1. Sɛ enii fa tanɩ kyɛ a, ɩyɛ sɩ kɛɛ ɔkɔnwʋ kɛɛ ɩva ɩhyɛ amba, mɩnla ti a?

 “MƖVA WƲ TANƖ MƖHYƐ WƲ.” Kila kezimɔ odwokɔ eyi kɛma wʋ ahʋnlɩnɩ kɔdɔ wu kunlu, titili mmɩlɩ mɔ ezi kɛɛ ɛhã debe anzɛnyɩɩ ɛyɛ debe mɔɔ ɩyɛ ɛyɛkɛ ediyia abiye nɩ! Naasʋ̃ sɛ enii kʋ̃ nɩ kã kɛɛ “mɩva wʋ tanɩ mɩyɛ wʋ” a, mɩnla paa yɛ ɩpɛɛ ikehile a? Asʋ̃ ɩpɛɛ kehile kɛɛ ɛ nɩɩ yɩ avinli yɛ baaba dɔkʋ̃ kʋlakʋla a? Anzɛnyɩɩ ɩpɛ kɛɛ ikile kɛɛ ɩábɛ kɛɛ ɩkɛhã mɔɔ izili yɩ nwʋ odwokɔ dɔkʋ̃ a? Sɛ abiye kã kɛɛ ɩva wʋ tanɩ ɩhyɛ wʋ a, ɩyɛ a ɩyɛ sɩ kɛɛ ɔkɔnwʋ kɛɛ ɩva ɩhyɛ wʋ amba.

 2. Kezimɔ Gyehova fa tanɩ kyɛ nɩ, kɛ Bayɩbʋlʋ yɩ kã nwʋmɔ odwokɔ se a? (Kila azɩkɛnɩ odwokɔ yɩ sʋ̃.)

² Kezimɔ Gyehova fa yɛ tanɩ kyɛ yɛ nɩ, ɩdɩ sʋnʋnkʋ̃ wɔ kezimɔ yɛfa tanɩ yɛkyɛ yɛ nwʋ yɛ nwʋ nɩ nwʋ kʋlaa. Abiyela íni kɛnɩ mɔɔ ɩkɔhʋla kɛva tanɩ kɛhyɛ kɛmɔ Gyehova fa tanɩ kyɛ nɩ. Ndwomidʋlɛvʋlɔ yɩ hanlɩ Gyehova nwʋ odwokɔ kɛɛ: “Wʋ kɛnɩ yɛ tanɩfakyɛ baaba yɩ wɔ a, mɔɔ ɩkɛyɛ mɔɔ mmenii bo kunlu koduli wʋ nwʋ.” a (Ndw. 130:4) Amba, Gyehova yɩ tanɩfakyɛ yɩ yɛ lɛ “tanɩfakyɛ baaba” yɩ a. Yɩzayɩ nkʋ̃ la yɛ ɩkʋla ɩma yɛnwʋ mɔɔ tanɩfakyɛ tʋ kile ankasa a. Wɔ Bayɩbʋlʋ yɩ ɔfʋã azʋlɔtʋ be nu nɩ, Bayɩbʋlʋ ɛhɛlɛlɛmaa nɩ valɩ Hibulu odwokɔpɔkɔ be hanlɩ Gyehova yɩ tanɩfakyɛ nwʋ odwokɔ wɔ ɔhʋanɩ be zʋ mɔɔ bɛlɛ́falɩ bɛlɛ́kanlɩ enii yɩ tanɩfakyɛ nwʋ odwokɔ kyɩ̃.

