1-2. Mɩnla yɛ Bayɩbʋlʋ kã falɩ Yizilaya awulombunli be nwʋ a?

 BAYƖBƲLƲ yɩ kã mmenyia mɔɔ bɔbʋ 40 mɔɔ nɩ bɛdɩ awulombunli wɔ Yizilaya nɩ nwʋ odwokɔ. a Ɩma yɛnwʋ nninyeni mɔɔ bo nu be yɛlɩ nɩ petee. Kɛ ndianwʋ nɩ, awulombunli baaba yɩ po, bɛyɛlɩ nninyeni tanɩ be. Bo nu be yɛ lɛ Bulombunli Devidi. Gyehova hanlɩ valɩ yɩ nwʋ kɛɛ: “Mɩ akɛlɛ Devidi mɔɔ ilili mɩ mmɛla odwokɔ zʋ, na ɩvalɩ yɩ ahʋnlɩnɩ munwatĩĩ ilili mɩ mɛda, na ɩyɛlɩ mɔɔ ɩtɩnɣɛ nkʋ̃tɩnyɩɩ wɔ mɩ anyɩ zʋ nɩ.” (1 Aw. 14:8) Naasʋ̃ ɩ nɩɩ baalɛ agyiahʋnlɩvʋlɔ be wɔlɩ adwomanlɩ, na ɩhyɩhyɛlɩ ma bohunli yi hũ wɔ kʋnɛ nu.—2 Sa. 11:​4, 14, 15.

² Naasʋ̃, bɛzabɛ mɔɔ nɩ bɛdɩ awulombunli tanɩ nɩ, bo nu sʋ̃maa sʋ̃ yɛlɩ nninyeni baaba be. Dɩkɛɛ Ɣɩlɛhobʋwamɩ zɛyɩ, ‘ɩyɛlɩ nninyeni tanɩ’ wɔ Gyehova anyɩ zʋ. (2 Mm. 12:14) Naasʋ̃, idiyeli Gyehova mmɩlɩ mɔ ɩhã ihileli yi kɛɛ áma ɩkʋ̃ itiyia Yizilaya mmusunwa okuwu bunlu yi, na ɩmá ɔhʋanɩ bɛ ma bɛyɩ bo bulombunli nɩ. Akʋ̃ sʋ̃, ahyonwa mɔɔ nɩ bɔwɔ yi bulombunlililɛ yi nu nɩ, ɩhyɛlɩ bɛ banɩwɔlɛ yɩ nu ɛzɩzɩbɛ ɩva ɩwɔlɩ Nyamɩnlɩ yi mmenii nwʋ banɩ.—1 Aw. 12:​21-24; 2 Mm. 11:​5-12.

3. Odwokɔɣizialɛ mɔɔ nwʋmɔ hyinyia ɛhɩnla dɩyɛ yɛ itwodwu a, na mɩnla yɛ yɛbazunzu nwʋmɔ wɔ dɩyɛzumanlɛ yɩ nu a?

³ Eyi ma odwokɔɣizialɛ be mɔɔ nwʋmɔ hyinyia twodwu kɛɛ: Sɛ Yizilaya awulombunli yi yɛlɩ nninyeni baaba nɩɩ tanɩ a, mɛyɩ nɩ mɩnla yɛ Gyehova gyinanlɩ zʋlɔ wuli bulombunli be kɛɛ ɩdɩ nɔhʋanlɛvʋlɔ a? Odwokɔɣizialɛ eyi nwʋ munwalɩyɛ kɛma yɛkɔnwʋ mɔɔ Gyehova pɩbɛ wɔ yɛ kɛnɩ. Yɛbahila nninyeni asã be mɔɔ Gyehova gyinanlɩ zʋlɔ va wuli awulombunli yi kɛɛ bɛdɩ nɔhʋanlɛmaa:  (1) ahʋnlɩnɩ mɔɔ nɩ bɛlɛ bɔsʋ̃mɩɩ Gyehova, (2) kezimɔ bonlunli bɔ nwʋ mmɩlɩ mɔ bɛyɛlɩ tanɩ, nɩɩ (3) kɛ bɔzʋ̃mɩnlɩ Gyehova wɔ ɔhʋanɩ mɔɔ ɩpɛ yɩ nɩ zʋ anzɛnyɩɩ bɛáyɛ zɔ.

