Paul: Nɩ ɩdɩ November 1985, nɩ yeluwa ɔhʋanɩ zʋ yɛkɔɔ yɛkɛyɛɛ yɛ odwokɔbadɛlɛlɛ egyimalilɛ mɔɔ ili bɔmʋnlɩ wɔ Liberia, mɔɔ ɩwɔ Africa Adɔlɩyɛ. Nɩ yɛ anyɩ le paa! Yɛ pileeni yi gyinanlɩ wɔ Senegal. Anne hanlɩ kɛɛ, “Ɩka kɛyɛ dɔnɩhwɩlɩ ɔkʋ̃ pɛ nɩ yedwu Liberia!” Ɩákyɛ bela yɛ bɛvalɩ amanɩyɛwɔlɛ bɛɣalɩ kɛɛ: “Bɛzabɛ mɔɔ bɔwɔ pileeni yi nu mɔɔ bɔkɔɔ Liberia nɩ, bodwú azɩ. Mmenii be pɛ kɛɛ bɛfa nhyɛ botu aɣanɩ yɩ wɔ zʋlɔ, meti yɛlɔ́kʋla yɛkɔhɔ kɛ.” Meti yedwuli azɩ wɔ Senegal, na yɛ nɩɩ odwokɔbadɛlɛlɛmaa mɔɔ bɔwɔ kɛnɩ nɩ wʋwalɩ aɣile bunlu. Yɛdɩlɩ wɔ news nu kɛɛ bokũhũũ mmenii sʋ̃maa, na aɣanɩ yɩ hyɛ kɛɛ áma abiyela finde nunuma, na abiyela mɔɔ bɔkɔnwʋ yɩ kɛɛ iluwaluwa punwuanu nɩ, bokohũ yi.

Anne: Yɛdɩ mmenii mɔɔ yekila yɛ nwʋ bʋwɔ paa. Mu nnwuakula nu munwala, nɩ bezi mɩ kɛɛ abiye mɔɔ mu kunlu tuli dɩyɛ nwʋ paa. Mutuaa kaalɩ ɔhʋanɩ po a, nɩ mu kunlu du! Naasʋ̃ nɩ yezi yɛ kɛnɣa kɛɛ ɔhʋanɩ bela zʋ, sa yɛkɔ yɛyɛ ye egyimalilɛ yɩ.

Paul: Mɩ nɩɩ Anne munwala nyinli wɔ dɩka ɔkʋ̃ wɔ England adɔlɩyɛ ɔfʋã nu. Mɩ awʋvʋlɔ nɩɩ Anne yɩ maamɩ hɔlɩ zʋlɔ hyɛlɩ yɛ ɛzɩzɩbɛ kɛɛ yɛyɛ́ ɔhʋanɩbukolɛ egyima yɩ be, meti yewieli sukuulu la yɛ yɛɣa yɛyɛlɩ ɔhʋanɩbukolɛmaa a. Mmɩlɩ mɔ yezili pɔkɔ kɛɛ yɛkɛva yɛ mmɩlɩ munwala yɛkɛyɛ ɔzʋ̃mɩnlɛ egyima yɩ nɩ, bɛ anyɩ leli paa. Milili alʋbɔ 19 nɩ, minyianlɩ ɔnwʋmɔ ɔhʋanɩ mʋhɔ mʋzʋ̃mɩnlɩ wɔ Bɛtɩlɩ, na mɩ nɩɩ Anne gyialɩ wɔ 1982 mɛda nɩ, ɩɣa ɩhɩnlanlɩ mʋ nwʋ wɔ kɛnɩ.

Anne: Nɩ yɛ anyɩ deli Bɛtɩlɩ nwʋ paa, naasʋ̃ nɩ yɛpɛ paa kɛɛ yɛkɔhɔ kɔzʋ̃mɩ wɔ dɩka mɔɔ mmʋwalɩyɛ nwʋ hyinyia. Mmeliyema be mɔɔ nɩ bɛdɩ odwokɔbadɛlɛlɛmaa mɔɔ yɛ nɩɩ bɛ wɔlɩ numɔ yɛlɩ egyima wɔ Bɛtɩlɩ nɩ, bo ozumanlɛnwʋnlɛ azʋlɔtʋ yɩ hyɛlɩ ɛpɛ mɔɔ nɩ yɛwɔ yɩ nu ɛzɩzɩbɛ. Nɩ yɛbɔ eyi nwʋ mpayɩ nunuma bela, yɛyɛlɩ zɔ alʋbɔ asã. Meti mmɩlɩ mɔ bɔdʋlɩ salɛ bɔvʋlɔlɩ yɛ kɛɛ yɛhɔ́ Giliyadɩ sukuulu mɔɔ ɩtɔ zʋlɔ 79 yɩ be wɔ 1985 nɩ, yɛ anyɩ leli paa! Bɛ nɩɩ yɛ hɔlɩ Liberia wɔ Africa Adɔlɩyɛ.