 3. Mɩnla ɔhʋanɩ zʋ yɛ kezimɔ Gyehova fa tanɩ kyɛ nɩ dɩ sʋnʋnkʋ̃ wɔ yɛ dɩyɛ nwʋ a? (Ayɩzaya 55:​6, 7)

 ³ Sɛ Gyehova fa abiye yɩ tanɩ kyɛ yɩ a, ɩpɩba enii kʋ̃ nɩ yɩ tanɩ yɩ kʋlakʋla. Ɩma yɛkʋla yɛ nɩɩ yɩ nyia abusunwawɔlɛ mɔɔ numɔ yɛ sɩ dɔkʋ̃. Yɛla Gyehova asɩ kɛɛ ɩfa yɛ tanɩ ɩkyɛ yɛ kʋlakʋla na ɩzʋ̃ kunlumiba nu ɩfa ɩkyɛ yɛ mbɔmɩ sʋ̃maa.—Kɩnga Ayɩzaya 55:​6, 7.

 4. Mɩnla ɔhʋanɩ zʋ yɛ Gyehova bʋwa yɛ ma yɛtɩ mɔɔ tanɩfakyɛ kile ankasa nɩ yɩ tʋ a?

⁴ Sɛ kezimɔ Gyehova fa tanɩ kyɛ nɩ dɩ sʋnʋnkʋ̃ wɔ yɛ dɩyɛ nwʋ a, nɩ kɛ ɩkɛyɛ na mmenii mɔɔ yɛtɔ sini nɩ, yɛahʋla yɛadɩ kezimɔ Gyehova fa tanɩ kyɛ ankasa nɩ yɩ tʋ bʋwɔ a? Gyehova fa ndindianwʋ ngɩnlɩma be bʋwa yɛ ma yɛtɩ kezimɔ ɩfa tanɩ ɩkyɛ nɩ yɩ tʋ, na yekozunzu numɔ be nwʋ wɔ dɩyɛzumanlɛ eyi nu. Ɩkɔwʋwa yɛ ma yɛkɔnwʋ kezimɔ Gyehova ɩyɩ yɛ tanɩ wɔ kɛ na mmɩlɩ kʋ̃ yɩ la isiyeziye yɛ nɩɩ yɩ avinli abusunwawɔlɛ mɔɔ tanɩ manlɩ ɩzɩkɛlɩ nɩ. Mmɩlɩ mɔ yesunzuu ndindianwʋ eyimmɔ nwʋ nɩ, ɩkɛma ɔlɔlɛ mɔɔ yɛwɔ yɛma yɛ Zɩ mɔɔ ɩnwʋ nwɔkɛ, yi kunlu ɩdɩyɛnɛ, na ɩfa ɩkyɛ wɔ ahʋanɩ sʋ̃maa zʋ nɩ kɛyɛ kezi.

GYEHOVA ƖYƖ YƐ TANƖ WƆ KƐ

 5. Sɛ Gyehova fa yɛ tanɩ kyɛ yɛ a, kɛ ɩyɛ yɩ ise a?

⁵ Wɔ Bayɩbʋlʋ nu nɩ, bɛfa tanɩ betindiã adɩsʋwa ɔnlʋmɔ ɔnlʋmɔ nwʋ. Bulombunli Devidi hanlɩ yɩzayɩ yɩ tanɩ nwʋ odwokɔ kɛɛ: “Mʋ mfʋmɩ wʋlʋ mʋ zʋ; ɩyɛ kɛɛ adɩsʋwa ɔnlʋmɔ mɔɔ mɩáhʋla mʋsʋwa.” (Ndw. 38:4) Naasʋ̃ bɛzabɛ mɔɔ bonu bɔ nwʋ nɩ, Gyehova ɩfa bɛ tanɩ ɩkyɛ bɛ. (Ndw. 25:18; 32:5) Hibulu odwokɔ mɔɔ bekile yɩ tʋ “fa kyɛ” nɩ, mɔɔ ikile yɛ lɛ kɛɛ “pigyia” anzɛnyɩɩ “sʋwa.” Meti sa yɛkʋla yetua Gyehova nwʋ mfonyini kɛɛ benyia be mɔɔ yɩ nwʋ yɛ sɩ mɔɔ ipigyia tanɩ nwʋ adɩsʋwa mɔɔ ɩla ye padi nɩ, na ɩsʋwa ɩkɔ aɣinzi aɣinzi.