BƐVALƖ BƐ AHƲNLƖNƖ MUNWALA BƆLƆLƖ GYEHOVA

4. Mɩnla dɩyɛ ɔkʋ̃ yɛ nɩ ɩdɩ sʋnʋnkʋ̃ wɔ awulombunli mɔɔ belili nɔhʋanlɛ nɩɩ mɔɔ bɛádi nɔhʋanlɛ nɩ nwʋ a?

⁴ Awulombunli mɔɔ bɛyɛlɩ mɔɔ ɩsɔ Gyehova anyɩ nɩ, bɛvalɩ bɛ ahʋnlɩnɩ b munwala bɔzʋ̃mɩnlɩ yɩ. Bulombunli baaba Gyehohyafatɩ “ɩvalɩ yɩ ahʋnlɩnɩ munwala ɩbɩbɛlɩ Gyehova.” (2 Mm. 22:9) Bayɩbʋlʋ yɩ kã falɩ Dwosaya nwʋ kɛɛ: ‘Awulombunli mɔɔ belili yɩ anyunu nɩ, bo nu bela íni kɛnɩ mɔɔ ɩvalɩ yɩ ahʋnlɩnɩ munwala izialɩ ɩɣalɩ Gyehova pɛ dɩkɛɛ mɛyɩ.’ (2 Aw. 23:25) Na Sɔlɔmɔnʋ sʋ̃ mɔɔ aɣinzi yi ɩyɛlɩ nninyeni tanɩ nɩ sʋ̃ ɛ? ‘Nɩ yɩ ahʋnlɩnɩ iáli munli.’ (1 Aw. 11:4) Na Abayɩgyamɩ sʋ̃, Bayɩbʋlʋ yɩ kã yi odwokɔ kɛɛ, nɩ “yɩ ahʋnlɩnɩ iáli munli wɔ Gyehova nwʋ.”—1 Aw. 15:3.

5. Sɛ bɛkã kɛɛ abiye ɩlɛ ahʋnlɩnɩ mɔɔ idi munli ɩsʋ̃mɩɩ Gyehova a, kɛ yɩ tʋ kile a?

⁵ Sɛ bɛkã kɛɛ abiye ɩlɛ ahʋnlɩnɩ mɔɔ idi munli ɩsʋ̃mɩɩ Gyehova a, kɛ yɩ tʋ kile a? Enii mɔɔ ɩdɩ zɔ nɩ, ɩázʋ̃mɩ Nyamɩnlɩ iluwakɛɛ ɩsɛ kɛɛ ɩsʋ̃mɩ yɩ nɩ ti a. Mfomi ɩsʋ̃mɩ yɩ iluwakɛɛ ɩwɔ ɔlɔlɛ nɩɩ annidi kezile ɩma yɩ. Akʋ̃ sʋ̃, ɩkɔ zʋlɔ ɩda ɔzɔ ɔlɔlɛ nɩɩ annidi nɩ ali ikile Nyamɩnlɩ wɔ yɩ nnwʋanlɩ eɣile munwala nu.

6. Kɛ ɩkɛyɛ na yɛahɔ zʋ yɛanyia ahʋnlɩnɩ mɔɔ idi munli a? (Ɛɣɛlɛwulɛ 4:23; Matiyu 5:​29, 30)

⁶ Kɛ ɩkɛyɛ na yɛazumazuma awulombunli mɔɔ belili nɔhʋanlɛ yɩ na yɛahɔ zʋ yɛava ahʋnlɩnɩ mɔɔ idi munli yɛazʋ̃mɩ Gyehova a? Ɩsɛ kɛɛ yɛtwɩ̃ yɛ nwʋ wɔ dɩyɛ bela mɔɔ ɩkɔhʋla kɛzɩkɛ ɔlɔlɛ mɔɔ yɛwɔ yɛma Gyehova nɩ nwʋ. Kɛ ndianwʋ nɩ, ɩsɛ kɛɛ yekila bʋwɔ wɔ nninyeni mɔɔ yɛfa yɛ mmɩlɩ yɛyɛ nɩɩ mɔɔ yekila nɩ nwʋ. Akʋ̃ sʋ̃, ɩsɛ kɛɛ yekila yɛ ɔhɔnwʋvalɛ bʋwɔ iluwakɛɛ ɩkɔhʋla kɛma yekenyia adwɩnɩ kɛɛ ozukua yɛ lɛ dɩyɛ mɔɔ nwʋmɔ hyinyia paa wɔ yɛ ɛbɩlawɔlɛ nu. Sɛ yɛnwʋ yɩ kɛɛ debe ɩyɛɛ kɛzɩkɛ ɔlɔlɛ mɔɔ yɛwɔ yɛma Gyehova nɩ a, ɩsɛ kɛɛ yetu yɩ tʋ ndɛndɛ.—Kɩnga Ɛɣɛlɛwulɛ 4:23; Matiyu 5:​29, 30.