Paul: Pileeni mɔɔ ili bɔmʋnlɩ mɔɔ bɛmanlɩ ɔhʋanɩ kɛɛ ɩhɔ́ Liberia nɩ, yɛvʋlɩ ebiye. Nɩ mmenii mɔɔ bɔwɔ kɛnɩ nɩ bo kunlu du, na nɩ bɛlanwʋ la bɛáma ɔhʋanɩ ma mmenii finde nunuma. Nɩ mmenii yi bo kunlu du nkʋ̃ʋ̃ ma sɛ kaalɩ be ituaa numɔ wɔ dɩka mɔɔ ɔlɔmɩ wɔ na ɩyɛ dede aɣilemvile nu po a, nɩ bo munwala bɛtɩnyɩaa dɩnyɩa numɔ, nɩ abiyela diã yɩ nwʋ azɩ. Mɔɔ ɩkɛyɛ na ye kunlu iáduli sʋ̃maa nɩ, nɩ yɛbɔ nu yɛkɩnga Ndwomi buuku  yi yɩ ɔfʋã be nunuma bela. Naasʋ̃ ɩávalɩ nwʋmɔ mɔɔ nɩ yeyiyiaa nɩ, nɩ yɛ anyɩ deli ye egyimalilɛ yɩ nwʋ paa. Nɩ Anne kɔ dasɩlɛlilɛ eɣile bela, na mɩzamɩ sʋ̃ mɩ nɩɩ Eliyema John Charuk a kɔ yɛ egyima wɔ Bɛtɩlɩ. John yi ozumanlɛnwʋnlɛ nɩɩ kezimɔ nɩ ɩtɩ mmeliyema mɔɔ bɔwɔ kɛnɩ bɔ bʋwabɩlɛ yɩ tʋ nɩ wʋwalɩ mɩ paa.

Anne: Mɩnla yɛ ɩmanlɩ yɛ anyɩ lelili Liberia nwʋ ndɛndɛ zɔ a? Iluwa ye mmeliyema mmenyia nɩɩ mmaalɛ yɩ ti a. Nɩ bɔdɔ yɛ paa na bedi nɔhʋanlɛ sʋ̃. Yɛ nɩɩ bɛ nyianlɩ ɔhɔnwʋvalɛ mɔɔ numɔ yɛ sɩ, na bɛɣa bɛyɛlɩ yɛ abusunwa. Bɛmanlɩ fʋlɔdulɛ baaba yɛ na bɛhyɛlɩ yɛ ɛzɩzɩbɛ sʋ̃. Nɩ ɛkɛnɩ dasɩlɛlilɛ yɛ fɛ baaba. Sɛ ɛ nɩɩ abiye bɔ nkɔmmɔ na wʋákyɛ wɔ kɛnɩ pɛ, nɩ ɩva ɛya! Ɔkɔnwʋ yɩ nɩ, nɩ mmenii gyĩ ahanlɩ ahanlɩ bɔbɔɔ Bayɩbʋlʋ nu nkɔmmɔ. Nɩ ɩáyɛ sɩ kɛɛ ɔkɔhɔ kɛhɩnla bɔ nkɔmmɔ yɩ nwʋ. Nɩ yɛwɔ Bayɩbʋlʋ dɩyɛzumanlɛmaa sʋ̃maa, na nɩ ɩyɛ sɩ kɛɛ yɛ nɩɩ bo munwala kozuma dɩyɛ po. Nɩ azɩlɛ-sini yi nu yɛ fɛ paa!

Paul: Yenyianlɩ azʋ̃nudwolɩyɛ ɛgyɩkɩ̃ɩ̃ kɛyɛ alʋbɔ anla. Naasʋ̃ wɔ 1989 nɩ, dɩyɛ bela zɩnzanlɩ, kʋnɛ be wɔlɩ yɩ tʋ. Wɔ July 2, 1990 nɩ, bɛzabɛ mɔɔ nɩ bɛpɛ kɛɛ botu aɣanɩ yɩ wɔ zʋlɔ nɩ, beleli dɩka be mɔɔ ibike Bɛtɩlɩ nɩ bɔwɔlɩ zʋlɔ. Meti kɛyɛ aziyianɩ asã nɩ, nɩ yɛáhʋla yɛ nɩɩ mmenii mɔɔ béni manlɩ yɩ nu, dɩkɛɛ ye mmusunwamaa, nɩɩ oyuwadɩ munwala egyimayɛlɛdɩka ti po di nkitanwʋ. Nɩ basabasayɛlɛ ɩkɔlɩɩ zʋlɔ wɔ dɩka bela, alɩyɛ nwʋ yɛlɩ na, na bɔdʋlɩ mmaalɛ sʋ̃maa mmɔna. Eyi hɔlɩ zʋlɔ alʋbɔ 14 wɔ manlɩ yɩ nu dɩka bela.

Anne: Nɩ mmusunwa okuwu be bɔkʋ̃ʋ̃ na bokũhũũ mmenii mɔɔ bɔwɔ mmusunwa okuwu mvʋlɔ nu nɩ. Nɩ azogyiamaa mɔɔ beziyeziye bɔ nwʋ ɛyɛlɛ ɛyɛlɛ na bɛlɛ akʋndɩ azʋlɔtʋ wɔ dɩka bela, na nɩ bɔwɔlɔ mmenii bɛ awudo bɔkɔ bɛfa mɔɔ bɛpɛ bela. Nɩ bo nu be kũ mmenii dɩkɛɛ mɔɔ bokũũ nwɔkɔlɔ la. Azogyiamaa atunwadɩlɛmaa yɩ dʋlɩ barrier wɔ nnɩka azʋlɔtʋ, na bohũhunli mmenii sʋ̃maa mɔɔ nɩ bɛpɛ kɛɛ botua numɔ nɩ, na bɛhyɩhyɛlɩ bɛ avunli wɔ nnɩka eyimmɔ, nɩ bɛhyɩhyɛ avunli yi be wɔ dɩka mɔɔ ibike Bɛtɩlɩ nɩ po. Bohunli ye mmeliyema yɩ be, mɔɔ odwokɔbadɛlɛlɛmaa anwɩ̃ kɩnla nwʋ.

