƖ NLUMANLƖ

11. Mɩnla yɛ ankɩ ɩkɔhʋla kɛma Kɔnɛlɩyɔsɩ kɔhwɩnhwɩ̃ yɩ agyia azɩ kɛɛ ikonluma a?

¹¹ Sa yɛkʋla sʋ̃ yesuma debe mɔɔ nwʋmɔ hyinyia wɔ Kɔnɛlɩyɔsɩ yi ndianwʋ mɔɔ ɩwɔ Bayɩbʋlʋ nu nɩ nu. Nɩ ɩdɩ sogyia ebani mɔɔ ikila Wulomi azogyiamaa 100 zʋ. (Egy. 10:1) Iluwa eyi ti, ɩkɛyɛ kɛɛ nɩ ɩdɩ enii titili wɔ dɩka mɔɔ ɩda nɩɩ azogyiamaa yɩ bo nu. Nɩ “ɩfa akyɛdɩ sʋ̃maa ɩma Dwuumaa ahyinyiamaa.” (Egy. 10:2) Gyehova zʋ̃manlɩ sʋ̃mavʋlɔ Pita kɛɛ ɩhɔ ɩhã odwokɔba yɩ ihilé yi. Asʋ̃ Kɔnɛlɩyɔsɩ yi dibilɛ manlɩ ɩhwɩ̃hwɩnlɩ yɩ agyia azɩ kɛɛ ikonluma a?

12. Mɩnla yɛ ɩwʋwalɩ Kɔnɛlɩyɔsɩ ma inlumanlɩ a?

¹² Mɩnla yɛ ɩwʋwalɩ Kɔnɛlɩyɔsɩ ma inlumanlɩ a? Bayɩbʋlʋ kã kɛɛ nɩ “ɩyɛ Nyamɩnlɩ, na ɩ nɩɩ yɩ awudomaa bo munwatĩĩ bɔsʋ̃mɩ Nyamɩnlɩ.” Na nɩ Kɔnɛlɩyɔsɩ kɔ zʋlɔ bɔ Nyamɩnlɩ mpayɩ. (Egy. 10:2) Mmɩlɩ mɔ Pita hanlɩ odwokɔba yɩ hileli Kɔnɛlɩyɔsɩ nɩ, ɩ nɩɩ yɩ awudomaa leli Kɩlayɩsɩ lili na ndɛndɛ zʋ la bonlumanlɩ bɛ. (Egy. 10:​47, 48) Nɩ Kɔnɛlɩyɔsɩ wɔ ɛpɛ kɛɛ ɩkɛyɛ nzɩnzanlɩyɛ bela mɔɔ ihyinyia na ama ɩ nɩɩ yɩ awudomaa bɛahʋla bɛazʋ̃mɩ Gyehova.—Dwh. 24:15; Egy. 10:​24, 33.

13. Mɩnla yɛ ɔkɔhʋla kozuma wɔ Kɔnɛlɩyɔsɩ kɛ a?

¹³ Dɩkɛɛ Sɔɔlʋ nɩ, ankɩ Kɔnɛlɩyɔsɩ kɔhʋla kɛma yi dibilɛ kezi yɩ ɔhʋanɩ kɛɛ ɩkɛɣa kɛyɛ Kilisinyianii. Naasʋ̃ ɩáma ɔhʋanɩ ma ɩba yɩ zɔ. Asʋ̃ ikehyinyia kɛɛ ɛyɛ nzɩnzanlɩyɛ nɣezile wɔ wʋ ɛbɩlawɔlɛ nu na ama wʋahʋla wʋanluma a? Sɛ ɔzɔ a, Gyehova kɔwʋwa wʋ. Ikeyila mmɔdɩnɩ mɔɔ ɔbɔɔ kɛɛ ɛkɛva Bayɩbʋlʋ nu egyinalɛzʋ-ndwokɔ kɛyɛ egyima wɔ wʋ ɛbɩlawɔlɛ nu ama wʋahʋla wʋazʋ̃mɩ yɩ nɩ zʋ.