7. Mɩnla yɛ ihyinyia kɛɛ yɛpʋ a, na mɩnla ti a?

⁷ Íni kɛɛ yɛma yɛ ahʋnlɩnɩ nu kyɩkyɛ. Sɛ yɛákila yɩ bʋwɔ a, yekozunzu kɛɛ iluwakɛɛ yɛyɛɛ sʋ̃maa wɔ Gyehova yɩ ɔzʋ̃mɩnlɛ nu nɩ ti dɩyɛ bela lɔ́kʋla ɩkɛzɩkɛ ɔlɔlɛ mɔɔ yɛwɔ yɛma yɩ nɩ. Bɛmá yehila ndianwʋ eyi. Sɛ esiyeziyee wʋ aliyia nu a, asʋ̃ okowuko wʋ anyɩnkɛ kediã nwʋmɔ ma anwʋma kezia kɛzɩza ndudulubo anzɛnyɩɩ owula kɛɣa numɔ dɔkʋ̃ a? Ɛlɛ́yɛ zɔ. Ɔzɔ la sʋ̃ yɛɛ yɛ nɩɩ Gyehova avinli abusunwawɔlɛ dɩ a. Nninyeniba mɔɔ yɛyɛ a ɩma yɛtwɩ̃ yebike Gyehova nɩ la ahanlɩ a, ɩsɛ kɛɛ yɛyɛ sʋ̃maa yɛkɩnla nwʋ. Kɛmɔ yelóbuko yɛ anyɩnkɛ ma owula kezia kɛɣa yɛ aliyia mɔɔ yesiyeziyee numɔ yɩ nu nɩ, ɔzɔ la yɛ ɩsɛ kɛɛ yekila kɛɛ yɛlɛ́ma dɩyɛ bela mɔɔ ɩkɔhʋla kɛzɩkɛ ɔlɔlɛ mɔɔ yɛwɔ yɛma Gyehova nɩ kɔwɔlɔ yɛ ahʋnlɩnɩ nu a.—Ɛfɩ. 2:2.

BONLUNLI BƆ NWƲ WƆ BƐ TANƖ NWƲ

8-9. Mmɩlɩ mɔ bɛhanlɩ Bulombunli Devidi nɩɩ Bulombunli Hɛzɩkaya bɛ anyunu nɩ, kɛ bɛyɛlɩ bɛ dɩyɛ bezeli a? (Kila mfonyini.)

⁸ Kɛmɔ yeli bɔmʋnlɩ yɛhã nɩ, Bulombunli Devidi yɛlɩ tanɩ kezile be. Naasʋ̃, mmɩlɩ mɔ nkɔmɩhyɛnii Neetanɩ hanlɩ yɩ tanɩ yɩ nwʋ odwokɔ hileli yi nɩ, ɩzʋ̃ kãnwʋazɩ nu inlunli yɩ nwʋ. (2 Sa. 12:13) Devidi ɩáyɛ yɩ nwʋ kɛɛ ɩhyɛdaa keli tanɩ yɩ nwʋ ɛyɛkɛ wɔ Neetanɩ yɩ anyunu na ama bɛáhwɩnlɩ yɩ azʋ̃. Sɛ yekila ndwokɔ mɔɔ ɩhanlɩ wɔ Ndwomi 51 nɩ a, yɛnwʋ kɛɛ inlunli yɩ nwʋ wɔ nɔhʋanlɛ nu.—Ndw. 51:​3, 4, 17, tisʋlɔ ndwokɔ.

