Naasʋ̃, Gyehova kila ɔhʋanɩ kɛɛ yɛkɛva abʋtalɩ yɛkɛlɩkɛ yɩzayɩ mmɩlɩ mɔ ɩkɛva ɩkɛyɛ nninyeni bʋwɔ nɩ. Mɩnla ti mɔɔ ɩpɛ kɛɛ yɛyɛ zɔ a? Mɩnla yɛ ɩkɔwʋwa yɛ ma yɛkɛva anyɩnlɩlelɛ yɛkɛlɩkɛ a?

MƖNLA TI MƆƆ GYEHOVA KILA ƆHƲANƖ KƐƐ YƐKƐLƖKƐ A?

Bayɩbʋlʋ yɩ kã kɛɛ: “Gyehova ɩlɛ abʋtalɩ ɩdɩkɛɛ kɛɛ ɩkɔwʋwa mʋnlʋmmɔ, na ikebigyia yi nu sʋlɔ ɩkɔnwʋ bɔ nwɔkɛ. Iluwakɛɛ Gyehova dɩ pɛlɩpɛlɩ Nyamɩnlɩ. Anyɩnlɩlelɛ yɛ lɛ bɛzabɛ munwatĩĩ mɔɔ bɛdɩkɛ yɩ nɩ.” (Ayɩ. 30:18) Ayɩzaya hɛlɛlɩ ndwokɔ eyi manlɩ Dwuumaa azʋ̃nzɩzɩbɛmaa nɩ. (Ayɩ. 30:1) Naasʋ̃ nɩ Dwuumaa abiyemmɔ wɔ kɛnɩ mɔɔ bɛdɩ nɔhʋanlɛmaa, meti ndwokɔ eyi manlɩ benyianlɩ anwʋlazʋ. Nnɛ sʋ̃, ndwokɔ eyi ma Gyehova azʋ̃mɩvʋlɔ nɔhʋanlɛmaa nyia anyɩnlɩlazʋ.

Meti ɩsɛ kɛɛ yɛfa abʋtalɩ yɛdɩkɛ, iluwakɛɛ Gyehova sʋ̃ ɩlɛ abʋtalɩ ɩdɩkɛɛ. Ɩhyɛ mmɩlɩ mɔ ɩkɛva ɩkɛyɩ oyuwadɩ tanɩ eyi wɔ kɛnɩ, na ɩdɩkɛɛ ɔzɔ eɣile yi nɩɩ dɔnɩhwɩlɩ yɩ. (Mt. 24:36) Ɔzɔ mmɩlɩ nɩ, dɩyɛ bela kɛla ali petee kɛɛ odwokɔ mɔɔ Abɔnsamɩ va dianlɩ Gyehova nɩɩ yɩ azʋ̃mɩvʋlɔ zʋ nɩ, ɩ́dɩ nɔhʋanlɛ. Akʋ̃ Gyehova kɛyɩ Setanɩ nɩɩ mmenii mɔɔ bɛda yɩ mɛda munwatĩĩ wɔ kɛnɩ, naasʋ̃ amɩyɛ mɛyɩ ‘ɩkɔnwʋ yɛ nwɔkɛ.’

Kakɩ yɩ mɛyɩ, ebiye a Gyehova ɩlɛ́yɩ yɛ ɔhawʋ azʋlɔtʋ yɩ wɔ yɛ zʋ, naasʋ̃ ɩhyɛ yɛ ɛzɩzɩbɛ kɛɛ sa yɛkʋla yɛfa anyɩnlɩlelɛ yɛdɩkɛ yɩ. Kɛmɔ Ayɩzaya hanlɩ nɩ, sɛ yekilaa ɔhʋanɩ kɛɛ debe baaba be kɛɣa a, sa yɛ anyɩ kʋla de. (Ayɩ. 30:18) a Kɛ ɩkɛyɛ na yɛanyia ɔzɔ anyɩnlɩlelɛ yɩ a? Nninyeni anla eyimmɔ kɔwʋwa yɛ.