14. Mɩnla ɔhʋanɩ zʋ yɛ Tsuyoshi yi ozumanlɛnwʋnlɛ yɩ kɔhʋla kɔwʋwa wʋ a?

¹⁴ Nɩ ɩsɛ kɛɛ Tsuyoshi mɔɔ ɩzʋ̃ Japan nɩ yɛ nzɩnzanlɩyɛ wɔ yi egyima nu na ama ɩavata ɩama onlumanlɛ. Nɩ ɩyɛ egyima wɔ sukuulu kezile be mɔɔ bekile kezimɔ bɛhyɩhyɛ fɩlawɛsɩ nu. Nɩ sukuulu ebani yi íni kɛnɩ a, mɛyɩ yɛ nɩ ɩwɔ kɛ a. Nɩ sɛ ebani yi ɩákʋla ɩkɔ ayile tʋ a, nɩ ɩma Tsuyoshi kɔ siye yɩ agyia nu na ɩyɛ Buddamaa bɛ amanɩ azʋlɔtʋ mɔɔ sɛ ebani yi hɔlɩ a ankɩ ɩkɛyɛ nɩ. Naasʋ̃ mmɩlɩ mɔ Tsuyoshi ɣa zumanlɩ nɔhʋanlɛ mɔɔ ɩfalɩ owulo nwʋ nɩ,  ɩnwʋnlɩ kɛɛ sɛ ɩkɔ zʋlɔ ɩyɛ ɔzɔ amanɩ yɩ a, ɩlɔ́kʋla konluma. Meti izili pɔkɔ kɛɛ ɩlɛ́fa yɩ nwʋ kowula ɔzɔ amanɩ yɩ nu dɔkʋ̃. (2 Kɔl. 6:​15, 16) Tsuyoshi nɩɩ yi ebani yi wɔlɩ nwʋmɔ nkɔmmɔ. Mɩnla yɛ ɩzʋ̃ numɔ ɩɣalɩ a? Ɩáyɩ yɩ ali na ɩáma ɩfa yɩ nwʋ wula ɔzɔ amanɩ yɩ nu dɔkʋ̃. Ɩwɔlɩ yɩ Bayɩbʋlʋ dɩyɛzumanlɛ tʋ nɩ, ilili kɛyɛ ɔlʋbɔ ɔkʋ̃ yɛ inlumanlɩ a. a Sɛ ihyinyia kɛɛ ɛyɛ nzɩnzanlɩyɛ wɔ wʋ egyima nu na ama wʋayɛ mɔɔ ɩsɔ Nyamɩnlɩ anyɩ a, nyia anwʋlazʋ kɛɛ Gyehova kɛva ɛ nɩɩ wʋ abusunwa bɛ ahyinyiadɩ kɛma bɛ.—Ndw. 127:2; Mt. 6:33.

KƆLƐNTƖMAA NƖ NLUMANLƖ

15. Mɩnla nninyeni yɛ ankɩ ɩkɔhʋla kezi Kɔlɛntɩmaa nɩ ɔhʋanɩ kɛɛ bokonluma a?

¹⁵ Nɩ mmenii mɔɔ bɛda ɔwɔkɩ Kɔlɛntɩ nɩ bɛ anyɩ bʋlʋ nnwʋnlamɩ ɔfʋã nu nninyeni na bɛ ɛbɩla zɩkɛ sʋ̃. Nɩ bo nu sʋ̃maa bɔ ɛbɩla mɔɔ Nyamɩnlɩ ɩábɛ yɩ. Meti nɩ ɩkɔhʋla kɛyɛ sɩ kɛma abiye mɔɔ ɩda kɛnɩ nɩ kɛɛ ɩkɔzʋ̃mɩ Gyehova. Naasʋ̃, mmɩlɩ mɔ sʋ̃mavʋlɔ Pɔɔlʋ hɔlɩ ɔzɔ twonwa yɩ nu hɔ hanlɩ Kɩlayɩsɩ nwʋ odwokɔba yɩ wɔ kɛnɩ nɩ, ‘mmenii sʋ̃maa wɔ Kɔlɛntɩ ɛkɛnɩ mɔɔ bɛdɩlɩ Odwokɔba nɩ, beleli belili na bonlumanlɩ bɛ.’ (Egy. 18:​7-11) Akʋ̃, Niibenyia Gyisɛsɩ Kɩlayɩsɩ yɩlɩ yɩ nwʋ hileli Pɔɔlʋ wɔ anyɩnlɩzʋdɩyɛnwʋnlɛ nu na ɩhanlɩ kɛɛ: “Mmenii sʋ̃maa bɔwɔ twonwa yɩ nu mɔɔ bɛdɩ mɩ dɩyɛ a.” Meti Pɔɔlʋ valɩ ɔlʋbɔ ɔkʋ̃ nɩɩ ɔfʋã hɔlɩ zʋlɔ hanlɩ odwokɔba yɩ wɔ kɛnɩ.