Sɛ nɩ atunwadɩlɛmaa yɩ nwʋ abusunwa okuwu mɔɔ bɛ nɩɩ bɛ bɛáhã yɩ nu maa a, nɩ bokũ bɛ. Ye mmeliyema yɩ be valɩ bɔ nnwʋanlɩ dianlɩ asianɩ nu na bɛvalɩ be mmeliyema mmenyia nɩɩ mmaalɛ mɔɔ bɔzʋ̃ ɔzɔ abusunwa yɩ nu nɩ ziyeli. Ɔzɔ la yɛ odwokɔbadɛlɛlɛmaa nɩɩ Bɛtɩlɩmaa yɩ sʋ̃ yɛlɩ a. Wɔ Bɛtɩlɩ nɩ, nɩ mmeliyema mɔɔ beɣiandi nɩ bo nu be da nniyia mɔɔ ɩwɔ azɩ yɩ nu, na nɩ yɛ nɩɩ bo nu be sʋ̃ da nniyia mɔɔ ɩwɔ sʋlɔ yɩ nu. Wɔ amɩyɛ yɛ aliyia nu mɛyɩ, nɩ yɛ nɩɩ mmenii asunwa yɛ yɛwɔ kɛ a.

Paul: Eɣile bela, nɩ atunwadɩlɛmaa yɩ bɔ mmɔdɩnɩ kɛɛ bɔkɔwɔlɔ ɛkɛnɩ na bɛɣa bɛahila kɛɛ yɛva abiyemmɔ yɛɣɩnta a. Sɛ ɩba yɩ zɔ a, nɩ mmenii anwɩ̃ kɔ anyɩnkɛ yi munwa bɛ nɩɩ atunwadɩlɛmaa yɩ kɔ tɩndɛ, nɩ mmenii anwɩ̃ sʋ̃ bɛva bɛ anyɩ bɛdɛ tokulo yɩ nu  bekilaa mɔɔ ɩkɔlɩɩ zʋ. Sɛ bɛzabɛ mɔɔ bɛ nɩɩ atunwadɩlɛmaa yɩ kɔhɔ kɛdɩndɛ nɩ fa bɛ sa kua bɛ anyunu a, nɩ ikile kɛɛ dɩyɛ bela dɩ bɔkɔɔ. Naasʋ̃ sɛ bɛfa bɛ sa bokua bɛ mɛda a, nɩ ikile kɛɛ odwokɔ ɣa. Sɛ ɩba yɩ zɔ a, nɩ bɛzabɛ mɔɔ bekilaa tokulo yi nu nɩ bɛyɛ ndɛndɛ bɔhɔ bɛhã behile be mmeliyema yɩ ma bɛva bɔ nwʋ beziye.

Anne: Alapɛnɩ sʋ̃maa mɛda nɩ, atunwadɩlɛmaa be mɔɔ nɩ bɛ anyɩ wʋlʋ valɩ nhyɛ wɔlɔlɩ Bɛtɩlɩ kɛnɩ. Mɩ nɩɩ eliyema baalɛ be yɛhɔ yewulalɩ ayuwalɩyɛ na yɛdʋnlɩ numɔ. Nɩ cupboard be wɔ kɛnɩ mɔɔ ɔhʋanɩ ɛgyɩkɩ̃ɩ̃ be la nwʋmɔ, na ɛkɛnɩ yɛ eliyema baalɛ nɩ ɩhɔ iwulalɩ a. Atunwadɩlɛmaa yɩ dʋwalɩ mɩ wɔ sʋlɔ kɛnɩ mɔɔ nɩ tui nɣezile be wɔ bɛ sa nu. Bɛvalɩ ɛya bɔwɔlɩ anyɩnkɛ yɩ nu ɛzɩzɩbɛ ɛzɩzɩbɛ. Nɩ Paul ɩbɔɔ mmɔdɩnɩ kɛɛ ɩlɛ́ma bɛkɛɣa numɔ, meti ɩhanlɩ kɛɛ, “Mɩ yɩ ibiyiaa.” Mmɩlɩ mɔ mʋdʋnlɩ dɩka mɔɔ nɩ eliyema baalɛ yɩ wula wɔ cupboard yi nu nɩ, ɩyɛlɩ dede. Nɩ ɩsɛ kɛɛ misia mɩhyɩhyɛ nninyeni mɔɔ nɩ ɩwɔ cupboard yɩ nu nɩ, na mɛyɩ sʋ̃ leli mmɩlɩ ɛgyɩkɩ̃ɩ̃. Ɩkɛyɛ kɛɛ eyi manlɩ mmenii yi nyianlɩ adwɩnɩ kɛɛ, adɩ debe ɩkɔlɩɩ zʋ, meti mʋ nwʋ munwala wɔlɩ yɩ tʋ kɛɛ ɩwʋsʋʋ la kyɛkyɛ kyɛkyɛ zɛ. Nɩ kɛ ɩkɛyɛ na miawuko anyɩnkɛ yɩ mmɩlɩ mɔ mʋ nwʋ ɩwʋsʋwʋsʋʋ zɔ a? Mʋwɔlɩ mpayɩ wɔ mi ti nu kɛɛ Gyehova ɩwʋwá mɩ. Akʋ̃ muwukoli anyɩnkɛ yɩ na mizemanlɩ bɛ mɔɔ mu kunlu iátu. Bo nu ɔkʋ̃ binyianlɩ mɩ ziyeli ahanlɩ, ɩhɔlɩ cupboard yi nu senyii ɩhɔ iwukoli, na ɩvɩdɩvɩdɩlɩ numɔ. Ɩyɛlɩ yɩ nnwʋánlɩ kɛɛ ɩánwʋ dɩyɛ bela. Ɩ nɩɩ yi mmenii yi bɔhɔ behilahilalɩ nniyia mɔɔ ɩha yɩ nu nɩɩ aliyia kunlu ɛgyɩkɩ̃ɩ̃ be mɔɔ iwula sʋlɔ nɩ nu. Naasʋ̃, bɛánwʋ dɩyɛ bela wɔ kɛnɩ sʋ̃.