 ⁹ Bulombunli Hɛzɩkaya sʋ̃ yɛlɩ tanɩ diyialɩ Gyehova. Bayɩbʋlʋ yɩ kã kɛɛ: “Yɩ ahʋnlɩnɩ bigyialɩ yɩ nwʋ sʋlɔ, na ɩmanlɩ Nyamɩnlɩ valɩ mɛyɩ nɩɩ Dwuuda nɩɩ Gyelusalamɩ nwʋ ɛya.” (2 Mm. 32:25) Mɩnla ti mɔɔ Hɛzɩkaya bigyiabigyialɩ yɩ nwʋ sʋlɔ a? Ebiye a, ɩdɩlɩ nɣanlɩ kɛɛ yɩ nwʋ wɔ sʋlɔ iluwa yɩ anwʋnyia sʋ̃maa, nkunimi mɔɔ ilili wɔ Asiliyiamaa bɔ zʋ, anzɛnyɩɩ iluwakɛɛ Gyehova zalɩ yɩ adimakɛlɛ wɔ nnwʋánlɩ ɔhʋanɩ zʋ nɩ ti. Ɩkɛyɛ kɛɛ ahantanɩ yɛ ɩmanlɩ ɩvalɩ yɩ anwʋnyia ihileli Babilɔnʋmaa yɩ a, na eyi yɛ ɩmanlɩ nkɔmɩhyɛnii Ayɩzaya hwili yɩ anyunu yɩ a. (2 Aw. 20:​12-18) Kɛmɔ Devidi yɛlɩ nɩ, Hɛzɩkaya sʋ̃ ɩzʋ̃ kãnwʋazɩ nu inlunli yɩ nwʋ. (2 Mm. 32:26) Awielɩyɛ kʋlaa nɩ, Gyehova wuli yi kɛɛ bulombunli nɔhʋanlɛvʋlɔ mɔɔ “ɩhɔlɩ zʋlɔ ɩyɛlɩ mɔɔ ɩtɩnɣɛ.”—2 Aw. 18:3.

10. Mmɩlɩ mɔ bɛhanlɩ Bulombunli Amɛzaya yɩ tanɩ nwʋ odwokɔ behileli yi nɩ, mɩnla yɛ ɩyɛlɩ a?

¹⁰ Naasʋ̃, Dwuuda Bulombunli Amɛzaya mɛyɩ ɩyɛlɩ mɔɔ ɩtɩnɣɛ, “naasʋ̃ nɩ yɩ ahʋnlɩnɩ iáli munli.” (2 Mm. 25:2) Mɩnla tanɩ yɛ ɩyɛlɩ a? Mmɩlɩ mɔ Gyehova wʋwalɩ yɩ ma ilili Idɔmɩmaa bɔ zʋ nkunimi mɛda nɩ, ɩwɔlɩ yɩ tʋ kɛɛ ɩsʋ̃mɩɩ bɛ awʋzʋmɩ. c Na mmɩlɩ mɔ Gyehova yɩ nkɔmɩhyɛnii hɔ hanlɩ yɩ tanɩ nwʋ odwokɔ hileli yi nɩ, iátiye na iduduli yi.—2 Mm. 25:​14-16.

11. Kɛmɔ 2 Kɔlɛntɩmaa 7:​9, 11 kile nɩ, mɩnla yɛ ɩsɛ kɛɛ yɛyɛ na ama Gyehova ɩava yɛ tanɩ yɛahyɛ yɛ a? (Kila mfonyini yi sʋ̃.)