16. Mɩnla yɛ ɩwʋwalɩ Kɔlɛntɩmaa nɩ ma bonlumanlɩ a? (2 Kɔlɛntɩmaa 10:​4, 5)

¹⁶ Mɩnla yɛ ɩwʋwalɩ Kɔlɛntɩmaa nɩ ma bonlumanlɩ a? (Kɩnga 2 Kɔlɛntɩmaa 10:4, 5.) Nyamɩnlɩ Odwokɔ yɩ nɩɩ yi sunzuma nwanzanwanza nɩ wʋwalɩ bɛ ma bɛyɛlɩ nzɩnzanlɩyɛ nɣezile wɔ bɛ ɛbɩlawɔlɛ nu. (Hib. 4:12) Bɛzabɛ mɔɔ bɔwɔ Kɔlɛntɩ mɔɔ beleli odwokɔba mɔɔ ɩfalɩ Kɩlayɩsɩ nwʋ belili nɩ, bɔhʋla beyiakili subanɩ nɩɩ nyɛlɩyɛ be dɩkɛɛ nzanyianlɛ, awuloyɛlɛ, mmenyia nɩɩ mmenyia nɩɩ mmaalɛ nɩɩ mmaalɛ mɔɔ bɛ nɩɩ bɔ nwʋ da nɩ.—1 Kɔl. 6:​9-11. b

17. Mɩnla yɛ ɔkɔhʋla kozuma wɔ Kɔlɛntɩmaa nɩ bɛ kɛ a?

¹⁷ Yɛ yɩ ndwɩ kɛɛ, ɩwɔ numɔ kɛɛ nɩ Kɔlɛntɩmaa nɩ be wɔ subanɩ azʋlɔtʋ mɔɔ ile ndɩnɩ wɔ bo nu mɔɔ ɩsɛ kɛɛ beyiaki dɩyɛ, naasʋ̃ bɛátɩ nɣanlɩ kɛɛ ɩyɛ sɩ sʋ̃maa kɛɛ bɛkɛɣa kɛyɛ Kilisinyiamaa. Bɔwɔlɩ mmɔdɩnɩ kɛɛ bokoluwa ɔhʋanɩ ɛdɩnɣa yɩ mɔɔ ɩkɔ nnwʋanlɩ mɔɔ íni awielɩyɛ nu nɩ zʋ. (Mt. 7:​13, 14) Asʋ̃ ɔbɔɔ mmɔdɩnɩ kɛɛ ekeyiaki subanɩ anzɛnyɩɩ nyɛlɩyɛ tanɩ be na ama wʋahʋla wʋanluma a? Áma  eyiaki kɛɛ ɔkɔhʋ̃ kediyia subanɩ tanɩ eyimmɔ! Siã Gyehova kɛɛ ɩvá yi sunzuma nwanzanwanza yɩ ɩwʋwá wʋ na ɔbʋ tanɩ nwʋ akɔnɔ.

18. Mɩnla ɔhʋanɩ zʋ yɛ Monika yi ozumanlɛnwʋnlɛ yɩ kɔhʋla kɔwʋwa wʋ a?

¹⁸ Monika mɔɔ ɩzʋ̃ Georgia wɔlɩ mmɔdɩnɩ paa kɛɛ ikeyiaki ndɛnɩ evinli hanlɛ na iayiaki ndwomi nɩɩ nninyeni mɔɔ ɩávata hilalɛ na ama ɩahʋla ianluma. Ɩhanlɩ kɛɛ “Wɔ mu nnwuakula nu nɩ, nɩ mɔɔ ɩbʋwa mɩ yɛ lɛ mpayɩwɔlɛ. Nɩ Gyehova zi kɛɛ mɩpɛ kɛɛ mɩyɛ mɔɔ ɩtɩnɣɛ, na ɩwʋwalɩ mɩ mmɩlɩ munwala na ihileli ɔhʋanɩ mɩ.” Monika nlumanlɩ mmɩlɩ mɔ nɩ ili alʋbɔ 16. Asʋ̃ nyɛlɩyɛ be wɔ kɛnɩ mɔɔ ɩsɛ kɛɛ eyiaki na ama wʋ ɔzʋ̃mɩnlɛ ɩazɔ Gyehova anyɩ a? Kɔ zʋlɔ siã Gyehova kɛnɩ anwʋzɩzɩbɛ na ama wʋahʋla wʋayɛ nzɩnzanlɩyɛ. Gyehova ɩzʋ̃ yɩ ahʋnlɩnɩ nu ɩfa yi sunzuma nwanzanwanza yɩ ɩma yɛ.—Dwɔ. 3:34.

