Ye munwala wɔ mmɩlɩ ɛgyɩkɩ̃ɩ̃ mɔɔ yɛfa yesuma dɩyɛ. Naasʋ̃ kɛ ɩkɛyɛ na yeanyia ɔzɔ mmɩlɩ ɛgyɩkɩ̃ɩ̃ yɩ zʋ mfasʋ a? Mɔɔ ili bɔmʋnlɩ, áma ɛfa mɔɔ osumaa nɩ tu tɔlɔnwa. Sɛ esi abʋtalɩ osuma debe ɛgyɩkɩ̃ɩ̃ na ɛtɩ yɩ tʋ bʋwɔ a, ɩdɩ baaba kʋlaa ɩtɛla kɛɛ ɛkɛɣɩnga nninyeni sʋ̃maa mɔɔ ɔlɔ́nwʋ mma mɔɔ ɩwɔ nu.

Akʋ̃, nwʋ mɔɔ nwʋmɔ hyinyia paa mɔɔ okozuma. (Ɛfɩ. 5:15, 16) Adwɩnɩhilelɛ eyimmɔ kɔhʋla kɔwʋwa paa:

• Kɩngá Bayɩbʋlʋ yɩ eɣile bela. (Ndw. 1:2) Sa ɔkʋla ɛfa Bayɩbʋlʋ ɛɣɩngalɛ mɔɔ botua bɛma yɛ wɔ dapɛnɩ avinli dɩyɛzumanlɛ tʋ nɩ ɔbɔ yɩ tʋ.

• Dí bɔmʋnlɩ suma Ɔwɩɛnɩlɛ Aɣanɩ yɩ nɩɩ dapɛnɩ avinli dɩyɛzumanlɛ yɩ ansaana wʋahɔ. Siyeziye wʋ nwʋ bʋwɔ na wʋahʋla wʋama munwalɩyɛ.—Ndw. 22:22.

• Yesiãã wʋ, bɔ mmɔdɩnɩ sʋ̃ kɛɛ ɛkɛɣɩnga yɛ awuuku azʋlɔtʋ yɩ, dɩkɛɛ magezini mɔɔ yɛkyɩkyɛ yɛma mmenii yi, ndwokɔ azʋlɔtʋ mɔɔ ɩba jw.org zʋ nɩɩ ye vidiyo azʋlɔtʋ yɩ.

• Yɛ ɛbɩbɛlɛnu. Sɛ eyiyiaa ndwokɔzɩzɩbɛ be, ɛpɛ kɛɛ enyia odwokɔɣizialɛ be nwʋ munwalɩyɛ anzɛnyɩɩ ɛpɛ kɛɛ ɛtɩ Bayɩbʋlʋ nu odwokɔ be tʋ bʋwɔ a, sa ɔkʋla ɛyɛ nwʋmɔ ɛbɩbɛlɛnu. Sɛ ɛpɛɛ eyi nwʋ ndwokɔ sʋ̃maa a, kila “Bible Study Activities” ɔfʋã mɔ ɩwɔ jw.org nɩ.