Paul: Mbɔmɩ sʋ̃maa nɩ, nɩ itwu nwɔnɩ a yɛányia alɩyɛ yedi, naasʋ̃ Bɛtɩlɩ nwɔnɩ ɔzʋ̃mɩnlɛ mɔɔ nɩ yɛyɛ nɩ ɣa yɛlɩ kɛɛ yɛ nwɔnɩ alɩyɛ. Nɩ ye munwala yezi kɛɛ Bayɩbʋlʋ mɔɔ yɛkɛɣɩnga na yɛazuma nɩ kɛhyɛ yɛ ɛzɩzɩbɛ ma yekegyina pindinyii.

Nɩ yezi kɛɛ sɛ yɛdɔlɩ punwuanu kɛɛ yɛkɛbɛ alɩyɛ nɩɩ nzulo a, ankɩ yɛlɔ́kʋla kɔwɔ mmeliyema mɔɔ yɛva bɛ yeziye nɩ nwʋ banɩ, na ebiye a ankɩ sa bɛba bokũ bɛ. Nɩ ɩyɛ a, ɔhʋanɩ mɔɔ Gyehova duwa zʋlɔ kila yɛ nɩ yɛ nnwʋánlɩ baaba. Gyehova valɩ mɔɔ yehyinyia nɩ manlɩ yɛ na ɩwʋwalɩ yɛ ma bɔlɔ ɩáhyɛ yɛ zʋ.

Ɩwɔ numɔ kɛɛ nɩ nninyeni zɩkɛlɛ la yɛ ɩsɩkɛɛ wɔ manlɩ yɩ nu dɩyɛ, naasʋ̃ nɔhʋanlɛ yɩ manlɩ yenyianlɩ anwʋzɩzɩbɛ. Ye mmeliyema mmenyia nɩɩ mmaalɛ sʋ̃maa ɣiandinli bɩlɩlɩ bɔ nnwʋanlɩ naasʋ̃ bɛáyiaki be dedi nu, na bo kunlu iátu ɩávalɩ nwʋmɔ ndwokɔzɩzɩbɛ mɔɔ nɩ beyiyiaa nɩ. Mmeliyema yɩ be hanlɩ kɛɛ bʋwabɩlɛ eyi mɔɔ bekyinaa yi munwa nɩ, isiyeziyee bɛ ɩkɛma anwʋhyɩlɩyɛ kezile yi. Asafʋ nu mbanimbani nɩɩ mmɩlantɩyɛ mɔɔ bɔwɔ asafʋ yɩ nu yɛlɩ mɔɔ bɔkɔhʋla bela bɔwʋwalɩ be mmeliyema. Mmeliyema mɔɔ beɣiandinli nɩ, bɔwʋwalɩ bɔ nwʋ nkʋ̃kʋ̃ nkʋ̃kʋ̃ na bɛyɛlɩ dasɩlɛlilɛ egyima yɩ wɔ dɩka mɔɔ bɔhɔlɩ nɩ. Dɩyɛ bela mɔɔ benyianlɩ wɔ pɔkɔ yɩ nu nɩ, bɛva begyinanlɩ Kɩndɔm Hɔɔlʋ na bɛyɛlɩ dɩyɛzumanlɛ wɔ kɛ. Wɔ ɔzɔ mmɩlɩ mɔ nɩ nninyeni nu yɛ sɩ nɩ, dɩyɛzumanlɛ nɩɩ dasɩlɛlilɛ mɔɔ mmeliyema hɔlɩ nɩ wʋwalɩ bɛ ma begyinanlɩ bʋwabɩlɛ yɩ munwa. Sɛ nɩ yɛlɛ nninyeni yɛkɛmaa mmeliyema yɩ a, kɛ ankɩ bɛkɛhã kɛɛ yɛɣɩlɛ́ ntalɩ bɛ nɩ, nɩ bɛkã kɛɛ yɛvá dasɩlɛlilɛ baagɩ mfomi yɛɣɩlɛ bɛ. Eyi hanlɩ yɛ ahʋnlɩnɩ paa! Mmenii mɔɔ nɩ alɔbɔ hã bɛ na bɛvalɩ bɛ anyɩ bɔnwʋnlɩ nninyeni ɛyɛlɛ ɛyɛlɛ wɔ kʋnɛ yɩ nu nɩ, nɩ bo nu sʋ̃maa pɛ kɛɛ betiye odwokɔba yɩ. Kezimɔ nɩ Dasɩvʋlɔmaa yɩ wɔ anyɩnlɩlelɛ na bɛáma bʋwabɩlɛ mɔɔ izi nɩ hyɛ bɔ zʋ nɩ yɛlɩ bɛ asibɔnwʋ. Nɩ bɛdɩ kɛɛ hanyɩɩ mɔɔ  itwee wɔ anwunzumi nu. (Mt. 5:​14-16) Ɛhyɩmɛ mɔɔ nɩ ye mmeliyema yɩ fa yɛ dasɩlɛlilɛ egyima yɩ nɩ, ɩhanlɩ atunwadɩlɛmaa mɔɔ bɔ nwʋ yɛ ɛyɛlɛ yɩ be po ma bɛɣa bɛyɛlɩ ye mmeliyema.