 6. Ɛhɩnla dɩka yɛ Gyehova ɩsʋwa yɛ tanɩ ɩkɔ itwu a?

⁶ Bayɩbʋlʋ yɩ fa ndindianwʋ fʋlɔ di egyima ma yɛnwʋ kɛɛ Gyehova sʋwa yɛ tanɩ kɔ aɣinzi aɣinzi paa. Ndwomi 103:12 kã kɛɛ: “Kɛmɔ avindelɩyɛ nɩɩ adɔlɩyɛ bɛ avinli twɩ̃ nɩ, ɔzɔ la yɛ ɩma yɛ nɩɩ yɛ tanɩ avinli hwɩ̃ a.” Avindelɩyɛ nɩɩ adɔlɩyɛ bɛ avinli twɩ̃ paa. Bɛáyiyia numɔ wɔ ɔhʋanɩ bela zʋ kyɩ̃. Eyi kile kɛɛ Gyehova ɩyɩ yɛ tanɩ ɩkɔ aɣinzi aɣinzi paa kɛmɔ avindelɩyɛ nɩɩ adɔlɩyɛ bɛ avinli twɩ̃ nɩ. Eyi ma yenyia anwʋlazʋ kɛɛ Gyehova fa yɛ tanɩ kyɛ yɛ kʋlakʋla amba!

 7. Mɔɔ Gyehova ɩfa ɩyɛ yɛ tanɩ nɩ, kɛ Bayɩbʋlʋ yɩ kã nwʋmɔ odwokɔ se a? (Mika 7:​18, 19)

⁷ Sɛ Gyehova ɩyɩ yɛ tanɩ ɩkɔ aɣinzi aɣinzi a, asʋ̃ ɩkɔ zʋ ibu nwʋmɔ ngʋnda a? Anhã. Bulombunli Hɛzɩkaya hanlɩ Gyehova nwʋ odwokɔ kɛɛ: “Ɔdʋ mɩ tanɩ munwatĩĩ ogua wʋ mɛda.” Anzɛnyɩɩ kɛmɔ azɩkɛnɩ odwokɔ yɩ kã nɩ, “ɛyɩ mɩ tanɩ munwatĩĩ wɔ wʋ anyunu.” (Ayɩ. 38:​9, 17; ad.) Ndindianwʋ eyi ma yɛnwʋ kɛɛ, sɛ Gyehova ɩyɩ bɛzabɛ mɔɔ bonu bɔ nwʋ nɩ bɛ tanɩ wɔ yɩ anyunu a, iti itiã dɩka mɔɔ ɩlɔ́nwʋ yɩ dɔkʋ̃. Sa yɛkʋla yɛkã odwokɔ eyi wɔ ɔhʋanɩ fʋlɔ zʋ kɛɛ: ‘Ɛma ɩyɛ kɛɛ mɔɔ mɩlɛ́yɛlɩ tanɩ po.’ Bayɩbʋlʋ yɩ valɩ ndindianwʋ fʋlɔ zili odwokɔ eyi zʋ wudo wɔ Mika 7:​18, 19. (Kɩnga.) Bɛkã Gyehova nwʋ odwokɔ wɔ kɛnɩ kɛɛ, ɩtʋ yɛ tanɩ itiã ngyemvile yɩ tʋ tɔnwʋʋ. Wɔ ɔwɔkɩ mmɩlɩ nu nɩ, sɛ nɩ bɔtʋ debe betiã ngyemvile tʋ a, nɩ ɩ́dɩ dɩyɛ mɔɔ bɔkɔhʋla bɔkɔnwʋ yɩ anzɛnyɩɩ bɛkɛyɩ yɩ dɔkʋ̃.