MƆƆ ƖKƐMA WƲ ANYƖ KELE MMƖLƖ MƆ ƐDƖKƐƐ NƖ

Fa wʋ adwɩnɩ siye nninyeniba zʋ. Nninyeni tanɩ sʋ̃maa dʋlɩ Bulombunli Devidi wɔ yɩ ɛbɩlawɔlɛ nu. (Ndw. 37:35) Naasʋ̃, ɩhɛlɛlɩ kɛɛ: “Yɛ dinyii kila Gyehova na dɩdagyɩ dɩkɛ yɩ. Sɛ abiye bɔ pɔkɔ tanɩ be na ɩkʋla ɩyɛ nwʋmɔ egyima a, máma idide wʋ.” (Ndw. 37:7) Devidi yɩzayɩ ɩvalɩ fʋlɔdulɛ eyi ɩyɛlɩ egyima na ɩvalɩ yɩ adwɩnɩ iziyeli anʋhʋba mɔɔ Gyehova ɩwɔ kɛɛ ikele yi nɩ zʋ. Akʋ̃ sʋ̃, ɩdwɩnɩndwɩnɩnlɩ nninyeniba mɔɔ Gyehova yɛlɩ manlɩ yɩ munwatĩĩ  nwʋ na ihileli nwʋmɔ anyɩnlɩzɔlɛ. (Ndw. 40:5) Yɛzayɛ sʋ̃, sɛ yɛdwɩnɩndwɩnɩ nninyeniba mɔɔ isizi wɔ yɛ ɛbɩlawɔlɛ nu nɩ nwʋ na yɛáfa yɛ adwɩnɩ yesiye ndwokɔzɩzɩbɛ mɔɔ yeyiyiaa nɩ zʋ a, sa ɩyɛ mɛlɛkɛ kɛɛ yɛkɛlɩkɛ Gyehova.

Yɛ sʋ̃maa fa yɩ Gyehova ayɛlɛ. Devidi mɔɔ ɩkɛyɛ kɛɛ ɩhɛlɛlɩ Ndwomi 71 nɩ hanlɩ hileli Gyehova kɛɛ: “Mɩkɛlɩkɛ wʋ daabaa; ayɛlɛyɩlɛ mɔɔ mɩfa mɩma wʋ nɩ, mɩkɛva ebiye mɩkɛhɩnla nwʋmɔ.” (Ndw. 71:14) Kɛ ɩyɩlɩ Gyehova ayɛlɛ izeli a? Nɩ ɩkã Gyehova nwʋ odwokɔ ikile mmenii, na ɩtʋ ayɛlɛyɩlɛ ndwomi ɩma yɩ. (Ndw. 71:​16, 23) Dɩkɛɛ Devidi nɩ, sɛ yɛdɩkɛɛ Gyehova a, sa yɛ anyɩ kʋla de. Yɛyɩ Gyehova ayɛlɛ mmɩlɩ mɔ yɛyɛɛ dasɩlɛlilɛ egyima yɩ, yɛ nɩɩ yɛ ɔhɔnwʋmmɔ bɔ yɩ nwʋ nkɔmmɔ, nɩɩ mmɩlɩ mɔ yɛtʋʋ asafʋ ndwomi nɩ. Mmɩlɩ fʋlɔ mɔ ɔkɔdʋ asafʋ ndwomi nɩ, fa wʋ adwɩnɩ siye numɔ ndwokɔ mɔɔ ɩhyɛ ɛzɩzɩbɛ nɩ zʋ.