Paul: Iluwa kʋnɛ yɩ ti nɩ itwu mmɩlɩ be a, ɩsɛ kɛɛ yɛzʋ̃ Liberia yɛyɩ yɛ nwʋ ɛgyɩkɩ̃ɩ̃. Mbɔmɩ asã zʋ yɛ yeduli yɛhɔ yelili mmɩlɩ sikalɛ be wɔ dɩka be a, na mbɔmɩ anwɩ̃ zʋ sʋ̃ yɛhɔ yelili ɔlʋbɔ ɔkʋ̃ wɔ dɩka be. Eliyema baalɛ be mɔɔ nɩ ɩdɩ odwokɔbadɛlɛlɛvʋlɔ nɩ hanlɩ kezimɔ yɛtɩ nɣanlɩ nɩ nwʋ odwokɔ kɛɛ: “Yɛhɔlɩ Giliyadɩ nɩ, behilehileli yɛ kɛɛ ɩsɛ kɛɛ yɛfa yɛ ahʋnlɩnɩ munwala yewula ye egyimalilɛ yɩ nu, na ɔzɔ la yɛ yɛyɛlɩ a. Meti mmɩlɩ mɔ nɩ ɩsɛ kɛɛ yetiã ye mmeliyema yɩ kɛnɩ wɔ bʋwabɩlɛ mɔɔ ɩdɩ zɔ nu nɩ, nɩ yedi ɛyɛkɛ wɔ yɛ ahʋnlɩnɩ nu baaba!” Meti nɩ ɩyɛ yɛ anyɩnlɩlelɛ kɛɛ dɩka mɔɔ yɛhɔlɩ nɩ, nɩ yɛkʋla yɛyɛ debe yɛbʋwa mmeliyema mɔɔ bɔwɔ Liberia nɩɩ dasɩlɛlilɛ egyima mɔɔ bɛyɛ yɩ wɔ kɛnɩ nɩ.

Anne: Wɔ May 1996 nɩ, nɩ yɛ nɩɩ mmeliyema anwɩ̃ be zʋ̃ dɩka mɔɔ nɩ yɛwɔ nɩ yɛyɩɩ yɛ nwʋ. Bɛtɩlɩ kaalɩ yɛ nɩ yɛlɛ yɛkɔɔ a, na yɛzɩzalɩ Liberia Bɛtɩlɩ ahɛlɛta be mɔɔ nwʋmɔ hyinyia yɛhɔlɩ. Nɩ yɛpɛ kɛɛ yɛkɔ dɩka be mɔɔ ɛkɛnɩ twe ɛgyɩkɩ̃ɩ̃, nɩ ɩ nɩɩ dɩka mɔɔ nɩ yɛwɔ yɩ nu twɩ̃ kilomita 16 (mayɛlɩ 10). Ɩákyɛ bela yɛ atunwadɩlɛmaa yɩ yɩlɩ be ti a. Nɩ bɛva ɛya na bɔwɔlɩ yɩ tʋ kɛɛ bɔtʋdʋʋ tui bɔkɔ sʋlɔ, begyinanlɩ yɛ kaalɩ yɩ, bɔhwɩnlɩ ye nu asã bevindenli, na boduli kaalɩ yɩ bɔhɔlɩ mɔɔ nɩ Paul lanwʋ la da numɔ. Izili yɛ nwʋ baaba. Aɣilemvile nu la, yekehila a Paul yɛ ɩzʋ̃ ɔlɔmɩ yɩ nu ɩbaa mɔɔ mmegyia luwa yɩ bʋma zʋ yɩ a. Ahyɛasɩ yɩ, nɩ yezi kɛɛ bɔdʋ tui yi, naasʋ̃ yɛɣa yɛnwʋnlɩ kɛɛ sɛ nɩ bɔdʋ tui bɔwɔ yɩ a, ankɩ ɩlɔ́kʋla ikediyia! Atunwadɩlɛmaa yɩ bo nu ɔkʋ̃ yɛ ɩwɔlɩ yɩ a mmɩlɩ mɔ nɩ ipinyiaa yɩ kɛɛ ɩzʋ̃ kaalɩ yɩ nu idwú azɩ nɩ. Naasʋ̃ anyɩnlɩlelɛ odwokɔ yɛ lɛ kɛɛ, iápila kezile.