 8. Babʋmɩ ɛkɩhyɩ nɩ, mɩnla yɛ yezuma a?

⁸ Ndindianwʋ eyimmɔ ma yɛnwʋ kɛɛ sɛ Gyehova fa yɛ tanɩ kyɛ yɛ a, ɩyɩ yɛ tanɩ nwʋ adɩsʋwa yɩ wɔ yɛ zʋ. Amba, kɛmɔ Devidi hanlɩ nɩ, “nyilalɛ ɩhã mmenii mɔɔ Nyamɩnlɩ ɩva bɛ mmɛladʋnlɛ ɩhyɛ bɛ, na ɩɣɩda bɛ tanɩ nɩ mmɔ zʋ nɩ! Nyilalɛ ɩhã enii nɩ mɔɔ Nyamɩnlɩ iáwu yɩ tanɩ nwʋ ngʋnda nɩ!” (Wul. 4:​6-8) Tanɩfakyɛ baaba yɛ nɩ!

 GYEHOVA PƖBA YƐ TANƖ

 9. Mɩnla ɔhʋanɩ zʋ yɛ Bayɩbʋlʋ yɩ bʋwa yɛ ma yɛnwʋ kezimɔ Gyehova fa yɛ tanɩ kyɛ yɛ kʋlakʋla a?

⁹ Iluwa elelɛdɩyɛ afɔlɩ yɩ ti, Gyehova kʋla pɩba tanɩyɛlɛmaa mɔɔ bonu bɔ nwʋ nɩ bɛ tanɩ. Bɛmá yehila mɔɔ Bayɩbʋlʋ yɩ kã falɩ kezimɔ Gyehova yɛ zɔ nɩ nwʋ. Bayɩbʋlʋ yɩ kã Gyehova nwʋ odwokɔ kɛɛ, ɩwʋwʋ tanɩ ɩkɔ. Eyi ma tanɩyɛlɛnii nɩ yɩ nwʋ tɩ. (Ndw. 51:7; Ayɩ. 4:4; Gyɛ. 33:8) Gyehova yɩzayɩ ɩkã mɔɔ ɩzʋ̃ ɔzɔ mɔɔ ɩyɛ nɩ nu ɩba nɩ nwʋ odwokɔ kɛɛ: “Ɩwɔ numɔ kɛɛ bɛ tanɩ ɩdɩ kɛɛ koogyanɩ dɩyɛ, naasʋ̃ ɩkɛyɛ sakʋʋ kɛɛ sunoo; ɩwɔ numɔ kɛɛ ɩyɛ kanwuu kɛɛ ɛdamɛ kɔkɔlɔ dɩyɛ, naasʋ̃ ɩkɛyɛ sakʋʋ kɛɛ owuanɩ eɣinli.” (Ayɩ. 1:18) Sɛ debe kɔkɔlɔ kalɩ atalɩ anzɛnyɩɩ ɛdamɛ be nu a, ɩyɛ sɩ paa kɛɛ ɛkɛyɩ yɩ wɔ numɔ. Naasʋ̃ ndindianwʋ eyi ma yenyia anwʋlazʋ kɛɛ, Gyehova kɔhʋla kɔwʋwʋ yɛ tanɩ ma ɩkɔhɔ kʋlakʋla mɔɔ yɛlɔ́nwʋ yɩ dɔkʋ̃.

10. Mɩnla ndindianwʋ fʋlɔ yɛ ɩma yɛnwʋ kezimɔ Gyehova ɩzʋ̃ kunlumiba nu ɩfa yɛ tanɩ ɩkyɛ yɛ a?

¹⁰ Kɛmɔ dɩyɛzumanlɛ mɔɔ ili eyi anyunu manlɩ yɛnwʋnlɩ yɩ nɩ, bɛfa tanɩ betindiã “kakɛ” nwʋ sʋ̃. (Mt. 18:​32-35) Meti mmɩlɩ bela mɔ yɛkɛyɛ Gyehova tanɩ nɩ, nɩ yɛ kakɛ yɩ ɩsʋ̃nɩɩ. Yɛma Gyehova kakɛ kezile paa! Naasʋ̃ sɛ Gyehova fa yɛ tanɩ kyɛ yɛ a, nɩ ɩdɩ kɛɛ mɔɔ idua yɛ kakɛ yɩ nu. Iáhila ɔhʋanɩ kɛɛ yekoduwa tanɩ mɔɔ ɩva ɩhyɛ yɛ nɩ nwʋ kakɛ. Kɛmɔ sɛ yɛma abiye kakɛ na ɩfa ɩkyɛ yɛ a yɛ anyɩ de nɩ, ɔzɔ la yɛ sɛ Gyehova fa yɛ tanɩ kyɛ yɛ a, yɛ anyɩ de a!