WƲ DEDI KƆHƲLA KODUDU AVILE

19. Mɩnla yɛ ɩkɔhʋla kɔwʋwa wʋ ma ekeli ndwokɔzɩzɩbɛ mɔɔ ɩdɩ kɛɛ file zʋ a? (Kila mfonyini yi sʋ̃.)

¹⁹ Nyia anwʋlazʋ kɛɛ Gyehova dɔ wʋ na ɩpɛ kɛɛ ɛba kɩnla yɩ abusunwa yɩ nwʋ. Kezimɔ Gyehova tɩ nɣanlɩ wɔ wʋ nwʋ nɩ ɩázɩnza ɩávalɩ nwʋmɔ kɛɛ eyiyiaa ndwokɔzɩzɩbɛ mɔɔ ɩdɩ kɛɛ isii wʋ onlumanlɛ nwʋ ɔhʋanɩ nɩ. Gyisɛsɩ hanlɩ hileli yɩ adʋwavʋlɔ yɩ be kɛɛ: “Sɛ bɛlɛ dedi ɛgyɩkɩ̃ɩ̃ mɔɔ ɩdɩ kɛɛ Masɩtadɩ mma a, ankɩ mʋnlʋmmɔ bekeze file eyi kɛɛ, ‘Ɔzʋ̃ ɛkɩhyɩ tudu kɔ dɛbawulo’ na ankɩ ɩkɔhɔ, na ankɩ dɩyɛ bela ɩyɛlɛ ɩlɛ́yɛ ɛzɩzɩbɛ mʋnlʋmmɔ.” (Mt. 17:20) Bɛzabɛ mɔɔ ɩhanlɩ ɔzɔ odwokɔ yɩ ihileli bɛ nɩ, nɩ bɛ nɩɩ yɩ luwa alʋbɔ ɛgyɩkɩ̃ɩ̃ be la, meti nɩ ihyinyia kɛɛ bɔkɔ zʋ bɛma be dedi yɛ kezi. Naasʋ̃ Gyisɛsɩ manlɩ benyianlɩ anwʋlazʋ kɛɛ sɛ benyia dedi kezile a, Gyehova kɔwʋwa bɛ ma bekeli ndwokɔzɩzɩbɛ mɔɔ ɩdɩ kɛɛ file zʋ. Gyehova kɔwʋwa wʋzawʋ sʋ̃ ma ɛkɛyɛ zɔ la!

20. Mɩnla ɔhʋanɩ zʋ yɛ ɔwɔkɩ nɩɩ nnɛ mmɩlɩ nu Kilisinyiamaa be ndianwʋ mɔɔ yezunzu nwʋmɔ wɔ dɩyɛzumanlɛ eyi nu nɩ hyɛ wʋ ɛzɩzɩbɛ a?

²⁰ Sɛ ɔnwʋ kɛɛ nninyeni be wɔ kɛnɩ mɔɔ sa ɩkʋla isi wʋ ɔhʋanɩ kɛɛ okonluma a, tu yɩ tʋ ndɛndɛ zʋ la. Ma ɔwɔkɩ nɩɩ nnɛ mmɩlɩ nu Kilisinyiamaa be ndianwʋ yɩ ɩyɩkyɩ wʋ ɛɣɛɛlɛ na ɩhyɛ wʋ ɛzɩzɩbɛ. Ma be ndianwʋ yɩ ɩhyɛ́ wʋ ɛzɩzɩbɛ ma eyila wʋ nwʋ zʋ ma Gyehova na onluma. Ɩdɩ pɔkɔzilɛ baaba mɔɔ ɩtɛla ebiyela mɔɔ sa ɔkʋla si!