Nɩ azogyiamaa bɛ kaalɩ be gyĩ kɛnɩ mɔɔ ɩlɛ́kyɛ na iadu, nɩ mmenii mɔɔ bɔwɔ numɔ munwala bo kunlu du baaba. Nɩ ɔhʋanɩ íni kaalɩ yɩ nu, meti yɛvʋãmɩnlɩ kaalɩ yɩ nwʋ. Nɩ yɛányia dɩyɛ bela yɛsɔ numɔ po. Dɩlayɩva yɩ duli kaalɩ yɩ nɩ idiyialɩ zʋlɔ, na ɩhalɩ ɛgyɩkɩ̃ɩ̃ ma yɛpʋlʋ yekua azɩ. Yezianlɩ yɩ kɛɛ igyiná, naasʋ̃ nɩ yi kunlu du paa meti ɩátɛnɩ yɛ nwʋ. Naasʋ̃ yɛwɔlɩ mmɔdɩnɩ bela kɛɛ yɛlɔ́tɔ azɩ. Na yedwuli nɩ, nɩ bɔlɔ ma yɛ nwʋ munwala ɩwʋsʋwʋsʋʋ na yɛ sa gyelɛ.

Paul: Yedwuli azɩ nɩ, abiyela hilalɩ yɩ ɔhɔnwʋ yɩ anyunu, na nɩ yekila kezimɔ nɩ yɛ nwʋ yɛ evinli na yɛ ntalɩ dɩdɩ nɩ a, nɩ ɩyɛ yɛ nnwʋánlɩ po kɛɛ yɛlanwʋ la yɛda azɩ. Nɩ pileeni be gyĩ kɛnɩ mɔɔ bɔdʋdʋ bulɛtɩ bɔwʋwɔ numɔ ma iduko duko, na mɛyɩ yɛ nɩ awulo kyɩ̃ a ɩkɛva yɛ kɔhɔ Sierra Leone a, meti yɛlalɩ pileeni yɩ nwʋ kɛnɩ la. Nɩ ɩyɛ yɛ fɛ kɛɛ yɛlanwʋ la yɛda azɩ, naasʋ̃ nɩ yɛdwɩnɩɩ ye mmeliyema yɩ nwʋ paa.

Anne: Yɛhɔ yedwuli Bɛtɩlɩ mɔɔ ɩwɔ Freetown nɩ azʋ̃nudwolɩyɛ nu, na mmeliyema mɔɔ bɔwɔ kɛnɩ nɩ hilalɩ yɛ bʋwɔ. Naasʋ̃ nɩ mʋwɔ kɛnɩ la a, nɩ nninyeni ɛyɛlɛ ɛyɛlɛ mɔɔ izizili wɔ Liberia nɩ ɣa zi mi ti nu. Eɣile bela, nɩ mu kunlu du, nɩ ɩyɛ mɩ kɛɛ mɔɔ odwokɔ tanɩ be ibazi, na nɩ mɩáhʋla musunzu nninyeni nwʋ bʋwɔ. Nɩ dɩyɛ bela dɩkɛɛ mɔɔ mʋkʋ̃ʋ̃ ɛlalɩyɛ. Nɩ itwu ohunluma a, mɩ anyɩ ta tɩ mɩ aɣilemvile nu, nɩ mʋ nwʋ ɩwʋsʋwʋsʋʋ, na mu kunlu tu kɛɛ odwokɔ ɛyɛlɛ ɛyɛlɛ be kezi. Ɩba yɩ zɔ a, nɩ mʋ mmʋnlɩ ɩtɩɩ. Nɩ Paul sɔ mɩ sa na ɩ nɩɩ mɩ bɔ mpayɩ. Nɩ yɛtʋ asafʋ ndwomi kɔbʋmɩ kɛɛ mʋ nwʋ mɔɔ ɩwʋsʋʋ nɩ keyiaki. Mɩdɩlɩ nɣanlɩ kɛɛ mi ti ɩyɛ kɛzɩkɛ na mʋlɔ́kʋla mʋkɔdʋwa odwokɔbadɛlɛlɛ egyimalilɛ yɩ zʋ dɔkʋ̃.