11. Sɛ Bayɩbʋlʋ kã kɛɛ “bɛbɩba” yɛ tanɩ a, kɛ yɩ tʋ kile a? (Egyima 3:​19, NWT)

¹¹ Gyehova iádua yɛ kakɛ anzɛnyɩɩ yɛ tanɩ nu kɛkɛ, mfomi ɩpɩba yɩ kʋlaa. (Kɩnga Egyima 3:​19, NWT). Fa yɩ kɛɛ ɛma abiye kakɛ na ɩhɛlɛ igua kɛlɛta zʋ, na akʋ̃ dɩyɛ enii ɔkʋ̃ nɩ ise ɩva ɩhyɛ wʋ meti ɩva pɛnɩ idua numɔ. Ɩwɔ numɔ kɛɛ idua kakɛ yɩ nu dɩyɛ, naasʋ̃ ekila kɛlɛta yɩ zʋ a ɔkʋla ɔnwʋ kɛɛ yɩ tʋ zʋ lanwʋ la wɔ kɛ. Naasʋ̃ sɛ bɛpɩba debe a, mɛyɩ ɩ́dɩ zɔ. Sɛ yɛkɛdɩ eyi tʋ bʋwɔ a, ɩsɛ kɛɛ yɛkakɛ kɛɛ wɔ ɔwɔkɩ mmɩlɩ nu nɩ, ɩnkɩ mɔɔ nɩ bɛfa bɛkɛlɛ dɩyɛ nɩ, nɩ ɩyɛ mɛlɛkɛ kɛɛ bɛkɛva nzulo kɛbɩba. Nɩ abiye kɔhʋla kɛva kyaabɛ kɔwɔ nzulo nu kɛbɩba debe mɔɔ bɛhɛlɛ. Meti nɩ sɛ ‘bɛpɩba’ kakɛ be a, iminli kʋlaa. Nɩ abiyela lɔ́kʋla kɔnwʋ mɔɔ bɛhɛlɛlɩ nɩ. Meti nɩ ɩdɩ kɛɛ mɔɔ enii ɔkʋ̃ nɩ ɩáma kakɛ bela. Ɩyɛ yɛ fɛ paa kɛɛ yɛnwʋ kɛɛ, sɛ Gyehova fa yɛ tanɩ kyɛ yɛ a, nɩ ɩbɩba yɩ kʋlaa dɩ kɛɛ mɔɔ yɛlɛ́yɛlɩ tanɩ po!—Ndw. 51:9.

12. Ndindianwʋ mɔɔ ɩfalɩ mununkumi tunwuu yi nwʋ nɩ, mɩnla yɛ yesuma wɔ nu a?

¹² Gyehova fa ndindianwʋ fʋlɔ di egyima fa kile kezimɔ ɩpɩba yɛ tanɩ kʋlakʋla nɩ nu. Ɩkã kɛɛ: “Mɩkɛbɩba bɛ mmɛladʋnlɛ dɩkɛɛ mɔɔ mununkumi ɣɩda zʋlɔ, na mɩabɩba bɛ tanɩ dɩkɛɛ mɔɔ mununkumi tunwuu ɣɩda zʋlɔ.” (Ayɩ. 44:22) Sɛ Gyehova fa yɛ tanɩ kyɛ yɛ a, ɩdɩ kɛɛ mɔɔ ɩva mununkumi tunwuu ɩɣɩda yɛ tanɩ yɩ zʋ mɔɔ anyɩnlɩ lɔ́nwʋ yɩ dɔkʋ̃ kʋlaa.