¹¹ Mɩnla yɛ yesuma wɔ ndianwʋ eyimmɔ nu a? Mɛyɩ yɛ lɛ kɛɛ, ihyinyia kɛɛ yenu yɛ nwʋ wɔ yɛ tanɩ nwʋ na yɛbɔ mmɔdɩnɩ kɛɛ yɛlɛ́yɛ dɔkʋ̃. Na sɛ asafʋ nu mbanimbani tɩnɣɛ yɛ wɔ nninyeni mɔɔ yesunzu kɛɛ ɩ́dɩ tanɩ mɔɔ anyɩnlɩbʋlʋ wɔ numɔ nwʋ sʋ̃ ɛ? Íni kɛɛ yɛtɩ nɣanlɩ kɛɛ Gyehova ɩálɔ yɛ na mbanimbani yi sʋ̃ bɛábɛ ye odwokɔ. Awulombunli mɔɔ bɛyɛlɩ dɩyɛ baaba wɔ Yizilaya po nɩ, boduli bɔ fʋlɔ na bɛhanlɩ bɛ anyunu wɔ nninyeni tanɩ mɔɔ bɛyɛlɩ nɩ nwʋ. (Hib. 12:6) Sɛ bɛtɩnɣɛ yɛ a, ɩsɛ kɛɛ (1) yɛzʋ̃ kãnwʋazɩ nu yede yetiã numɔ, (2) yɛyɛ nzɩnzanlɩyɛ mɔɔ ihyinyia, nɩɩ (3) yɛkɔ zʋ yɛfa yɛ ahʋnlɩnɩ munwala yɛsʋ̃mɩ Gyehova. Sɛ yenu yɛ nwʋ wɔ yɛ tanɩ nwʋ a, Gyehova kɛva kɛhyɛ yɛ.—Kɩnga 2 Kɔlɛntɩmaa 7:​9, 11.

BƆZƲ̃MƖNLƖ GYEHOVA WƆ ƆHƲANƖ MƆƆ ƖPƐ YƖ NƖ ZƲ

12. Mɩnla yɛ ɩmanlɩ awulombunli nɔhʋanlɛmaa nɩ yɛlɩ sʋnʋnkʋ̃ a?

¹² Awulombunli mɔɔ Gyehova wuli bɛ kɛɛ bɛdɩ nɔhʋanlɛmaa nɩ, bɔzʋ̃mɩnlɩ Gyehova wɔ ɔhʋanɩ mɔɔ ɩpɛ yɩ nɩ zʋ. Na bɛhyɛlɩ bɛ manlɩmaa nɩ ɛzɩzɩbɛ kɛɛ bɛyɛ́ zɔ la. Kɛmɔ yɛnwʋ yɩ nɩ, bɛzabɛ sʋ̃ belili mfʋmɩ, naasʋ̃ bɔzʋ̃mɩnlɩ Gyehova yɩzayɩ nkʋ̃ na bɔwɔlɩ mmɔdɩnɩ kɛɛ bokodu awʋzʋmɩzʋ̃mɩnlɛ tʋ wɔ bɛ manlɩ yɩ nu. d

13. Mɩnla ti mɔɔ Gyehova wuli Ehabɩ kɛɛ bulombunli mɔɔ iádi nɔhʋanlɛ a?

¹³ Na awulombunli sʋ̃ mɔɔ Gyehova wuli bɛ kɛɛ bɛ́dɩ nɔhʋanlɛmaa nɩ sʋ̃ ɛ? Kɛ dɩyɛ bela mɔɔ bɛyɛlɩ nɩ yɛ nɩ ɩdɩ tanɩ a. Bulombunli Ehabɩ tinuzɩzɩbɛvʋlɔ yɩ po, mmɩlɩ mɔ iluwa mɛyɩ ti bohunli Nebɔtʋ nɩ, ɩhanlɩ yɩ nwʋ azɩ na ilili nwʋmɔ ɛyɛkɛ. (1 Aw. 21:​27-29) Akʋ̃ sʋ̃, ɩyɩkyɩlɩ ahyonwa na ilili nkunimi ɩmanlɩ Yizilaya manlɩ yɩ. (1 Aw. 20:​21, 29; 22:39) Naasʋ̃ Ehabɩ yɛlɩ debe mɔɔ nɩ ɩdɩbɛ kʋlaa. Yɩ yɩ binyiabinyianlɩ yɩ ma ɩhyɛlɩ awʋzʋmɩzʋ̃mɩnlɛ nwʋ ɛzɩzɩbɛ. Eyi mɛyɩ, iánu yɩ nwʋ wɔ nwʋmɔ kyɩ̃.—1 Aw. 21:​25, 26.

14. (a) Mɩnla ti mɔɔ Gyehova wuli Bulombunli Ɣɩlɛhobʋwamɩ kɛɛ abiye mɔɔ iádi nɔhʋanlɛ a? (b) Awulombunli mɔɔ belili tumi wɔ Yizilaya nɩ, mɩnla yɛ bo nu sʋ̃maa yɛlɩ a?