Mɛyɩ mɛda nɩ, odwokɔ be zili mɔɔ mɩ ɛɣɛɛlɛ iléfi kyɩ̃. Wɔ ɔzɔ dapɛnɩ yɩ nu la, yɛ sa hanlɩ magezini anwɩ̃ be. Nɩ ɔkʋ̃ dɩ June 8, 1996 Awake! yi. Nɩ odwokɔ be wɔ numɔ mɔɔ ise, “Mɔɔ Ɔkɔhʋla Kɛyɛ Mmɩlɩ Mɔ Bɔlɔ Ɩhyɛ Wʋ Zʋ Nɩ.” Nɩ akʋ̃ banzɛmɔ mɩdɩ mɔɔ nɩ ɩyɛɛ mɩ nɩ tʋ a. Magezini mɔɔ ɩtɔ zʋlɔ anwɩ̃ yɩ dɩ May 15, 1996, Ɔwɩɛnɩlɛ Aɣanɩ yɩ. Nɩ odwokɔtile be wɔ numɔ mɔɔ ise, “Ɛhɩnla Dɩka Yɛ Benyia Bɛ Anwʋzɩzɩbɛ a?” Nɩ fafɩlanta be mɔɔ ibila yɩ mfonyini wɔ ɔzɔ Ɔwɩɛnɩlɛ Aɣanɩ yɩ nu. Ihilehileli numɔ kɛɛ, kɛmɔ fafɩlanta kɔ zʋlɔ di alɩyɛ na itu ɩávalɩ nwʋmɔ kɛɛ yɩ andɛba dɩdɩ nɩ, ɔzɔ la yɛ amɩyɛ sʋ̃ sɛ yɛtɩ nɣanlɩ kɛɛ ye padi golɔ iluwa nninyeni tanɩ mɔɔ izizi wɔ yɛ ɛbɩlawɔlɛ nu nɩ ti a, Gyehova kɔhʋla kɔwʋwa yɛ ma yɛkɔhɔ zʋ yɛkɔwʋwa mmenii mvʋlɔ. Gyehova luwalɩ ɔzɔ odwokɔ yɩ zʋ manlɩ minyianlɩ anwʋzɩzɩbɛ mɔɔ nɩ mihyinyia wɔ yɩ mmɩlɩ nu. (Mt. 24:45) Mɩyɛlɩ ndwokɔ mɔɔ ɩdɩdɩ zɔ nwʋ ɛbɩbɛlɛnu, na mɩhɩ̃hanlɩ mʋwɔlɩ numɔ dɩkɛɛ buuku ɔkʋ̃, na eyi wʋwalɩ mɩ paa. Mmɩlɩ ɩkɔlɩɩ zʋlɔ nɩ, bɔlɔ mɔɔ nɩ ɩkã mɩ nɩ hanlɩ azɩ kʋlaa.

Paul: Mmɩlɩ bela mɔ yekezia kɔhɔ Liberia nɩ, nɩ yɛ anyɩ de paa. Wɔ 2004 yɩ awielɩyɛ nɩ, nɩ yɛva kɛyɛ alʋbɔ 20 yɛyɛ ye egyimalilɛ yɩ. Nɩ kʋnɛ yɩ ɣa awielɩyɛ. Nɩ nhyɩhyɛlɩyɛ gua ɔhʋanɩ nu mɔɔ bɛlɛ bɛbagyina Bɛtɩlɩ nniyia fʋlɔ. Naasʋ̃ aɣilemvile nu la bɛhanlɩ kɛɛ yɛhɔ́ yɛyɛ egyimalilɛ fʋlɔ be.

 Nɩ ɩ́la azɩ ɩma yɛ kʋlaa. Nɩ yɛdɔ ye mmeliyema mɔɔ bɔwɔ Liberia nɩ paa. Nɩ bɛɣa bɛyɛ kɛɛ yɛ abusunwa, meti nɩ ɩyɛ sɩ kɛɛ yekediã bɛ kɛnɩ kɔhɔ. Naasʋ̃ nɩ yɛnwʋ kezimɔ Gyehova yilalɩ yɛ mmɩlɩ mɔ yedianlɩ yɛzayɛ ye mmusunwamaa kɛnɩ yɛhɔlɩ Giliyadɩ sukuulu nɩ, meti yeleli egyimalilɛ fʋlɔ eyi yedianlɩ nu. Nɩ ye egyimalilɛ fʋlɔ yɩ wɔ Ghana.

Anne: Mmɩlɩ mɔ yɛzʋ̃ Liberia yɛkɔɔ nɩ, yezunli paa. Eliyema benyia ebani be mɔɔ bɔfʋlɔ yɩ Frank mɔɔ izi nɣɛlɛbɛ hanlɩ odwokɔ be mɔɔ izili yɛ nwʋ. Ɩhanlɩ kɛɛ: “Máma bɔdwɩnɩ yɛ nwʋ!” Akʋ̃ ihilehileli numɔ kɛɛ: “Yezi kɛɛ bɛ ɛɣɛɛlɛ iléfi yɛ kyɩ̃, naasʋ̃ ɩsɛ kɛɛ bɛfa bɛ ahʋnlɩnɩ munwala bowula be egyimalilɛ fʋlɔ yɩ nu. Gyehova yɛ ɩzʋ̃ma bɛ a, meti bɛvá bɛ adwɩnɩ beziye mmeliyema mmenyia nɩɩ mmaalɛ mɔɔ bɔwɔ kɛnɩ nɩ zʋ.” Mɔɔ eliyema yɩ hanlɩ nɩ hyɛlɩ yɛ ɛzɩzɩbɛ na iziyeziyeli yɛ ɩmanlɩ dɩka fʋlɔ mɔɔ nɩ yɛkɔɔ yɩ. Nɩ ɩdɩ manlɩ mɔɔ mmenii ɛgyɩkɩ̃ɩ̃ be la yɛ bezi yɛ wɔ kɛ a, na yɛlɔ́bʋwalɩ kɛnɩ kyɩ̃ nɩ.