13. Sɛ Gyehova fa wʋ tanɩ kyɛ wʋ a, kɛ ɩma ɛtɩ nɣanlɩ se a?

¹³ Mɩnla yɛ yesuma wɔ ndindianwʋ eyimmɔ nu a? Sɛ Gyehova fa yɛ tanɩ kyɛ a, íni kɛɛ yɛma yɛ adwɩnɩ kɔ zʋlɔ bu yɛ fɔ. Gyehova luwa Gyisɛsɩ Kɩlayɩsɩ yi mmegyia zʋ idua yɛ kakɛ munwala nu. Sɛ Gyehova fa yɛ tanɩ kyɛ yɛ a, ɩdɩ kɛɛ mɔɔ yɛlɛ́yɛlɩ tanɩ po. Sɛ yɛyɛ tanɩ na yenu yɛ nwʋ a, ɔzɔ ɔhʋanɩ yɩ zʋ yɛ Gyehova ɩfa ɩkyɛ yɛ a, ɩfa ɩkyɛ yɛ kʋlakʋla!

GYEHOVA SIYEZIYE YƐ NƖƖ YƖ AVINLI ABUSUNWAWƆLƐ

14. Mɩnla ti mɔɔ yɛkɔhʋla kenyia Gyehova yɩ tanɩfakyɛ nu anwʋlazʋ a? (Kila mfonyini yi sʋ̃.)

¹⁴ Sɛ Gyehova fa yɛ tanɩ kyɛ yɛ kʋlakʋla a, ɩma yɛkʋla yɛ nɩɩ yɩ nyia abusunwawɔlɛ baaba. Eyi ɩáma yɛ adwɩnɩ kɔ zʋlɔ bu yɛ fɔ. Íni kɛɛ  ye kunlu tu kɛɛ Gyehova ɩlɛ́falɩ ɩlɛ́kyɛlɩ kʋlakʋla na ɩpɩbɛɛ ɔhʋanɩ be koluwa zʋlɔ kɔhwɩ̃ yɛ azʋ̃. Gyehova ɩlɛ́yɛ zɔ kyɩ̃. Sɛ Gyehova kã kɛɛ ɩva yɛ tanɩ ɩhyɛ yɛ a, mɩnla ti mɔɔ yɛkɔhʋla kenyia yi nu anwʋlazʋ kɛɛ ɩva ɩhyɛ yɛ amba a? Gyehova hanlɩ hileli nkɔmɩhyɛnii Gyɛlɩmaya kɛɛ: “Mɩkɛva bɔ mfʋmɩ mɩkɛhyɛ bɛ, na mɩlɛ́kakɛ bɛ tanɩ ebiyekʋ̃.” (Gyɛ. 31:34) Pɔɔlʋ hanlɩ ndwokɔ mɔɔ Gyehova hanlɩ hileli nkɔmɩhyɛnii Gyɛlɩmaya nɩ be kɛɛ: “Mɩlɛ́kakɛ bɔ mfʋmɩ nɩ mmɔ ebiyekʋ̃.” (Hib. 8:12) Kɛ eyi tʋ kile ankasa a?