Ma wu mmeliyema mmenyia nɩɩ mmaalɛ bɛhyɛ wʋ ɛzɩzɩbɛ. Mmɩlɩ mɔ Devidi iyiyiaa ndwokɔzɩzɩbɛ nɩ, ɩhã ihileli Gyehova kɛɛ: “Mɩkɛva mʋ nwʋ mikediã wu dima zʋ wɔ wʋ nɔhʋanlɛmaa bɛ anyunu.” (Ndw. 52:9) Amɩyɛ sʋ̃, kɛ dɩyɛzumanlɛ nɩɩ dasɩlɛlilɛ nu nkʋ̃ la yɛ yɛkɔhʋla yekenyia ɛzɩzɩbɛhyɛlɛ wɔ ye mmeliyema kɛ a, mfomi mmɩlɩ sʋ̃ mɔ yɛ nɩɩ bɛ yɛbɔɔ numɔ yekele yɛ anyɩ nɩ.—Wul. 1:​11, 12.

Hyɛ wʋ anyɩnlɩlazʋ yi nu ɛzɩzɩbɛ. Ndwomi 62:5 kã kɛɛ: “Nyamɩnlɩ yɛ mɩyɛ dinyii mɩdɩkɛɛ yɩ a, iluwakɛɛ mɛyɩ yɛ lɛ mɩ anyɩnlɩlazʋ.” Nwʋmɔ hyinyia paa kɛɛ yenyia dedi mɔɔ numɔ yɛ sɩ, titili mmɩlɩ mɔ yɛtɩ nɣanlɩ kɛɛ oyuwadɩ yɩ awielɩyɛ nɩ ɩhyɛ ɩdɛla mmɩlɩ mɔ nɩ yekilaa yɩ ɔhʋanɩ nɩ. Ɩsɛ kɛɛ yenyia anwʋlazʋ kɛɛ Gyehova yɩ anʋhʋba munwatĩĩ kɛɣa numɔ, ɩávalɩ nwʋmɔ mmɩlɩ tɩndɩnlɩ mɔ yɛkɛva yɛkɛlɩkɛ nɩ. Sa yɛkʋla yɛhyɛ yɛ anyɩnlɩlazʋ yi nu ɛzɩzɩbɛ iluwa Nyamɩnlɩ Odwokɔ mɔɔ yekozuma nɩ zʋ. Kɛ ndianwʋ nɩ, ɩsɛ kɛɛ yesuma numɔ nkɔmɩhyɛ, kezimɔ Bayɩbʋlʋ ɛhɛlɛlɛmaa yɩ bo ndwokɔ yiyia, nɩɩ mɔɔ Gyehova ɩma yɛnwʋ yɛfalɩ yɩ nwʋ. (Ndw. 1:​2, 3) Akʋ̃, ɩsɛ kɛɛ yɛkɔ zʋ “yesiã wɔ sunzuma nwanzanwanza yi tumi nɩ nu” na ama yɛahɔ zʋ yɛ nɩɩ Gyehova yeanyia abusunwawɔlɛ baaba mmɩlɩ mɔ yɛdɩkɛɛ kɛɛ yɩ anʋhʋba mɔɔ ɩfalɩ nnwʋanlɩ mɔɔ íni awielɩyɛ yɩ nwʋ kɛɣa numɔ nɩ.—Dwu. 20, 21.

Dɩkɛɛ Bulombunli Devidi nɩ, nyia anwʋlazʋ kɛɛ Gyehova bɔ bɛzabɛ mɔɔ bɛdɩkɛ yɩ nɩ munwatĩĩ bɔ nwʋ banɩ na ɩda ɔlɔlɛ kanyɩɩ ali ikile bɛ. (Ndw. 33:​18, 22) Sɛ ɛfa wʋ adwɩnɩ esiye nninyeniba mɔɔ izizi wɔ wʋ ɛbɩlawɔlɛ nu nɩ zʋ, ɛyɩ Gyehova ayɛlɛ, ɛma wu mmeliyema dedimaa hyɛ wʋ ɛzɩzɩbɛ, na ɔkɔ zʋ hyɛ wʋ anyɩnlɩlazʋ kɩnlɩma yɩ nu ɛzɩzɩbɛ a, sa ɔkɔ zʋ fa abʋtalɩ ɛdɩkɛ Gyehova.