Paul: Naasʋ̃ ɩákyɛ kʋlaa yɛ yɛɣa yɛbɛlɩ mmeliyema mɔɔ bɔwɔ Ghana nɩ bo odwokɔ paa a. Nɩ Dasɩvʋlɔmaa sʋ̃maa wɔ kɛnɩ! Yezumanlɩ sʋ̃maa wɔ yɛ ɔhɔnwʋmmɔ mvʋlɔ eyi mɔɔ bedi nɔhʋanlɛ na bɔwɔ dedi kezile nɩ bɛ kɛnɩ. Yɛzʋ̃mɩnlɩ wɔ Ghana alʋbɔ 13 mɛda nɩ, bɛmanlɩ egyimalilɛ fʋlɔ yɛ. Bɛhanlɩ kɛɛ yɛhɔ́ yɛzʋ̃mɩ wɔ East Africa Bɛtɩlɩ mɔɔ ɩwɔ Kenya nɩ. Ɩwɔ numɔ kɛɛ nɩ yɛ ɛɣɛɛlɛ dɔ mmeliyema mɔɔ bɔwɔ nnɩka mɔɔ yelili bɔmʋnlɩ yɛhɔ yɛzʋ̃mɩnlɩ nɩ dɩyɛ, naasʋ̃ ɩákyɛ kʋlaa yɛ mmeliyema mɔɔ bɔwɔ Kenya nɩ sʋ̃ ɣa yɛlɩ yɛ ɔhɔnwʋmmɔ a. Na dɩkɛɛ Ghana nɩɩ Liberia nɩ, yɛwɔ egyima sʋ̃maa yɛyɛ wɔ Kenya azɩlɛ-sini yi nu.

Anne: Miyiyia ndwokɔzɩzɩbɛ sʋ̃maa wɔ mɩ ɛbɩlawɔlɛ nu, na ɩyɛ a ɩma bɔlɔ kã mɩ paa. Sɛ yɛda dɩka mɔɔ nninyeni ɛyɛlɛ ɛyɛlɛ sizi anzɛnyɩɩ yeyiyia ndwokɔzɩzɩbɛ be a, sa ɩkʋla ɩma yɛ nwʋ pa yɛ na adwɩnɩndwɩnɩ sʋ̃ kʋla hyɛ yɛ zʋ. Yɛlɔ́kʋla kehila ɔhʋanɩ kɛɛ Gyehova kɔwɔ yɛ nwʋ banɩ wɔ nninyeni eyimmɔ nwʋ. Nnɛ po la, sɛ mɩtɩ tui yi dede a, nɩ mʋ nwʋ ba mɩ, na nɩ mɩ sa yɛ titilii zɛ. Naasʋ̃ muzuma kɛɛ mikele ɔhʋanɩ azʋlɔtʋ mɔɔ Gyehova duwa zʋlɔ hyɛ yɛ ɛzɩzɩbɛ nɩ munwala mikediã numɔ, mɔɔ mmʋwalɩyɛ mɔɔ ye mmeliyema fa ma yɛ nɩ sʋ̃ kɩnla nwʋ. Na mɩɣa mʋnwʋ kɛɛ sɛ yɛkɔ zʋ yesuma dɩyɛ, yɛbɔ mpayɩ, na yɛkɔ dɩyɛzumanlɛ nɩɩ dasɩlɛlilɛ a, Gyehova kɔwʋwa yɛ ma yɛkɔhɔ zʋ yɛkɛyɛ ye egyimalilɛ yɩ.

Paul: Ɩyɛ a abiyemmɔ bizia yɛ kɛɛ, “Meti bɛ anyɩ deli be egyimalilɛ yɩ nwʋ a?” Manlɩ be wɔ kɛnɩ a, numɔ yɛ kɩnlɩma. Naasʋ̃ ɛkɛnɩ bʋwabɩlɛ kɔhʋla kɛzɩnza na basabasayɛlɛ ɩaɣa kɛnɩ. Meti, mɩnla yɛ yɛ anyɩ deli nwʋmɔ paa a? Ɩdɩ ye mmeliyema mmenyia nɩɩ mmaalɛ mɔɔ bɛla yɛ ahʋnlɩnɩ zʋ nɩ, bɔnlʋmmɔ yɛ lɛ yɛ abusunwa a. Ɩwɔ numɔ kɛɛ ɔsʋnɩ ye nu bela yɩ abusunwa nɩɩ dɩka mɔɔ yɛzʋ̃ dɩyɛ, naasʋ̃ ye munwala yɛlɛ adwɩnɩ ɔkʋ̃. Nɩ yezi kɛɛ bɔzʋ̃ma yɛ kɛɛ yɛhɔ́ yɛhyɛ bɛ ɛzɩzɩbɛ, naasʋ̃ nɔhʋanlɛ nu nɩ, bɔnlʋmmɔ mfomi yɛ bɛhyɛ yɛ ɛzɩzɩbɛ a.

Ye mmeliyemayɛlɛ okuwu yi dɩ nnwʋánlɩdɩyɛ mɔɔ ɩzʋ̃ Gyehova kɛ! Dɩka bela mɔɔ yɛkɔhɔ nɩ, yɛwɔ abusunwamaa wɔ kɛnɩ! Mmɩlɩ tɩndɩnlɩ la mɔɔ yɛwɔ asafʋ yɩ nu mɛyɩ, yɛwɔ abusunwa nɩɩ dɩka mɔɔ banɩwɔlɛ wɔ. Yɛwɔ anwʋlazʋ paa kɛɛ, sɛ yɛkɔ zʋ yɛfa yɛ nwʋ yetiã Gyehova zʋ a, sa ɩma anwʋzɩzɩbɛ yɛ ma yekyina bʋwabɩlɛ bela mɔɔ yekeyiyia nɩ munwa.—Fɩl. 4:13.