 ¹⁴ Bɛmá yehila Ɣɩlɛhobʋwamɩ sʋ̃. Mɛyɩ sʋ̃ iádi nɔhʋanlɛ. Kɛmɔ yeli bɔmʋnlɩ yɛnwʋ yɩ nɩ, ɩyɛlɩ nninyeni baaba sʋ̃maa mmɩlɩ mɔ nɩ idii tumi nɩ. Naasʋ̃ mmɩlɩ mɔ yi bulombunlililɛ diminli nɩ, iyiakili Gyehova ɔzʋ̃mɩnlɛ na ɩzʋ̃mɩnlɩ awohwi anyamɩnlɩ. (2 Mm. 12:1) Mɛyɩ mɛda nɩ, ɩyɛ a nɩ ɩzʋ̃mɩ Gyehova, ɩyɛ sʋ̃ a nɩ ɩhɔ ɩzʋ̃mɩ awʋzʋmɩ. (1 Aw. 14:​21-24) Kɛ Ɣɩlɛhobʋwamɩ nɩɩ Ehabɩ nkʋ̃ la yɛ bɛdɩ awulombunli mɔɔ bɛásʋ̃mɩ Gyehova wɔ ɔhʋanɩ mɔɔ ɩpɛ yɩ nɩ zʋ a. Nɔhʋanlɛ nu nɩ, awulombunli sʋ̃maa mɔɔ belili tumi wɔ Yizilaya nɩ, bo nu sʋ̃maa zʋ̃mɩnlɩ awʋzʋmɩ na bɛhyɛlɩ mmenii mvʋlɔ ɛzɩzɩbɛ ma bɛyɛlɩ zɔ la. Ɩda ali petee kɛɛ Gyehova mɛyɩ, ɔhʋanɩ mɔɔ ɩpɛ kɛɛ yeduwa zʋ yɛsʋ̃mɩ yɩ nɩ yɛ igyinanlɩ zʋlɔ iwuli bulombunli be kɛɛ ɩdɩ nɔhʋanlɛvʋlɔ anzɛnyɩɩ ɩ́dɩ nɔhʋanlɛvʋlɔ a.

15. Mɩnla ti mɔɔ nɩ nɔhʋanlɛzʋ̃mɩnlɛ nwʋ hyinyia Gyehova a?

¹⁵ Mɩnla ti mɔɔ nɩ ɔzʋ̃mɩnlɛ nwʋ hyinyia Gyehova zɛ yɩ a? Sianti ɔkʋ̃ yɛ lɛ kɛɛ, nɩ ɩdɩ awulombunli yi bɛ asɛdɩ kɛɛ bekeli Nyamɩnlɩ mmenii anyunu ma bɔkɔzʋ̃mɩ yɩ wɔ nɔhʋanlɛ nu. Akʋ̃ sʋ̃, sɛ nɩ mmenii sʋ̃mɩ awʋzʋmɩ a, ɩma bɛyɛ tanɩ nɣezile na bɛ nɩɩ mmenii iáli yi bʋwɔ. (Ho. 4:​1, 2) Ebiyekʋ̃ sʋ̃, nɩ beyila Yizilaya awulombunli yi nɩɩ bɛ manlɩmaa munwatĩĩ zʋ bɛma Gyehova. Meti, sɛ nɩ bɛádi Gyehova nɔhʋanlɛ na bɔkɔ bɔsʋ̃mɩ awʋzʋmɩ a, Bayɩbʋlʋ yɩ fa tindiã agyiahʋnlɩzɩkɛlɛ nwʋ. (Gyɛ. 3:​8, 9) Sɛ abiye sɩkɛ agyiahʋnlɩ a, ɩyɛ tanɩ itiyia yi hũ anzɛnyɩɩ yɩ yɩ, na ɩma idi ɛyɛkɛ. Ɔzɔ la sʋ̃ yɛ sɛ Gyehova yɩ sʋ̃mɩvʋlɔ mɔɔ iyila yɩ nwʋ zʋ ɩma yɩ nɩ, ɩfa yɩ nwʋ iwula awohwizʋ̃mɩnlɛ nu a, ɩyɛ  tanɩ itiyia yɩ senyii na ɩma idi ɛyɛkɛ a. e—Dit. 4:​23, 24.