15. Sɛ Gyehova kã kɛɛ ɩlɛ́kakɛ yɛ tanɩ dɔkʋ̃ a, ikile mɩnla?

¹⁵ Sɛ Bayɩbʋlʋ fa odwokɔpɔkɔ “kakɛ́” di egyima a, kɛ mmɩlɩ munwala yɛ ikile kɛɛ abiye kɔdwɩnɩndwɩnɩ odwokɔ be mɔɔ izili nɩ nwʋ a. Mfomi, ɩkɔhʋla sʋ̃ kehile kɛɛ ikodu agyiakɛ wɔ odwokɔ be nwʋ. Awulo mɔɔ nɩ igyeni owudo zʋ wɔ Gyisɛsɩ yɩ pɛ nɩ hanlɩ hileli Gyisɛsɩ kɛɛ: “Gyisɛsɩ, sɛ ɛba kɛɛ Bulombunli, wɔ wu Bulombunli Manlɩ nɩ nu a, kakɛ mɩ!” (Lk. 23:​42, 43) Ɔzɔ mmɩlɩ yɩ, nɩ ɩlɛ́kã kehile Gyisɛsɩ kɛɛ ɩdwɩnɩndwɩnɩ́ yɩ nwʋ kɛkɛ. Munwalɩyɛ mɔɔ Gyisɛsɩ va manlɩ yɩ nɩ kile kɛɛ nɩ ɩkɛyɛ debe kɛma awulo yi, kile kɛɛ ikodunwo yi wɔ owulo nu. Eyi ma yɛnwʋ kɛɛ sɛ Gyehova kã kɛɛ ɩlɛ́kakɛ yɛ tanɩ dɔkʋ̃ a, mɔɔ ikile yɛ lɛ kɛɛ ɩva ɩhyɛ yɛ na ɩlɔ́twɩ̃ yɛ azʋ̃ wɔ nwʋmɔ eɣile be.

16. Fanwʋdi mɔɔ ɩzʋ̃ tanɩfakyɛ baaba yɩ nu ɩba nɩ, kɛ Bayɩbʋlʋ yɩ kã nwʋmɔ odwokɔ ise a?

¹⁶ Ndindianwʋ fʋlɔ wɔ Bayɩbʋlʋ yɩ nu mɔɔ ɩma yɛtɩ kezimɔ tanɩfakyɛ baaba yɩ ma yenyia fanwʋdi nɩ tʋ. Ɩkã kɛɛ, iluwakɛɛ yɛtɔ sini nɩ ti, ‘yɛdɩ alɔngɔ yɛma tanɩ.’ Naasʋ̃ yɛla Gyehova asɩ paa kɛɛ, iluwa yɩ tanɩfakyɛ ti, ɩdɩ kɛɛ mɔɔ bele yɛ wɔ alɔngɔzʋ̃mɩnlɛ nu na ‘yéni tanɩ yɩ tʋ ebiyekʋ̃.’ (Wul. 6:​17, 18; Yik. 1:5) Amba, sɛ yɛba yɛnwʋ kɛɛ Gyehova fa yɛ tanɩ kyɛ yɛ a, sa ɩkʋla ɩma yɛtɩ nɣanlɩ kɛɛ dɔngɔ mɔɔ bele yi wɔ alɔngɔzʋ̃mɩnlɛ nu.

17. Mɩnla ɔhʋanɩ zʋ yɛ sɛ bɛfa yɛ tanɩ bɛkyɛ yɛ a, ɩsa yɛ adimakɛlɛ a? (Ayɩzaya 53:5)

¹⁷ Kɩnga Ayɩzaya 53:5. Ndindianwʋ mɔɔ itualɩ yɩ tʋ mɔɔ yɛbazunzu nwʋmɔ nɩ, ɩfa yɛ  tindiã mmenii mɔɔ owulo adimakɛlɛ be wɔ bɛ nɩ nwʋ. Iluwa elelɛdɩyɛ afɔlɩ mɔɔ Gyehova luwalɩ yɩ Ɣa yɩ zʋ ɩwɔlɩ nɩ ti, yɛkʋla yɛkã yɩ wɔ sɛnkyɩlɛdɩ ɔhʋanɩ zʋ kɛɛ bɛza yɛ adimakɛlɛ. (1 Pit. 2:24) Sɛ yɛyɛ tanɩ a, yɛsɩkɛ yɛ nɩɩ Gyehova avinli abusunwawɔlɛ. Naasʋ̃ iluwa elelɛdɩyɛ afɔlɩ yɩ ti, ɩfa yɛ tanɩ ɩkyɛ yɛ na ɩma yɛ nɩɩ yɩ nyia abusunwawɔlɛ mɔɔ numɔ yɛ sɩ dɔkʋ̃. Kɛmɔ sɛ abiye yɩ nwʋ pa yɩ ɛzɩzɩbɛ ɛzɩzɩbɛ na yɩ nwʋ tɔ yɩ a yɩ anyɩ de nɩ, ɔzɔ la yɛ sɛ yesiyeziye yɛ nɩɩ Gyehova avinli na ide yɛ itiã numɔ dɔkʋ̃ a, yɛ anyɩ de paa a.