16. Wɔ Gyehova anyɩ zʋ nɩ, mɩnla yɛ ɩma ɛdɩnɣɛlɛnii yɛ sʋnʋnkʋ̃ wɔ tanɩvʋlɔ nwʋ a?

¹⁶ Mɩnla ozumalɛdɩyɛ yɛ yenyia a? Ɩsɛ kɛɛ yesi yɛ kɛnɣa kɛɛ yɛkɔhwɩ̃ yɛ nwʋ wɔ dɩyɛ bela mɔɔ ɩfalɩ awohwizʋ̃mɩnlɛ nwʋ. Naasʋ̃ iázi kɛnɩ la, mfomi ɩsɛ kɛɛ yɛkɔ zʋ yɛsʋ̃mɩ Gyehova wɔ ɔhʋanɩ mɔɔ ɩpɛ yɩ nɩ zʋ na yɛyɛ sʋ̃maa wɔ yɩ ɔzʋ̃mɩnlɛ nu. Nkɔmɩhyɛnii Malakayɩ hileli mɔɔ ɩma abiye yɛ enii baaba anzɛnyɩɩ enii tanɩ wɔ Gyehova anyɩ zʋ. Ɩhɛlɛlɩ kɛɛ: “Akʋ̃ bekezia bɔkɔnwʋ sʋnʋnkʋ̃ mɔɔ ɩwɔ enii mɔɔ ɩtɩnɣɛ nɩɩ tanɩyɛlɛnii bɛ avinli, nɩɩ mɔɔ ɩsʋ̃mɩ Nyamɩnlɩ nɩɩ mɔɔ ɩázʋ̃mɩ yɩ nɩ bɛ avinli.” (Mal. 3:18) Iluwa eyi ti, íni kɛɛ yɛma ye sinidɔlɛ nɩɩ yɛ mfʋmɩ, anzɛnyɩɩ dɩyɛ bela kolɔ yɛ abɔkɔ nkʋ̃ʋ̃ ma yeyiaki Gyehova ɔzʋ̃mɩnlɛ kyɩ̃. Gyehova yɩ ɔzʋ̃mɩnlɛ mɔɔ yekeyiaki yi yɩzayɩ po dɩ tanɩ kezile baaba.

17. Mɩnla ti mɔɔ sɛ yesii pɔkɔ wɔ enii mɔɔ yekegyia yɩ nɩ nwʋ a, ɩsɛ kɛɛ yekila bʋwɔ a?

¹⁷ Sɛ ɛdɩ sigyianii mɔɔ osunzuu agyiahʋnlɩ nwʋ a, Malakayɩ yi ndwokɔ yɩ kɔhʋla kɔwʋwa wʋ ma ekezi pɔkɔba wɔ enii kʋ̃ mɔɔ ekegyia yɩ nɩ nwʋ. Sunzu eyi nwʋ kila: Abiye kɔhʋla kɛla subanɩ ngɩnlɩma ali, naasʋ̃ sɛ ɔzɔ enii nɩ ɩázʋ̃mɩ nɔhʋanlɛ Nyamɩnlɩ yɩ a, asʋ̃ Gyehova kowu yi kɛɛ ɛdɩnɣɛlɛnii a? (2 Kɔl. 6:14) Sɛ ekyia enii mɔɔ ɩdɩ zɔ a, asʋ̃ ɩkɔwʋwa wʋ ma ekeli Gyehova nɔhʋanlɛ a? Mɔwʋ dwɩnɩ eyi nwʋ kila: Sɔlɔmɔnʋ yɩ yɩmmɔ yɩ, ebiye a nɩ bɔwɔ subanɩ ngɩnlɩma be. Naasʋ̃ nɩ bɛázʋ̃mɩ Gyehova, na ngyɩkɩ̃ɩ̃ ngyɩkɩ̃ɩ̃ la bɔhwɩnlɩ Sɔlɔmɔnʋ ma ɩhɔ ɩzʋ̃mɩnlɩ awʋzʋmɩ.—1 Aw. 11:​1, 4.