MFASƲ MƆƆ YENYIA WƆ GYEHOVA YƖ TANƖFAKYƐ ZƲ

18. Ndindianwʋ mɔɔ ɩfalɩ Gyehova yɩ tanɩfakyɛ nwʋ mɔɔ yezunzu nwʋmɔ nɩ, mɩnla yɛ yezuma wɔ nu a? (Kila alɩka mɔɔ ise “Kezimɔ Gyehova Ɩfa Yɛ Tanɩ Ɩkyɛ Yɛ.” nɩ sʋ̃.)

¹⁸ Ndindianwʋ mɔɔ ɩfalɩ Gyehova yɩ tanɩfakyɛ nwʋ mɔɔ yezunzu nwʋmɔ nɩ, mɩnla yɛ yezuma wɔ nu a? Sɛ Gyehova fa yɛ tanɩ kyɛ yɛ a, ɩfa ɩkyɛ yɛ kʋlakʋla dɩkɛɛ mɔɔ yɛlɛ́yɛlɩ tanɩ po, na ilékyina zʋlɔ kɔhwɩ̃ yɛ azʋ̃ eɣile be. Eyi ɩma yɛkʋla yɛ nɩɩ yɛ sʋlɔ Ɛzɩlɛ yɩ nyia abusunwawɔlɛ baaba. Naasʋ̃ ɩsɛ kɛɛ yɛkakɛ kɛɛ, Gyehova yɩ tanɩfakyɛ dɩ akyɛdɩ mɔɔ ɩfa ɩma yɛ. Kɛ ebiye a yɛfata ti yɛ ɩfa ɩma yɛ a, mfomi iluwa kunlumiba nɩɩ ɔlɔlɛ mɔɔ ɩwɔ ɩma yɛ nɩ ti a.—Wul. 3:24.

19. (a) Mɩnla yɛ ɩsɛ kɛɛ yekile nwʋmɔ anyɩnlɩzɔlɛ a? (Wulomimaa 4:8) (b) Mɩnla yɛ yekozunzu nwʋmɔ wɔ dɩyɛzumanlɛ mɔɔ ili kɛnɩ nɩ nu a?

¹⁹ Kɩnga Wulomimaa 4:8. Yɛ anyɩ sɔ paa kɛɛ Gyehova ɩfa yɛ tanɩ ɩkyɛ yɛ! (Ndw. 130:4) Naasʋ̃, sɛ yɛpɛ kɛɛ Gyehova fa yɛ tanɩ kyɛ yɛ a, ɩsɛ kɛɛ yɛyɛ debe mɔɔ nwʋmɔ hyinyia paa. Gyisɛsɩ hileli numɔ kɛɛ: “Na sɛ mʋnlʋmmɔ bɛáfa mmenii mɔɔ bɛyɛ tanɩ mʋnlʋmmɔ nɩ bɛ dɩyɛ nɩ bɛkyɛ bɛ a, mʋnlʋmmɔ bɛ Zɩ mɔɔ ɩwɔ sʋlɔ nɩ sʋ̃ ɩlɛ́fa mʋnlʋmmɔ sʋ̃ bɛ dɩyɛ nɩ ɩkɛhyɛ mʋnlʋmmɔ.” (Mt. 6:​14, 15) Eyi ma yɛnwʋ yɩ petee kɛɛ, ɩsɛ kɛɛ yesumazuma Gyehova yɩ tanɩfakyɛ yɩ. Naasʋ̃ kɛ yɛkɛyɛ yɩ keze a? Dɩyɛzumanlɛ mɔɔ ili kɛnɩ nɩ kɛma yɛkɔnwʋ yɩ.