18. Mɩnla yɛ ɩsɛ kɛɛ awʋvʋlɔ bʋwa bo nnwuakula ma bɔnwʋ yɩ a?

¹⁸ Awʋvʋlɔ, sa bɔkʋla bɛfa awulombunli yi  mɔɔ bɔwɔ Bayɩbʋlʋ nu nɩ be ndianwʋ yɩ bɔbʋwa bo nnwuakula ma benyia ɛpɛ kɛɛ bɔkɔzʋ̃mɩ Gyehova. Bʋwʋwá bɛ ma bɔnwʋ kɛɛ awulombunli mɔɔ Gyehova wuli bɛ kɛɛ bɛdɩ baaba nɩ, nɩ bɔsʋ̃mɩ Gyehova na bɛhyɛlɩ bɛ manlɩmaa sʋ̃ ɛzɩzɩbɛ ma bɔzʋ̃mɩnlɩ yɩ. Duwa wu ndwokɔhanlɛ nɩɩ wʋ nyɛlɩyɛ zʋ ma bɔnwʋ́ kɛɛ sunzuma ɔfʋã nu nninyeni, dɩkɛɛ Bayɩbʋlʋ mɔɔ bokozuma, dɩyɛzumanlɛhɔlɛ nɩɩ dasɩlɛlilɛ nwʋ hyinyia tɛla dɩyɛ bela. (Mt. 6:33) Sɛ kɛ zɔ a, bo nnwuakula kenyia adwɩnɩ kɛɛ Gyehova ɔzʋ̃mɩnlɛ dɩ bɛ awuvʋlɔ bɔ ɔzʋ̃mɩnlɛ meti bɔkɔɔ ebiye la. Na ɩba yɩ zɔ a, bɛlɛ́fa Gyehova ɔzʋ̃mɩnlɛ anyɩnlɩbʋlʋ anzɛnyɩɩ bekeyiaki donwuu.

19. Mɩnla anyɩnlɩlazʋ yɛ ɩwɔ kɛnɩ ɩma bɛzabɛ mɔɔ beyiaki Gyehova ɔzʋ̃mɩnlɛ nɩ a? (Kila alɩka mɔɔ ise “ Sa Ɔkʋla Sia Ba Gyehova Yɩ Pɛ!”)

¹⁹ Sɛ abiye yiaki Gyehova ɔzʋ̃mɩnlɛ a, asʋ̃ ikile kɛɛ ɩlɔ́kʋla kɛɣa kɔzʋ̃mɩ Gyehova dɔkʋ̃ a? Anhã, iluwakɛɛ sa ɩkʋla inu yɩ nwʋ na ɩawɔ yɩ tʋ ɩazʋ̃mɩ Gyehova nɔhʋanlɛ nu. Sɛ ɩkɔhʋla kɛyɛ zɔ a, ɩsɛ kɛɛ ɩkã yɩ nwʋ azɩ na ide asafʋ nu mbanimbani bɔ mmʋwalɩyɛ itiã numɔ. (Gye. 5:14) Sɛ ɩbɔ mmɔdɩnɩ na ɩba ɩyɛ Gyehova yɩ ɔhɔnwʋ dɔkʋ̃ a, ikenyia nyilalɛ sʋ̃maa!

20. Sɛ yesumazuma awulombunli nɔhʋanlɛmaa yɩ a, kɛ Gyehova kowu yɛ keze a?

²⁰ Mɩnla yɛ yezuma wɔ Yizilaya awulombunli yi bɛ kɛ a? Sɛ yɛfa ahʋnlɩnɩ mɔɔ idi munli yɛsʋ̃mɩ Gyehova a, sa yɛkʋla yɛba yɛyɛ kɛɛ awulombunli mɔɔ belili nɔhʋanlɛ nɩ. Sɛ yedi mfʋmɩ a, bɛmá yezuma debe wɔ numɔ, yenlu yɛ nwʋ, na yɛyɛ́ nzɩnzanlɩyɛ bela mɔɔ ihyinyia nɩ. Na bɛmá yɛhakɛ kɛɛ, ɩsɛ kɛɛ yɛsʋ̃mɩ nɔhʋanlɛ Nyamɩnlɩ nɩ wɔ ɔhʋanɩ mɔɔ ɩpɛ yɩ nɩ zʋ. Sɛ edi nɔhʋanlɛ ma Gyehova a, ikowu wʋ kɛɛ abiye mɔɔ ɛtɩnɣɛ wɔ yɩ anyɩ zʋ.